Category Page: Humanitare

    Ditët e Kurban Bajramit i bashkëshoqëron shpërndarja e mishit të bagëtive të flijuara

    Festimet e Kurban Bajramit nuk mund të kuptohen në Fondacionin ALSAR pa një aktivitet të gjerë humanitar të përsëritur viti pas vit dhe me traditë të konsoliduar.

    Aksioni masiv i shpërndarjes së mishit të kurbanit ka vijuar në një varg ndalesash në qytete të ndryshme të vendit.

    Mbështetja nga HASENE, organizata e ndihmave humanitare me qendër në Gjermani, ka mundësuar therjen e 364 kurbanëve dhe shpërndarjen e mishit për 1456 familje.

    Përfaqësues të entit kontribues, një partner i ALSAR-it, kanë qenë të pranishëm në aktivitet, ndihmues dhe në shpërndarje.

    Mish kurbani është shpërndarë në Korçë, Devoll, Maliq, në Çërravë të Pogradecit e në Lushnjë.

    Në Elbasan e kanë përfituar atë anëtarë të shoqatës së të verbërve, si dhe jetimë nën përkujdesin e ALSAR-it.

    Mish kurbani u është shpërndarë dhe jetimëve në Librazhd. Një sasi është ndarë gjithashtu në Laç.

    Mirënjohja dhe falënderimi është ndeshur kudo ku ka mbërritur kjo ndihmë domethënëse humanitare.

    Në traditën e ALSAR-it, jetimëve u dhurohen veshmbathje për Kurban Bajram

    Në atmosferën festive të mbërritjes së Kurban Bajramit, të pritjes së tij sa më mirë dhe sa më gëzueshëm, Fondacioni ALSAR ka menduar sërish për jetimët.

    Duke respektuar një traditë shumëvjeçare të tij, të forcuar viti pas viti, si në çdo bajram, ALSAR-i i ka gëzuar fëmijët jetimë me dhurata.

    Veshmbathje të reja janë dhuruar për ta, shpërndarë në ambientet e fondacionit nga punonjës të ALSAR-it dhe përfaqësues të entit mbështetës.

    Veshmbathjet e përzgjedhura me kujdes e dashuri i kanë përfituar 250 jetimë, të lumturuar dhe për kohën e kaluar në shoqërinë e njëri-tjetrit.

    WEFA, organizata e ndihmave me qendër në Gjermani, dhe një partnere e kahershme e Fondacionit ALSAR, e mundësoi zhvillimin e kësaj veprimtarie në dobi të jetimëve.

    Ditët e Kurban Bajramit i shoqëron në Fondacionin ALSAR një aktivitet i shtuar, më së shumti humanitar.

    Kryetari i Fondacionit ALSAR priti në një takim rektorin e Universitetit Alparslan të Mushit në Turqi

    Fondacionin ALSAR e ka vizituar rektori i Universitetit Alparslan të Mushit në Turqi (Muş Alparslan Üniversitesi), prof. dr. Mustafa Alican, së bashku me një grup akademikësh të universitetit.

    Ai është pritur nga kryetari i Fondacionit ALSAR, z. Mehdi Gurra, me të cilin ka patur një bisedë miqësore.

    Veç fjalëve mbi njohjen reciproke të dy institucioneve, është diskutuar për sistemin arsimor në Turqi dhe për mundësinë e dërgimit të studentëve nga vendi ynë në Universitetin Alparslan të Mushit.

    Degë si historia, arkeologjia dhe veterinaria janë sugjeruar si më të specializuarat për t’u ndjekur nga studentët shqiptarë që mund të shkojnë në këtë universitet në Turqi. Për studentët e mbërritur në të për studime nëpërmjet Fondacionit ALSAR, të tëra shpenzimet do të mbulohen nga Universiteti Alparslan i Mushit.

    Me vizionin për të qenë lokomotivë e zhvillimit rajonal, Universiteti Alparslan i Mushit ka 15.000 studentë dhe siguron mundësi për arsimim dhe kërkim shkencor cilësor. Universiteti njeh rritje të nivelit akademik, të reflektuar në renditjet vlerësuese, dhe ka ambicie të fortë për t’u bërë sa më tërheqës për brezin e ri të kushtuar seriozisht fitimit të dijes.

    Rektori turk i propozoi z. Gurra një marrëveshje bashkëpunimi, e për këtë drejtues të Fondacionit ALSAR do të bëjnë në qershor një vizitë në Mush dhe do ta nënshkruajnë marrëveshjen e bashkëpunimit me Universitetin Alparslan.

