Category Page: Humanitare

    Familje në nevojë në Librazhd dhe Pogradec ndihmohen me lëndë drusore për ngrohje dhe pako ushqimore

    Aksioni i përbashkët humanitar i ALSAR-it dhe HASENE-së, organizatës së ndihmave me qendër në Gjermani, do të vazhdonte gjatë kësaj jave me ndihma të shpërndara në Librazhd dhe në Çërravë të Progradecit.

    Në ditë solidariteti human, familje në nevojë u ndihmuan me dru për ngrohje dhe me ushqime.

    Në Librazhd, dru zjarri u shpërndanë për 50 familje në nevojë. Shpërndarja u bë nga punonjësit e ALSAR-it dhe të HASENE-së.

    Në njësinë administrative Çërravë të Pogradecit ndihma e dhënë për 150 familje në nevojë ishte në pako ushqimore.

    Shpërndarja u bë në kuadër të projektit të ndihmave dimërore dhe të ngutshme.

    Fondacioni ALSAR organizon gjatë gjithë vitit veprimtari të këtilla humanitare në ndihmë të shtresave në nevojë kudo në vend, shumë prej të cilave kryhen në bashkëpunim me organizata dhe fondacione partnere ndërkombëtare.

    [rev_slider slidertitle=”postim alsar librazhd2″ alias=”postim-alsar-librazhd2-22″]

    Në Elbasan me ndihmat e HASENE-së

    Në ditën e dytë të aktivitetit humanitar të organizuar me mbështetjen e organizatës së ndihmave me qendër në Gjermani, HASENE, në ndihmë u është ardhur nevojtarëve të Elbasanit.

    ALSAR dhe HASENE kanë shpërndarë pako ushqimore, ngrohëse elektrike dhe batanije për jetimë, për familjet e tyre dhe për familje në nevojë.

    Në ndalesën e sotme në Elbasan, për çdonjë nga 100 fëmijë jetimë apo familjarë të tyre janë dhënë si ndihmë nga dy batanije dhe një ngrohëse elektrike; artikuj mjaft të nevojshëm në të ftohtin e dimrit.

    Në Labinot-Mal, 100 familje në nevojë janë ndihmuar me pako ushqimore, shpërndarë nga punonjësit tanë dhe të organizatës partnere.

    Gjithçka e dhuruar nevojtarëve ka qenë në kuadër të ndihmës humanitare emergjente dhe dimërore.

    Ditë të tilla të solidaritetit human, gjatë së cilave ai shprehet me shpërndarje ndihmash, janë të vazhdueshme në aktivitetin e Fondacionit ALSAR.

    [rev_slider slidertitle=”postim alsar ndihma elbasan” alias=”postim-alsar-dite-solidariteti-elbasan”]

    Ditë të solidaritetit human: me mbështetjen e HASENE-së në ndihmë të nevojtarëve

    Fondacioni ALSAR dhe HASENE, organizata e ndihmave me qendër në Gjermani, e kanë nisur këtë javë me një varg veprimtarish humanitare.

    Me mbështetjen e HASENE-së, në këto ditë solidariteti human do të ndihmohen nevojtarë në kuadër të ndihmave të ngutshme dhe atyre dimërore.

    Kështu, në bashkërendim me Bashkinë e Tiranës, në qendrën e saj sociale në Shkozë u shpërndanë të hënën pako ushqimore dhe batanije për 100 familje në nevojë.

    Po të hënën, për 150 familje fëmijësh jetimë u dhanë në mjediset tona ndihma në pako ushqimore.

    Zhvillimin e aktivitetit humanitar po e ndjekin dhe punonjës të HASENE-së, aktivë në shpërndarjen e ndihmave së bashku me ata të ALSAR-it.

    HASENE është një organizatë partnere me të cilën Fondacioni ALSAR ka një bashkëpunim të frytshëm në realizimin e projekteve të përbashkëta humanitare.

    [rev_slider slidertitle=”postim alsar dite solidariteti” alias=”postim-alsar-dite-solidariteti”]

    Veshmbathje për fëmijë jetimë, veprimtari humanitare e mbështetur nga IHH me qendër në Holandë

    Nën kujdesin e Fondacionit ALSAR, fëmijët jetimë janë përfitues të vazhdueshëm të ndihmave të ndryshme, të mundësuara nga projekte të realizuara në bashkëpunim me organizata, shoqata dhe fondacione partnere.

