Nisja e vitit të ri shkollor është një mundësi e mirë për të kryer veprimtari humanitare dhe arsimore. Dhe nuk ka më mirë se t’u vish në ndihmë fëmijëve jetimë, që edhe ata ta nisin mbarë shkollën.

Nevoja për mjete shkollore është e para për çdo fëmijë, për çdo nxënës. E tillë është dhe për jetimët në ecje në rrugën e bukur dhe të vështirë të marrjes së dijes.

Dhe, kështu, për t’u ardhur në ndihmë jetimëve të ulur në bankat e shkollës në këto ditë të fundit të shtatorit, Fondacioni ALSAR shpërndau për ta çanta dhe mjete të tjera didaktike.

Dhuratat për vitin e ri shkollor i morën 200 fëmijë jetimë në Tiranë, përfitues të vazhdueshëm të ndihmës së Fondacionit ALSAR.

Projekti i dhurimit të çantave dhe mjeteve të tjera shkollore u realizua me mbështetjen e IHH-së me qendër në Holandë.

Ndihma për arsimimin e brezit të ri është investim për të ardhmen e shoqërisë dhe të vendit, dhe kontributi është akoma më i madh dhe më me vlerë kur ajo u jepet jetimëve.

Të dielën e 26 shtatorit u nisën drejt Turqisë fituesit e aplikimit për ndjekjen e studimeve në medresetë atje.

Nxënësit fitues do të mësojnë në shkollën në Tekirdağ, Uluslararası Şehit Münir Alkan Anadolu İmam Hatip Lisesi.

Ata e patën kryer aplikimin gjatë verës në Fondacionin ALSAR, pasi shkolla, medreseja, në qytetin turk bëri të ditur se do të pranonte nxënës me bursë nga Ballkani për vitin e ri shkollor. Përzgjedhja u bë sipas kritereve të caktuara.

Djemtë e përcjellë për në medresenë në Tekirdağ do të gjejnë atje mjedisin e duhur për shkollimin e tyre.

Një numër i madh djem e vajzash i kanë ndjekur dhe vazhdojnë t’i ndjekin studimet në Turqi falë ndërmjetësimit dhe ndihmës së drejtpërdrejtë të Fondacionit ALSAR.

Me nivelin e tyre të lartë, shkollat e mesme dhe universitetet turke janë prej dekadash një destinacion i parapëlqyer për nxënësit dhe studentët shqiptarë.

Stacioni i dytë në realizimin e projektit të Fondacionit ALSAR për shpërndarjen e çantave të shkollës dhe të mjeteve të tjera didaktike në këtë fillim të vitit të ri shkollor ishte Lazarati, në Gjirokastër.

Fëmijë të shumtë u mblodhën në një ambient të hapur të lokalitetit për të marrë çantat shkollore të dhuruara nga Fondacioni ALSAR.

Për ta u shpërndanë 350 çanta dhe mjete didaktike, të nevojshme për një nisje të mbarë të shkollës.

ALSAR e konsideron shkollimin e duhur të brezit të ri një garanci për të nesërmen e shoqërisë tonë, prandaj përpiqet pandërprerë t’i vijë atij në ndihmë në shumë forma, nga dhurimi i çantave te dhënia e bursave.

Projekti i tanishëm parashikon shpërndarjen e 1000 çantave dhe mjeteve didaktike në shkolla dhe lokalitete të ndryshme.

Dhurimi i çantave dhe mjeteve didaktike për nxënësit shoqërohet me urimin për një vit të mbarë shkollor!

Shtatori i kthen nxënësit në bankat e shkollës, për të marrë dije dhe për t’u përgatitur për jetën. Dëshirës së madhe të fëmijëve dhe të rinjve për t’u arsimuar shpesh nuk i përgjigjet mundësia e kufizuar e prindërve për t’ua plotësuar nevojat për mjete didaktike, përgjithësisht në zona të varfra të vendit.

I ndjeshëm ndaj nevojave të komuniteteve, i gatshëm për t’u ardhur në ndihmë shkollave dhe nxënësve, Fondacioni ALSAR për çdo vit shkollor dhuron çanta dhe mjete të tjera didaktike. Një sipërmarrje e tillë është pjesë e aktivitetit arsimor të fondacionit, të kryer krahas aktivitetit humanitar dhe kulturor.

Dhurimi i çantave këtë shtator ka nisur nga Peshkopia. Në njësinë administrative Tomin, në periferi të Peshkopisë, çanta dhe mjete didaktike janë dhuruar për nxënës të shkollës 9-vjeçare “Idriz Kaba”.

Shpërndarjen e kanë bërë punonjës të Fondacionit ALSAR, ndihmuar nga arsimtarët e shkollës. Ndihma në çanta dhe mjete didaktike ishte për 150 nxënës.

Dhënia e çantave dhe mjeteve didaktike për nxënës të shkollave të ndryshme të vendit do të vijojë dhe në ditët e ardhshme. Prej dhuratave shkollore të Fondacionit ALSAR kanë për të përfituar 1000 nxënës.

Peshkopia ishte vendmbërritja e parë në këtë vit të ri shkollor; çanta shkollore do të dhurohen nesër në tjetër qytet, në tjetër shkollë, për të gëzuar të tjerë fëmijë, të tjerë nxënës.

Fundi i stinës së verës sjell dhe mbarimin e kurseve verore, të hapura nga Fondacioni ALSAR, në bashkëpunim me donatorë të huaj.

Punonjës të fondacionit e ndoqën nga pranë gjatë javës së shkuar zhvillimin e këtyre kurseve në pjesë të ndryshme të vendit. Me interes qe të shihej efikasiteti i këtyre kurseve verore në edukimin dhe në zbavitjen e shëndetshme të fëmijëve në muajt e verës.

Konstatimet ishin pozitive, konkluzionet gjithashtu: një veprimtari e përvitshme e ALSAR-it, kurset verore u vlejnë vërtet fëmijëve për ta kaluar si duhet kohën e lirë, për t’u dëfryer e për të mësuar gjëra të reja.

Kurset verore kanë qëndruar të hapura për tre muaj në qytete dhe qyteza nga veriu në jug, ndjekur nga rreth 1000 fëmijë të moshës 8-15 vjeç. Krahas mësimit të dhënë nga një mësues për çdonjë prej 30 kurseve, fëmijëve u janë organizuar shëtitje dhe aktivitete të tjera argëtuese.

Si e ardhmja e vendit, si brezi më i ri, është shumë e rëndësishme që të tregohet vëmendje në formimin e karakterit të fëmijëve, në brumosjen e tyre me cilësitë më të mira njerëzore, e të mbahen larg ata nga veset, nga gjërat e dëmshme dhe të pamoralshme, aq të përhapura në këtë kohë. Nga kjo pikëpamje, kurset verore të ALSAR-it i shërbejnë edukimit etiko-moralo-besimore të fëmijëve, ua bëjnë atyre cilësor kalimin e muajve të pushimit.

Pas ca ditësh, fëmijët i presin bankat e shkollës, për t’u kthyer në kurset verore të Fondacionit ALSAR sërish në verën e ardhshme.