Fondacioni ALSAR ka zhvilluar në këto ditë shtatori një veprimtari humanitare të kushtuar jetimëve.

Pranë ambienteve të tij janë shpërndarë pako me ushqime, të dhëna për 50 fëmijë jetimë.

Kjo ndihmë me artikujt bazë ushqimorë është mundësuar nga EMİN, organizata e ndihmave humanitare me qendër në Gjermani.

EMİN jep një ndihmë ushqimore periodike për jetimët; shpërndarja u krye në kuadër të saj.

Bashkëpunimet frytdhënëse të Fondacionit ALSAR me organizata dhe ente partnere sigurojnë mbështetje të vazhdueshme për jetimët në aspektin humanitar.

Një veprimtari humanitare është zhvilluar në mjediset e Fondacionit ALSAR në kuadër të kujdesit të vazhdueshëm për fëmijët jetimë.

Në sallën e konferencave të fondacionit u krye shpërndarja e zarfave me këstin e tremujorit të dytë të ndihmës financiare periodike.

Atë e përfituan 281 jetimë falë mbështetjes së dhënë nga organizata humanitare IHH me qendër në Holandë.

Ndihma financiare periodike e dhënë këtyre jetimëve i përkiste tremujorit nga 1 prilli në 30 qershor të vitit aktual.

Aktiviteti humanitar i ALSAR-it nuk resht as në ditët e nxehta të verës; bashkëpunimi me organizata partnere e bën atë më të suksesshëm.

Kurban Bajrami ka sjellë si përherë buzëqeshje e gëzim te fëmijët, të mësuar me marrjen e dhuratave.

Jetimët, në veçanti, kanë ndjerë përkujdesin e Fondacionit ALSAR, të shtuar në momente kur ajo merr simbolikë më të fuqishme.

Si në çdo Kurban Bajram, për jetimë janë dhuruar veshmbathje të reja, përzgjedhur në qendrat tregtare të kryeqytetit.

Në një aktivitet të tillë dhurues, veshmbathje u janë dhuruar 120 jetimëve; përjetues të çasteve të lumtura në shoqëri bashkëmoshatarësh.

Dhurimin e veshmbathjeve e ka mundësuar mbështetja e organizatës së ndihmave humanitare ndërkombëtare IHH me qendër në Holandë. Një përfaqësues i saj ishte i pranishëm dhe aktiv në zgjedhjen dhe dhurimin e rrobave për fëmijët.

Fondacioni ALSAR ka zhvilluar një varg aktivitetesh humanitare në ditët e Kurban Bajramit. Kontributet e qenësishme të partnerëve ndërkombëtarë kanë mundësuar realizimin me sukses të projekteve.

Në atmosferën festive të Kurban Bajramit, dhe në kuadër të aktivitetit të tij humanitar, Fondacioni ALSAR ka realizuar projektin e dhurimit të bletëve dhe të koshereve për familje jetimësh.

Nëpërmjet këtij projekti, dhe të ngjashmëve, kërkohet të ndihmohet në mënyrë të prekshme dhe me ndikim afatgjatë ekonomia e familjeve të jetimëve.

Projekti i vjen në ndihmë të drejtpërdrejtë zhvillimit të mikrobiznesit familjar, prej nga mund të përmirësohen kushtet e jetesës dhe të sigurohen të ardhura të qëndrueshme.

Këtë projekt të parë në fushën e bletarisë e mbështeti organizata IHH me qendër në Holandë, e pranishme gjatë këtyre ditëve dhe me kontribute të tjera humanitare.

Për ndihmën me koshere dhe bletë u përzgjodhën dy familje përfituese, një në Belsh dhe një tjetër në rrethinat e Elbasanit.

Për familjet e jetimëve u dhuruan në tërësi 60 koshere, nga të cilat 30 me bletë dhe 30 të tjera pa bletë; këto të fundit për t’u mbushur në kohën e shumimit të bletëve.

Ndihma për jetimët dhe familjet e tyre mbetet përparësi e vazhdueshme për Fondacionin ALSAR. Mbështetja në forma e mënyra të reja tregon seriozitetin e vëmendjes ndaj tyre.

Fondacioni ALSAR ka realizuar me sukses një varg projektesh të shpërndarjes së mishit të kurbanit gjatë këtyre ditëve festive.

Nga bashkëpunimi dhe bashkëveprimi i ALSAR-it me ente të huaja partnere e kanë përfituar ndihmën mijëra familje për Kurban Bajram.

Veç kësaj, kanë kontribuar në këtë aspekt dhe donatorë vendas e të huaj. Kontributi i tyre dhurues ka mundësuar prerjen e 95 kokë bagëtive.

Kontribut modest, por domethënës, ka dhënë dhe organizata bamirëse, “Send a Little Hope”, me qendër në Mbretërinë e Bashkuar, ofruese e bërjes së dy kurbanëve.

Mishi i kurbanëve të prerë nga kontributet humanitare të lartpërmendura është shpërndarë për 388 familje në vendbanime të ndryshme, ku mund të veçojmë fshatin Gërmenj në Rrogozhinë dhe fshatin Mënik në Tiranë.

Prerja e kurbanëve dhe shpërndarja e mishit të tyre në Kurban Bajram ka një historik të konsoliduar në Fondacionit ALSAR, si pjesë e aktivitetit të tij humanitar.

Përmbushja e objektivit për ta përcjellë ngado frymën festive të Kurban Bajramit dhe për t’u ardhur në ndihmë nevojtarëve i ka gjetur në veprim punonjësit e ALSAR-it në fundjavë.

Shpërndarje e mishit të kurbanit është bërë në kryeqytet, ashtu si më herët në qytete e lokalitete të ndryshme të vendit.

Për ndarjen në Tiranë të mishit të kurbanit për 84 familje, kontributi i përket shoqatës ADEMDER, me qendër në Turqi.

Me mbështetjen e kësaj shoqate u therën 21 kokë bagëti si kurban, destinuar për aktivitetin humanitar të këtyre ditëve të festës.

Fondacioni ALSAR bashkëpunon me një varg partnerësh për projektet humanitare në Kurban Bajram, duke u ardhur në ndihmë mijëra familjeve dhe duke ua bërë dhe atyre të mundur të gëzojnë.