    Nga një projekt i tillë përfituan këtë të hënë 50 fëmijë jetimë, ndihmuar me veshmbathje.

    Përmes projektit të veshjeve për jetimët, të organizatës së ndihmave humanitare me qendër në Holandë, IHH, çdo fëmijë jetim mori dhuratë një palë pantallona, një bluzë apo triko, dhe një palë çorape.

    Jetimët u çuan dhe në një qendër tregtare për t’i zgjedhur veshjet e tyre.

    Në ceremoninë e shpërndarjes, zhvilluar në mjediset e Fondacionit ALSAR, ishin të pranishëm dhe përfaqësuesit e IHH-së me qendër në Holandë.

    Projekti i realizuar është veç një nga dhjetëra projekte ndihme për jetimët që realizohen përgjatë gjithë vitit.

    [rev_slider slidertitle=”postim alsar femijet jetim veshmbathje” alias=”postim-alsar-femijet-jetim-veshmbathje”]

    Fondacioni ALSAR dhuron fidanë për gjelbërimin e Tiranës

    Kontribues në përmirësimin e cilësisë së jetesës në kryeqytet, në gjelbërimin e hapësirave, të mjedisit tonë rrethues, Fondacioni ALSAR ka dhuruar 100 fidanë, destinuar për t’u mbjellë buzë një rruge të re.

    ALSAR e organizoi ceremoninë e dhurimit në bashkëpunim me Bashkinë e Tiranës, në një akt tjetër kontributi për kryeqytetin.

    Dhuruar në kuadër të nismës “Dhuro për Tiranën”, pemët e reja janë mbjellë në praninë e kryetarit të Bashkisë së Tiranës, z. Erion Veliaj, dhe të kryetarit të Fondacionit ALSAR, z. Mehdi Gurra.

    Në ceremoninë e dhurimit dhe të mbjelljes kanë qenë i pranishëm dhe personeli i Fondacionit ALSAR, së bashku me studentë nën kujdesin e ALSAR-it.

    Erion Veliaj shprehu mirënjohjen për Fondacionin ALSAR në emër të banorëve të kryeqytetit, duke e vlerësuar lart këtë kontribut të përsëritur për gjelbërimin e Tiranës.

    Kryetari i Fondacionit ALSAR, z. Mehdi Gurra, e çmoi nismën e Bashkisë për ta bërë Tiranën sa më të gjelbëruar dhe shprehu kënaqësinë që institucioni i drejtuar prej tij i është bashkuar me kohë nismës.

    Një Tiranë e gjelbëruar u siguron qytetarëve të saj ajër dhe mjedis më të pastër, jetë më të bukur dhe më të lumtur. ALSAR prej vitesh kontribuon për një Tiranë të tillë.

    [rev_slider slidertitle=”postim alsar mbjellim peme” alias=”postim-alsar-mbjelim-peme”]

    Aktiviteti humanitar i ALSAR-it në 2021-shin, dhjetëra projekte, mijëra të ndihmuar

    I përkushtuar në përmbushjen e objektivave në të tre komponentët e veprimtarisë së tij, Fondacioni ALSAR i kushtoi rëndësi të veçantë dhe gjatë 2021-shit, si në çdo vit tjetër, aktivitetit humanitar, për t’u ardhur në ndihmë shtresave në nevojë, për t’ua lehtësuar jetën dhe për t’u dhënë shpresë për një të ardhme më të mirë.

    Kujdes dhe ndihmë maksimale u tregua dhe u dha për fëmijët jetimë. Familjet e tyre përfituan po ashtu ndihma të ndryshme. Ndihma ushqimore dhe materiale përfituan shtresa në nevojë, familje të varfra, familje të të verbërve, të sëmurë në fazë terminale.

    “Ditët e solidaritetit me fëmijët jetimë”, “Përkujdesja sociale ndaj fëmijëve jetimë, një kontribut i shquar në ndihmë të shoqërisë”, “Ditët e solidaritetit human me njerëzit në nevojë”, “Ditët e solidaritetit human gjatë Ramazanit”, “Solidaritet në ditë feste”, “Dora e ngrohtë e bamirësisë në stinën e dimrit”, ishin moto dhe projekte që e nxitën dhe e udhëhoqën punën e ALSAR-it në ndihmë të të pamundurve, të të papasurve, të nevojtarëve.

