Fondacionin ALSAR e ka vizituar rektori i Universitetit Alparslan të Mushit në Turqi (Muş Alparslan Üniversitesi), prof. dr. Mustafa Alican, së bashku me një grup akademikësh të universitetit.

Ai është pritur nga kryetari i Fondacionit ALSAR, z. Mehdi Gurra, me të cilin ka patur një bisedë miqësore.

Veç fjalëve mbi njohjen reciproke të dy institucioneve, është diskutuar për sistemin arsimor në Turqi dhe për mundësinë e dërgimit të studentëve nga vendi ynë në Universitetin Alparslan të Mushit.

Degë si historia, arkeologjia dhe veterinaria janë sugjeruar si më të specializuarat për t’u ndjekur nga studentët shqiptarë që mund të shkojnë në këtë universitet në Turqi. Për studentët e mbërritur në të për studime nëpërmjet Fondacionit ALSAR, të tëra shpenzimet do të mbulohen nga Universiteti Alparslan i Mushit.

Me vizionin për të qenë lokomotivë e zhvillimit rajonal, Universiteti Alparslan i Mushit ka 15.000 studentë dhe siguron mundësi për arsimim dhe kërkim shkencor cilësor. Universiteti njeh rritje të nivelit akademik, të reflektuar në renditjet vlerësuese, dhe ka ambicie të fortë për t’u bërë sa më tërheqës për brezin e ri të kushtuar seriozisht fitimit të dijes.

Rektori turk i propozoi z. Gurra një marrëveshje bashkëpunimi, e për këtë drejtues të Fondacionit ALSAR do të bëjnë në qershor një vizitë në Mush dhe do ta nënshkruajnë marrëveshjen e bashkëpunimit me Universitetin Alparslan.

Akademikët shprehën mirënjohjen për pritjen e ngrohtë të ofruar në Fondacionin ALSAR.

Në kuadër të aktivitetit humanitar dhe të kujdesit të vazhdueshëm të Fondacionit ALSAR për jetimët, është bërë shpërndarja e një sasie mishi “Adak”.

Paketimet me mish “Adak” të shpërndara nga punonjësit e ALSAR-it i kanë përfituar 50 familje jetimësh.

Veprimtaria e zhvilluar këtë të mërkurë, më 21 maj, u mundësua falë mbështetjes së hafizit të nderuar nga Turqia, Mustafa Demirkan.

Jetimët përfitojnë periodikisht nga donacione të ngjashme individësh apo institucionesh, shpërndarë përmes bashkëpunimit efektiv me Fondacionin ALSAR.

Mbështetja për jetimët dhe familjet e tyre është një angazhim i kurdohershëm i ALSAR-it, realizuar në shumë drejtime dhe në frymën e solidaritetit të fortë human.

Në kuadër të mbështetjes së vazhdueshme për jetimët dhe familjet e tyre, të veprimtarive humanitare të Fondacionit ALSAR, e të bashkëpunimit të konsoliduar me Agjencinë Turke për Bashkëpunim dhe Koordinim (TİKA), është bërë në këtë fillim të javës dhurimi i një sasie mjaft të konsiderueshme fidanësh ulliri dhe plehrash kimike për familje të jetimëve.

Në aktivitetin humanitar të zhvilluar në Librazhd merrte pjesë ambasadori i Republikës së Turqisë në Tiranë, z. Tayyar Kağan Atay, koordinatori i TİKA-s në Tiranë, z. Mustafa Ata, dhe kryetari i Fondacionit ALSAR, z. Mehdi Gurra.

Ambasadori turk e cilësoi ndihmën për familjet e jetimëve një dhuratë të popullit turk për popullin vëlla shqiptar, duke uruar gjithashtu që kjo ndihmë ta lehtësojë jetesën e këtyre familjeve.

Kryetari i Fondacionit ALSAR, pasi solli në kujtesën e të pranishmëve zhvillimin dhe më herët të projekteve të tilla humanitare, përcolli shpresën për shtimin e tyre në vitet që vijnë.

Familjet e ndihmuara i përkisnin qarkut të Elbasanit, përkatësisht qyteteve Elbasan, Librazhd, Peqin, Cërrik, Belsh dhe Gramsh, si dhe një numër i vogël atij të Beratit.

Ndihma e shpërndarë për 50 familje jetimësh përmbante 35 fidanë ullinjsh dhe dy thasë, apo 50 kg, plehra kimike, për çdonjërën prej tyre. Në një numër të përgjithshëm, u dhuruan 1750 fidanë ulliri.

Synimi i dhënies së kësaj ndihme ishte një kontribut me efekte afatgjata në jetën e këtyre familjeve, ku të ardhurat mund të sigurohen përmes bujqësisë dhe frutikulturës.

Fondacioni ALSAR dhe TİKA organizojnë dhe realizojnë bashkërisht në mënyrë periodike aktivitete të ngjashme humanitare në ndihmë të shtresave në nevojë të shoqërisë sonë.

Fondacioni ALSAR ka zhvilluar një aktivitet humanitar në mjediset e tij në ditën e parë të majit.

Në kuadër të mbështetjes së vazhdueshme për jetimët është dhënë ndihma periodike financiare.

Ndihmën e kanë përfituar 278 jetimë, të shoqëruar nga familjarë në marrjen e zarfeve.

Zhvillimin e aktivitetit e mundësoi IHH me qendër në Holandë, organizata humanitare me të cilën ALSAR ka një bashkëpunim të qëndrueshëm.

Një varg veprimtarish gjatë kësaj periudhe kanë patur në qendër të tyre posaçërisht jetimët, përfitues të ndihmave të ndryshme humanitare.

Pranë ambienteve të Fondacionit ALSAR është zhvilluar një aktivitet humanitar në ndihmë të fëmijëve jetimë të kryeqytetit.

Për 80 jetimë të Tiranës është dhuruar mish “Adak”, marrë prej tyre nën shoqërimin e familjarëve.

Ndihma përbënte një kontribut material, ndërsa dëshmonte në mënyrë të përsëritur kujdesin e pandërprerë të Fondacionit ALSAR për ta.

Shpërndarjen e kësaj sasie mishi “Adak” e mundësoi një dhurues nga Turqia, Hafiz Mustafa Demirkan.

ALSAR bashkëpunon dhe ndërvepron me ente dhe individë në zhvillimin e aktivitetit të tij humanitar, me vëmendje të veçantë të kushtuar jetimëve.

Me përparësi në aktivitetin humanitar të Fondacionit ALSAR, jetimët dhe familjet e tyre ndihmohen vijueshmërisht në forma e mënyra të ndryshme.

Përmes ndihmës u gjendemi pranë, lehtësohet përditshmëria e tyre dhe përcillet mesazhi i solidaritetit human.

Midis veprimtarive të kësaj jave është dhe ajo për shpërndarjen për familje jetimësh të një sasie mishi “Adak”.

Në mjediset e jashtme të Fondacionit ALSAR është shpërndarë mish “Adak” për 35 familje jetimësh.

Kontribues dhe mundësues i aktivitetit ishte individi bamirës Şükrü Alibaba.