Category Page: Humanitare

    Njerëz në nevojë në Fushë-Krujë, Mamurras, Lezhë, Shkodër dhe Malësi të Madhe marrin pako ushqimore

    Ditët e Ramazanit, të përjetuara dhe si ditë të solidaritetit human, i karakterizon aktiviteti i gjerë humanitar i Fondacionit ALSAR.

    Në saje të këtij aktiviteti, shtresa e komunitete në nevojë në të katër anët e vendit ndihmohen e lehtësohen në jetën e tyre të përditshme.

    TİKA, Agjencia Turke për Bashkëpunim dhe Koordinim, po mbështet një projekt humanitar të shpërndarjes së pakove me artikujt bazë ushqimorë.

    Një segment në të cilin u krye shpërndarja e pakove gjatë kësaj jave ishte dhe ai që nisi me Fushë-Krujën, vazhdoi me Mamurrasin, Lezhën, Shkodrën dhe Malësinë e Madhe.

    Edhe në këtë segment, ndihmën ushqimore e përfituan 300 familje jetimësh dhe të shtresave në nevojë.

    Ky projekt humanitar ruan vazhdimësinë në Ramazan dhe përfshin shumë qytete dhe lokalitete, me ndihmën të pritur kudo me mirënjohje dhe falënderim.

    Pako me ndihma ushqimore shpërndahen në Elbasan, Cërrik, Librazhd dhe Peqin

    Fondacioni ALSAR vazhdon të kryejë aktivitet të ngjeshur humanitar në ditët e begata të Ramazanit, duke dërguar në qytete e fshatra të Shqipërisë ndihma ushqimore e duke përçuar anekënd frymën e solidaritetit njerëzor.

    Në kuadër të bashkëpunimit me Agjencinë Turke për Bashkëpunim dhe Koordinim (TİKA), një projekt i gjerë humanitar ka nisur zbatimin që në nisje të muajit të agjërimit.

    Pjesë e ecurisë së tij ka qenë dhe shpërndarja e pakove me ndihma ushqimore në aksin që përfshin qarkun e Elbasanit.

    Familje jetimësh dhe të tjera në nevojë kanë marrë ndihmën e dhënë bujarisht, të përbërë nga artikujt kryesorë ushqimorë.

    Ndihmën ushqimore të shpërndarë në Elbasan, Cërrik, Librazhd dhe Peqin e kanë përfituar 300 familje të jetimëve dhe të shtresave sociale në nevojë.

    Ky aktivitet humanitar i zhvilluar në partneritet mes ALSAR-it dhe TİKA-s nuk do të ketë të ndalur në Ramazan.

    Dhënia e iftareve në Ramazan, tradita konsolidohet me mbështetjen nga TİKA

    Në vargun e projekteve humanitare të Fondacionit ALSAR për muajin e begatë të Ramazanit zë vend për çdo vit në mënyrë të patjetërsueshme dhe dhënia e iftareve.

    I tërë ky aktivitet organizohet dhe zhvillohet në dy forma, si shtrim iftaresh dhe si shpërndarje e tyre në formë të paketuar, të parapërgatitur.

    I shërben kjo dhënie iftaresh mbledhjes rreth një tryeze të agjëruesve, si dhe ardhjes në ndihmë të komuniteteve në nevojë.

    Ky Iftar i dhënë kështu ka brenda humanitetin, solidaritetin, socializimin; përfshin ndihmën humanitare dhe ka karakter bashkues, në dobi të kohezionit shoqëror.

    ALSAR bashkëpunon me partnerë të ndryshëm në këtë aspekt. Agjencia Turke për Bashkëpunim dhe Koordinim (TİKA) është ndër bashkëpunëtorët kryesorë që ndihmon në forcimin e traditës së dhënies së iftareve.

    TİKA po e mbështet dhe në këtë Ramazan aktivitetin humanitar të ALSAR-it, duke u gjendur së bashku mbrëmjeve me iftare pranë agjëruesve dhe nevojtarëve.

