Category Page: Humanitare

    Jepet ndihma financiare e zekatit për jetimë në ditë të solidaritetit human në Ramazan

    Projekte humanitare ndjekin njëri-tjetrin në realizim ndërsa muaji i agjërimit ka hyrë në dhjetëditëshin e fundit.

    Fondacioni ALSAR vazhdon me ritëm të lartë shpërndarjen e ndihmës të siguruar falë bashkëpunimit dhe bashkërendimit me ente partnere.

    Ndër aktivitetet e javës ka qenë dhe dhënia e ndihmës financiare të zekatit për fëmijë jetimë.

    Shpërndarja e zarfeve është bërë në ambientet e Fondacionit ALSAR, ku jetimët janë pritur me dashurinë e treguar gjithmonë për ta.

    Ndihma financiare e zekatit është dhënë për 100 fëmijë jetimë dhe atë e ka mundësuar WEFA, organizata e ndihmave humanitare me qendër në Gjermani.

    Me kontributin e WEFA-s do të zhvillohen dhe disa veprimtari të tjera humanitare në kuadër të muajit të Ramazanit.

    Shpërndahen ndihma ushqimore në njësi administrative të Tiranës, në Bërzhitë, Krrabë dhe Petrelë

    Fondacioni ALSAR është në ditë të ngarkuara me aktivitete humanitare, të zhvilluara në qytete e fshatra të vendit.

    Në valën e aksionit humanitar në muajin e Ramazanit, ndihma ushqimore janë shpërndarë në tre njësi administrative të Tiranës.

    Në Bërzhitë, Krrabë dhe Petrelë është bërë dhurimi i pakove me artikuj ushqimorë për banorë të zonave, për familje në nevojë.

    Veprimtaritë shpërndarëse kanë mbledhur njerëz të shumtë, mirënjohës për ndihmën e dhënë zemërgjerësisht.

    Pakot me ushqime i përfituan një numër i përgjithshëm prej 450 familjesh të këtyre njësive administrative.

    Ndihma ishte pjesë e kontingjentit të mundësuar nga TİKA, Agjencia Turke për Bashkëpunim dhe Koordinim.

    Në ndihmë të shtresave në nevojë në Elbasan dhe Cërrik me pako ushqimore

    Ditët e solidaritetit human në Ramazan janë të mbushura me aktivitete humanitare të dedikuara shtresave në nevojë anembanë vendit.

    Nevojtarët i gëzohen ndihmës së dhënë, të lehtësuar sadopak në përditshmërinë e tyre, dhe ndiejnë mbështetjen e veçantë në këtë muaj po kaq të veçantë.

    Fondacioni ALSAR po e kryen një pjesë të aktivitetit humanitar në kuadër të shpërndarjes së kontingjentit të pakove me ushqime të siguruara nga TİKA, Agjencia Turke për Bashkëpunim dhe Koordinim.

    Në saje të këtij kontributi dhe të bashkëpunimit të suksesshëm midis dy institucioneve është realizuar dhe shpërndarja e një sasie ndihme ushqimore në Elbasan dhe Cërrik.

    Për shtresa në nevojë të këtyre dy qyteteve janë shpërndarë 200 pako me artikujt kryesorë ushqimorë.

    Ashtu si kudo, kjo ndihmë është pritur me mirënjohje.

    Zhvillim të njëpasnjëshëm të aktiviteteve humanitare të Fondacionit ALSAR do të ketë dhe në dhjetëditëshin e fundit të Ramazanit.

    Në skajin jugor me ndihmat në Ramazan, pako me ushqime për familje në nevojë dhe nxënës të Konispolit

    Fondacioni ALSAR e ka zgjeruar numrin e të ndihmuarve në këtë Ramazan me një aktivitet humanitar në Konispol.

    Përmes projektit të çuar përpara me sukses në bashkëpunim me Agjencinë Turke për Bashkëpunim dhe Koordinim, TİKA, janë shpërndarë dhe në skajin jugor të vendit pako me ushqime.

    Ndihma është dhënë për familje në nevojë të Bashkisë së Konispolit dhe për nxënës të shkollës “Bido Sejko”.

    Sasia e kësaj ndihme përbëhej nga 300 pako ushqimore; lehtësuese të barrës së jetesës dhe me simbolikën e fortë të solidaritetit njerëzor në muajin e agjërimit.

    Aktiviteti humanitar i zhvilluar këtë të hënë marsi në Konispol do të ndiqet nga të tjera veprimtari shpërndarëse përgjatë kësaj jave.

    Veprimtari humanitare në Shkodër, iftar dhe ndihma ushqimore për njerëz në nevojë

    Në kuadër të muajit të Ramazanit dhe të frymës solidarizuese që e bashkëshoqëron atë pashmangshmërisht, Fondacioni ALSAR po realizon projekte të shumta humanitare në ndihmë të shtresave në nevojë.

    Kjo ndihmë po jepet në bashkëpunim me partnerë të fondacionit, kontribues dhe mundësues të aktiviteteve humanitare në qytete e fshatra të Shqipërisë.

    ADEMDER, shoqata me qendër në Turqi, bëri të mundur zhvillimin në fundjavë të dhurimit të një sasie të konsiderueshme ndihme ushqimore dhe të shtrimit të një iftari e të shpërndarjes së paketimeve me ushqim të parapërgatitur për iftar.

    Në qytetin e Shkodrës u shpërndanë 200 pako me ushqime për anëtarë të Shoqatës së Paraplegjikëve dhe Tetraplegjikëve e për familje në nevojë.

    U shtrua gjithashtu një iftar dhe u shpërndanë paketime me ushqim të parapërgatitur për iftar. Kjo ndihmë me paketime iftari do të vijojë të shpërndahet dhe këtë të hënë, ndërsa tërë aktiviteti i këtij kontributi të lidhur me iftaret është i destinuar për 500 persona.

    Angazhimi i ALSAR-it për t’ua bërë sa më të ngrohtë e më të përjetuar këtë Ramazan dhe më nevojtarëve do të sjellë të tjera aktivitete humanitare në ditët e ardhshme.

    Aktivitet i pandërprerë humanitar, pakot me ndihma ushqimore mbërrijnë dhe shpërndahen dhe në Gramsh, Dimal, Roskovec, Patos, Berat, Poliçan e Çorovodë

    Fondacioni ALSAR po zhvillon veprimtari të njëpasnjëshme në ndihmë të shtresave në nevojë në kuadër të ditëve të solidaritetit human në Ramazan.

    Është në traditën e tij ta intensifikojë punën në muajin e agjërimit dhe ta shtojë shumë numrin e nevojtarëve të ndihmuar aty ku është më e domosdoshme.

    Me kontributin e Agjencisë Turke për Bashkëpunim dhe Koordinim, TİKA, po shpërndahen prej fillimit të Ramazanit ndhma ushqimore për familje të jetimëve.

    Nga ky bashkëpunim kanë përfituar familje të tëra në shumë qytete e lokalitete, ndërsa radha e shpërndarjes ka qenë në segmentin Gramsh, Dimal, Roskovec, Patos, Berat, Poliçan dhe Çorovodë.

    Ndihmën në ushqime, dhënë me bujari dhe pritur me mirënjohje, e kanë marrë 200 familje.

    Ky projekt i gjerë ndihme do të vijojë realizimin e plotë dhe në ditët në vijim, duke e përçuar ngado solidarizimin me më nevojtarët në një muaj të tillë të begatë.