Category Page: Humanitare

    Aktiviteti humanitar në Ramazan: shpërndahen pako me ushqime në qarkun e Elbasanit për familje jetimësh

    Në traditën e një aktiviteti të ngjeshur humanitar në muajin e begatë të Ramazanit, Fondacioni ALSAR po kryen shpërndarje të ndihmës ushqimore në pjesë të ndryshme të vendit.

    Radhën në veprimtarinë e këtyre ditëve e ka patur dhurimi i pakove me ushqime në qarkun e Elbasanit.

    Ndihma në ushqime është shpërndarë për 150 familje të jetimëve në këtë qark.

    Kjo ndihmë është mundësuar nga TİKA, Agjencia Turke për Bashkëpunim dhe Koordinim.

    Falë bashkëpunimit dhe bashkërendimit të Fondacionit ALSAR dhe TİKA-s, shumë familje të tjera jetimësh do ta përfitojnë gjatë këtij muaji ndihmën me pako ushqimore.

    Ramazani është një muaj i veçantë dhe për solidaritetin shoqëror, për ndihmën e dhënë shtresave në nevojë. Fondacioni ALSAR dallohet për iniciativat humanitare dhe projektet e realizuara me institucione, organizata e shoqata partnere.

    Përgjatë Ramazanit pranë njerëzve në nevojë, shpërndahen pako me ushqime në Fushë-Krujë, Thumanë, Lezhë, Shkodër dhe Koplik

    Fondacioni ALSAR intensifikon aktivitetin humanitar me ardhjen e Ramazanit. Një prej tre kolonave të veprimtarisë së tij merr tjetër forcë në këtë muaj dhe dendësohet me kalimin e ditëve.

    Ndihma mbërrin në shtresa në nevojë, në njerëz në pritje për përkrahje. Fryma e solidaritetit përshkon qytete, fshatra e lokalitete, ngroh zemrat e nevojtarëve dhe ua lehtëson jetesën në këtë kohë të veçantë të vitit.

    Në kuadër të bashkërendimit me TİKA-n, Agjencinë Turke për Bashkëpunim dhe Koordinim, dhe të ndihmës ushqimore të mundësuar prej saj, java ka nisur me shpërndarjen e pakove në segmentin e parë.

    Në Fushë-Krujë, Thumanë, Lezhë, Shkodër dhe Koplik është bërë dhurimi i pakove me artikuj ushqimorë për banorë në nevojë.

    Në këtë segment të parë të shpërndarjes së ndihmës së siguruar nga TİKA, pako me ushqime janë dhënë për 200 familje të fëmijëve jetimë.

    Në të tjera vendndalime do të dërgohet kjo ndihmë në ditët e ardhshme, te të tjerë nevojtarë.

    Një varg projektesh humanitare presin radhën për t’u realizuar nga ALSAR-i në bashkëpunim me institucione, organizata e shoqata partnere.

    Fondacioni ALSAR dhe TİKA shpërndajnë ndihma ushqimore për jetimë të kryeqytetit në nisje të Ramazanit

    Fondacioni ALSAR dhe Agjencia Turke për Bashkëpunim dhe Koordinim (TİKA) kanë zhvilluar një aktivitet humanitar të mërkurën, më 18 shkurt, në kuadër të nisjes së muajit të Ramazanit.

    Në pallatin e sportit “Asllan Rusi” është bërë shpërndarja e ndihmës humanitare në pako me ushqime për jetimë të Tiranës.

    Kryetari i Fondacionit ALSAR, z. Mehdi Gurra, dhe koordinatori i TİKA-s në Tiranë, z. Mustafa Ata, kanë qenë të pranishëm në shpërndarjen e ndihmave dhe u janë drejtuar pjesëmarrësve me fjalë përshëndetëse.

    Atmosfera festive ishte lehtësisht e dukshme gjatë aktivitetit humanitar. Për jetimët u shpërndanë 900 pako me artikujt bazë ushqimorë.

    Me aktivitetin startoi një fushatë e gjerë e shpërndarjes së ndihmave ushqimore në Ramazan, ndërsa TİKA do të dhurojë një total prej 3500 pakosh me ushqime për jetimë dhe familje në nevojë anembanë vendit, të paraqitur për ndihmë pranë Fondacionit ALSAR.

    Aktivitete të tilla humanitare do të ketë në vazhdimësi përgjatë tërë Ramazanit. Përçimi i frymës së këtij muaji të begatë, lehtësimi i përditshmërisë së shtresave në nevojë dhe shprehja e solidaritetit njerëzor i bashkëshoqërojnë në synim këto aktivitete.

