Në kuadër të veprimtarive përkujtimore në përvjetorin e nëntë të tentativës së dështuar për grusht shteti në Turqi, në kryeqytet është mbajtur paneli i titulluar, “Emri i fitores: Turqi”.

Paneli është organizuar nën kujdesin e Ambasadës së Republikës së Turqisë në Tiranë dhe të Drejtorisë së Komunikimeve të Presidencës së Turqisë.

Mes pjesëmarrësve në panel është dalluar prania e kryetarit dhe e drejtorit administrativ të Fondacionit ALSAR, të pranishëm një ditë më herët dhe në aktivitetin përkujtues në memorialin me emrat e dëshmorëve të 15 korrikut, ku z. Mehdi Gurra mbajti një fjalë në emër të shoqërisë civile.

Një mesazh nga drejtuesi i Drejtorisë së Komunikimeve të Presidencës së Turqisë, z. Burhanettin Duran, dhe një material filmik kushtuar 15 korrikut të 2016-s u janë paraqitur ndjekësve të punimeve të panelit.

Atë e ka përshëndetur zëvendësambasadorja e Republikës së Turqisë në vendin tonë, znj. Naime Öztürk Meral, theksuese e rëndësisë së aktivitetit për ndërgjegjësimin e opinionit publik mbi rrezikshmërinë e FETÖ-s, organizatës përgjegjëse për tentativën e dështuar për grusht shteti nëntë vite më parë.

Panelin e moderoi prof. Yusuf Özkır, shef i departamentit të gazetarisë në Universitetin Medipol në Turqi, dhënës i fjalës për pjesëmarrësit e tjerë në panel.

Panelistët ligjëruan mbi 15 korrikun, mbi ngjarjen dhe rrjedhojat e saj për Turqinë e më gjerë. FETÖ-ja si një strukturë kriminale, ende një kërcënim dhe për vende si Shqipëria, ku e ka praninë të prekshme, mori vëmendjen e duhur dhe kohën e folësve, trajtuar në mënyrë të argumentuar dhe bindëse.

Një pikë kthese për Turqinë ishte cilësimi me të cilën e përmblodhi 15 korrikun diskutuesi turk, asist. prof. Recep Şehitoğlu, nga Universiteti i Gaziantepit.

Mes folësve, prof. Ardian Muhaj kërkoi çlirimin e Shqipërisë nga ndikimi i FETÖ-s, e njëkohësisht i mëshoi përcaktimit se Turqia dhe populli turk janë aleatët më të mirë të shqiptarëve.

Epokaliteti i një ngjarjeje të tillë aq dramatike, efektet në fatet e Turqisë moderne, roli kritik dhe jetik i vullnetit popullor në dështimin e grushtit të shtetit, u diskutuan gjerësisht dhe hollësisht.

Ndërgjegjësimi, vigjilenca dhe angazhimi për të mos lejuar më një përpjekje të ngjashme kërcënuese për rendin kushtetues në Turqi, prerja e çdo mundësie për aktivitet të organizatës gyleniste brenda dhe jashtë Turqisë, e në këtë kontekst, në Shqipëri, përbënë pjesë të temave të trajtuara nga folësit në panel.

Një ekspozitë fotografike u dha të pranishmëve në panel mundësinë për të riparë momente të veçanta dhe domethënëse të 15 korrikut dhe të ditëve pasuese.

Përvjetori i nëntë i tentativës puçiste në Turqi për të rrëzuar qeverisjen demokratike dhe për të marrë pushtetin me dhunë u përkujtua dhe në Tiranë.

Si në çdo 15 korrik, pranë memorialit të kushtuar të rënëve në atë ngjarje të përgjakshme të vitit 2016 u organizua një ceremoninë nën kujdesin e Ambasadës së Republikës së Turqisë në Tiranë, ku morën pjesë përfaqësues të institucioneve turke në vendin tonë, aktivistë dhe përfaqësues të shoqërisë civile, qytetarë turq dhe të kryeqytetit.

Himnet kombëtare të dy vendeve, Shqipërisë dhe Turqisë, hapën aktivitetin përkujtues, për t’ua lënë vendin mbajtësve të fjalëve përkatëse.

Duke vënë në pah epopenë e popullit turk në atë moment historik të para nëntë viteve, ambasadori i Turqisë në Tiranë, z. Tayyar Kağan Atay, e vuri theksin te kërcënimi serioz që përbën FETO, organizata terroriste përgjegjëse për tentativën për grusht shteti më 15 korrik 2016, për çdo vend ku ka aktivitet të fshehtë, posaçërisht dhe në Shqipëri, e te rëndësia e luftës ndaj saj.

