Category Page: Humanitare

    Në fshatin Zhamë të Lushnjës shpërndahen ndihma ushqimore.

    Në kuadër të afrimit të Ramazanit dhe të nisjes së ditëve të solidaritetit human gjatë këtij muaji, aktiviteti humanitar i Fondacionit ALSAR ka vijuar në fshatin Zhamë, në Lushnjë.

    Mes interesit të madh të banorëve në zonë, për njerëz e familje në nevojë u shpërndanë të shtunën 200 pako me artikuj bazë ushqimorë.

    Realizimi i shpërndarjes së kësaj ndihme u bë i mundur me mbështetjen e organizatës humanitare IHH me qendër në Holandë.

    Ky ishte vetëm kontingjenti i parë i ndihmave ushqimore të mundësuara nga kjo organizatë.

    IHHNL do të kontribuojë me kontingjente të tjera të ndihmave ushqimore për shtresat në nevojë gjatë muajit të Ramazanit.

    ALSAR ka një bashkëpunim të shtuar në Ramazan me partnerët ndërkombëtarë, me të cilët koordinohen shumë veprimtari humanitare.

    Ndihmë në farëra bujqësore dhe për familje jetimësh në Tiranë, aktivitet nga TİKA dhe ALSAR

    Projekti humanitar i shpërndarjes së farërave bujqësore dhe plehrave kimike për familje të jetimëve ka vijuar dhe është përmbyllur në Tiranë.

    Ndihmën e kanë përfituar 24 familje, që kanë marrë farëra misri, jonxhe dhe fasuleje, së bashku me një sasi plehu kimik.

    Të pranishëm në shpërndarjen e ndihmës ishin kryetari i Fondacionit ALSAR, z. Mehdi Gurra, dhe koordinatori i TİKA-s në Tiranë, z. Mustafa Ata. Duke iu drejtuar përfituesve, z. Ata foli për veprimtarinë e TİKA-s në sferën humanitare, për projektet në fushën e bujqësisë, dhe për dobinë e ndihmës së dhënë, me të cilën këto familje jetimësh mund të përmirësojnë ekonominë dhe mirëqenien e tyre.

    Nga aktiviteti i organizuar në bashkërendim mes TİKA-s, Agjencisë Turke për Bashkëpunim dhe Koordinim, dhe Fondacionit ALSAR përfituan në tërësi 50 familje jetimësh.

    Sasia e parë e ndihmës, për 26 familje, u nda më herët gjatë kësaj jave në Lushnjë.

    I gjithë aktiviteti përkon me afrimin e Ramazanit, muajit në të cilin solidariteti njerëzor shpërfaqet më tepër se në çdo pjesë tjetër të vitit.

    Ndihma në ushqime për banorë të Peqinit, Librazhdit dhe Belshit

    Veprimtaria humanitare dyditore në qarkun e Elbasanit ka vijuar në ditën e dytë të saj në tre vendndalime të tjera.

    Një sasi e konsiderueshme ndihmash ushqimore është shpërndarë në Peqin, Librazhd dhe Belsh.

    Familje në nevojë janë ndihmuar me 273 pako me artikuj ushqimorë, mundësuar nga HASENE, organizata e ndihmave me qendër në Gjermani.

    E tërë ndihma e shpërndarë në qark në kuadër të afrimit të muajit të Ramazanit përbëhej nga 833 pako ushqimore.

    Fondacioni ALSAR ka nisur tashmë fushatën e zakonshme humanitare që i paraprin mbërritjes së muajit të begatë të agjërimit dhe që vijon bashkë me të.

    Projektet humanitare të kësaj periudhe janë në përgjithësi bashkëveprime me partnerë ndërkombëtarë.

    Aktivitet humanitar në qarkun e Elbasanit, shpërndahen pako me ushqime

    Në traditën e zhvillimit të veprimtarive humanitare me afrimin e muajit të Ramazanit, për dy ditë me radhë u është ardhur në ndihmë banorëve në nevojë të qarkut të Elbasanit.

    Aksioni humanitar është mundësuar falë mbështetjes së organizatës së ndihmave me qendër në Gjermani, HASENE, që ka bashkëpunim prej një kohe të gjatë me Fondacionin ALSAR.

    Sasia e ndihmës së shpërndarë përbëhej nga 833 pako ushqimore.

    Në ditën e parë u shpërndanë 560 pako për familje në nevojë në Elbasan, Gramsh dhe Cërrik.

    Për realizimin me sukses të shpërndarjes kontribuoi dhe qendra në ndihmë të individëve me nevoja ndryshe, “Future for You”.

    ALSAR-i dhe TİKA japin farëra bujqësore për familje jetimësh

    Fondacioni ALSAR dhe TİKA, Agjencia Turke për Bashkëpunim dhe Koordinim, kanë zhvilluar një veprimtari të përbashkët humanitare në ndihmë të 50 familjeve të fëmijëve jetimë.

    Me synimin për të kontribuar në rritjen e ekonomisë së këtyre familjeve, në Lushnjë janë shpërndarë farëra bujqësore dhe plehra kimike.

    Ndihmën e përbërë nga farëra misri, jonxhe dhe fasuleje e kanë përfituar 26 familje, që bashkë me to kanë marrë dhe pleh kimik.

    Çdo familje ka marrë një sasi të përgjithshme ndihme bujqësore prej 220 kg.

    Në aktivitetin e dhurimit ishte i pranishëm ambasadori i Republikës së Turqisë në Tiranë, z. Tayyar Kağan Atay, përshëndetës dhe me një fjalë të shkurtër.

    Ai vuri në pah miqësinë mes dy popujve, angazhimin humanitar në ndihmë të shtresave në nevojë, si dhe foli për projektet e TİKA-s në fushën e bujqësisë.

    Kryetari i Fondacionit ALSAR theksoi rëndësinë e projektit, si një mundësi e dhënë për shfrytëzimin e tokës bujqësore. Projekti, tha z. Mehdi Gurra, flet për vijimësinë e ndihmës së popullit turk, dhënë për jetimët dhe familjet shqiptare në nevojë përmes TİKA-s.

    Të premten do të shpërndahet në Tiranë ndihma në farëra bujqësore dhe plehra kimike e dedikuar për 24 familje.

    Nis vargu i veprimtarive humanitare me afrimin e Ramazanit, shpërndahen ndihma ushqimore në fshatrat Shupal dhe Pajan të Tiranës.

    Pragu i Ramazanit lajmëron si për çdo vit fillimin e një vargu të gjatë veprimtarish humanitare të Fondacionit ALSAR në ndihmë të shtresave në nevojë.

    Aktivitete të shumta organizohen në bashkëpunim dhe në bashkërendim me partnerë vendas dhe të huaj, shoqata, organizata dhe individë të angazhuar në fushën humanitare.

    Fushata ka nisur të shtunën, për të vijuar dhe të dielën, me shpërndarje të ndihmave ushqimore.

    Në fshatin Shupal është shpërndarë një sasi prej 100 pakosh me artikuj bazë ushqimore. Në Pajan, një tjetër fshat i Tiranës, është ndarë e njëjta sasi ndihme, 100 pako ushqimore për nevojtarët.

    Aktivitetin e kanë shoqëruar vizita në shtëpi të banorëve me aftësi të kufizuar apo të sëmurë, ndihmuar gjithashtu me pako me ushqime.

    Dhënien e kësaj ndihme e mundësoi organizmi humanitar me qendër në Britani, Send A Little Hope.