Category Page: Kulturore

    Fondacioni ALSAR i pranishëm në Takimin e Dijetarëve të Ballkanit, të mbajtur në Edirne

    Në qytetin turk të Edirnesë është mbajtur para pak ditësh, nga 31 tetori në 2 nëntor, Takimi i Dijetarëve të Ballkanit, një organizim i dytë i këtij lloji.

    Takimi u organizua nga Fondacioni i Dijetarëve Islamë (Islam Alimleri Vakfı), nën kujdesin e Prefekturës së Edirnesë.

    Takimin e kanë ndjekur me praninë e tyre prefekti i Edirmesë, personalitete islame, klerikë dhe dijetarë, rektorë universitetesh, dhe shumë të ftuar nga vendet e Ballkanit.

    Në takim kanë marrë pjesë dhe organizata të ndryshme nga Shqipëria, mes tyre dhe Fondacioni ALSAR, i përfaqësuar nga kryetari, z. Mehdi Gurra.

    Çështja e Gazës mori vëmendje qendrore në një prej seancave të takimit, ndërsa një seancë tjetër iu kushtua familjes dhe sfidave që ajo po ndesh në vendet e Ballkanit.

    Deklarata në fund të takimit përmblidhte temat e diskutuara gjerësisht gjatë ditëve të punimeve.

    Kryetari i Fondacionit ALSAR viziton në Edirne Fondacionin Mimar Sinan, pritet në takim nga homologu turk

    Në një seri vizitash dhe takimesh që po zhvillon në këtë periudhë në Turqi, kryetari i Fondacionit ALSAR është ndalur në Edirne dhe ka vizituar Fondacionin Mimar Sinan (Mimar Sinan Vakfı).

    Mirëseardhjen ia ka uruar kryetari i Fondacionit Mimar Sinan, z. Hasan Gümüş, me të cilin ka patur një bisedë, ku është diskutuar për perspektivat e bashkëpunimit dypalësh.

    Mikpritësi dhe kryetari i Fondacionit ALSAR, z. Mehdi Gurra, kanë folur për marrëdhëniet midis dy institucioneve.

    Ndërsa është vënë në dukje aktiviteti botues i ALSAR-it, z. Hasan Gümüş ka premtuar mbështetje për këto botime.

    Ai dha fjalën se brenda këtij viti do të vijë enkas në Tiranë për një vizitë në Fondacionin ALSAR. Kryetari i Fondacionit Mimar Sinan e ka vizituar dhe para pak vitesh të njëjtin institucion.

    Mehdi Gurra shprehu mirënjohjen për pritjen e ngrohtë, për bisedën dhe ndarjen e ideve të përbashkëta për bashkëpunim në të ardhmen mes dy fondacioneve.

    Në takim ishin të pranishëm dhe mysafirë nga Rumania dhe Presheva, si dhe anëtarë të bordit të Fondacionit Mimar Sinan.

    Drejtuesi i konfederatës sindikale HAK-İŞ pret kryetarin e Fondacionit ALSAR, vizitë në kuadër të bashkëpunimit

    Kryetari i Fondacionit ALSAR ka vizituar në Ankara dhe selinë e Konfederatës HAK-İŞ, entit të njohur sindikal në Turqi.  

    Ai është pritur nga kryetari i konfederatës, z. Mahmut Arslan, i cili i ka uruar mirëseardhjen.  

    Bashkëbisedimi gjatë vizitës ka krijuar mundësinë për t’u njohur me aktivitetet e dy institucioneve gjatë kësaj periudhe dhe për të shkëmbyer ide për forcimin e bashkëpunimit kur është folur në terma konkretë të interesit reciprok. 

    Z. Mahmut Arslan falënderoi z. Mehdi Gurra për bashkëpunimin institucional dhe garantoi për vazhdimin e mbështetjes për më tutje, përgjatë kësaj kohe të mbetur të këtij viti dhe për vitin në vijim, në të tre fushat e aktivitetit të Fondacionit ALSAR, humanitar, arsimor dhe kulturor, specifikisht dhe në realizimin e botimeve me tematikë historike dhe fetare.

    Nga ana e tij, z. Mehdi Gurra e ka falënderuar së pari kryetarin e konfederatës sindikale për mikpritjen. Ai ka vlerësuar mbështetjen e deritanishme dhe zhvillimin e projekteve ku kjo mbështetje është fokusuar.  

    Bisedën e mbizotëroi vullneti i përbashkët për vazhdimësinë e bashkëpunimit. 

    Z. Mehdi Gurra ka zhvilluar në javën e sapombyllur një varg takimesh në Ankara me drejtues të institucioneve turke me të cilat Fondacioni ALSAR ka një bashkëpunim e partneritet të suksesshëm.      

    Kryetari i Fondacionit ALSAR vijon takimet në Ankara, zhvillon një vizitë në Sindikatën e Shëndetësisë, Öz Sağlık-İş

    Në vargun e takimeve që po zhvillon në Turqi, posaçërisht në Ankara, në kuadër të një vizite pune, kryetari i Fondacionit ALSAR është pritur dhe nga drejtuesi i sindikatës turke të Shëndetësisë. 

    Z. Devlet Sert, një mik, bashkëpunëtor e mbështetës prej një kohe të gjatë i Fondacionit ALSAR, e priti z. Mehdi Gurra në selinë e sindikatës dhe pati me të një bisedë të ngrohtë.