    Fondacioni ALSAR dhe TİKA shpërndajnë pako ushqimore për jetimët e kryeqytetit në kuadër të projektit humanitar për muajin e Ramazanit

    Fondacioni ALSAR dhe Agjencia Turke për Bashkëpunim dhe Koordinim (TİKA) e kanë nisur bashkëveprimin e tyre në Ramazan me shpërndarjen pak para ardhjes së këtij muaji të pakove ushqimore për fëmijët jetimë të Tiranës.

    Ceremonia tanimë e përvitshme është zhvilluar të enjten, më 27 shkurt, në pallatin e sportit “Farie Hoti”. Në të kanë marrë pjesë kryetari i Fondacionit ALSAR, z. Mehdi Gurra, dhe koordinatori i TİKA-s në Tiranë, z. Mustafa Ata.

    Jetimë dhe të afërm të tyre ishin pjesë e ceremonisë si ndjekës të saj dhe përfitues të ndihmës ushqimore.

    Projekti humanitar i dedikuar jetimëve përgjatë muajit të Ramazanit ka filluar të vihet në jetë në këtë mënyrë me shpërndarjen e 700 pakove të para.

    Në total është parashikuar shpërndarja e 3500 pakove ushqimore në një muaj në një gjeografi të gjerë të vendit.

    Kryetari i Fondacionit ALSAR e falënderoi TİKA-n, në një deklarim për median, për mbështetjen për të bërë të lumtur mijëra fëmijë jetimë. Koordinatori i TİKA-s theksoi po në kuadër të informimit rëndësinë e dhënë në projekte grupeve më në nevojë të shoqërisë.

    Ky projekt i shpërndarjes së pakove ushqimore me rastin e muajit të Ramazanit do të vazhdojë të zbatohet në ditët e ardhshme nëpërmjet aktiviteteve të njëpasnjëshme humanitare.

    Ndihma në ushqime për nevojtarë në Shkodër

    Kontributi humanitar i Fondacionit ALSAR në ndihmë të shtresave në nevojë të shoqërisë sonë u konkretizua gjatë këtyre ditëve dhe me një aktivitet në Shkodër.

    Në fokus të ndihmës ushqimore të dhënë ishin pjesëtarë të Shoqatës së Paraplegjikëve dhe Tetraplegjikëve, edhe më herët përfitues të mbështetjes humanitare të ALSAR-it.

    Po ashtu ndihmë ushqimore u dha dhe për komunitetin e besimtarëve në njësinë administrative Ana e Malit.

    Për njerëz e familje në nevojë në tërë veprimtarinë në Shkodër u shpërndanë 200 pako me ushqime.

    Aktiviteti ishte pjesë e një pakete ndihme prej 700 pakosh me ushqime të dhëna me mbështetjen nga organizata e ndihmave HASENE, me qendër në Gjermani.

    Ajo u nda me një sasi prej pakosh 250 në Pogradec, 200 në Korçë, 200 në Shkodër, dhe 50 të lëna për konviktin studentor të ALSAR-it.

    Aktivitete të shumta humanitare e shoqërojnë afrimin dhe mbërritjen e muajit të begatë të Ramazanit. Një pjesë e mirë e tyre janë bashkëpunime të Fondacionit ALSAR me partnerë të huaj.

    Aktivitet humanitar në Korçë, shpërndahen ndihma ushqimore

    Fondacioni ALSAR e ka vijuar aktivitetin humanitar të këtyre ditëve me një veprimtari në Korçë, ku janë shpërndarë pako me artikuj ushqimorë.

    Për familje në nevojë të zonës së Korçës janë dhënë 200 pako ushqimore; ndihmë e konsiderueshme për nevojtarë të gjërave më esenciale të jetesës.

    Shpërndarja e kësaj sasie u mundësua nga mbështetja e organizatës së ndihmave me qendër në Gjermani, HASENE.

    Veprimtaria humanitare në Korçë pasoi atë në Pogradec, si pjesë e një kontributi të gjerë humanitar nga HASENE në këtë prag Ramazani.

    Ndihmat synojnë përkrahjen materiale dhe morale të shtresave në nevojë, ndërsa shumë pranë është muaji i shpërfaqjes së plotë të solidaritetit human.