    Aktiviteti humanitar u përqendrua te ndihma humanitare për të prekurit nga përmbytjet, te ndihma humanitare për familje në nevojë, ndihma në përmirësimin e kushteve të jetesës për familje në nevojë, ndihma me fidanë ullinjsh dhe arrash për familje të fëmijëve jetimë, ndihma ushqimore për të sëmurë rëndë, ndihma në veshmbathje për nevojtarë, ndihma financiare për fëmijët jetimë, ndihma në artikuj higjienikë dhe në aparatura mjekësore, dhurimi i mishit të kurbanit, shpërndarja e pakove me ushqime në zona të ndryshme të vendit, ardhja në ndihmë me mish “Adak”, dhënia e batanijeve dhe lëndës drusore për ngrohje në të hyrë të dimrit, etj.

    Intensitet i madh aktiviteti e shoqëroi muajin e Ramazanit, me ndihmat e shumta të dhuruara, ushqimore, financiare, në veshmbathje, me shtrimin e iftareve. Banorë fshatrash dhe qytetesh, besimtarë, nevojtarë, fëmijë jetimë dhe familje në nevojë, e ndienë pranë solidaritetin human të Fondacionit ALSAR dhe të partnerëve të tij ndërkombëtarë. Për të përmendur si shembull, vetëm gjatë muajit të Ramazanit u shpërndanë 8050 pako me ndihma ushqimore, u shtruan iftare apo u dha i paketuar ushqimi i iftarit për 7500 persona, dhe u dhuruan veshmbathje për 432 fëmijë jetimë.

    Gjeografia e ndihmave përfshiu Shkodrën, Tiranën, Durrësin, Kavajën, Dibrën, Krujën, Lushnjën, Elbasanin, Librazhdin, Gramshin, Mallakastrën, Pogradecin, Klosin, Belshin, Përrenjasin, Maliqin, etj., dhe rrethina të tyre.

    E tërë kjo ndihmë e dhënë u bë e mundur me mbështetjen e organizatave dhe fondacioneve partnere, të donatorëve të ndryshëm, që meritojnë pa dyshim falënderim për kontributin e dhënë dhe bashkëpunimin e shkëlqyer. Disa prej tyre kanë sigurisht kontribut më të madh, të shtrirë në kohë, e disa më të vogël dhe sporadik, por çdonjëri bashkëpunëtor i ALSAR-it vlen të përmendet këtu, duke nisur nga WEFA, HASENE, IHH me qendër në Holandë, UKIM, UK Islamic Mission, ATİB, HAYRAT, TİKA, Organizata Botërore Islame e Bamirësisë, Drejtoria e Përgjithshme e Vakëfeve dhe Ambasada e Shtetit të Kuvajtit, Konfederata Sindikale Turke HAK-İŞ, Rumeli Vakfı, ADEMDER, IHH me qendër në Belgjikë, Avrupa Yardım Vakfı, AYDER, Qendra Islame Shqiptare në Londër, IGMG Hasene Hilfs-und Sozialverein, EMIN, Global One.

    Si dhe në vitin paraardhës, aktiviteti humanitar i ALSAR-it u vështirësua nga kufizimet e vëna prej pandemisë, sidoqoftë pa u ndaluar apo zvogëluar. Të vendosur në përmbushjen e misionit të vënë vetes që në ditën e parë e krijimit të fondacionit, drejtuesit dhe punonjësit e ALSAR-it punuan pareshtur për ta çuar ndihmën te çdo nevojtar. “Alternativa e së Ardhmes” u erdhi në ndihmë gjatë vitit 2021 me projektet e saj mijëra njerëzve, shprehu solidaritet me ta dhe ua pakësoi sadopak hallet. Në më tepër se një dekadë e gjysëm, ky është një aktivitet humanitar i pandërprerë për asnjë çast, për asnjë ditë!

    [rev_slider slidertitle=”postim alsar ndihma e reja 2021 1″ alias=”postim-alsar-ndihma-2021-e-reja-1-1-1-1″]