    Ai i shprehu vlerësimet mikut nga Tirana për aktivitetet e kryera nga Fondacioni ALSAR gjatë vitit 2024 dhe u njoh në të njëjtën kohë me veprimtaritë e këtij viti.  

    Drejtuesi sindikalist siguroi mbështetjen nga Öz Sağlık-İş për Fondacionin ALSAR për dy muajt e fundit të këtij viti dhe për të gjithë vitin e ardhshëm e në vazhdim. 

    Z. Sert sugjeroi në bisedë se Fondacioni ALSAR duhet të planifikojë dhe të zhvillojë projekte që do t’i mundësonin të ardhura të rrjedhshme dhe, në këtë mënyrë, një bazë më të qëndrueshme të veprimtarisë.

    Falënderime u shprehën nga z. Mehdi Gurra për mbështetjen e dhënë nga sindikata turke e Shëndetësisë gjatë këtij viti dhe më herët.  

    Një mik i vyer i ALSAR-it, z. Devlet Sert, i çmon dhe u jep mbështetje projekteve të fondacionit në fushat e veprimtarisë së tij, mes tyre projekteve të kurseve verore, të kurseve të gjuhës turke, dhe humanitare. Öz Sağlık-İş është një prej enteve turke me të cilat Fondacioni ALSAR ka një bashkëpunim serioz dhe frytdhënës.   

    Në takim ishte i pranishëm dhe prof. dr. Yılmaz Yeşil, një njohës mjaft i mirë i aktivitetit të Fondacionit ALSAR, dhe që po përgatit një vepër të kushtuar këtij aktiviteti në njëzet vite. 

    Kryetari i Fondacionit ALSAR viziton në Ankara kryetarin e TİKA-s dhe e uron për detyrën

    Kryetari i Fondacionit ALSAR ka zhvilluar një vizitë në selinë e TİKA-s, Agjencisë Turke për Bashkëpunim dhe Koordinim. 

    Z. Mehdi Gurra është pritur në vizitën në Ankara nga kryetari i TİKA-s, z. Abdullah Eren, në një takim ku ka mbizotëruar fryma miqësore.

    Kryetari i TİKA-s është uruar për detyrën e re nga z. Gurra, që i ka shprehur dhe gëzimin e veçantë për postin mikut të vjetër të Fondacionit ALSAR.  

    Projektet e vitit në mbarim dhe projektet e vitit të ardhshëm u trajtuan në bisedën e ngrohtë. U fol në veçanti për aktivitetin botues të ALSAR-it, për botimet që përmbajnë dokumente historike dhe të periudhës osmane.  

    Ndërsa ka falënderuar kryetarin e Fondacionit ALSAR për vizitën, mikpritësi ka sjellë në vëmendje bashkëpunimin e deritanishëm dhe ka pohuar se ky bashkëpunim mes dy institucioneve, njëri shtetëror dhe tjetri joqeveritar, do të vijojë dhe në vitet e ardhshme.  

    Z. Gurra dhe z. Eren ndanë mendimin e njëjtë se ndërveprimi institucional i shërben forcimit të mëtejshëm të lidhjeve vëllazërore të dy popujve.

    Bisedën e përshkoi mirëkuptimi i plotë dhe vizioni i qartë për thellimin e bashkëpunimit.  

    TİKA dhe Fondacioni ALSAR realizojnë prej vitesh projekte të përbashkëta, të dobishme dhe me ndikim mjaft pozitiv në fushat dhe shtresat e synuara.      

    Vizitë e kryetarit të Fondacionit ALSAR në zyrat e YTB-së në kryeqytetin turk, pritet nga kryetari i institucionit

    Kryetari i Fondacionit ALSAR ka vizituar gjatë qëndrimit në Ankara titullarin e YTB-së, Departamentit për Turqit që Jetojnë Jashtë Vendit dhe Marrëdhëniet me Komunitetet Mike. 

    Z. Mehdi Gurra i është rezervuar një pritje të ngrohtë nga kryetari i YTB-së, z. Abdulhadi Turus, e shoqëruar nga një bisedë e hapur, miqësore, në kuadër të bashkëpunimit.

    Duke e çmuar njohjen e hershme dhe miqësinë e gjatë të tij dhe të institucionit që drejton me kryetarin e YTB-së, z. Gurra i përcolli atij urimet dhe kënaqësinë e veçantë për këtë detyrë të re dhe të rëndësishme.  

    Në takim u fol për bashkëpunimin ndërmjet Fondacionit ALSAR dhe YTB-së, për arritjet dhe nevojën e mënyrat e konsolidimit të tij.  

    U diskutua gjithashtu për botimet e ALSAR-it dhe për përdorimin e disa titujve prej tyre nga ndjekësit e shkollave verore të organizuara nga YTB-ja në Ballkan.   

    Z. Abdulhadi Turus shprehu konsideratën për aktivitetin e Fondacionit ALSAR, më në verçanti për ndihmën e dhënë studentëve, për organizimin dhe zhvillimin e suksesshëm të kurseve të gjuhës turke, si dhe për përkthimin e botimin e literaturës akademike.

    Kryetari i YTB-së dhe kryetari i Fondacionit ALSAR e theksuan vazhdimin e bashkëpunimit dhe në vitin e ardhshëm, me projekte të përbashkëta në Shqipëri.  

    Mikpritja, atmosfera dhe biseda e ngrohtë rishprehën nivelin mjaft të mirë të marrëdhënieve midis dy institucioneve dhe drejtuesve të tyre përkatës.