Fondacionin ALSAR e vizitoi më 27 qershor një grup akademik nga Mqedonia e Veriut dhe Kosova. Ata u pritën nga kryetari i institucionit, z. Mehdi Gurra.

Të ardhur në Tiranë në kuadër të seminarit të parë ballkanik mbi turkologjinë, organizuar nga Universiteti i Nju Jorkut në Tiranë nën kujdesin e Fondacionit Turk Maarif, vizitorët patën një bisedë mjaft të këndshme me mikpritësin.

Doc. dr. Seyhan Murtezan İbrahimi, zëvendësrektore e Universitetit Ndërkombëtar Ballkanik në Maqedoninë e Veriut, doc. dr. Elsev Brina Lopar, shefe e programit në gjuhën turke në Universitetin Ukshin Hoti në Kosovë, prof. dr. Osman Emin, drejtues i degës së gjuhës dhe letërsisë turke në Universitetin Kiril ve Metodiy në Maqedoninë e Veriut, dr. sc. Eljesa Ismaili, drejtues i degës së gjuhës dhe letërsisë turke në departamentin e gjuhëve lindore të Fakultetit të Filozofisë së Universitetit të Tetovës, Berna Beyoğlu dhe Banu İsmaili, në degën e mësuesisë së gjuhës turke në Universitetin Ndërkombëtar Ballkanik në Maqedoninë e Veriut, u falënderuan nga kryetari, z. Gurra, për vizitën dhe u njohën përmes tij për aktivitetin 19-vjeçar të Fondacionit ALSAR.

Z. Mehdi Gurra u foli vizitorëve për veprimtaritë në fushën e turqishtes, për kurset në kryeqytet, në Kukës dhe Konispol, për mësimin e turqishtes nga jetimët, nga nxënës dhe nxënëse të dy qyteteve në veri e jug të vendit. Mësimdhënia – u shpjegoi ai atyre – në këto kurse bëhet nga dy pedagogë të sjellë nga Ministria e Arsimit në Turqi dhe të paguar prej saj.

Botimet e ALSAR-it në gjuhën turke, mes tyre ai për marrëdhëniet shqiptaro-turke, apo përmbledhja e kumtesave të simpoziumit mbi vakëfet në Ballkan, u vunë në dukje po ashtu në bisedë nga z. Gurra.

Vizitorët panë më pas ambientet e fondacionit dhe librarinë e tij, ku morën si dhuratë nga kryetari i ALSAR-it botime në gjuhën turke dhe në dy gjuhët, shqip dhe turqisht.

Shprehja e konsideratave nga miqtë dhe falënderimi për mikpritjen ishin pjesë e natyrshme e vizitës.

Fondacioni ALSAR organizoi fundjavën e sapolënë pas një ekskursion për ndjekëset e kurseve në kryeqytet, në mjediset e tij.

Për të kaluar një kohë cilësore, në shoqëri dhe me zbavitje, për të shëtitur e për të parë gjëra të reja, qe menduar e planifikuar një vizitë në qytetet e Gjirokastrës dhe Përmetit.

Të shoqëruara nga punonjës të Fondacionit ALSAR, njëzet vajzat patën mundësinë dhe kënaqësinë të shohin vendet më interesante të qytetit turistik të Gjirokastrës, të ecin në kalldrëmet e tij, të ngjiten në kala, e të mësojnë mbi historinë e së shkuarës.

Për ndjekëset e kurseve të turqishtes u shfrytëzua ky ekskursion dhe për t’i gëzuar me shpërndarjen e certifikatave përkatëse, e për të dhënë vlerësime mbi angazhimin dhe seriozitetin e tyre në përvetësimin e gjuhës turke.

Po aq e këndshme ishte dhe vizita në Përmet, e kaluar bukur në shëtitje dhe në ndalesa në vende tërheqëse.

Dreka për ndjekëset e kurseve në Tiranë nuk mund të mungonte në ekskursion, mundësuar po ashtu nga organizatorët.

E shtuna e 24 majit qe një ditë ekskursioni për ndjekësit e kurseve fundjavore të mësim-edukimit në Devoll.

Në kuadër të aktiviteteve kulturore dhe arsimore, Fondacioni ALSAR u dha mundësinë njëzet nxënësve nga Devolli të bëjnë një vizitë në kryeqytet, të kenë një shëtitje me plot argëtim dhe gjithashtu me shumë dobi.

Njohja me kulturën, me trashëgiminë tonë kombëtare, dhe me kryeqytetin, përbënin veçorinë e ekskursionit.

Nxënës e nxënëse të Devollit panë nga afër institucione dhe vende turistike të Tiranës, u njohën posaçërisht me institucione besimore, dhe vizituan mes tyre xhaminë e re të Namazgjasë, të përuruar e hapur vjeshtën e vitit të kaluar.

Fondacioni ALSAR u shtroi djemve dhe vajzave dhe një drekë pas orësh të kaluara në aktivitet.

Ekskursionistët nga Devolli të kurseve fundjavore e lanë kryeqytetin me emocione dhe përshtypje që do t’u mbeten gjatë në mendje.

