Kryetari i Fondacionit ALSAR ka vizituar në Ankara dhe selinë e Konfederatës HAK-İŞ, entit të njohur sindikal në Turqi.  

Ai është pritur nga kryetari i konfederatës, z. Mahmut Arslan, i cili i ka uruar mirëseardhjen.  

Bashkëbisedimi gjatë vizitës ka krijuar mundësinë për t’u njohur me aktivitetet e dy institucioneve gjatë kësaj periudhe dhe për të shkëmbyer ide për forcimin e bashkëpunimit kur është folur në terma konkretë të interesit reciprok. 

Z. Mahmut Arslan falënderoi z. Mehdi Gurra për bashkëpunimin institucional dhe garantoi për vazhdimin e mbështetjes për më tutje, përgjatë kësaj kohe të mbetur të këtij viti dhe për vitin në vijim, në të tre fushat e aktivitetit të Fondacionit ALSAR, humanitar, arsimor dhe kulturor, specifikisht dhe në realizimin e botimeve me tematikë historike dhe fetare.

Nga ana e tij, z. Mehdi Gurra e ka falënderuar së pari kryetarin e konfederatës sindikale për mikpritjen. Ai ka vlerësuar mbështetjen e deritanishme dhe zhvillimin e projekteve ku kjo mbështetje është fokusuar.  

Bisedën e mbizotëroi vullneti i përbashkët për vazhdimësinë e bashkëpunimit. 

Z. Mehdi Gurra ka zhvilluar në javën e sapombyllur një varg takimesh në Ankara me drejtues të institucioneve turke me të cilat Fondacioni ALSAR ka një bashkëpunim e partneritet të suksesshëm.      

Në vargun e takimeve që po zhvillon në Turqi, posaçërisht në Ankara, në kuadër të një vizite pune, kryetari i Fondacionit ALSAR është pritur dhe nga drejtuesi i sindikatës turke të Shëndetësisë. 

Z. Devlet Sert, një mik, bashkëpunëtor e mbështetës prej një kohe të gjatë i Fondacionit ALSAR, e priti z. Mehdi Gurra në selinë e sindikatës dhe pati me të një bisedë të ngrohtë.

Ai i shprehu vlerësimet mikut nga Tirana për aktivitetet e kryera nga Fondacioni ALSAR gjatë vitit 2024 dhe u njoh në të njëjtën kohë me veprimtaritë e këtij viti.  

Drejtuesi sindikalist siguroi mbështetjen nga Öz Sağlık-İş për Fondacionin ALSAR për dy muajt e fundit të këtij viti dhe për të gjithë vitin e ardhshëm e në vazhdim. 

Z. Sert sugjeroi në bisedë se Fondacioni ALSAR duhet të planifikojë dhe të zhvillojë projekte që do t’i mundësonin të ardhura të rrjedhshme dhe, në këtë mënyrë, një bazë më të qëndrueshme të veprimtarisë.

Falënderime u shprehën nga z. Mehdi Gurra për mbështetjen e dhënë nga sindikata turke e Shëndetësisë gjatë këtij viti dhe më herët.  

Një mik i vyer i ALSAR-it, z. Devlet Sert, i çmon dhe u jep mbështetje projekteve të fondacionit në fushat e veprimtarisë së tij, mes tyre projekteve të kurseve verore, të kurseve të gjuhës turke, dhe humanitare. Öz Sağlık-İş është një prej enteve turke me të cilat Fondacioni ALSAR ka një bashkëpunim serioz dhe frytdhënës.   

Në takim ishte i pranishëm dhe prof. dr. Yılmaz Yeşil, një njohës mjaft i mirë i aktivitetit të Fondacionit ALSAR, dhe që po përgatit një vepër të kushtuar këtij aktiviteti në njëzet vite. 

Kryetari i Fondacionit ALSAR ka zhvilluar një vizitë në selinë e TİKA-s, Agjencisë Turke për Bashkëpunim dhe Koordinim. 

Z. Mehdi Gurra është pritur në vizitën në Ankara nga kryetari i TİKA-s, z. Abdullah Eren, në një takim ku ka mbizotëruar fryma miqësore.

Kryetari i TİKA-s është uruar për detyrën e re nga z. Gurra, që i ka shprehur dhe gëzimin e veçantë për postin mikut të vjetër të Fondacionit ALSAR.  