    Akademikët shprehën mirënjohjen për pritjen e ngrohtë të ofruar në Fondacionin ALSAR.

    Mish “Adak” për familje jetimësh

    Në kuadër të aktivitetit humanitar dhe të kujdesit të vazhdueshëm të Fondacionit ALSAR për jetimët, është bërë shpërndarja e një sasie mishi “Adak”.

    Paketimet me mish “Adak” të shpërndara nga punonjësit e ALSAR-it i kanë përfituar 50 familje jetimësh.

    Veprimtaria e zhvilluar këtë të mërkurë, më 21 maj, u mundësua falë mbështetjes së hafizit të nderuar nga Turqia, Mustafa Demirkan.

    Jetimët përfitojnë periodikisht nga donacione të ngjashme individësh apo institucionesh, shpërndarë përmes bashkëpunimit efektiv me Fondacionin ALSAR.

    Mbështetja për jetimët dhe familjet e tyre është një angazhim i kurdohershëm i ALSAR-it, realizuar në shumë drejtime dhe në frymën e solidaritetit të fortë human.

    Fondacioni ALSAR dhe TİKA zhvillojnë aktivitetin humanitar të dhurimit të fidanëve të ullirit dhe të plehrave kimike për familje jetimësh

    Në kuadër të mbështetjes së vazhdueshme për jetimët dhe familjet e tyre, të veprimtarive humanitare të Fondacionit ALSAR, e të bashkëpunimit të konsoliduar me Agjencinë Turke për Bashkëpunim dhe Koordinim (TİKA), është bërë në këtë fillim të javës dhurimi i një sasie mjaft të konsiderueshme fidanësh ulliri dhe plehrash kimike për familje të jetimëve.

    Në aktivitetin humanitar të zhvilluar në Librazhd merrte pjesë ambasadori i Republikës së Turqisë në Tiranë, z. Tayyar Kağan Atay, koordinatori i TİKA-s në Tiranë, z. Mustafa Ata, dhe kryetari i Fondacionit ALSAR, z. Mehdi Gurra.

    Ambasadori turk e cilësoi ndihmën për familjet e jetimëve një dhuratë të popullit turk për popullin vëlla shqiptar, duke uruar gjithashtu që kjo ndihmë ta lehtësojë jetesën e këtyre familjeve.

    Kryetari i Fondacionit ALSAR, pasi solli në kujtesën e të pranishmëve zhvillimin dhe më herët të projekteve të tilla humanitare, përcolli shpresën për shtimin e tyre në vitet që vijnë.

    Familjet e ndihmuara i përkisnin qarkut të Elbasanit, përkatësisht qyteteve Elbasan, Librazhd, Peqin, Cërrik, Belsh dhe Gramsh, si dhe një numër i vogël atij të Beratit.

    Ndihma e shpërndarë për 50 familje jetimësh përmbante 35 fidanë ullinjsh dhe dy thasë, apo 50 kg, plehra kimike, për çdonjërën prej tyre. Në një numër të përgjithshëm, u dhuruan 1750 fidanë ulliri.

    Synimi i dhënies së kësaj ndihme ishte një kontribut me efekte afatgjata në jetën e këtyre familjeve, ku të ardhurat mund të sigurohen përmes bujqësisë dhe frutikulturës.

    Fondacioni ALSAR dhe TİKA organizojnë dhe realizojnë bashkërisht në mënyrë periodike aktivitete të ngjashme humanitare në ndihmë të shtresave në nevojë të shoqërisë sonë.

    Fëmijë jetimë marrin ndihmën periodike financiare

    Fondacioni ALSAR ka zhvilluar një aktivitet humanitar në mjediset e tij në ditën e parë të majit.

    Në kuadër të mbështetjes së vazhdueshme për jetimët është dhënë ndihma periodike financiare.

    Ndihmën e kanë përfituar 278 jetimë, të shoqëruar nga familjarë në marrjen e zarfeve.

    Zhvillimin e aktivitetit e mundësoi IHH me qendër në Holandë, organizata humanitare me të cilën ALSAR ka një bashkëpunim të qëndrueshëm.

    Një varg veprimtarish gjatë kësaj periudhe kanë patur në qendër të tyre posaçërisht jetimët, përfitues të ndihmave të ndryshme humanitare.