Bota shqiptare është më e varfër sot me kalimin në botën tjetër të një prej penave më produktive të publicistikës së epokës postkomuniste, pluraliste, demokratike.

Abdi Baleta ka ndërruar jetë në moshën 84-vjeçare, duke lënë pas një trashëgimi të pasur të aktivitetit publicistik, të përkushtimit të plotë ndaj ideve dhe projeksioneve nacionale.

Diplomati i para ’90-s u dallua si ndër protagonistët dhe ekspertët më të spikatur të Partisë Demokratike në fillimet e saj. Formimi dhe elokuenca e Abdi Baletës e veçuan atë në veprimtarinë parlamentare të viteve të para të sistemit të ri shumëpartiak. I pamësuar të lëshonte pe në bindjet e tij, ai provoi dhe rrugë të reja për sa kontribuoi cilësisht në politikë.

Tërheqja pa zhurmë nga arena e spektaklit politik i siguroi Abdi Baletës mundësinë për t’iu dhënë tërësisht publicistikës, ku shkëlqeu me integritetin parimor dhe karakterin jokonformist.

Mbrojtja e gjithçkaje kombëtare, zëri i ngritur për Kosovën, qëndrimi i palëkundur kundërvënës ndaj islamofobisë dhe qasja bindëse se Islami i ruajti shqiptarët nga sllavizimi dhe helenizimi i dhanë Abdi Baletës vlerësimin dhe respektin e merituar.

Fondacioni ALSAR i botoi të ndjerit serinë e plotë publicistike, prej 36 veprash, përfshirëse të një vargu të gjatë temash kombëtare të trajtuara gjerësisht dhe imtësisht.

ALSAR u përcjell më së pari ngushëllime bashkëshortes dhe dy vajzave të Abdi Baletës, më pas të afërmve dhe miqve të tij, rrethit në të cilin e ushtroi aktivitetin dhe të gjithë atyre që ia çmuan veprimtarinë dhe fjalën.

Lutjet e ALSAR-it janë për të!

Fondacioni ALSAR përcjell në këtë ditë me simbolikë të fuqishme urimin e përzemërt dhe gjithpërfshirës për një Kurban Bajram të gëzuar!

U përjetoftë ky Kurban Bajram me përshpirtshmërinë e nxitur natyrshëm dhe vetvetiu nga domethënia e mbartur prej thellësisë së tij burimore!

Na bëftë kjo festë më të njerëzishëm, më të prekshëm, më të prirur për t’iu gjendur pranë njëri-tjetrit, më të solidarizuar me vuajtjet e krijesave të tjera njerëzore afër dhe larg nesh!

Akti i gatishmërisë së Ibrahimit, patriarkut të monoteizmit, për të flijuar të birin për hir të Zotit të Gjithësisë përçon në njerëzinë botëkuptimin e duhur mbi ekzistencën tonë në këtë botë dhe i jep çdo krijese njerëzore me vetëdije të formuar si duhet energjinë dhe dëshirën për sakrifikim.

Devotshmëria jonë është ajo që vlen, që mbërrin, te Krijuesi, i Plotfuqishmi, Mëshiruesi, e jo gjaku dhe mishi i gjësë së flijuar. Dhe kjo devotshmëri nuk duhet të jetë një fotografim çasti, njëditor, por cilësi e pandashme dhe shumë e vyer e jetës sonë, për të qenë të mirë sot dhe mirë nesër, këtu, në këtë botë, e në amshim.

Kurban Bajrami është festë e sakrificës më të lartë njerëzore, kujtesë se kjo jetë është e mbushur me sprova, më së pari për besimin tonë, e se kalimi me sukses i tyre sjell kënaqësi genuine, esenciale.

Pa përsiatjen e nevojshme reflektuese, pa na ngjallur empati e solidaritet njerëzor, pa na inspiruar për përmirësimin e qenies sonë, kjo festë mbetet e mangët. Duhet kujtuar se vullneti për të sakrifikuar gjërat më të shtrenjta për hir të Hyjnores është virtyt i krijesës njerëzore të devotshme.

Edhe një herë, me çdo fjalë të thënë më sipër, Fondacioni ALSAR uron: Gëzuar Kurban Bajramin!

Në këtë ditë feste për besimtarët muslimanë, në këtë ditë të madhe kremtimi, Fondacioni ALSAR përcjell urimet më të mira.

Ky moment final i një muaji sakrifice, devotshmërie dhe adhurimi meriton të festohet si duhet, meriton të përjetohet si një gëzim më se i përligjur.

Përkushtimi ndaj Zotit kapi maja në Ramazan, e bëri krijesën njerëzore më të përulur, më adhuruese, më sfiduese ndaj egos, shumë më të prirur ndaj së mirës dhe shumë më të frenuar ndaj së keqes.

Muajin e agjërimit e bashkëshoqëroi solidariteti njerëzor, braktisja e individuales dhe përqafimi i shoqërores, forcimi i kohezionit social.

Masivizimi i agjërimit i dha tërë muajit një atmosferë feste, ndeshur kudo e prekur në shumë mjedise.

Fitër Bajrami është epilogu i lutjeve të gjata dhe i përshpirtshmërisë kolektive, është festa në mbarim të sakrificave domethënëse dhe vetëshprehëse.