Projektet e vitit në mbarim dhe projektet e vitit të ardhshëm u trajtuan në bisedën e ngrohtë. U fol në veçanti për aktivitetin botues të ALSAR-it, për botimet që përmbajnë dokumente historike dhe të periudhës osmane.  

Ndërsa ka falënderuar kryetarin e Fondacionit ALSAR për vizitën, mikpritësi ka sjellë në vëmendje bashkëpunimin e deritanishëm dhe ka pohuar se ky bashkëpunim mes dy institucioneve, njëri shtetëror dhe tjetri joqeveritar, do të vijojë dhe në vitet e ardhshme.  

Z. Gurra dhe z. Eren ndanë mendimin e njëjtë se ndërveprimi institucional i shërben forcimit të mëtejshëm të lidhjeve vëllazërore të dy popujve.

Bisedën e përshkoi mirëkuptimi i plotë dhe vizioni i qartë për thellimin e bashkëpunimit.  

TİKA dhe Fondacioni ALSAR realizojnë prej vitesh projekte të përbashkëta, të dobishme dhe me ndikim mjaft pozitiv në fushat dhe shtresat e synuara.      

Kryetari i Fondacionit ALSAR ka vizituar gjatë qëndrimit në Ankara titullarin e YTB-së, Departamentit për Turqit që Jetojnë Jashtë Vendit dhe Marrëdhëniet me Komunitetet Mike. 

Z. Mehdi Gurra i është rezervuar një pritje të ngrohtë nga kryetari i YTB-së, z. Abdulhadi Turus, e shoqëruar nga një bisedë e hapur, miqësore, në kuadër të bashkëpunimit.

Duke e çmuar njohjen e hershme dhe miqësinë e gjatë të tij dhe të institucionit që drejton me kryetarin e YTB-së, z. Gurra i përcolli atij urimet dhe kënaqësinë e veçantë për këtë detyrë të re dhe të rëndësishme.  

Në takim u fol për bashkëpunimin ndërmjet Fondacionit ALSAR dhe YTB-së, për arritjet dhe nevojën e mënyrat e konsolidimit të tij.  

U diskutua gjithashtu për botimet e ALSAR-it dhe për përdorimin e disa titujve prej tyre nga ndjekësit e shkollave verore të organizuara nga YTB-ja në Ballkan.   

Z. Abdulhadi Turus shprehu konsideratën për aktivitetin e Fondacionit ALSAR, më në verçanti për ndihmën e dhënë studentëve, për organizimin dhe zhvillimin e suksesshëm të kurseve të gjuhës turke, si dhe për përkthimin e botimin e literaturës akademike.

Kryetari i YTB-së dhe kryetari i Fondacionit ALSAR e theksuan vazhdimin e bashkëpunimit dhe në vitin e ardhshëm, me projekte të përbashkëta në Shqipëri.  

Mikpritja, atmosfera dhe biseda e ngrohtë rishprehën nivelin mjaft të mirë të marrëdhënieve midis dy institucioneve dhe drejtuesve të tyre përkatës.

Një grup të rinjsh të organizatës bamirëse HAYRAT, me qendër në Turqi, kanë ndërmarrë gjatë këtyre ditëve një udhëtim nëpër Ballkan, e janë ndalur dhe në vendin tonë.

Interesi i këtyre të rinjve në këtë ekskursion është njohja me vendet e Ballkanit, me trashëgiminë e tyre historike dhe kulturore, me traditat dhe pasurinë besimore.

Në udhëtimin në Shqipëri, vizitorët në moshë të re ishin në disa qytete dhe mundën të shohin nga afër elemente të trashëgimisë kulturore dhe islame, vepra të arkitekturës osmane, etj.

Fondacioni ALSAR i mirëpriti të rinjtë në vizitën në kryeqytet, u mundësoi strehimin në konviktin e tij, e gjithashtu ushqimin.

Takimi me kryetarin e Fondacionit ALSAR u shërbeu atyre për të mësuar mbi aktivitetin e gjerë treplanësh, humanitar, arsimor dhe kulturor, të entit mikpritës, mbi vizionin dhe misionin.

