Category Page: Humanitare

    Dhurohen kompjutera për jetimë

    Fondacioni ALSAR zhvilloi në pjesën e dytë të javës së kaluar një varg aktivitetesh humanitare të përqendruara te jetimët dhe mbështetja e gjerë për ta.

    Krahas dhurimit të veshjeve, vizitave në shtëpi të shoqëruara dhe me dhënie dhuratash, apo mbledhjes së jetimëve në një qendër zbavitjeje dhe shtrimit të një dreke, është realizuar dhe dhënia e një numri kompjuterash.

    Në sallën e konferencave të Fondacionit ALSAR janë dhuruar laptopë për katër jetimë.

    Kontributi nga WEFA, organizata e ndihmave ndërkombëtare me qendër në Gjermani, e ka mundësuar dhe këtë veprimtari.

    Përfaqësuesi i saj, i ardhur enkas në vendin tonë, u ka dorëzuar përfituesve dhuratën.

    Fondacioni ALSAR dhe WEFA kanë një bashkëpunim produktiv, të konkretizuar përgjithësisht me aktivitete humanitare për shtresa në nevojë të shoqërisë sonë. Jetimët zënë një vend të posaçëm në fokusin e këtyre aktiviteteve humanitare.

    Jetimëve u dhurohen veshmbathje, aktivitet në ditë të solidaritetit human

    Në kuadër të një vargu aktivitetesh humanitare për fëmijët jetimë përgjatë ditëve të fundit të javës, të shtunën është realizuar dhurimi i veshmbathjeve të reja.

    Jetimë nën kujdesin e Fondacionit ALSAR kanë patur mundësinë t’i përzgjedhin vetë veshjet në një qendër tregtare në kryeqytet.

    Aktiviteti i zhvilluar në ditë të solidaritetit human u është dedikuar 50 fëmijëve jetimë, përfitues të veshmbathjeve të dhuruara.

    Ashtu si veprimtaritë e tjera të kësaj jave janari, dhe këtë e mundësoi kontributi i WEFA-s, organizatës së ndihmave ndërkombëtare me qendër në Gjermani.

    Përmes së njëjtit kontribues janë bërë gjithashtu vizita në shtëpi jetimësh, janë parë nga afër kushtet e jetesës dhe janë dhuruar pako me ushqime, libra, etj.

    Ditët e solidaritetit human në Fondacionin ALSAR nënkuptojnë aktivitete të shumta humanitare, realizime projektesh humanitare në bashkëpunim me partnerë të ndryshëm.

    Argëtim për fëmijët jetimë në këto ditë të para janari, lojëra dhe një drekë për ta

    Fondacioni ALSAR e ka nisur muajin e parë të 2026-s me aktivitete humanitare. Në kuadër të kujdesit për jetimët, të mbështetjes së tyre dhe të ndihmës në shumë aspekte të jetës, këtë fundjavë është organizuar një veprimtari zbavitëse.

    Orë argëtimi janë mundësuar për 80 jetimë, të mbledhur për të luajtur së bashku.

    Lojëra të shumta, të shumëllojshme, i kanë përfshirë jetimët në një atmosferë gëzimi e zbavitjeje, mbushur me të qeshura e aktivitet fizik.

    Mjedisi i posaçëm dhe me mundësi të shumta dëfrimi nuk i ka lënë për asnjë çast në qetësi fëmijët, vrapues nga një lojë në tjetrën.

    Veç argëtimit, ata janë njohur mes tyre, kanë krijuar shoqëri të reja dhe kanë ndarë bashkë momente të bukura dhe të paharrueshme.

    Ditën e ka zbukuruar më tej një drekë e përbashkët, e shtruar për 120 vetë, dhe të cilën e kanë shijuar dhe familjarë të jetimëve.

    Zhvillimin e aktivitetit argëtues e bëri të mundur kontributi nga WEFA, organizata e ndihmave ndërkombëtare me qendër në Gjermani.

