Category Page: Arsimore

    Në Kukës rinis kursi i gjuhës turke

    Në kuadër të aktivitetit arsimor të Fondacionit ALSAR dhe të projektit shumëvjeçar të kurseve të gjuhëve të huaja, në qytetin e Kukësit ka nisur dhe për këtë vit shkollor kursi i gjuhës turke.

    I lirë për t’u ndjekur nga çdo i interesuar për mësimin e turqishtes, kursi ofron mësimdhënien e duhur në një ambient të përshtatshëm dhe të duhur.

    Kursi zhvillohet sipas grupmoshave dhe niveleve të ndryshme, duke iu përgjigjur kështu kërkesave të ndjekësve të tij.

    Një organizim në bashkëpunim me bashkinë e qytetit, kursi krijon një hapësirë të shfrytëzueshme për këdo që dëshiron të përvetësojë gjuhën e bukur turke. Për djemtë e vajzat që në objektivat e tyre kanë vijimin e studimeve në Turqi, kursi është një ndihmë e çmueshme.

    Të pranishmëve në orët e para të kursit u është përgatitur dhe një koktej, për një pritje sa më të ngrohtë.

    Me një vazhdimësi tanimë më se dhjetëvjeçare, kursi është rihapur më herët, që në nisje të këtij viti shkollor, dhe në Konispol.

    Studentë të universiteteve publike marrin këstin e parë të bursave të ekselencës për këtë vit akademik

    Fondacioni ALSAR ka zhvilluar këtë javë tetori një varg veprimtarish në kuadër të realizimit të projekteve humanitare dhe arsimore.

    Aktiviteti i radhës i mundësuar nga mbështetja e IHH-së me qendër në Holandë, organizmit me bashkëpunim të konsoliduar me Fondacionin ALSAR, ishte dhënia e bursave të ekselencës për 37 studentë të universiteteve publike.

    Në ambientet e Fondacionit ALSAR u krye shpërndarja e zarfeve me këstin e parë të bursave të ekselencës për këtë vit akademik.

    Përfaqësuesit e IHHNL-së, të pranishëm në aktivitet, dhanë për çdo student zarfin përkatës me këstin e bursës.

    Me të gjithë ata u bë në fund një fotografi e përbashkët.

    Dhënia e këstit të parë të bursave të ekselencës për këta studentë shënoi dhe mbarimin e aktiviteteve të zhvilluara në bashkëpunim me IHHNL-në përgjatë këtyre ditëve.

    Drejtues të Fondacionit ALSAR dhe ekipi i IHHNL-së shfrytëzuan mundësinë për të bërë një analizë e vlerësim të partneritetit, me konkluzione në të mirë të bashkëpunimit dypalësh.

    Nga Fondacioni ALSAR u shpreh mirënjohja për kontributin e vyer të IHH-së me qendër në Holandë në realizimin e shumë projekteve.

    Realizohet në qarkun e Elbasanit projekti i dhurimit të çantave shkollore për 250 nxënës

    Fondacioni ALSAR ka realizuar me sukses të martën e 20 tetorit projektin e dhurimit të çantave shkollore dhe të mjeteve didaktike në qarkun e Elbasanit.

    Projekti i zhvilluar në kuadër të aktivitetit arsimor dhe humanitar ka synuar t’u vijë në ndihmë nxënësve e t’ua lehtësojë angazhimin shkollor.

    Veprimtaria dhuruese është mundësuar nga IHH me qendër në Holandë, e pranishme dhe me përfaqësuesit e saj në shpërndarjen e çantave.

    Ndihmën me çanta shkollore dhe mjete didaktike e kanë përfituar 250 nxënës, sipas një grafiku të përcaktuar më herët dhe që ka marrë në konsideratë nevojat.

    Përfitues ishin fëmijë autikë, fëmijë të qendrës “Future for You” në Elbasan, të Qendrës Komunitare Multifunksionale në Shushicë, të qendrës ditore “Lulet e Diellit” në Gramsh, të QSHNJNV-së në Elbasan, të qendrës komunitare për romët, të Qendrës Komunitare Multifunksionale në Cërrik, të shkollës speciale “Zëra Jete” në Elbasan, të familjeve në nevojë e me status jetimi.

    Përfaqësues dhe punonjës të Fondacionit ALSAR dhe të entit kontribues, IHHNL-së, kanë komunikuar me fëmijët dhe me personelin arsimor, kanë parë nga afër ambientet dhe kanë shpërndarë çantat e mjetet didaktike.

    Veç ndihmës së prekshme, dhuratat kanë sjellë dhe gëzim te përfituesit.

    I përkushtuar në kujdesin ndaj fëmijëve, dhe ndaj brezit të ri në përgjithësi, Fondacioni ALSAR realizon në mënyrë periodike projekte të tilla ku ndërthuren aspektet humanitare dhe arsimore të aktivitetit të tij.