Z. Mehdi Gurra u foli për rolin e Fondacionit ALSAR në forcimin e urave të miqësisë midis dy vendeve, Turqisë dhe Shqipërisë, për bashkëpunimin me institucione dhe organizata partnere turke, për përpjekjet në ruajtjen e lidhjeve historike të shqiptarëve dhe turqve, si dy popuj me një të shkuar shekullore të përbashkët.

Mundësia e shtimit të bashkëpunimit dhe të ndërveprimit të të rinjve turq dhe shqiptarë u nënvizua në fjalën e z. Gurra për mysafirët në moshë të re.

Takimi me kryetarin e Fondacionit ALSAR u vlejti ekskursionistëve për të kuptuar kontributin shoqëror të një prej institucioneve të dalluara jofitimprurëse në Tiranë.

Paraqitja e vlerave dhe trashëgimisë sonë kombëtare është pjesë e pandashme e aktivitetit kulturor të Fondacionit ALSAR, dhe pritja e të rinjve turq, njohja me këtë trashëgimi, ishte në këtë kuadër.

Në kuadër të veprimtarive përkujtimore në përvjetorin e nëntë të tentativës së dështuar për grusht shteti në Turqi, në kryeqytet është mbajtur paneli i titulluar, “Emri i fitores: Turqi”.

Paneli është organizuar nën kujdesin e Ambasadës së Republikës së Turqisë në Tiranë dhe të Drejtorisë së Komunikimeve të Presidencës së Turqisë.

Mes pjesëmarrësve në panel është dalluar prania e kryetarit dhe e drejtorit administrativ të Fondacionit ALSAR, të pranishëm një ditë më herët dhe në aktivitetin përkujtues në memorialin me emrat e dëshmorëve të 15 korrikut, ku z. Mehdi Gurra mbajti një fjalë në emër të shoqërisë civile.

Një mesazh nga drejtuesi i Drejtorisë së Komunikimeve të Presidencës së Turqisë, z. Burhanettin Duran, dhe një material filmik kushtuar 15 korrikut të 2016-s u janë paraqitur ndjekësve të punimeve të panelit.

Atë e ka përshëndetur zëvendësambasadorja e Republikës së Turqisë në vendin tonë, znj. Naime Öztürk Meral, theksuese e rëndësisë së aktivitetit për ndërgjegjësimin e opinionit publik mbi rrezikshmërinë e FETÖ-s, organizatës përgjegjëse për tentativën e dështuar për grusht shteti nëntë vite më parë.

Panelin e moderoi prof. Yusuf Özkır, shef i departamentit të gazetarisë në Universitetin Medipol në Turqi, dhënës i fjalës për pjesëmarrësit e tjerë në panel.

Panelistët ligjëruan mbi 15 korrikun, mbi ngjarjen dhe rrjedhojat e saj për Turqinë e më gjerë. FETÖ-ja si një strukturë kriminale, ende një kërcënim dhe për vende si Shqipëria, ku e ka praninë të prekshme, mori vëmendjen e duhur dhe kohën e folësve, trajtuar në mënyrë të argumentuar dhe bindëse.

Një pikë kthese për Turqinë ishte cilësimi me të cilën e përmblodhi 15 korrikun diskutuesi turk, asist. prof. Recep Şehitoğlu, nga Universiteti i Gaziantepit.

Mes folësve, prof. Ardian Muhaj kërkoi çlirimin e Shqipërisë nga ndikimi i FETÖ-s, e njëkohësisht i mëshoi përcaktimit se Turqia dhe populli turk janë aleatët më të mirë të shqiptarëve.

Epokaliteti i një ngjarjeje të tillë aq dramatike, efektet në fatet e Turqisë moderne, roli kritik dhe jetik i vullnetit popullor në dështimin e grushtit të shtetit, u diskutuan gjerësisht dhe hollësisht.

Ndërgjegjësimi, vigjilenca dhe angazhimi për të mos lejuar më një përpjekje të ngjashme kërcënuese për rendin kushtetues në Turqi, prerja e çdo mundësie për aktivitet të organizatës gyleniste brenda dhe jashtë Turqisë, e në këtë kontekst, në Shqipëri, përbënë pjesë të temave të trajtuara nga folësit në panel.

Një ekspozitë fotografike u dha të pranishmëve në panel mundësinë për të riparë momente të veçanta dhe domethënëse të 15 korrikut dhe të ditëve pasuese.