Në emër të shoqërisë civile, të pranishmëve iu drejtua kryetari i Fondacionit ALSAR, z. Mehdi Gurra.

“Më 15 korrik 2016, Turqia u përball me një prej sfidave më të mëdha në historinë e saj moderne. Ajo natë solli një përpjekje brutale për përmbysjen e rendit kushtetues, kur një grup puçistësh u ngrit me armë kundër popullit dhe institucioneve të shtetit. Me përdorimin e avionëve luftarakë, tankeve, helikopterëve dhe një arsenali të frikshëm ushtarak, puçistët synuan të rrëzonin qeverinë legjitime dhe të ekzekutonin presidentin e zgjedhur me votë të lirë, Recep Tayyip Erdoğan,” tha z. Gurra.

“Por Turqia nuk u përkul. Pikërisht në orët më të errëta, kur gjithçka dukej e humbur, ndodhi e papritura. Presidenti iu drejtua popullit përmes televizionit, duke i ftuar

qytetarët të dilnin në rrugë, të mbronin demokracinë, lirinë dhe të ardhmen e vendit të tyre. Dhe ata dolën. Miliona njerëz u përballën me plumba, tanke dhe frikë, duke mos lejuar që demokracia të mbytej nga një grusht tradhtarësh. Ata mbrojtën jo vetëm një qeveri, por idealin që e mban të gjallë një komb: lirinë për të vendosur vetë për fatin e tij.

Gjatë asaj nate të zezë, 253 qytetarë u flijuan për atdheun dhe mijëra të tjerë u plagosën. Ata nuk ishin ushtarë profesionistë, por njerëz të thjeshtë, që u bënë heronj me veprën e tyre. Me gjakun e tyre u ndal një tragjedi dhe u mbrojt një demokraci. Ky qëndrim i pathyeshëm i popullit turk u bë një shembull frymëzues për gjithë botën, që e pa me sytë e vet se si guximi dhe bashkimi mund të ndalin edhe armët më të rënda,” vijoi ai.

“Organizata FETO, e cila qëndron pas këtij grushti shteti, u zbulua si një rrjet i rrezikshëm, me veprimtari të fshehtë në çdo segment të shtetit. Nën petkun e një organizate fetare dhe edukative, ajo kishte depërtuar në ushtri, polici, në sistemin e drejtësisë dhe në institucionet arsimore, duke planifikuar në heshtje rrëzimin e rendit demokratik. Me dështimin e puçit, filloi edhe procesi i pastrimit dhe shërimit të plagëve që kjo organizatë kishte shkaktuar brenda shoqërisë turke.

Por rreziku nuk ishte vetëm brenda kufijve të Turqisë. Tentakulat e kësaj organizate ishin shtrirë në shumë vende të botës, përfshirë edhe Shqipërinë. Nëpërmjet rrjeteve të shkollave, universiteteve, bizneseve dhe mediave, struktura gyleniste kishte arritur të ndërtojë një prezencë të konsiderueshme edhe në vendin tonë.

Shqipëria, fatkeqësisht, numëron një nga përqendrimet më të mëdha të kësaj organizate në rajon.

Veçanërisht shqetësues është roli i FETO-s në Komunitetin Mysliman të Shqipërisë, ku është vërejtur një ndërhyrje e drejtpërdrejtë që ka cenuar thellësisht pavarësinë dhe balancën institucionale të këtij komuniteti. Medresetë dhe Universiteti Bedër përmenden si pjesë e këtij ndikimi, i cili ka ndikuar jo vetën jetën fetare të besimtarëve, por edhe në harmoninë tradicionale ndërfetare që e ka karakterizuar gjithmonë Shqipërinë. Për herë të parë në historinë moderne të shtetit shqiptar, një komunitet fetar drejtohet në mënyrë të hapur nga një rreth me struktura të mbyllura, që ndjek agjenda të huaja dhe jo interesin e besimtarëve shqiptarë.

Në këtë situatë, nuk mund të qëndrohet indiferent. Është detyrë e institucioneve shqiptare që të vlerësojnë me seriozitet këto zhvillime dhe të mbrojnë vlerat e shoqërisë shqiptare, vlera që bazohen në tolerancë, pavarësi dhe ruajtje të harmonisë fetare. Nuk

është çështje politike, por kombëtare. Ajo që ndodhi në Turqi më 15 korrik është një kujtesë e dhimbshme për pasojat e mosvëmendjes ndaj strukturave që veprojnë në heshtje, por godasin fort kur gjejnë terren të përshtatshëm.

