Fondacioni ALSAR ka nisur zhvillimin e një vargu aktivitetesh disaditore në ndihmë të fëmijëve jetimë, në shprehje të solidaritetit me ta dhe në përmbushje të misionit të tij humanitar.

Aktivitetet në ditët e solidaritetit me fëmijët jetimë organizohen në bashkëpunim me një organizatë ndërkombëtare partnere, WEFA-n, me qendër në Gjermani.

Delegacionit të WEFA-s të ardhur në vendin tonë i prin kryetari i saj, z. Musab Aydın. Pjesë e delegacionit janë dhe një grup gazetarësh, për përgatitjen e një reportazhi mbi aktivitetet e këtyre ditëve.

Programi përmban mes të tjerash vizita në shtëpitë e fëmijëve jetimë në tre qytete të vendit, në Librazhd, Elbasan dhe Tiranë. Vizitat shërbejnë për të parë nga afër kushtet e jetesës së jetimëve, për ta prekur realitetin e tyre, për të përçuar te fëmijët jetimë dhe familjet e tyre ndjenjën e solidaritetit, të kujdesit të shoqërisë për ta.

Vizitat e para u kryen të enjten në pesë familje jetimësh në Librazhd. Të premten u vizituan familje të fëmijëve jetimë në Elbasan. Numër i njëjtë vizitash në familjet e jetimëve do të bëhet të dielën në Tiranë.

Për jetimët e vizituar nga përfaqësuesit e ALSAR-it dhe të WEFA-s jepen ndihma në pako ushqimore, në veshmbathje dhe në shumë monetare. Një ndihmë e tillë u dha për jetimët në Librazhd dhe Elbasan.

Programi i përbashkët me WEFA-n vijon të shtunën me të tjera aktivitete në kryeqytet me fëmijët jetimë.

Në kuadër të aktivitetit të tij humanitar, Fondacioni ALSAR i dhuroi spitalit të Peshkopi dy aparatura dialize, si ndihmë në përmirësimin e kushteve spitalore për t’u shërbyer sa më mirë të sëmurëve.

Dhurimi i aparaturave të përdorura të dializës u krye në bashkërendim me Drejtorinë e Shëndetit Publik në qytetin verilindor. Projektin e mbështeti IHH me qendër në Holandë, partnere energjike e ALSAR-it në një varg veprimtarish humanitare.

Ceremonia e dorëzimit të aparaturave të dializës u zhvillua sot, më 7 tetor, në spitalin e Peshkopisë.

Institucionet publike të kujdesit shëndetësor kanë përfituar dhe në të shkuarën nga aktiviteti humanitar i Fondacionit ALSAR, ndihmuar në mënyrë të qenësishme me aparatura apo mjete të tjera infrastrukturore.

Vlen të theksohet se ALSAR u kthye brenda pak javësh në Peshkopi me projekte humanitare. Ai dhuroi muajin e kaluar mjete shkollore dhe ushqime për nxënës dhe banorë të një lokaliteti pranë qytetit.

Me hyrjen e vjeshtës, ditët e ftohta nuk duken më aq larg sa ç’ishin në gushtin përvëlues. Dimri do të nisë të trokasë pak nga pak, duke sjellë dhe nevojën për t’u ngrohur.

Fondacioni ALSAR i paraprin stinës së ftohtë me nisjen e projektit të shpërndarjes së ndihmave dimërore për familje në nevojë.

Mes të parëve që e përfituan ndihmën këto ditë ishin 100 familje të fëmijëve jetimë në Tiranë. Për çdonjërën prej tyre u dhanë nga tre batanije.

Projektin e mbështeti IHH me qendër në Holandë.

Ndërsa kujdeset për fëmijët jetimë, ALSAR nuk lë jashtë vëmendjes dhe familjet e tyre, shpesh në nevojë për gjërat më elementare.

ALSAR-i u gjendet ngaherë pranë shtresave në nevojë të shoqërisë; ndihmat dimërore janë pjesë e aktivitetit humanitar të fondacionit.

Një ndihmë e dhënë për familjet në nevojë me afrimin e dimrit është lënda drusore për ngrohje. Pjesa më e madhe e tyre nuk kanë mundësi ta blejnë atë, as të ngrohen ndryshe, prandaj Fondacioni ALSAR e ka parë të nevojshme t’ua sigurojë një sasi të caktuar.

Me projektin humanitar të ALSAR-it për shpërndarjen e ndihmave dimërore, lëndë drusore për ngrohje në sasinë një metër kub u është shpërndarë 100 familjeve të fëmijëve jetimë në Tiranë.

Mbështetje për realizimin e projektit dha IHH me qendër në Holandë.

Projekti i shpërndarjes së ndihmave dimërore është në fillimet e veta për këtë sezon. Ditë pas dite, javë pas jave, muaj pas muaji, harta e shpërndarjes së ndihmave dimërore do të zgjerohet, e bashkë me të dhe numri i përfituesve, individë apo familje në nevojë.

Lënda drusore është vetëm një në ndihmat e shumta për nevojtarët që ALSAR jep përgjatë gjithë vitit.

Solidarizimi me njerëzit në nevojë, me të pamundurit, ndihma për ta, gjendet në esencën e aktivitetit të Fondacionit ALSAR.

Gjithanshmëria e ndihmës së dhënë për 200 fëmijë jetimë në Tiranë të hënën e fundit të shtatorit u plotësua me veshmbathjet e dhuruara atyre.

Pas marrjes së ndihmës periodike financiare, çantave dhe mjeteve të tjera shkollore, për jetimët u dhuruan dhe veshmbathje, pantallona, bluza dhe atlete.

Veprimtarinë dhuruese të Fondacionit ALSAR e mbështeti IHH me qendër në Holandë.

Aktiviteti humanitar i ALSAR-it i kushtuar fëmijëve jetimë ka në historikun e tij shumë projekte ndihmash, realizuar me sukses në të katër anët e vendit.

Qindra fëmijë jetimë janë prej vitesh nën përkujdesjen e Fondacionit ALSAR, të ndihmuar në çdo pikëpamje. Shumë prej projekteve të ndihmave për jetimët kanë patur dhe kanë mbështetjen e organizatave dhe fondacioneve të huaja partnere.

Në kuadër të aktivitetit të tij humanitar, të misionit për t’u ardhur në ndihmë shtresave në nevojë, veçanërisht fëmijëve jetimë, Fondacioni ALSAR shpërndau ndihmën financiare periodike për 200 jetimë në Tiranë.

Ndihma financiare e dhënë periodikisht i përket tremujorit të tretë të këtij viti. Ajo shkon për fëmijë jetimë të ndihmuar në mënyrë të vazhdueshme nga Fondacioni ALSAR.

Projekti u mbështet nga IHH me qendër në Holandë, një organizatë ndihmash me të cilën ALSAR ka bashkëpunim të ngushtë dhe të shtrirë në kohë.

Jetimë në Tiranë dhe në qytete të tjera të Shqipërisë kanë te ALSAR-i një ndihmues të sinqertë në lehtësimin e jetës së vështirësuar nga mungesa e prindit.

Kontributi financiar i ALSAR-it për jetimët përbën vetëm një pjesë të ndihmës së shumtë dhe të larmishme që u jepet atyre përgjatë gjithë vitit; një dëshmi e qartë e solidaritetit njerëzor!