Category Page: Humanitare

    Mbështetja për jetimët, shpërndahen për ta pako me ushqime

    Një nga dy veprimtaritë humanitare të së shtunës, të dedikuar tërësisht jetimëve, përmbante shpërndarjen e një ndihme në pako ushqimore.

    Ndarja e pakove me ushqime u bë pranë ambienteve të Fondacionit ALSAR, nën kujdesin e punonjësve të tij.

    Ky ishte kontingjenti i radhës i ndihmës në ushqime për 50 jetimë të mbështetur nga EMİN, një organizëm i ndihmës humanitare me qendër në Gjermani.

    Fondacioni ALSAR dhe EMİN kanë një bashkëpunim produktiv në fushën humanitare, dobiprurës për shtresa në nevojë, në veçanti për fëmijë jetimë.

    Këta gëzojnë ndihmën e pakursyer të ALSAR-it në shumë aspekte të jetës së tyre, të përforcuar e të dendësuar nga partneritete të ngjashme.

    Fëmijë jetimë marrin ndihmën financiare periodike

    Ambientet e Fondacionit ALSAR i kanë gjallëruar në këtë fundjavë veprimtari humanitare në dobi të fëmijëve jetimë.

    Dhjetëra prej tyre kanë marrë një ndihmë financiare, të ndarë për ta në cikle tremujore.

    Shpërndarja i përkiste ndihmës financiare të dhënë për tremujorin e dytë dhe të tretë të vitit falë mbështetjes nga Organizata Botërore e Bamirësisë Islame, me qendër në Kuvajt.

    Përfitues të ndihmës ishin 78 jetimë, të shoqëruar në veprimtarinë e së shtunës dhe nga të afërm të tyre.

    Dhënia e kësaj ndihme financiare u krye në kuadër të aktivitetit humanitar të Fondacionit ALSAR, gjithnjë i vëmendshëm ndaj nevojave të jetimëve.

    Ndihmë për jetimë, jepen çanta dhe pako ushqimore

    Pranë ambienteve të Fondacionit ALSAR u zhvillua në ditën e parë të kësaj jave shpërndarja e një sasie të konsiderueshme çantash shkolle dhe pakosh ushqimore për jetimë të Tiranës.

    Projekti u realizua në kuadër të aktivitetit humanitar të ALSAR-it, i mbushur vijimësisht me aksione të tilla shpërndarëse për njerëz në nevojë.

    Çantat dhe artikujt ushqimorë i përfituan 250 jetimë, mirënjohës për gjërat e dhuruara.

    Zhvillimin e projektit e mundësoi mbështetja nga FGRF (Faizan Global Relief Foundation), fondacioni me qendër në Londër, e me një degë në Tiranë, Fondacionin Faizan e Medina.

    Veprimtaria ishte fryt i bashkëpunimit të parë të ALSAR-it me fondacionin e lartpërmendur në fushën humanitare.

    Ashtu siç zgjeron shtrirjen e aktivitetit dhe ndikimin humanitar mbi sa shumë shtresa dhe njerëz në nevojë, Fondacioni ALSAR shton partneritete të reja në historikun e tij disadekadësh.

    Në ditët e festës u shpërnda mish kurbani për 4300 familje në qytete të ndryshme

    Pak ditë pas mbarimit të Kurban Bajramit, dhe pas një veprimtarie të ngjeshur humanitare, që ka kërkuar përkushtim dhe energji të mëdha, meriton të bëhet një bilanc.

    Me angazhimin tonë dhe mbështetjen e partnerëve dhe të dhuruesve të ndryshëm, u bënë kurban 1075 kokë bagëti të imëta.

    WEFA, me qendër në Gjermani, mbështeti prerjen e 100 kurbanëve. Kontributi i HASENE-së, me qendër gjithashtu në Gjermani, ishte për 390 kokë bagëti të bëra kurban. Falë mbështetjes nga IHH me qendër në Holandë, u prenë 500 kokë bagëti. I konsiderueshëm qe dhe kontributi nga Mercy to Humanity, me qendër në Britani, përmes degës në vendin tonë, Mirësi për Botën, që mundësoi therjen për kurban të 50 kokëve bagëti. Donatorë të ndryshëm vendas dhe të huaj kishin po ashtu vendin e tyre në këtë kontribut, si mundësues për 35 kokë bagëti të therur si kurban.

    Mishi i kurbanit u shpërnda brenda një kohe të shkurtër. E përfituan atë 4300 familje në një hapësirë të gjerë të vendit. Besimtarë, nevojtarë e jetimë e morën ndihmën në kuadër të festës, për të gëzuar e për ta përjetuar sa më mirë Kurban Bajramin.

    Mishi i kurbanit u shpërnda në disa qytete dhe lokalitete; në Tiranë, Elbasan, Librazhd, Peqin, Cërrik, Pogradec, Korçë, Devoll, Maliq, Gramsh.

    Ky aktivitet në Kurban Bajram ka krijuar tanimë traditën e tij në Fondacionin ALSAR. Veç karakterit humanitar, shpërndarja e mishit të kurbanit shpreh solidaritet njerëzor dhe shoqëror.

    Të falënderuar për kontributin janë të gjithë partnerët dhe donatorët e lartpërmendur.

    Fëmijë jetimë marrin ndihmën financiare të zekatit

    Në këto ditë feste, të mbushura me aktivitet humanitar, për fëmijë jetimë është dhënë ndihma financiare e zekatit.

    Ata e kanë marrë atë në ambientet e Fondacionit ALSAR, ku janë pritur me ngrohtësinë e zakonshme.

    Nën kujdesin e vazhdueshëm të fondacionit, 50 jetimë e përfituan ndihmën, shtënë në zarfa të posaçëm.

    Dhënia e ndihmës financiare të zekatit u mundësua nga WEFA, me qendër në Gjermani.

    Kjo organizatë humanitare mbështeti dhe aktivitete të tjera të ALSAR-it gjatë ditëve të Kurban Bajramit.

    Në Elbasan, me mish kurbani për jetimët

    Në valën e aktivitetit humanitar të zhvilluar prej së dielës në kuadër të Kurban Bajramit, për shtresa në nevojë është shpërndarë mish kurbani.

    Atë e përfituan mijëra familje në qytete dhe fshatra të ndryshme të vendit, të cilave iu mundësua një përjetim më i mirë i festës.

    Fondacioni ALSAR e realizoi shpërndarjen e mishit të kurbanit me mbështetjen e disa enteve humanitare ndërkombëtare; partnerë me të cilët ka një një bashkëpunim të gjatë dhe të frytshëm.

    Elbasani ishte ndër qytetet ku u dha kjo ndihmë, dhe te kontribuesit u rreshtua dhe organizmi bamirës me qendër në Britani, Mercy to Humanity.

    Përmes përfaqësuesve të tyre në vendin tonë, nën emrin, Mirësi për Botën, u shpërnda mish kurbani për 200 jetimë të këtij qyteti.

    Ndhmën e shpërndarë në një mjedis të hapur e morën nëna apo të afërm të jetimëve.