Shqiptarët e kanë ndjerë gjithmonë afërsinë me popullin turk. Në ditët më të vështira, si dhe në ditët e triumfit, ata kanë ndarë dhimbje dhe gëzim. Nuk është thjesht një miqësi politike, është një lidhje që vjen nga historia, nga respekti i ndërsjellë dhe nga vlerat e përbashkëta që bashkojnë dy kombe. Një Turqi e qëndrueshme, demokratike dhe e fortë, është një aleat i çmuar për Ballkanin dhe shqiptarët. Populli shqiptar, i lidhur si vëllai me vëllanë me popullin e madh turk, të jetë përherë përkrah tij në përpjekjet e përbashkëta për liri, demokraci e prosperitet.

Fondacioni ALSAR, një institucion i angazhuar në thellimin e marrëdhënieve shqiptaro-turke, nderon me respekt të thellë dëshmorët e 15 korrikut. Si çdo vit nga 2016-ta, ai përkulet me mirënjohje përpara kujtimit të 253 heronjve që dhanë jetën për lirinë e popullit të tyre. Lutja dhe dëshira e përbashkët e të gjithë atyre që ndajnë vlerat e demokracisë dhe lirisë është e qartë: kurrë më një 15 korrik i tillë për popullin mik turk!”, qenë fjalët e përzgjedhura të z. Mehdi Gurra.

Lutje dhe këndim të vargjeve kur’anore iu kushtuan dëshmorëve të 15 korrikut, aktit të tyre sublim, të dhënies së jetës për të mos e lënë Turqinë të rrëshqasë në anarki dhe në dhunë puçiste.

Pamjet fotografike të ekspozuara në ceremoni risollën të gjallë realitetin tragjik dhe njëkohësisht reagimin historik të popullit turk në të njëjtën ditë të nëntë viteve më parë.

Karafila të kuq u vendosën në memorialin me emrat e dëshmorëve të 15 korrikut.

Në kuadër të zgjerimit të aktivitetit bashkëpunues me institucione me perspektiva dhe interesa përkuese, Fondacioni ALSAR ka nënshkruar një memorandum bashkëpunimi me Institutin Shqiptar për Studime Ndërkombëtare.

Nënshkrimi është kryer në selinë e Institutit Shqiptar për Studime Ndërkombëtare, në praninë e drejtuesve përkatës, kryetarit të Institutit Shqiptar për Studime Ndërkombëtare, dr. Albert Rakipi, dhe kryetarit të Fondacionit ALSAR, z. Mehdi Gurra.

Të pranishëm ishin dhe znj. Alba Çela, drejtore ekzekutive e Institutit Shqiptar për Studime Ndërkombëtare, dhe z. Saimir Rusheku, drejtor ekzekutiv i Fondacionit ALSAR.

Memorandumin e nënshkruan znj. Alba Çela dhe z. Mehdi Gurra, të cilët shkëmbyen dhe dokumentin përkatës.

Marrëveshja synon nxitjen e mirëkuptimit të ndërsjellë dhe zhvillimin e bashkëpunimit akademik, ideimin dhe realizimin e projekteve dhe aktiviteteve të përbashkëta.

Nënshkruesit e memorandumit angazhohen institucionalisht për organizime të përbashkëta forumesh, për pjesëmarrje në konferenca, seminare, ngjarje dhe takime akademike, për shkëmbim të literaturës dhe informacioneve, për përkthime dhe botime, për shkëmbime të dyanshme, e për aktivitete dhe publikime të përbashkëta në fushën e kërkimit shkencor.

Institucionet u zotuan përmes memorandumit të ndajnë informacion rreth punës dhe mundësive të reja për zhvillim institucional, e të raportojnë në bordet përkatëse për rezultatet e bashkëpunimit.

Takimi i drejtuesve të dy institucioneve u mbizotërua nga diskutimi i fushave të bashkëpunimit.

Nënshkrimit të memorandumit me Institutin Shqiptar për Studime Ndërkombëtare do t’i paraprinte muaj më parë një shkëmbim vizitash i drejtuesve të institucioneve.

Falë një aktiviteti të gjerë botues, dhe organizimit të konferencave e simpoziumeve të ndryshme me karakter kulturor dhe shkencor, Fondacioni ALSAR ofron bashkëpunim cilësor për institucionet e interesuara.

Fondacionin ALSAR e vizitoi më 27 qershor një grup akademik nga Mqedonia e Veriut dhe Kosova. Ata u pritën nga kryetari i institucionit, z. Mehdi Gurra.

Të ardhur në Tiranë në kuadër të seminarit të parë ballkanik mbi turkologjinë, organizuar nga Universiteti i Nju Jorkut në Tiranë nën kujdesin e Fondacionit Turk Maarif, vizitorët patën një bisedë mjaft të këndshme me mikpritësin.

