Fondacioni ALSAR realizoi të shtunën e 19 nëntorit projektin e shpërndarjes së mishit “Adak” për familje të fëmijëve jetimë të Tiranës.

Shpërndarja u bë në kuadër të aktivitetit humanitar të fondacionit, të mbështetjes së shtresave në nevojë dhe të ndihmës së vazhdueshme për jetimët dhe familjet e tyre.

Mish “Adak” u shpërnda për 300 familje jetimësh, të mbledhur në ambientet e jashtme të Fondacionit ALSAR.

Kjo veprimtari humanitare në ditë të solidaridetit human me njerëz në nevojë përsëritet vit pas viti, si ndihmë për jetimët.

Realizimin e projektit e mbështeti HASENE, organizata e ndihmave me qendër në Gjermani.

Në kuadër të zbatimit të projekteve humanitare në ndihmë të shtresave në nevojë, të komuniteteve dhe institucioneve të ndryshme, një dhuratë e veçantë i është bërë Myftinisë së Malësisë së Madhe.

Drejtuesve të kësaj myftinie iu dorëzua një mjet për shërbimet funerale, i nevojshëm për përgatitjen e të ikurve nga kjo jetë për shtënien në dhé.

Akti i dorëzimit të mjetit të dhuruar u krye në Koplik në praninë e përfaqësuesve të Fondacionit ALSAR dhe të myftinisë.

Falënderime u shprehën nga marrësit e dhuratës për Fondacionin ALSAR dhe kontributin e tij humanitar në vite për shoqërinë.

Projekti u realizua falë bashkëpunimit të ALSAR-it me partnerë në Turqi.

I gatshëm për të dhënë ndihmë aty ku është e nevojshme, Fondacioni ALSAR zhvilloi të martën një aktivitet humanitar në Tropojë.

Në suazën e projektit të emergjencave civile, u ndihmuan me ushqime dhe batanije familje tropojane të prekura nga përmbytjet e pak ditëve më parë.

Shpërndarja u bë në bashkëveprim me pushtetin lokal, ndërsa i gjithë aktiviteti u bë i mundur falë mbështetjes së WEFA-s, organizatës partnere të ndihmave me qendër në Gjermani, përfaqësuesit e së cilës ishin të pranishëm dhe aktivë në terren së bashku me drejtuesit e ALSAR-it.

Për familjet më në nevojë u shpërndanë 100 pako me ushqime dhe 200 batanije; çdo tërheqës i ndihmave mori një pako me artikujt bazë ushqimorë dhe dy batanije.

Përfituesit falënderuan Fondacionin ALSAR dhe WEFA-n për ndihmën e dhënë në këto ditë të vështira për ta.

Në kuadër të realizimit të projekteve të përbashkëta humanitare me organizatën partnere WEFA, me qendër në Gjermani, është bërë dhurimi i orendive shtëpiake për familje të fshatit Vilëz, në njësinë administrative Zall-Bastar.

Pajisja me orendi shtëpiake për tre familje e përmbushi premtimin e dhënë kohë më parë për një ndihmë të tillë.

Orendi të ndryshme iu dhuruan atyre familjeve, në kushte të vështira jetese, me mungesa të skajshme.

Në dhurimin e orendive ishin të pranishëm kryetari i Fondacionit ALSAR, z. Mehdi Gurra, dhe drejtori i projekteve të WEFA-s, z. Mehmet Bakıcı.

Ata bënë vizita në këto familje, biseduan me anëtarët e tyre dhe e panë nga afër realitetin e vështirë; akt i mbështetjes morale, si plotësues i ndihmës materiale.

ALSAR dhe WEFA kanë një bashkëpunim të suksesshëm në fushën humanitare, në ndihmë të shtresave në nevojë.

Fondacioni ALSAR dhe Mercy to Humanity, me qendër në Mbretërinë e Bashkuar, kanë nisur një projekt të përbashkët për të ndihmuar financiarisht fëmijë jetimë.

Në ambientet e Fondacionit ALSAR është bërë dhënia e këstit të parë të ndihmës financiare për 78 fëmijë jetimë, që më së paku do ta marrin atë për një vit.

Realizimi i projektit bëhet në koordinim me degën në Shqipëri të Mercy to Humanity.

Ky është aktiviteti i parë i përbashkët i dy institucioneve, fryt i marrëveshjes së bashkëpunimit për projekte humanitare, të fokusuar te ndihma për fëmijët jetimë.

Fondacioni ALSAR bashkëpunon me shumë partnerë të huaj për kryerjen e veprimtarive të ndryshme humanitare. Bashkëpunimit për realizimin e projekteve në ndihmë të jetimëve i është shtuar tani dhe ai me Mercy to Humanity.

Përgjatë tre ditëve, nga e hëna në të mërkurën e kësaj jave shtatori, Fondacioni ALSAR dhe TİKA, Agjencia Turke për Bashkëpunim dhe Koordinim, po kryejnë një veprimtari të përbashkët bamirëse në ndihmë të familjeve të fëmijëve jetimë.

Nëpërmjet këtij aktiviteti humanitar ndihmohen 50 familje jetimësh, nën kujdesin e ALSAR-it, me fidanë agrumesh. Çdo familje merr si ndihmë 75 fidanë, 25 portokalli, 25 mandarine, dhe po aq limoni.

Një specialist turk i bujqësisë u vjen gjithashtu në ndihmë marrësve të fidanëve me dhënien e informacionit përkatës për mbjelljen dhe mirërritjen e tyre, duke e praktikuar dhe në terren procesin mbjellës.

Pas shpërndarjes së fidanëve të hënën në Lushnjë dhe Kavajë, në ditën e dytë të veprimtarisë, në Shalës, të Bashkësisë së Cërrikut, ishin të pranishëm dhe ambasadori i Republikës së Turqisë në Tiranë, z. Tayyar Kağan Atay, koordinatorja e TİKA-s në Tiranë, dr. Emine Gizem Başkan, si dhe kryetari i Fondacionit ALSAR, z. Mehdi Gurra. Ata u ndalën në fjalën e tyre të rastit te projekti në zhvillim, ndërsa folën dhe më në përgjithësi, për kontributin dhe mbështetjen e gjithanshme turke për popullin shqiptar.

Aktivitetin e ndjekin nga afër, dhe si kontribues në të, një grup aktivistësh, studentë të ardhur nga Turqia në kuadër të një projekti të shkëmbimit të përvojave.

Shpërndarja e fidanëve ka vijuar të mërkurën në Libofshë të Fierit, ku është ndjekur e njëjta procedurë.

Projekti është një prej shumë të tillëve të realizuar nga bashkëpunimi i Fondacionit ALSAR me organizma partnere si veprimtari humanitare në ndihmë të shtresave në nevojë.