    Ndihma në ushqime për familje në nevojë, realizim i projekteve humanitare në prag të Ramazanit

    Fondacioni ALSAR ka zhvilluar në tre ditët e fundit të javës së sapombyllur disa aktivitete humanitare në kuadër të projekteve të ndihmës për familje në nevojë.

    Shpërndarja e ndihmave ushqimore është bërë në prag të Ramazanit, në bashkëpunim dhe koordinim me partnerë të ALSAR-it.

    Një sasi prej 800 pakosh janë shpërndarë për familje në nevojë në lokalitete të ndryshme të vendit.

    Të parët kanë përfituar anëtarë të shoqatës “Shpresa për jetën” në Tiranë; pako janë dhënë për 100 familje.

    Në ditën e dytë të këtij aksioni humanitar është dhënë realizuar shpërndarja e 200 pakove me ushqime në fshatin Ponçarë të Devollit dhe e 200 pakove të tjera në Korçë.

    Për 250 familje në fshatrat Zall-Bastar dhe Vilëz të Tiranës është dhënë kjo ndihmë me pako ushqimore në ditën e tretë.

    Konviktit të Fondacionit ALSAR i është ardhur në ndihmë me 50 pako.

    I tërë aktiviteti është kryer në ndërveprim me koordinatorët lokalë të fondacionit.

    HASENE, organizata e ndihmave humanitare me qendër në Gjermani, ka mundësuar realizimin e projektit të gjerë humanitar. Përfaqësues të saj kanë qenë të pranishëm në shpërndarjen e ndihmës, kanë parë nga afër kushtet e jetesës të përfituesve, si dhe kanë kryer vizita në disa familje në nevojë.

    Zhvillimi i projekteve të ndihmës humanitare në prag të Ramazanit dhe gjatë tij përsëritet për çdo vit, si një traditë tashmë e konsoliduar e aktivitetit humanitar të ALSAR-it.

    ALSAR-i e pret Ramazanin me aktivitete humanitare, shpërndahen pako ushqimore në Kavajë

    Muaji i begatë i Ramazanit, i agjërimit njëmujor për hir të Zotit, është shumë pranë, dhe vetëm pak ditë na ndajnë prej tij. Në traditën e konsoliduar prej vitesh të Fondacionit ALSAR, Ramazani pritet me një varg aktivitetesh humanitare në ndihmë të shtresave në nevojë.

    Realizimi i projekteve të shumta humanitare ka nisur, i mbështetur nga organizata e shoqata partnere jashtë vendit. Në një gjeografi të gjerë do mbërrijë ndihma humanitare, e destinuar për të përçuar solidaritet, për të lehtësuar barrën e përballimit të jetesës, e për t’i përfshirë dhe më nevojtarët në frymën festive të Ramazanit.

    Një aktivitet i tillë humanitar është zhvilluar në Kavajë, në një prej fshatrave të saj, ku janë dhuruar pako me artikujt kryesorë ushqimorë.

    Për banorë të zonës, për familje në nevojë, janë shpërndarë 100 pako me ushqime, si fazë e parë e një projekti humanitar të mbështetur nga IHH me qendër në Holandë.

    Ky kontingjent i parë do të pasohet nga të tjerë, pasi organizata IHH me qendër në Holandë do të shpërndajë në total 350 pako ushqimore.

    Donatorët do të jenë vetë të pranishëm gjatë Ramazanit në shpërndarjen e ndihmave, ndërsa parashikohen dhe realizime të projekteve të tjera humanitare, si, për shembull, shtrimi i iftareve.

    Ndihma humanitare për familje në nevojë, shpërndahen pako me ushqime në dy fshatra të Tiranës

    Fondacioni ALSAR ka zhvilluar një aktivitet humanitar në ditët e fundit të janarit në dy fshatra të Tiranës, në Pinet dhe Sauqet.

    Projekti përmbante shpërndarjen e 100 pakove me artikuj ushqimorë për familjet e këtyre fshatrave dhe u realizua në prag të muajit të Ramazanit.

    Një sasi prej 50 pakosh u shpërnda për familje të fshatit Pinet; 50 pakot e tjera u dhanë për familje të fshatit Sauqet.

    Shpërndarjen e kryen punonjës të Fondacionit ALSAR dhe të shoqatës së ndihmave që e mundësoi realizimin e projektit, HAYRAT, me qendër në Turqi.

    Aktiviteti përbënte vetëm një fazë të parë të dhënies së ndihmës humanitare. Projekte të tjera humanitare do të realizohen gjatë Ramazanit.

    ALSAR hyn tani në një periudhë me aktivitet të ngjeshur humanitar në mbështetje të shtresave të ndryshme në nevojë të shoqërisë.