Organizata e ndihmave me qendër në Gjermani, HASENE, shpërndau të mërkurën, më 27 tetor, pako ushqimore për 300 fëmijë jetimë të Tiranës.

Shpërndarja u bë pranë ambienteve të Fondacionit ALSAR, e organizuar në bashkëpunim me të. Për të marrë ndihmat në ushqime kishin ardhur familjarë të jetimëve.

Dhënia e pakove me ushqime është një prej veprimtarive humanitare të kryera nga përfaqësuesit vullnetarë të HASENE-së gjatë qëndrimit të tyre njëjavor në vendin tonë.

“Projekti i jetimëve” është ideuar si një takim me jetimët, dhe përmban brenda tij një seri aktivitetesh. Qëllimi është që jetimët të mos mbesin jetimë, por të ndiejnë ngrohtësinë dhe mbështetjen njerëzore të shoqërisë.

Korniza e aktiviteteve gjatë këtyre ditëve të kësaj organizate partnere të ALSAR-it përfshin vizitat në shtëpi jetimësh, dhënien e ndihmave, shtrimin e një dreke për jetimët dhe familjet e tyre, shpërndarjen e mishit “Adak”.

Partneritete të këtilla në ndihmë të jetimëve janë të zakonshme në punën e Fondacionit ALSAR, që kujdesin për jetimët e ka përparësor.

HASENE, oganizata e ndihmave me qendër në Gjermani, po kryhen gjatë kësaj jave një varg aktivitetesh bamirëse për jetimët në vendin tonë, në kuadër të asaj që e ka quajtur “Projekti i jetimëve”.

Me projektin synohet t’u jepet ndihmë fëmjëve që për një arsye a një tjetër kanë humbur njërin nga prindërit apo të dy dhe që kanë nevojë për mbështetje të çdo forme.

Veprimtaria njëjavore zhvillohet në partneritet me Fondacionin ALSAR; një praktikë e ndjekur dhe në të shkuarën për projekte të ngjashme.

Takimi me jetimët bëhet përmes vajtjes në shtëpitë e tyre, ku shihen kushtet e jetesës, bisedohet me familjarët e jepen dhurata.

Përfaqësuesit vullnetarë të HASENE-së të ardhur në Shqipëri do të vizitojnë shtëpitë e 50 fëmijëve jetimë. Vizitat kanë nisur dhe përfshijnë gjeografikisht shtëpi të jetimëve në Tiranë, Durrës, Elbasan, Krujë, Kavajë, Dibër, Burrel dhe Gramsh.

Në shtëpitë e vizituara dhurohen pako ushqimore, ndihmë financiare, libra dhe mjete kancelarike për fëmijët që shkojnë në shkollë.

Përmes projektit përçohet ndjenja e solidaritetit, u jepet mbështetje shpirtërore jetimëve dhe familjeve të tyre, si dhe u lehtësohet sadopak jeta me gjërat e dhuruara.

Realizimi i projekteve të tilla në ndihmë të jetimëve është objektiv i përhershëm i Fondacionit ALSAR. Ai arrihet nëpërmjet bashkëpunimit dhe bashkërendimit me organizata partnere, si HASENE.

Nga bashkëpunimi i suksesshëm midis Fondacionit ALSAR dhe WEFA-s, organizatës së ndihmave me qendër në Gjermani, dhjetëra fëmijë jetimë të kryeqytetit kanë kaluar një të shtunë të paharrueshme zbavitëse.

Veprimtaritë e së shtunës janë zhvilluar në kuadrin e ditëve të solidaritetit me jetimët, për të cilat ka ardhur në Tiranë dhe delegacioni i WEFA-s, në krye të të cilit është kryetari i saj, z. Musab Aydın.

Për dyzet fëmijë jetimë janë dhënë ndihma ushqimore, është organizuar aktivitet zbavitës, është shtruar drekë e përbashkët, janë dhuruar biçikleta dhe veshmbathje.

E shtuna ka nisur me shpërndarjen e ndihmave në pako ushqimore në ambientet e Fondacionit ALSAR, pjesëmarrës aktiv i së cilës ishte kryetari i WEFA-s, si në të gjitha veprimtaritë e tjera të kësaj dite.

Fëmijët jetimë janë dërguar më pas në qendrën e argëtimit “Latitude”, ku kanë luajtur e janë dëfryer.