Në kuadër të zgjerimit të aktivitetit dhe të shtimit të partneriteteve e ndërveprimeve me institucione të ndryshme, Fondacioni ALSAR ka nënshkruar një marrëveshje bashkëpunimi me Universitetin “Ismail Qemali” në Vlorë.

Nënshkrimit të marrëveshjes i ka paraprirë një vizitë dhe një takim në mjediset e universitetit, me praninë e prof. dr. Aurela Saliaj, rektore e këtij institucioni publik arsimor, dhe z. Mehdi Gurra, kryetar i Fondacionit ALSAR.

Prof. dr. Sabri Laçi, koordinator për hapjen e një bashkëpunimi mes dy palëve dhe marrëveshjen, i ka kushtuar fjalë të veçanta aktivitetit dhe kontributit arsimor e kulturor të Fondacionit ALSAR.

Krerët e dy institucioneve kanë bërë paraqitjet përkatëse të veprimtarive dhe kanë theksuar rëndësinë e bashkëpunimit.

Marrëveshja e nënshkruar sot, më 14 maj, parashikon bashkëpunim akademik dhe kulturor, mbështetjen e studentëve, pasurimin e bibliotekës së universitetit, organizimin e aktiviteteve të përbashkëta, etj.

Qëllim i marrëveshjes është përkushtimi në shërbim të studentëve, duke synuar ruajtjen dhe promovimin e vlerave kombëtare.

Fondacioni ALSAR angazhohet ndër të tjera të japë ndihmë dhe mbështetje për realizimin e projekteve të përbashkëta të botimit të literaturës akademike, të akordojë stimuj financiarë për studentë me kontribute akademike dhe shkencore, të japë ndihmë në bazë materiale për të përmirësuar infrastrukturën universitare, të ofrojë mbështetje financiare për studentë në vështirësi ekonomike, specifikisht për ata jetimë, e të ndërmjetësojë në

krijimin nga universiteti të urave të bashkëpunimit me institucione homologe brenda dhe jashtë vendit.

Atmosfera mikpritëse dhe mjaft miqësore e shoqëroi vizitën e drejtuesve të Fondacionit ALSAR në Universitetin “Ismail Qemali” dhe nënshkrimin e marrëveshjes.

Kryetari i Fondacionit ALSAR, z. Mehdi Gurra, ka zhvilluar një takim në Institutin Shqiptar për Studime Ndërkombëtare.

Ai është pritur nga kryetari, z. Albert Rakipi, me të cilin ka patur një bisedë të mbizotëruar nga shkëmbimi i ideve dhe diskutimi i perspektivave bashkëpunuese.

Përvojat në aktivitetin e dy institucioneve kanë qenë pjesë e natyrshme e bisedës mes z. Rakipi dhe z. Gurra.

Ata kanë folur për mundësitë e bashkëpunimit, si në fushën e botimeve dhe në organizimin e aktiviteteve të përbashkëta.

Bibliotekës së Institutit Shqiptar për Studime Ndërkombëtare iu dhuruan 135 tituj të Botimeve ALSAR.

Në ditën e festës së madhe, të Fitër Bajramit, dhe sipas një tradite të konsoliduar në vite, Fondacioni ALSAR ka pritur mysafirë të shumtë në mjediset e tij.

Zyra e kryetarit të Fondacionit ALSAR, z. Mehdi Gurra, është vizituar nga personalitete të jetës akademike, shoqërore, politike, kulturore, nga bashkëpunëtorë e përfaqësues shoqatash.

Atasheu për Arsimin pranë Ambasadës së Republikës së Turqisë, z. Metin Bulut, është pritur nga z. Mehdi Gurra dhe ka shkëmbyer me të urimet për Fitër Bajramin.

Akademikë, studiues, ish-prefekti i Tiranës, z. Sadi Vorpsi, ish-ambasadori i Shqipërisë në Turqi dhe drejtor i Drejtorisë së Rajonit dhe Vendeve Fqinje në Ministrinë për Evropën dhe Punët e Jashtme, z. Kastriot Robo, prof. dr. Ferid Duka dhe prof. dr. Emil Lafe,  dr. Abaz Hado, artist dhe mbajtës i disa posteve shtetërore, dhe drejtues të shoqatës “Tirana”, përfaqësues dhe pjesëtarë të shoqërisë civile, janë bërë pjesë e festimeve dhe e pritjes në Fondacionin ALSAR.

Me mysafirët e shumtë është ndarë urimi i përbashkët për festën në mbarim të muajit të agjërimit.

Përvojat e ndryshme në Ramazan, mënyrat e përjetimit në këtë muaj, kanë zënë vend në biseda dhe janë trajtuar nga disa këndvështrime.

Për mysafirët është bërë qerasja e rastit me ëmbëlsira, ndërsa mikpritjen e kanë shprehur dhe tavolinat e mbushura.

Me pritjen në ditën e Fitër Bajramit, Fondacioni ALSAR përmbylli më së miri një muaj me angazhim maksimal të aktivitetit të tij, të dalluar për bilancin mbresëlënës humanitar.