Me nisjen e ditëve të begata të muajit të madhërueshëm të Ramazanit, Fondacioni ALSAR u përcjell të gjithë besimtarëve urimin për agjërim të lehtë e të pranuar te Zoti i gjithësisë!

Privimet e këtij muaji le t’u shërbejnë agjëruesve për të përmirësuar qenien e tyre, brendinë dhe të jashtmen e tyre, për t’ua zbukuruar shpirtin, zemrën dhe sjelljen!

Le të shndërrohet ky vrapim njëmujor drejt përsosjes dhe kërkimit të fitimit të kënaqësisë së të Plotfuqishmit në një pasion që do ta shoqërojë gjatë gjithë jetës njeriun!

Ramazani është muaji kur fjala dhe puna e mirë ndeshen shumë më dendur se në çdo pjesë tjetër të vitit, kur përkorësia dhe devotshmëria janë tipare shumë më të dukshme, kur solidariteti dhe vëllazëria triumfojnë ndaj shpirtvogëlsisë, egos së sëmurë dhe meskinitetit.

Ky muaj i festivalit të së mirës i sjelltë begati çdo krijese njerëzore! Adhurim e agjërim të sinqertë për çdokënd!

ALSAR i uron çdo besimtari, çdo agjëruesi, që të përjetojë gjatë këtij Ramazani momente të përshpirtshmërisë së skajshme, gjurmëlënëse në të ardhmen e tij!

Qoftë i mbarë ky Ramazan! Qofshin të pranuara adhurimet tona! Qoftë i pranuar te Zoti agjërimi ynë!

Të vegjël e të rinj, djem e vajza, u kanë dhënë fund pushimeve të verës dhe kanë vërshuar sot në objektet e tyre shkollore. Mbërrijnë në shkollë me energji të reja dhe me synimin e përhershëm për të marrë dije, për t’u arsimuar e për t’u bërë të dobishëm për familjen dhe shoqërinë.

Më të vegjlit ulen për herë të parë në bankat e shkollës, provojnë për herë të parë ndjesinë e qenies në një klasë, të ndjekjes së mësimit, e të bërjes së detyrave në kohën që deri dje e shfrytëzonin për të luajtur.

Për më të rriturit është një rinisje e ecjes në rrugën e shkollimit, me ambicie të konsoliduara për shumë prej tyre, e me objektiva të qarta për të ardhmen.

Përjetim i veçantë është sot dhe për mësuesit dhe mësueset, këta bartës të detyrës fisnike të përcjelljes së dijes te nxënësit.

Fondacioni ALSAR u uron një vit të mbarë shkollor të gjithë nxënësve, në mbarë vendin tonë. I njëjti urim për mbarësi në këtë ditë feste për shkollat është dhe për mësuesit e mësueset.

Si një mbështetës i palodhur i përpjekjeve për shkollim të çdo individi të shoqërisë sonë, Fondacioni ALSAR përsërit angazhimin e pandryshueshëm për kontribut të shumanshëm në fushën e arsimit.

Në këtë ditë feste për të gjithë ata të cilët e kanë besimin islam pjesë esenciale të qenies dhe jetës së tyre, në këtë atmosferë sublime që krijon simbolika e flijimit si nënshtrim absolut ndaj Zotit, Fondacioni ALSAR uron për të gjithë shqiptarët një Kurban Bajram të gëzuar!

Kurbani, me përçimin e fuqishëm, e lartëson njeriun në virtyt dhe e afron më pranë Krijuesit, si dëshmi e gatishmërisë për t’iu bindur dhe përulur vullnetit të Plotfuqishmit.

Akti i Ibrahimit për ta çuar në vend fjalën hyjnore ishte nënshtrim i pastër, i sinqertë; një veprim shembullor i skalitur si sprovë e kaluar me sukses.

Përsosja jonë kalon përmes akteve flijuese, pasuruese për shpirtin tonë, pastruese dhe ndërgjegjësuese. Krijesa njerëzore nuk mund ta vërë poshtë vesin e t’i jepet devocionit pa atë dashuri të madhe për Hyjnoren që ia bën të lehtë sakrificën.

