Category Page: Humanitare

    Jetimët u gëzohen veshmbathjeve të reja në Kurban Bajram

    Kurban Bajrami ka sjellë si përherë buzëqeshje e gëzim te fëmijët, të mësuar me marrjen e dhuratave.

    Jetimët, në veçanti, kanë ndjerë përkujdesin e Fondacionit ALSAR, të shtuar në momente kur ajo merr simbolikë më të fuqishme.

    Si në çdo Kurban Bajram, për jetimë janë dhuruar veshmbathje të reja, përzgjedhur në qendrat tregtare të kryeqytetit.

    Në një aktivitet të tillë dhurues, veshmbathje u janë dhuruar 120 jetimëve; përjetues të çasteve të lumtura në shoqëri bashkëmoshatarësh.

    Dhurimin e veshmbathjeve e ka mundësuar mbështetja e organizatës së ndihmave humanitare ndërkombëtare IHH me qendër në Holandë. Një përfaqësues i saj ishte i pranishëm dhe aktiv në zgjedhjen dhe dhurimin e rrobave për fëmijët.

    Fondacioni ALSAR ka zhvilluar një varg aktivitetesh humanitare në ditët e Kurban Bajramit. Kontributet e qenësishme të partnerëve ndërkombëtarë kanë mundësuar realizimin me sukses të projekteve.

    Projektet e mbështetjes për familjet e jetimëve, dhurohen koshere dhe bletë si ndihmë për ekonominë familjare

    Në atmosferën festive të Kurban Bajramit, dhe në kuadër të aktivitetit të tij humanitar, Fondacioni ALSAR ka realizuar projektin e dhurimit të bletëve dhe të koshereve për familje jetimësh.

    Nëpërmjet këtij projekti, dhe të ngjashmëve, kërkohet të ndihmohet në mënyrë të prekshme dhe me ndikim afatgjatë ekonomia e familjeve të jetimëve.

    Projekti i vjen në ndihmë të drejtpërdrejtë zhvillimit të mikrobiznesit familjar, prej nga mund të përmirësohen kushtet e jetesës dhe të sigurohen të ardhura të qëndrueshme.

    Këtë projekt të parë në fushën e bletarisë e mbështeti organizata IHH me qendër në Holandë, e pranishme gjatë këtyre ditëve dhe me kontribute të tjera humanitare.

    Për ndihmën me koshere dhe bletë u përzgjodhën dy familje përfituese, një në Belsh dhe një tjetër në rrethinat e Elbasanit.

    Për familjet e jetimëve u dhuruan në tërësi 60 koshere, nga të cilat 30 me bletë dhe 30 të tjera pa bletë; këto të fundit për t’u mbushur në kohën e shumimit të bletëve.

    Ndihma për jetimët dhe familjet e tyre mbetet përparësi e vazhdueshme për Fondacionin ALSAR. Mbështetja në forma e mënyra të reja tregon seriozitetin e vëmendjes ndaj tyre.

    Shpërndarja e mishit të kurbanit, përfituese qindra familje të tjera nga kontributet humanitare

    Fondacioni ALSAR ka realizuar me sukses një varg projektesh të shpërndarjes së mishit të kurbanit gjatë këtyre ditëve festive.

    Nga bashkëpunimi dhe bashkëveprimi i ALSAR-it me ente të huaja partnere e kanë përfituar ndihmën mijëra familje për Kurban Bajram.

    Veç kësaj, kanë kontribuar në këtë aspekt dhe donatorë vendas e të huaj. Kontributi i tyre dhurues ka mundësuar prerjen e 95 kokë bagëtive.

    Kontribut modest, por domethënës, ka dhënë dhe organizata bamirëse, “Send a Little Hope”, me qendër në Mbretërinë e Bashkuar, ofruese e bërjes së dy kurbanëve.

    Mishi i kurbanëve të prerë nga kontributet humanitare të lartpërmendura është shpërndarë për 388 familje në vendbanime të ndryshme, ku mund të veçojmë fshatin Gërmenj në Rrogozhinë dhe fshatin Mënik në Tiranë.