    ALSAR organizon në periudha të ndryshme të vitit aktivitete të ngjashme për jetimët, në partneritet me bashkëpunëtorë ndërkombëtarë, duke e shtuar bilancin e tij humanitar në dy dekada me angazhim intensiv social.

    Realizohet projekti humanitar i dhurimit dhe mbjelljes së fidanëve në njësinë administrative Çërravë të Pogradecit dhe në fshatin Mënik të Tiranës

    Fondacioni ALSAR e ka nisur vitin e ri kalendarik me një aktivitet humanitar në ndihmë të komuniteteve lokale.

    Në njësinë administrative të Çërravës në Pogradec janë dhuruar për komunitetin dhe janë mbjellë 50 fidanë arre.

    Pjesëmarrës aktivë në veprimtarinë e zhvilluar këtë të hënë të parë të janarit të 2026-s kanë qenë kryetari i Fondacionit ALSAR, z. Mehdi Gurra, administratori i njësisë administrative, z. Olger Ibi, dhe punonjës të Fondacionit ALSAR.

    Mbjellja e këtyre fidanëve i shërben përmirësimit të cilësisë së jetës së banorëve të zonës, duke ndikuar për një mjedis më të gjebër dhe më tërheqës.

    Bashkëpunimi mes Fondacionit ALSAR, Bashkisë Pogradec dhe Njësisë Administrative Çërravë mundësoi zhvillimin si duhet të veprimtarisë.

    Në veprimtarinë tjetër të së njëjtës ditë, në fshatin Mënik, në periferitë e Tiranës, u dhuruan dhe u mbollën në kuadër të realizimit të të njëjtit projekt 36 fidanë limoni.

    Veprimtaritë u mbështetën dhe u zhvilluan falë kontributit të WEFA-s, organizatës së ndihmave me qendër në Gjermani.

    Aktivitet humanitar për fëmijë jetimë, jepet ndihmë financiare dhe materiale

    Fondacioni ALSAR ka zhvilluar në këtë nisje të muajit të fundit të vitit një aktivitet humanitar për fëmijë jetimë.

    Ndihma e dhënë për ta ishte financiare dhe materiale, e shpërndarë në mjediset e brendshme të fondacionit.

    Për 44 jetimë janë dhënë zarfe me ndihmë financiare, pako me ushqime, veshmbathje dhe çanta shkollore.

    Aktiviteti i përkiste dhënies së ndihmës periodike gjashtëmujore, mundësuar nga kontributi i organizatës humanitare UKIM (UK Islamic Mission), me qendër në Britaninë e Madhe.

    Një pjesë e mirë e aktivitetit humanitar të Fondacionit ALSAR u dedikohet jetimëve, dhe realizimi i shumë projekteve bëhet i mundur nga bashkëpunime afatgjata dhe serioze me ente partnere jashtë vendit.

    Mbështetja për familjet e jetimëve, shpërndahet mish “Adak”, bëhen vizita në shtëpi

    Aktiviteti i tretë humanitar në radhën e zhvillimit të projekteve në gjysmën e parë të nëntorit për jetimë dhe familje jetimësh ishte ai i shpërndarjes së mishit “Adak”.

    Familje jetimësh të Tiranës e morën pranë ambienteve të Fondacionit ALSAR ndihmën me mish “Adak”.

    Kontributin mbështetës nga HASENE, organizata e ndihmave humanitare me qendër në Gjermani, e përfituan 100 familje jetimësh.

    Veç dhurimit të kësaj ndihme, e të ndihmës me pako ushqimore më herët, përfaqësuesit e HASENE-së dhe punonjës të Fondacionit ALSAR bënë vizita në familje jetimësh në Tiranë dhe Elbasan.

    Ata panë nga afër kushtet e jetesës, u interesuan për përditshmërinë, për mungesat dhe nevojat e familjeve të vizituara.

    Aktivitetet u përkisnin ditëve të solidaritetit human, me fokus ekskluziv takimin me jetimët dhe zhvillimin e projekteve për ta.