Category Page: Humanitare

    Ditët e solidaritetit human, në Tiranë dhe Klos me ndihma ushqimore

    Ndërsa Ramazani i afrohet mbarimit për këtë vit, bilanci i veprimtarive të Fondacionit ALSAR në ndihmë të shtresave në nevojë shtohet e pasurohet.

    Për të kontribuar në zhvillimin e aktiviteteve humanitare janë ofruar gjatë kësaj periudhe shumë ente partnere, së fundi dhe sindikata turke.

    Një prej tyre, Hizmet-İş, ka mundësuar shpërndarjen e një sasie ndihme ushqimore në Tiranë dhe Klos.

    Për njerëz e familje në nevojë janë dhënë 200 pako me artikujt bazë ushqimorë, shpërndarë nga personeli i Fondacionit ALSAR.

    Ndihma ka mbërritur te nevojtarët në ditë të solidaritetit human, të mbushura me realizime projektesh humanitare.

    Larmi aktivitetesh humanitare në Ramazan, dhurohen fidanë frutorë

    Fondacioni ALSAR është përfshirë tërësisht në një aktivitet të gjerë humanitar, me një shumëllojshmëri projektesh të dedikuara ditëve të muajit të Ramazanit.

    Veç shpërndarjes së ndihmës ushqimore, shtrimit të iftareve dhe dhënies së paketimeve me ushqim për iftar, si veprimtari mbizotëruese, zhvillohen dhe të tjera aktivitete në ndihmë të komuniteteve dhe shtresave në nevojë.

    Mes tyre është dhe dhurimi i fidanëve frutorë; një ndihmë me efekte më të gjata dhe kontribuese për përmirësim të gjendjes ekonomike të përfituesve dhe për mirëmbajtjen e mjedisit.

    Përmes një projekti të tillë janë dhënë 147 fidanë frutorë për Xhaminë e Hadmit në Pezë, në Tiranë, dhe për familjet e tre fëmijëve jetimë.

    Procesin dhurues e ka shoqëruar dhe mbjellja e fidanëve.

    WEFA, organizata ndërkombëtare e ndihmave me qendër në Gjermani, e mundësoi dhurimin e fidanëve frutorë.

    Vijon shpërndarja e pakove ushqimore, ndihmë për familje në Ballsh, Tepelenë, Këlcyrë, Përmet, Vlorë, Sarandë dhe Konispol

    Kontributi humanitar i Agjencisë Turke për Bashkëpunim dhe Koordinim në këtë Ramazan vazhdon të mbërrijë në destinacionet e planifikuara në bashkërendim me Fondacionin ALSAR.

    Një varg i gjatë aktivitetesh në qytete e lokalitete të ndryshme të vendit ka mundësuar shpërndarjen e ndihmës ushqimore për familje në nevojë, për familje jetimësh.

    Në segmente të ndryshme, nga veriu në jug, pakot me artikujt bazë ushqimorë kanë lehtësuar sadopak përditshmërinë e nevojtarëve dhe kanë përçuar frymën e solidarizimit me ta.

    Shpërndarja është kryer së fundi në Ballsh, Tepelenë, Këlcyrë, Përmet, Vlorë, Sarandë dhe Konispol.

    Pako me ushqime janë ndarë në tërësi në këto vendndalime për 100 familje.

    Fondacioni ALSAR dhe TİKA e vijojnë dhe më tej këtë ndërveprim të suksesshëm.

    Ndihma për nevojtarët, në Tiranë dhe Elbasan jepet ushqim i paketuar për iftar

    Shtresa në nevojë, individë dhe familje në kushte jo të mira jetese, po ndihmohen përmes realizimit të projekteve të ndryshme humanitare të Fondacionit ALSAR.

    Kjo shprehje e solidaritetit human bëhet e prekshme nga bashkëpunime me partnerë ndërkombëtarë, të angazhuar enkas për aktivitetet humanitare në Ramazan.

    HİLAL, organizata bamirëse me qendër në Gjermani, përfshiu në kontributin e dhënë gjatë këtyre ditëve dhe shpërndarjen e ushqimit të parapërgatitur për iftar.

    Përfaqësues të HİLAL-it morën pjesë aktivisht në zhvillimin e këtij aktiviteti krahas punonjësve të ALSAR-it.

    Në Tiranë dhe Elbasan u dhanë për nevojtarë 200 paketime me ushqim iftari.

    Në periferitë e Tiranës shpërndahen pako me ushqime

    Fondacioni ALSAR e ka mbushur dhe dhjetëditëshin e fundit të Ramazanit me aktivitete humanitare në ndihmë të shtresave në nevojë.

    Shpërndarja e ndihmave ushqimore, një prej veprimtarive kryesore të këtij muaji, nuk njeh ulje të intensitetit.

    E mundësojnë këtë kontribues të ndryshëm, partnerë dhe bashkëpunëtorë të Fondacionit ALSAR, në bazë të një plani paraprak që merr parasysh nevojat sociale.

    Në radhën e tyre, një aktivitet shpërndarës të ndihmës ushqimore ka mundësuar sindikata turke e shëndetësisë, Öz Sağlık-İş.

    Pakot me artikujt bazë ushqimorë janë shpërndarë në periferi të Tiranës. Sasia prej 200 pakosh është dhënë për njerëz e familje në nevojë.

    Ky kontribut i dhënë në ditë të solidaritetit human ka sjellë lehtësim e gëzim te përfituesit.

    Fëmijë jetimë marrin ndihmën financiare të zekatit

    Aktiviteti i gjerë humanitar i Fondacionit ALSAR në Ramazan dallohet për larmishmërinë dhe masën e gjerë të të ndihmuarve.

    Jetimët, pandërprerë në vëmendje, kanë qenë ndër përfituesit e ndihmave, së bashku me familjet e tyre.

    Nën kujdesin e Fondacionit ALSAR, për një numër jetimësh është dhënë gjatë kësaj jave ndihma financiare e zekatit.

    Dhënia e zarfeve është bërë në mjediset e fondacionit, në sallën e konferencave, ku fëmijët janë pritur me ngrohtësinë e zakonshme.

    Ndihmën financiare të zekatit, të përfituar nga 12 jetimë, e mundësoi kontributi i organizatës bamirëse HİLAL, me qendër në Gjermani.