Bazuar në programin e saj arsimor, për t’iu ofruar  studentëve mbështetje dhe mundësi për të fituar përvojë si për kërkime ashtu edhe për shprehitë e duhura profesionale, Fondacioni “ALSAR” gjatë periudhës janar – maj të këtij viti ka vijuar programin e krijimit të mundësive për zhvillimin e praktikave mësimore për studentët e fakultetit të shkencave sociale me synimin që të mund të marrin përvoja administrative e trajnime profesionale, duke i aftësuar ata për tregun e punës, dhe duke realizuar njëherazi një element lehtësues për universitetin në këtë fushë.

Në funksion të këtij programi është nënshkruar edhe një marrëveshje bashkëpunimi ndërmjet Fondacionit “ALSAR” dhe Fakultetit të Shkencave Sociale, ku përmes së cilës u mundësohet studentëve kryerja e praktikës mësimore. Në këtë kuadër gjatë periudhës nëntor – dhjetor në koordinim e bashkërendim të plotë me Departamentin e Punës dhe Politikës Sociale, po ndiqet angazhimi dhe aktivizimi i tyre në aspektin e trajnimit dhe kualifikimit administrativ, në fushën e zbatimit të projekteve të përkujdesjes sociale ndaj fëmijëve jetimë.

Në vijimësi të zhvillimit të veprimtarisë së tij arsimore Fondacioni “ALSAR” zhvilloi më 26 prill në Hotel Tirana Internacional, ceremoninë e “Akordimit të bursave 150 studentëve të ekselencës”, duke realizuar për të katërtin vit radhazi, këtë program mbështetjeje e inkurajimi në ndihmë të studentëve të dalluar, me synimin për t’iu ofruar atyre mundësi të reja që ata të zgjerojnë horizontin e njohurive të tyre, të aftësohen në drejtim të formimit, zhvillimit dhe përgatitjes së tyre të specializuar profesionale dhe duke i orientuar edhe me asistencë motivuese morale, materiale dhe akademike.
Në ceremoninë e organizuar morën pjesë përfaqësues të trupit diplomatik të akredituar në vendin tonë, dekani i Fakultetit të Histori – Filologjisë Prof. Dr. Sabri Laçi, pedagogë, drejtues të organizatave të shoqërisë civile, studentë të ekselencës dhe prindër të studentëve përfitues të kësaj burse.
Ceremoninë e hapi kryetari i Fondacioni “ALSAR”, Z. Mehdi Gurra, i cili, pasi përshëndeti pjesëmarrësit në takim, foli për veprimtarinë e fondacionit të drejtuar prej tij në fushën e arsimit dhe të edukimit të të rinjve shqiptarë, veçanërisht atyre të talentuar nëpërmjet mbështetjes dhe inkurajimit akademik. Në fjalën e tij, ai dha shifra mjaft interesante. “Kështu, në katër vjet, tha ai, Fondacioni ALSAR ka akorduar për studentët ekselentë mbi 400 bursa, me një rritje progresive nga viti në vit. Treguesit e pritshmërisë së tij kanë ardhur gjithnjë në rritje, numri i përfituesve në vitin 2014 ka qenë 25 studentë, tashmë gjatë këtij viti akademik, falë mbështetjes dhe inkurajimit të partnerëve tanë, numri i tyre ka arritur në 150 studentë.

Numri i studentëve përfitues sipas fakulteteve:

Fakulteti i Drejtësisë – 18 studentë;  Fakulteti i Shkencave të natyrës – 20 studentë;                   Fakulteti Ekonomik – 15 studentë; Fakulteti i Mjekësisë – 36 studentë;                               Fakulteti i Shkencave Sociale – 35 studentë; Fakulteti i Histori-Filologjisë  –  26  studentë.

Fondacioni jo vetëm interesohet, për këta studentë në vijimësi, por me programe aftësimi dhe projekte të tillë si: “Nise tani karrierën tënde”, “Në horizontin e vullnetarizmit”; “Miqtë e librit” dhe ”Takim me personalitete”, synon të kontribuojë sadopak në orientimin e vëmendjes së studentëve drejt vullnetarizmit, punës në grup, dhe mendimit kritik si mekanizmat më të mirë të aftësimit kulturor e profesional të rritjes së potencialeve të tyre intelektuale e aktivizimit shoqëror.

Realizimi i këtij programi arsimor ndër vite, mundësohet falë ndihmës bujare te institucioneve partnere turke, që janë ndër shembujt konkretë e më shprehës të dashamirësisë, e miqësisë dhe aleancës strategjike që ka populli, dhe shteti turk me Shqipërinë. Një e vërtetë e pamohueshme dhe e vërtetuar në të gjitha aspektet!

Tashmë ky program konsiderohet ndër projektet parësore dhe strategjike të Fondacionit “ALSAR”, duke u shndërruar në një traditë vlerash që ndiqet e pasurohet ndër vite, përfundoi fjalën, kryetari i Fondacionit, Mehdi Gurra.