Fondacioni ALSAR, pas një aktiviteti intensiv humanitar njëmujor, të përditshëm, të lodhshëm, frytdhënës dhe frymëzues, uron për të gjithë një Fitër Bajram të gëzuar!

Me nisjen e ditëve të begata të muajit të madhërueshëm të Ramazanit, Fondacioni ALSAR u përcjell të gjithë besimtarëve urimin për agjërim të lehtë e të pranuar te Zoti i gjithësisë!

Privimet e këtij muaji le t’u shërbejnë agjëruesve për të përmirësuar qenien e tyre, brendinë dhe të jashtmen e tyre, për t’ua zbukuruar shpirtin, zemrën dhe sjelljen!

Le të shndërrohet ky vrapim njëmujor drejt përsosjes dhe kërkimit të fitimit të kënaqësisë së të Plotfuqishmit në një pasion që do ta shoqërojë gjatë gjithë jetës njeriun!

Ramazani është muaji kur fjala dhe puna e mirë ndeshen shumë më dendur se në çdo pjesë tjetër të vitit, kur përkorësia dhe devotshmëria janë tipare shumë më të dukshme, kur solidariteti dhe vëllazëria triumfojnë ndaj shpirtvogëlsisë, egos së sëmurë dhe meskinitetit.

Ky muaj i festivalit të së mirës i sjelltë begati çdo krijese njerëzore! Adhurim e agjërim të sinqertë për çdokënd!

ALSAR i uron çdo besimtari, çdo agjëruesi, që të përjetojë gjatë këtij Ramazani momente të përshpirtshmërisë së skajshme, gjurmëlënëse në të ardhmen e tij!

Qoftë i mbarë ky Ramazan! Qofshin të pranuara adhurimet tona! Qoftë i pranuar te Zoti agjërimi ynë!

Të vegjël e të rinj, djem e vajza, u kanë dhënë fund pushimeve të verës dhe kanë vërshuar sot në objektet e tyre shkollore. Mbërrijnë në shkollë me energji të reja dhe me synimin e përhershëm për të marrë dije, për t’u arsimuar e për t’u bërë të dobishëm për familjen dhe shoqërinë.

Më të vegjlit ulen për herë të parë në bankat e shkollës, provojnë për herë të parë ndjesinë e qenies në një klasë, të ndjekjes së mësimit, e të bërjes së detyrave në kohën që deri dje e shfrytëzonin për të luajtur.

Për më të rriturit është një rinisje e ecjes në rrugën e shkollimit, me ambicie të konsoliduara për shumë prej tyre, e me objektiva të qarta për të ardhmen.

Përjetim i veçantë është sot dhe për mësuesit dhe mësueset, këta bartës të detyrës fisnike të përcjelljes së dijes te nxënësit.

Fondacioni ALSAR u uron një vit të mbarë shkollor të gjithë nxënësve, në mbarë vendin tonë. I njëjti urim për mbarësi në këtë ditë feste për shkollat është dhe për mësuesit e mësueset.

Si një mbështetës i palodhur i përpjekjeve për shkollim të çdo individi të shoqërisë sonë, Fondacioni ALSAR përsërit angazhimin e pandryshueshëm për kontribut të shumanshëm në fushën e arsimit.

Në këtë ditë feste për të gjithë ata të cilët e kanë besimin islam pjesë esenciale të qenies dhe jetës së tyre, në këtë atmosferë sublime që krijon simbolika e flijimit si nënshtrim absolut ndaj Zotit, Fondacioni ALSAR uron për të gjithë shqiptarët një Kurban Bajram të gëzuar!

Kurbani, me përçimin e fuqishëm, e lartëson njeriun në virtyt dhe e afron më pranë Krijuesit, si dëshmi e gatishmërisë për t’iu bindur dhe përulur vullnetit të Plotfuqishmit.

Akti i Ibrahimit për ta çuar në vend fjalën hyjnore ishte nënshtrim i pastër, i sinqertë; një veprim shembullor i skalitur si sprovë e kaluar me sukses.

Përsosja jonë kalon përmes akteve flijuese, pasuruese për shpirtin tonë, pastruese dhe ndërgjegjësuese. Krijesa njerëzore nuk mund ta vërë poshtë vesin e t’i jepet devocionit pa atë dashuri të madhe për Hyjnoren që ia bën të lehtë sakrificën.

Nuk janë mishi dhe gjaku që arrijnë tek Ai, por devotshmëria jonë. Pa pastrimin tonë të brendshëm, pa përmirësimin e vetvetes, shoqëria e ka të pamundur të bëhet më e mirë, mirësia e ka të pamundur të mbizotërojë.

Kurbani ynë reflekton prirjen tonë për nga e mira, të vënë më në pah me ndarjen e gjësë së flijuar në njerëzit përreth.

Të shërbejë, pra, kjo ditë, kjo festë, si nxitëse për reflektim, për çdonjë nga ne, për çdo besimtar musliman, për çdo qytetar dhe anëtar të shoqërisë sonë, për çdo pjesëtar të ummetit islam.

Edhe një herë, Fondacioni ALSAR ua uron të gjithëve festën e flijimit, me shpresën e pranimit të sakrificës!