Category Page: Humanitare

    Në ndihmë të familjeve në nevojë në fshatrat Çërravë dhe Bllacë të Pogradecit

    Vetëm pak ditë larg muajit të madhërueshëm të Ramazanit, në Fondacionin ALSAR ka fituar ritëm aktiviteti humanitar në ndihmë të shtresave në nevojë.

    Një varg veprimtarish në kuadër të projekteve humanitare janë zhvilluar së fundi në partneritet dhe në bashkëveprim me organizatën e ndihmave HASENE, me qendër në Gjermani.

    Ndihma përbëhej nga pako me artikuj ushqimorë, shpërndarë fillimisht në Pogradec, në njësinë administrative Çërravë.

    Për familje me nevoja ekonomike në fshatrat Çërravë dhe Bllacë është shpërndarë një sasi prej 250 pakosh ushqimore.

    Të ardhur posaçërisht, punonjës të organizmit humanitar mbështetës, HASENE-së, ishin aktivë në dhënien e ndihmës ushqimore përfituesve.

    Fondacioni ALSAR dhe HASENE kanë një ndërveprim frytdhënës në të mirë të shtresave e komuniteteve në nevojë për ndihmë në vendin tonë.

    Realizohet në Koplik projekti i shpërndarjes së ndihmave në pako ushqimore

    Fondacioni ALSAR zhvilloi në fundjavën e kaluar dhe një aktivitet humanitar në Koplik për t’u ardhur në ndihmë shtresave në nevojë në këto ditë që i paraprijnë muajit të madhërueshëm të Ramazanit.

    Në zonën e Malësisë së Madhe, në njësinë administrative të Gruemirës, janë shpërndarë 200 pako ushqimore.

    Dhënien e kësaj ndihme humanitare e mundësoi mbështetja nga IHH me qendër në Holandë.

    Punonjës dhe drejtues të Fondacionit ALSAR ishin në terren për ta shpërndarë sa më mirë këtë sasi ndihme.

    Aktiviteti humanitar i ALSAR-it dendësohet më tej gjatë Ramazanit përmes bashkëveprimit me shumë partnerë ndërkombëtarë.

    Aktivitet humanitar në Tiranë, jepet mish “Adak” për familje jetimësh

    Fondacioni ALSAR po i paraprin ardhjes së Ramazanit me një varg aktivitetesh humanitare në ndihmë të shtresave në nevojë.

    Për realizimin e tyre po japin mbështetje ente partnere të ALSAR-it, bashkëpunëtorë në organizime me karakter humanitar.

    Në një prej tyre të zhvilluar gjatë fundjavës së kaluar, në ambientet e Fondacionit ALSAR është kryer shpërndarja e një sasie mishi “Adak”.

    Atë e kanë përfituar 20 familje jetimësh falë mbështetjes nga dhurues jashtë vendit.

    Jetimët dhe ndihma ndaj tyre janë prioritet i kahershëm i Fondacionit ALSAR, intensifikuar në veçanti gjatë muajit të Ramazanit.

    Nis aktiviteti humanitar i shpërndarjes së ndihmave ushqimore me afrimin e muajit të Ramazanit

    Me një traditë të konsoliduar ndër vite, aktivitetet humanitare të Fondacionit ALSAR në muajin e begatë të Ramazanit startojnë disa ditë përpara mbërritjes së tij.

    Shpërndarja e ndihmave në pako ushqimore ka filluar në këtë prag Ramazani me një aktivitet në Tiranë të mbështetur nga WEFA, organizata e ndihmave ndërkombëtare me qendër në Gjermani.

    Fokus i kësaj ndihme prej 50 pakosh me artikuj ushqimorë kanë qenë pjesëtarë të shoqatës “Shpresë për jetën”.

    Ndihma është shpërndarë nga punonjës të Fondacionit ALSAR dhe përfaqësues të WEFA-s të ardhur enkas në vendin tonë.

    Sasia e shpërndarë është veç një pjesë e vogël e totalit prej 350 pakosh ushqimore që WEFA do të shpërndajë përgjatë Ramazanit në partneritet me Fondacionin ALSAR.

    Ndihma materiale për komunitetin e romëve

    Në kuadër të aktivitetit humanitar të Fondacionit ALSAR është shpërndarë në fundjavë një ndihmë materiale për pjesëtarë të komunitetit të romëve.

    Veprimtaria u zhvillua të shtunën, më 15 shkurt, në bashkëpunim me shoqatën “Romët për integrim”.

    Ndihmën materiale në dyshekë e morën 40 familje të komunitetit të romëve, në kushte të vështira jetese dhe në nevojë për përkrahje.

    Ky komunitet e ka të vazhdueshme mbështetjen e Fondacionit ALSAR, të shpeshtë dhe të larmishme në ndihmën e dhënë.

    Dhurimi i dyshekëve u krye përmes realizimit të projektit të ndihmës humanitare në mbështetje të njerëzve në nevojë.

    Soba gatimi dhe dru zjarri për familje të jetimëve në Elbasan, aktivitet humanitar i dhënies së ndihmave dimërore

    Fondacioni ALSAR ka zhvilluar një aktivitet humanitar në Elbasan, në ndihmë të jetimëve dhe familjeve të tyre.

    Kontributi humanitar përbëhej nga soba gatimi dhe dru zjarri, dhënë në kuadër të realizimit të projekteve dimërore.

    Sobat e gatimit i përfituan 13 familje jetimësh. Dru zjarri u shpërndanë për 20 familje jetimësh, marrëse të sasisë nga një metër kub.

    Përfaqësueset e WEFA-s, organizatës së ndihmave ndërkombëtare me qendër në Gjermani dhe mbështetëses të aktivitetit, ishin të pranishme në procesin shpërndarës.

    Realizimi me sukses në dy ditë i këtij projekti dimëror dëshmoi bashkëpunimin produktiv mes Fondacionit ALSAR dhe WEFA-s.

    Si bilanc, përmes këtyre aktiviteteve humanitare u shpërndanë 40 soba, 20 nga të cilat për ngrohje dhe të dhuruara shkollave të Mushqetasë dhe Krrabës, dhe 20 të tjera për ngrohje e gatim, dhuratë për familje jetimësh, 7 në Tiranë dhe 13 në Elbasan. Drutë e zjarrit qenë të destinuara për 20 familje jetimësh në Elbasan.