    Dhurohen stola për shkollën 9-vjeçare “Sherif Dervishi” në Budull të Krujës

    Fondacioni ALSAR ka realizuar të mërkurën e 23 shtatorit projektin e dhurimit të stolave për shkollën 9-vjeçare “Sherif Dervishi” në Budull të Krujës.

    Projekti i hartuar dhe i realizuar në kuadër të aktivitetit arsimor të Fondacionit ALSAR synonte përmirësimin e infrastrukturës në këtë shkollë.

    Stolat u dhuruan në përgjigje të kërkesës së bërë nga shkolla dhe i shërbejnë rregullimit të mjedisit dhe funksionalitetit të tij për nxënësit dhe mësuesit.

    Në dhurimin e 12 stolave nga punonjës të Fondacionit ALSAR ishin të pranishëm drejtoresha e shkollës, mësues dhe nxënës.

    Shkolla 9-vjeçare “Sherif Dervishi”, e rindërtuar pas tërmetit të nëntorit të 2019-s, merr një pamje më të bukur me stolat e dhuruar, ku mund të kalohen momente pushimi.

    Fjalët që e shoqëruan projektin, “Për fëmijët, për të ardhmen”, reflektonin përkushtimin e pandryshuar të fondacionit për të kontribuar në shkollimin e brezit të ri, në rritjen dhe edukimin e duhur të tij.

    Me nisjen e vitit të ri shkollor kanë rifilluar veprimtarinë dhe kurset pranë Fondacionit ALSAR

    Shtatori sjell si gjithmonë hapjen e dyerve të shkollave dhe uljen e nxënësve në banka për të marrë dije e për t’u përgatitur për jetën.

    E bashkëshoqëron këtë në Fondacionin ALSAR rinisja e kurseve, si traditë e konsoliduar ndër vite.

    Djem e vajza të gatshëm për të marrë dije shtesë, për të mësuar gjuhë të huaja dhe për të ndjekur mësimdhënie të karakterit edukativ, mirëpriten në ambientet e fondacionit për ta shfrytëzuar këtë mundësi të dhënë bujarisht.

    Kurset e gjuhës angleze dhe turke, e veç tyre dhe të edukimit etiko-moral, të ofruara pa pagesë, mund të ndiqen gjatë tërë vitit shkollor në orare që nuk u sjellin pengesë nxënësve për të vajtur në shkollë.

    Mjediset e përshtatshme, mësimdhënia me nivelin e dëshiruar dhe mjetet didaktike bashkëkohore e bëjnë të lehtë dhe tërheqëse pjesëmarrjen në kurse të të interesuarve.

    Kurseve u shtohen në vazhdim studentë e studente, me fillimin e vitit të ri akademik.

    Regjistrimi në kurset e Fondacionit ALSAR është i mundur për çdo të ri e të re që synon ta bëjë sa më të plotë marrjen e dijes.

    Kurset zhvillohen në kuadër të aktivitetit arsimor të Fondacionit ALSAR, çmuar si ndihmëse dhe mjaft të dobishme për brezin e ri.

    Përmbyllen me sukses kurset verore në qytete të ndryshme të vendit për edukimin etik, moral dhe fetar të fëmijëve

    Fondacioni ALSAR organizoi dhe përmbylli me sukses kurset verore, në kuadër të aktivitetit arsimor dhe të kujdesit të pandërprerë për mirërritjen e brezit të ri.

    Si për çdo vit gjatë muajve të verës, u hapën dhjetëra kurse në të katër anët e Shqipërisë dhe iu mundësua fëmijëve të marrin mësime të vlefshme dhe të kalojnë një pjesë të kohës së pushimit në aktivitet të dobishëm.

    Mësuesit u kujdesën t’ua bëjnë sa më tërheqës lëndën mësimore ndjekësve të kurseve, duke ndërthurur edukimin etik, moral dhe fetar.

    Djemtë dhe vajzat e kurseve verore u pritën ngrohtësisht në mjediset përkatëse, morën mësime dhe u zbavitën njëherësh në grup.

    Në 60 kurset verore të hapura në dymbëdhjetë qytete, nga veriu në jug, i ndoqën mësimet 2500 fëmijë. Tirana, Durrësi, Kavaja, Fieri, Elbasani, Berati, Kopliku, Kurbini, Këlcyra, Pogradeci, Korça dhe Devolli do të përzgjidheshin për organizimin dhe zhvillimin e kurseve.

    Projekti i zhvillimit të kurseve verore u mbështet nga ente partnere të ALSAR-it dhe nga donatorë të tjerë. IHH me qendër në Holandë, HASENE, me qendër në Gjermani, Bashkia e Bahçelievlerit në Stamboll, veçohen si mbështetësit kryesorë. Mirënjohja, ndërkaq, u shprehet të gjithë kontribuesve.

    Përfundimi i kurseve verore dhe i muajve të pushimit do t’ua lënë vendin tani projekteve të tjera arsimore në Fondacionin ALSAR, synuese gjithnjë për t’i shërbyer sa më mirë edukimit të duhur të fëmijëve dhe të rinjve.