Më pas të pranishmit i përshëndeti dekani i Fakultetit te Histori – Filologjisë Prof. Dr. Sabri Laçi, i cili vlerësoi veprimtarinë e larmishme të Fondacionit ALSAR në fushën e arsimit jo vetëm përmes projekteve të akordimit të bursave të studimit por edhe përmes realizimit te projekteve të përmirësimit të infrastrukturës arsimore në shkollat publike dhe pajisjen e tyre me bazë materiale e didaktike, duke i konsideruar ato si një kontribut të vyer në shërbim të shoqërisë e duke theksuar se investimi në arsim është investimi me i qëndrueshëm për të sotmen dhe për të ardhmen e vendit. Në përfundim të kësaj ceremonie 150 studentëve të pranishëm iu akorduan çeqet e këstit të parë të bursave të inkurajimit për vitin 2018.

Fondacioni “ALSAR” në përmbushje të programit të tij arsimor ka vijuar gjatë këtyre ditëve,ofrimin e konsulencës së nevojshme nxënësve të interesuar për të ndjekur studimet në Turqi. Në këtë konteks janë realizuar takime me maturantët e gjimnazeve “Havzi Nela” në Kukës dhe “Bido Sejko” në Konispol.Qëllimi i këtyre takimeve ishte prezantimi i programit të bursave të studimit të ofruara falas nga shteti turk. Në këto takime u prezantuan kushtet,sistemi i aplikimit dhe mundësitë që ofron ky program bursash. Duke patur parasysh kushtet mjaft të favorshme dhe standardet bashkëkohore të universiteteve në Turqi, interesimi dhe dëshira për t’u bërë pjesë e këtij programi ishte mjaft e lartë.

Në rrethanat e një shoqërie me nivel të lartë kriminaliteti, të ardhur si rezultat i mungesës së gjatë të një edukimi fetar të brezave, si dhe në rrethanat kur edukimi fetar për breznitë e reja nuk mund të përfitohet në shkollat e arsimit të përgjithshëm brenda sistemit arsimor zyrtar, është i rëndësishëm garantimi i mësimit të besimit përmes nismave private. Për këtë arsye, Fondacioni “ALSAR” gjatë periudhës janar – qershor ka ndërmarrë organizimin dhe zhvillimin e projektit të kurseve verore të mësim-besimit.
Kjo veprimtari konsiston në ringjalljen e vlerave të traditës, si dhe në dhënien e ndihmesës për edukimin e brezit të ri, të shoqërisë shqiptare, me vlerat etiko-morale dhe shpirtërore islame.
 Në aspektin organizativ, vlen të përmendim se janë ndërmarrë të gjitha procedurat e planifikimit programor, dhe në zhvillimin e procesit të mësimdhënies janë përfshirë tri etapa kryesore:
• Planifikimi programor, i orientuar me qëllime të veçanta sipas lëndës.
• Mësimdhënia, e gërshetuar me metoda të dobishme bashkëkohore.
• Vlerësimi periodik i njohurive të përfituara prej kursantëve, nëpërmjet kontrolleve të përgatitura nga Departamenti i Arsimit të Fondacionit ALSAR.
Shtrirja e veprimtarive të kurseve nga pikëpamja gjeografike, është përqendruar në zonat veriore, qendrore dhe juglindore të vendit. Në 3 rrethe, janë zhvilluar 10 kurse, me pjesëmarrjen e 500 kursantëve.
Programi mësimor i këtij projekti synon në edukimin e brezit të ri të shoqërisë shqiptare nëpërmjet mësimdhënies së këtyre lëndëve:
• Njohuri të besimit.
• Njohuritë themelore të fesë islame.
• Mësimin e leximit të Kuranit Famëlartë në gjuhën arabe, dhe memorizimi i 20 sureve të fundit të tij.
Kursantëve u janë shpërndarë falas tekstet përkatëse në funksion të procesit të mësimdhënies së këtyre lëndëve.

Fondacioni “ALSAR” me synimin për t’iu ofruar mundësi kualifikimi e aftësimi profesional nënave të fëmijëve jetimë, tashmë me një përvojë 3 – vjeçare, ka vijuar organizimin e kursit të rrobaqepësisë për t’iu ofruar mundësi punësimi në këtë profil, që tashmë është i kërkuar nga tregu i punës.

Ky program aftësimi profesional është ndjekur me interes në vijimësi nga 50 nëna të fëmijëve jetimë, të cilat kanë përfituar jo vetëm njohuritë përkatëse nga programi teoriko-praktik i profilizuar në prerje e qepje, por njëkohësisht kanë pasur edhe mundësitë optimale për t’i ofruar familjarëve të tyre, dhurata në artikuj veshmbathjeje të qepura e të realizuara nga duart e tyre.

Në një atmosferë të këndshme e familjare është zhvilluar ceremonia e prezantimit dhe ekspozimit të punimeve të kursit të rrobaqepësisë, të realizuara me shumë profesionalizëm prej këtyre rrobaqepëseve të reja, këtyre profesionisteve të afta, për t’u integruar në tregun e punës. Ishte ky një kurorëzim i suksesshëm i kësaj veprimtarie me rastin e përfundimit të programit të këtij niveli aftësimi profesional.