Me rastin e dhënies së programit fetaro-kulturor për Profetin Muhamed, a.s., në Ulqin dhe Tuz, kryetari i Fondacionit ALSAR bëri dhe një vizitë në Ambasadën e Republikës së Turqisë në kryeqytetin e Malit të Zi.

Mehdi Gurra u prit nga ambasadorja e Republikës së Turqisë, znj. Songül Ozan, me të cilën pati një bisedë të ngrohtë.

Ai shoqërohej në vizitë nga anëtarë të Bashkësisë Islame të Malit të Zi, si dhe nga prof. dr. Hamdi Arslan e dr. Hakan Kutlu.

Gjatë vizitës u fol për zhvillimet në rajon, për rolin dhe ndikimin e Turqisë në Ballkan. Z. Gurra e njohu ambasadoren me aktivitetin humanitar, arsimor dhe kulturor të Fondacionit ALSAR, me rëndësinë e dhënë marrëdhënieve miqësore shqiptaro-turke, dhe me angazhimin e fondacionit për të ndihmuar në forcimin e tyre.

Vizitën e karakterizoi fryma miqësore, ndërsa ajo u pasqyrua dhe në faqen e Ambasadës së Turqisë në Podgoricë në rrjetet sociale.

Në Pallatin e Kulturës të Cërrikut do të ketë më 31 tetor një program fetaro-kulturor kushtuar të Dërguarit të Zotit, Profetit Muhamed, a.s., në muajin e tij.

Programin e organizojnë Fondacioni ALSAR dhe Bashkia e Cërrikut, me një ftesë të hapur për çdokënd.

I quajtur, “Mirë se erdhe Mëshira e mbarë Botës”, programi do të nisë të dielën në orën 15:00.

Fjalën përshëndetëse do ta mbajë kryetari i Bashkisë së Cërrikut, z. Andis Salla. Imami i Xhamisë së Cërrikut, z. Eduard Sula, do të mbajë fjalën e rastit.

Prof. Hamdi Arslan, nga Universiteti “Fatih Sulltan Mehmed” i Stambollit, dhe Sadush Tahiri, imam dhe ligjërues nga Shkupi, kryeqyteti i Maqedonisë së Veriut, do të mbajnë ligjërata. Leximin e Kur’anit do ta bëjë dr. Hakan Kutlu, po ashtu nga Universiteti “Fatih Sulltan Mehmed” i Stambollit.