Nuk janë mishi dhe gjaku që arrijnë tek Ai, por devotshmëria jonë. Pa pastrimin tonë të brendshëm, pa përmirësimin e vetvetes, shoqëria e ka të pamundur të bëhet më e mirë, mirësia e ka të pamundur të mbizotërojë.

Kurbani ynë reflekton prirjen tonë për nga e mira, të vënë më në pah me ndarjen e gjësë së flijuar në njerëzit përreth.

Të shërbejë, pra, kjo ditë, kjo festë, si nxitëse për reflektim, për çdonjë nga ne, për çdo besimtar musliman, për çdo qytetar dhe anëtar të shoqërisë sonë, për çdo pjesëtar të ummetit islam.

Edhe një herë, Fondacioni ALSAR ua uron të gjithëve festën e flijimit, me shpresën e pranimit të sakrificës!

Në një ditë feste për besimtarët muslimanë ngado në botë, në mbarim të një muaji të mbushur me sfida vetjake, për t’u bërë më të përkorë e më të mirë, urojmë për të gjithë shqiptarët një Bajram të gëzuar!

Sakrifica e agjërimit, me të cilën njeriu ngjit shkallë në nivelin e qenësisë së tij, përbën një vepër sublime për hir të Zotit. Ajo është rrugë drejt përmbushjes shpirtërore, drejt së kuptuarit të duhur të qëllimit për çka jemi sjellë në këtë botë kalimtare.

Ramazani, muaj i tregimit të vullnetit të fortë dhe devotshmërisë, përbashkon zemra dhe ushqen ndjesi të larta njerëzore. Empatia dhe solidarizimi mbizotërojnë ndër agjërues e përtej, duke e bërë njeriun më social.

Kjo gatishmëri për të hequr dorë nga gjëra të dëshiruara në përditshmërinë tonë, qoftë dhe për një muaj, i jep impulse pozitive shoqërisë, ndjekur nga kënaqësia maksimale e të përjetuarit së bashku të Bajramit.

Si në çdo vit dhe për çdo Ramazan, Fondacioni ALSAR e pati këtë muaj plot me aktivitet humanitar, në lëvizje pandërprerë në shpërndarjen e ndihmës dhe në përçimin e frymës së solidaritetit njerëzor.

Me vetëdijen për misionin tonë, përsëritëm vetveten dhe u gjendëm sërish krah njerëzve, për ta bërë më të lehtë sakrificën tek disa, e për t’i lehtësuar ngushticat te të tjerë.

Urimi i përzemërt në këtë mbarim agjërimi vjen natyrshëm, dalë nga zemra dhe mbarëpërfshirës: GËZUAR!

Fondacioni ‘ALSAR’ vjen me një botim të ri për lexuesin shqiptar me titull ”Dua të jetoj”.Një histori e e vërtetë e hedhur në rreshta nga pena e shkrimtarit Burhan al-Din Sejdi Fili zhvillohet në kampet e internimit në Shqipërinë e periudhës së regjimit komunist.

Një realitet i hidhur i përcjellur bukur emocionalisjt nga pena e Burhan Filit. Edhe pse frika instiktive e nënë Bajames për të panjohurën, po ashtu boshllëku shpirtëror i saj nga zhgënjimet dhe fatkeqësitë e përjetuara, ajo përsëri e deshi fort jetën e u kap fort pas litarit të besimit në Allah dhe arriti ta sfidojë fatkeqësinë e saj.

Autori ka ditur të prekë mjeshtërisht temën e fatit të njeriut të ndodhur në udhëkryq e asaj kohe dhe të duket sikur personazhi kryesorë i romanit, nënë Bajamja në çdo rresht përcjellë mesazhin që pavarësisht gjithçkaje nuk dëshironte të binte pre e vdekjes së pangopur.

Një rrëfim i bukur mundi dhe përjetësimi i mpleksur nëpërmjet forcës, guximit dhe besimit të shkruar nga Burhan al-Din Sejdi Fili.

Fondacioni ‘ALSAR’ ka vijuar shpërndarjen e ndihmës ekonomike për familjet e jetimëve.
Në bashkëpunim me organizatën humanitare ‘HASENE’ me qendër në Gjermani, në ambientet e fondacionit ‘ALSAR’ u shpërndanë çeqe për jetimët.

Fondacioni ‘ALSAR’ qëndron në krah të fëmijëve jetimë!