Doc. dr. Seyhan Murtezan İbrahimi, zëvendësrektore e Universitetit Ndërkombëtar Ballkanik në Maqedoninë e Veriut, doc. dr. Elsev Brina Lopar, shefe e programit në gjuhën turke në Universitetin Ukshin Hoti në Kosovë, prof. dr. Osman Emin, drejtues i degës së gjuhës dhe letërsisë turke në Universitetin Kiril ve Metodiy në Maqedoninë e Veriut, dr. sc. Eljesa Ismaili, drejtues i degës së gjuhës dhe letërsisë turke në departamentin e gjuhëve lindore të Fakultetit të Filozofisë së Universitetit të Tetovës, Berna Beyoğlu dhe Banu İsmaili, në degën e mësuesisë së gjuhës turke në Universitetin Ndërkombëtar Ballkanik në Maqedoninë e Veriut, u falënderuan nga kryetari, z. Gurra, për vizitën dhe u njohën përmes tij për aktivitetin 19-vjeçar të Fondacionit ALSAR.

Z. Mehdi Gurra u foli vizitorëve për veprimtaritë në fushën e turqishtes, për kurset në kryeqytet, në Kukës dhe Konispol, për mësimin e turqishtes nga jetimët, nga nxënës dhe nxënëse të dy qyteteve në veri e jug të vendit. Mësimdhënia – u shpjegoi ai atyre – në këto kurse bëhet nga dy pedagogë të sjellë nga Ministria e Arsimit në Turqi dhe të paguar prej saj.

Botimet e ALSAR-it në gjuhën turke, mes tyre ai për marrëdhëniet shqiptaro-turke, apo përmbledhja e kumtesave të simpoziumit mbi vakëfet në Ballkan, u vunë në dukje po ashtu në bisedë nga z. Gurra.

Vizitorët panë më pas ambientet e fondacionit dhe librarinë e tij, ku morën si dhuratë nga kryetari i ALSAR-it botime në gjuhën turke dhe në dy gjuhët, shqip dhe turqisht.

Shprehja e konsideratave nga miqtë dhe falënderimi për mikpritjen ishin pjesë e natyrshme e vizitës.

Fondacioni ALSAR organizoi fundjavën e sapolënë pas një ekskursion për ndjekëset e kurseve në kryeqytet, në mjediset e tij.

Për të kaluar një kohë cilësore, në shoqëri dhe me zbavitje, për të shëtitur e për të parë gjëra të reja, qe menduar e planifikuar një vizitë në qytetet e Gjirokastrës dhe Përmetit.

Të shoqëruara nga punonjës të Fondacionit ALSAR, njëzet vajzat patën mundësinë dhe kënaqësinë të shohin vendet më interesante të qytetit turistik të Gjirokastrës, të ecin në kalldrëmet e tij, të ngjiten në kala, e të mësojnë mbi historinë e së shkuarës.

Për ndjekëset e kurseve të turqishtes u shfrytëzua ky ekskursion dhe për t’i gëzuar me shpërndarjen e certifikatave përkatëse, e për të dhënë vlerësime mbi angazhimin dhe seriozitetin e tyre në përvetësimin e gjuhës turke.

Po aq e këndshme ishte dhe vizita në Përmet, e kaluar bukur në shëtitje dhe në ndalesa në vende tërheqëse.

Dreka për ndjekëset e kurseve në Tiranë nuk mund të mungonte në ekskursion, mundësuar po ashtu nga organizatorët.

E shtuna e 24 majit qe një ditë ekskursioni për ndjekësit e kurseve fundjavore të mësim-edukimit në Devoll.

Në kuadër të aktiviteteve kulturore dhe arsimore, Fondacioni ALSAR u dha mundësinë njëzet nxënësve nga Devolli të bëjnë një vizitë në kryeqytet, të kenë një shëtitje me plot argëtim dhe gjithashtu me shumë dobi.

Njohja me kulturën, me trashëgiminë tonë kombëtare, dhe me kryeqytetin, përbënin veçorinë e ekskursionit.

Nxënës e nxënëse të Devollit panë nga afër institucione dhe vende turistike të Tiranës, u njohën posaçërisht me institucione besimore, dhe vizituan mes tyre xhaminë e re të Namazgjasë, të përuruar e hapur vjeshtën e vitit të kaluar.

Fondacioni ALSAR u shtroi djemve dhe vajzave dhe një drekë pas orësh të kaluara në aktivitet.

Ekskursionistët nga Devolli të kurseve fundjavore e lanë kryeqytetin me emocione dhe përshtypje që do t’u mbeten gjatë në mendje.