    Prerja e kurbanëve dhe shpërndarja e mishit të tyre në Kurban Bajram ka një historik të konsoliduar në Fondacionit ALSAR, si pjesë e aktivitetit të tij humanitar.

    Familje në kryeqytet marrin mish kurbani

    Përmbushja e objektivit për ta përcjellë ngado frymën festive të Kurban Bajramit dhe për t’u ardhur në ndihmë nevojtarëve i ka gjetur në veprim punonjësit e ALSAR-it në fundjavë.

    Shpërndarje e mishit të kurbanit është bërë në kryeqytet, ashtu si më herët në qytete e lokalitete të ndryshme të vendit.

    Për ndarjen në Tiranë të mishit të kurbanit për 84 familje, kontributi i përket shoqatës ADEMDER, me qendër në Turqi.

    Me mbështetjen e kësaj shoqate u therën 21 kokë bagëti si kurban, destinuar për aktivitetin humanitar të këtyre ditëve të festës.

    Fondacioni ALSAR bashkëpunon me një varg partnerësh për projektet humanitare në Kurban Bajram, duke u ardhur në ndihmë mijëra familjeve dhe duke ua bërë dhe atyre të mundur të gëzojnë.

    Ndahet mish kurbani në Tiranë, e në njësitë administrative të Petrelës, Krrabës dhe Bërzhitës

    Në kuadër të aktivitetit humanitar të Fondacionit ALSAR përgjatë Kurban Bajramit, shpërndarje e mishit të bagëtive të flijuara është bërë në Tiranë dhe në njësi administrative të saj, dedikuar për familje dhe anëtarë të disa shoqatave dhe të një komuniteti.

    Falë kontributit të organizatës së ndihmave humanitare ndërkombëtare IHH me qendër në Holandë, janë prerë 368 kurbanë dhe kanë marrë prej mishit të tyre 1472 familje dhe individë.

    Shpërndarje është kryer nga punonjësit e ALSAR-it dhe nga përfaqësues të IHHNL-së për familje në tre njësi administrative të Tiranës, në Petrelë, Krrabë dhe Bërzhitë.

    Përfitues të tjerë nga ky mish kurbani kanë qenë jetimë të kryeqytetit. Për anëtarë nga Shoqata e të Verbërve të Shqipërisë, nga Shoqata për Integrim e Pensionistëve të Shqipërisë, dhe nga shoqata “Shpresa për jetën” është ndarë po ashtu një sasi e këtij kontributi humanitar.

    Pako me mish kurbani u rezervuan dhe për romët, një komunitet në nevojë që përfiton në vazhdimësi nga ndihma humanitare e ALSAR-it.

    Projekti i realizuar në bashkëveprim me IHHNL-në është një prej disa të tillëve të vënë në zbatim gjatë ditëve të festës në partneritet me organizata ndërkombëtare ndihme.

    Pranë njerëzve në ditë feste, shpërndahet mish kurbani në Cërrik

    Fondacioni ALSAR, në aktivitet humanitar si në çdo Kurban Bajram, ka nisur të shpërndajë në qytete dhe lokalitete mishin e prerë në ditët e gëzuara të festës.

    Projektet e shpërndarjes janë mundësuar në sajë të kontributeve të partnerëve të huaj dhe të donatorëve të ndryshëm.

    Në ndalesën në Cërrik është shpërndarë një sasi e konsiderueshme mishi kurbani për familje në nevojë dhe jetimësh.

    Me mbështetjen nga WEFA, organizata e ndihmave humanitare me qendër në Gjermani, janë prerë 100 kurbanë dhe është shpërndarë mish për 400 familje.

    Përfaqësues të saj e kanë ndjekur nga afër dhe në mënyrë aktive procesin, nga therja te shpërndarja.

    Bashkëpunimi me autoritetet lokale e ka bërë më të lehtë zhvillimin e veprimtarisë shpërndarëse dhe realizimin me sukses të projektit.