Category Page: Humanitare

    Solidariteti human në muajin e agjërimit, banorë të fshatit Gërmenj në Rrogozhinë marrin ndihmë ushqimore

    Harta e aktiviteteve humanitare të Fondacionit ALSAR në këtë Ramazan zgjerohet ditë pas dite me të tjera vende të shkelura, me të tjerë njerëz të ndihmuar.

    Shtresa në nevojë po ndiejnë praninë e ndihmës njerëzore dhe ngrohtësinë e krijuar vetvetishëm prej këtij muaji të begatë.

    Partnerë ndërkombëtarë të ALSAR-it po kontribuojnë në dhënien e ndihmës ushqimore, aq të nevojshme për mijëra familje në kushte jo të mira jetese anembanë vendit.

    Në këtë kuadër, pako me ushqime u shpërndanë dhe në fshatin Gërmenj të Rrogozhinës. Ndihma e dhënë aty përbëhej nga 80 pako me artikujt kryesorë ushqimorë.

    Ndihmën dhe veprimtarinë shpërndarëse i mundësoi organizata humanitare UKIM (UK Islamic Mission), me qendër në Britaninë e Madhe.

    Fondacioni ALSAR do të zhvillojë gjatë tërë këtij muaji aktivitete të shpërndarjes së ndihmës ushqimore.

    Ndihma e dedikuar në këtë muaj për familje jetimësh, pako ushqimore jepen në Librazhd, Përrenjas, Pogradec dhe Korçë

    Fondacioni ALSAR ka vijuar shpërndarjen e ndihmës ushqimore në këtë muaj Ramazani për familje të jetimëve në qytete të ndryshme të vendit.

    Nga ky kontingjent ndihme, radhën e kanë patur për të përfituar banorë të Librazhdit, Përrenjasit, Pogradecit dhe Korçës.

    Kamioni me pakot ushqimore e ka përshkuar këtë segment në mesjavë, ndalur në të katër vendmbërritjet dhe pritur me mirënjohje.

    Ndihmën në ushqime e kanë marrë një numër i përgjithshëm prej 200 personash.

    TİKA, Agjencia Turke për Bashkëpunim dhe Koordinim, e ka mundësuar këtë aktivitet të gjerë humanitar në muajin e agjërimit.

    Ndihma ushqimore për familje jetimësh do të shpërndahen dhe në ditët në vazhdim përmes bashkërendimit midis Fondacionit ALSAR dhe TİKA-s.

    Shtrim iftari dhe dhënie e paketimeve me ushqim për iftar, aktivitete në Kukës dhe Tiranë

    Ndër aktivitetet e mirënjohura humanitare të Fondacionit ALSAR në Ramazan është shtrimi i iftareve dhe dhënia e ushqimit të parapërgatitur e të paketuar për iftar.

    Banorë në vendin e organizimit të një aktiviteti të tillë, besimtarë, shtresa në nevojë, etj., thirren në tryezat e shtruara për ta apo për të marrë ushqimin e përgatitur për familjet e tyre për iftar.

    Përveçse humanitar, ky aktivitet mbart dhe ndikim social, duke ndihmuar në afrimin e njerëzve dhe të përjetimit të përbashkët të mbylljes së agjërimit ditor.

    Në këtë kuadër është bërë dhe zhvillimi i këtyre aktiviteteve në Kukës dhe Tiranë në fundin e javës së lënë pas.

    Aktivitetet i përkisnin realizimit të projektit të shtrimit të iftareve për 600 persona me mbështetjen nga organizata IHH me qendër në Holandë.

    Kryetari i Fondacionit ALSAR dhe përfaqësuesi i IHHNL-së ishin të pranishëm në iftarin e shtruar në fundjavë.

    Përgjatë Ramazanit do të ketë në vazhdimësi aktivitete të ngjashme të zhvilluara përmes bashkëpunimeve të tilla.

    Në tre fshatra të Lushnjës shpërndahen pako me ushqime në kuadër të aktivitetit humanitar në Ramazan

    Fondacioni ALSAR nuk ka njohur pushim as këtë të dielë, në ditën e parë të marsit. Aktivitet humanitar është zhvilluar në Lushnjë, në tre fshatra.

    Pako me ushqime u shpërndanë në Zhamë, Çermë dhe Thanasaj për familje në nevojë.

    Ndihma ushqimore e shpërndarë përbëhej nga 234 pako.

    Ky ishte kontingjenti i dytë i ndihmave ushqimore të dhëna për shtresa në nevojë në kuadër të muajit të Ramazanit me kontributin e organizatës IHH me qendër në Holandë.

    Përfaqësuesi i IHHNL-së mori pjesë aktive në shpërndarjen e pakove për banorët e këtyre fshatrave.

    Bashkëpunimet e Fondacionit ALSAR me partnerë ndërkombëtarë dhe donatorë të ndryshëm garantojnë realizimin e projekteve humanitare përgjatë tërë muajit të begatë të Ramazanit.

    Ndihma ushqimore shpërndahen dhe në aksin verior, në Milot, Rrëshen, Mirditë dhe Kukës

    Aktiviteti humanitar i Fondacionit ALSAR ka vijuar në ditën e fundit të shkurtit me shpërndarjen e pakove ushqimore në segmentin gjeografik ku përfshiheshin Miloti, Rrësheni, Mirdita dhe Kukësi.

    Ndihma u prit me mirënjohje dhe në këtë aks verior dhe atë e përfituan 200 familje jetimësh.

    Edhe kjo shpërndarje e pakove me ushqime u mundësua nga mbështetja e Agjencisë Turke për Bashkëpunim dhe Koordinim, TİKA.

    Fondacioni ALSAR dhe TİKA po bashkëpunojnë në këtë Ramazan, ashtu si në vitet e kaluara, për shpërndarjen e një sasie të madhe ndihmash në ushqime për shtresa në nevojë, posaçërisht për familje të jetimëve.

    Lehtësimi i barrës së jetesës së nevojtarëve në ditë të solidaritetit human dhe përçimi kudo i atmosferës së muajit të begatë të Ramazanit janë synime të këtij aktiviteti të dendur humanitar.

    Familje jetimësh në Shijak, Durrës, Kavajë, Lushnjë dhe Fier marrin ndihma në ushqime në ditë të solidaritetit human

    Muaji i Ramazanit ka bërë tashmë një të tretën e parë të tij; një periudhë kohore në të cilën Fondacioni ALSAR ka zhvilluar një varg aktivitetesh humanitare në ndihmë të shtresave në nevojë.

    Në atmosferën e solidaritetit human të këtij muaji dhe të projekteve humanitare të parashikuara për t’u realizuar në të, janë shpërndarë të premten ndihma në ushqime në disa qytete.

    Veprimtaritë e kësaj dite janë mundësuar me mbështetjen nga TİKA, Agjencia Turke për Bashkëpunim dhe Koordinim, dhe në kuadër të bashkërendimit të Fondacionit ALSAR me të për shpërndarjen e ndihmave ushqimore për familje jetimësh në Ramazan.

    Pako me ushqime janë shpërndarë në Shijak, Durrës, Kavajë, Lushnjë dhe Fier. Ndihmën e kanë përfituar 200 familje jetimësh.

    Fundjava do të ketë gjithashtu aktivitete të ngjashme humanitare, në të tjera pikëmbërritje, për ta bërë sa më të gjerë hartën e të ndihmuarve në Ramazan dhe për ta përçuar frymën e tij ngado.