Pas një procesi përzgjedhës, të bazuar në vlerësimet e komisionit prej tre anëtarësh e të kryesuar nga prof. dr. Seit Mansaku, Fondacioni ALSAR bën të njohur listën me emrat e studentëve që kanë fituar të drejtën e marrjes së bursës së ekselencës për vitin akademik 2021-2022.

Përzgjedhja u mbështet në kriteret e përcaktuara të vlerësimit të dokumentacionit përkatës dhe në intervistat e studentëve.

I konsideruar një projekt parësor dhe strategjik në fushën e aktivitetit arsimor të Fondacionit ALSAR, “Programi i akordimit të bursave të ekselencës” është në vitin e tetë të tij. ALSAR-i u vjen në ndihmë me të studentëve të spikatur, të shkëlqyer, duke u krijuar mundësinë e thellimit në studime dhe të përgatitjes së plotë profesionale.

Qindra studentë kanë përfituar në vite nga programi i bursave të ekselencës, pjesë e ndihmës së shumanshme që ALSAR u jep të rinjve dhe të rejave të përkushtuar në rrugën e dijes.

Dhënia e bursave për studentët e shkëlqyer është tashmë një veprimtari e konsoliduar e Fondacionit ALSAR. Me konturet e një tradite, programi merr më shumë vëmendje dhe tërheq më tepër aplikues vit pas viti.

Përfituesit e bursave për vitin akademik 2021-2022 janë ndjekës të studimeve në nivelet bachelor dhe master. Në vite të ndryshme studimi, studentët përfitues ndjekin një larmi degësh, nga infermieria e përgjithshme te inxhinieria agroushqimore. Qytetet dhe rrethet nga vijnë, ku kanë vendlindjen apo vendbanimin, janë po kaq të larmishme: prej Podgoricës, Preshevës, Krumës, Kukësit, Dibrës, Matit, Krujës, Tiranës, Fierit, Lushnjës, Poliçanit, Ballshit, Kuçovës, Delvinës, etj.