Një drekë e përbashkët pas lojërave u ka kthyer energjitë fëmijëve, të ngazëllyer nga përkujdesi për ta. Të tjera dhurata po i prisnin…

Për 20 fëmijë, më të vegjlit, të moshës 6-10 vjeç, u dhurua nga një biçikletë; për njëzet të tjerë dhuratë u bënë veshmbathje, të zgjedhura prej vetë atyre në një qendër tregtare.

Dhurimi i biçikletave dhe blerja e veshjeve mbylli aktivitetet e së shtunës kushtuar dyzet fëmijëve jetimë.

WEFA është e falënderuar për mbështetjen e tillë në ndihmë të jetimëve dhe për partneritetin mjaft dobiprurës me Fondacionin ALSAR.

Fondacioni ALSAR ka nisur zhvillimin e një vargu aktivitetesh disaditore në ndihmë të fëmijëve jetimë, në shprehje të solidaritetit me ta dhe në përmbushje të misionit të tij humanitar.

Aktivitetet në ditët e solidaritetit me fëmijët jetimë organizohen në bashkëpunim me një organizatë ndërkombëtare partnere, WEFA-n, me qendër në Gjermani.

Delegacionit të WEFA-s të ardhur në vendin tonë i prin kryetari i saj, z. Musab Aydın. Pjesë e delegacionit janë dhe një grup gazetarësh, për përgatitjen e një reportazhi mbi aktivitetet e këtyre ditëve.

Programi përmban mes të tjerash vizita në shtëpitë e fëmijëve jetimë në tre qytete të vendit, në Librazhd, Elbasan dhe Tiranë. Vizitat shërbejnë për të parë nga afër kushtet e jetesës së jetimëve, për ta prekur realitetin e tyre, për të përçuar te fëmijët jetimë dhe familjet e tyre ndjenjën e solidaritetit, të kujdesit të shoqërisë për ta.

Vizitat e para u kryen të enjten në pesë familje jetimësh në Librazhd. Të premten u vizituan familje të fëmijëve jetimë në Elbasan. Numër i njëjtë vizitash në familjet e jetimëve do të bëhet të dielën në Tiranë.

Për jetimët e vizituar nga përfaqësuesit e ALSAR-it dhe të WEFA-s jepen ndihma në pako ushqimore, në veshmbathje dhe në shumë monetare. Një ndihmë e tillë u dha për jetimët në Librazhd dhe Elbasan.

Programi i përbashkët me WEFA-n vijon të shtunën me të tjera aktivitete në kryeqytet me fëmijët jetimë.

Në kuadër të aktivitetit të tij humanitar, Fondacioni ALSAR i dhuroi spitalit të Peshkopi dy aparatura dialize, si ndihmë në përmirësimin e kushteve spitalore për t’u shërbyer sa më mirë të sëmurëve.

Dhurimi i aparaturave të përdorura të dializës u krye në bashkërendim me Drejtorinë e Shëndetit Publik në qytetin verilindor. Projektin e mbështeti IHH me qendër në Holandë, partnere energjike e ALSAR-it në një varg veprimtarish humanitare.

Ceremonia e dorëzimit të aparaturave të dializës u zhvillua sot, më 7 tetor, në spitalin e Peshkopisë.

Institucionet publike të kujdesit shëndetësor kanë përfituar dhe në të shkuarën nga aktiviteti humanitar i Fondacionit ALSAR, ndihmuar në mënyrë të qenësishme me aparatura apo mjete të tjera infrastrukturore.

Vlen të theksohet se ALSAR u kthye brenda pak javësh në Peshkopi me projekte humanitare. Ai dhuroi muajin e kaluar mjete shkollore dhe ushqime për nxënës dhe banorë të një lokaliteti pranë qytetit.

Me hyrjen e vjeshtës, ditët e ftohta nuk duken më aq larg sa ç’ishin në gushtin përvëlues. Dimri do të nisë të trokasë pak nga pak, duke sjellë dhe nevojën për t’u ngrohur.

Fondacioni ALSAR i paraprin stinës së ftohtë me nisjen e projektit të shpërndarjes së ndihmave dimërore për familje në nevojë.

Mes të parëve që e përfituan ndihmën këto ditë ishin 100 familje të fëmijëve jetimë në Tiranë. Për çdonjërën prej tyre u dhanë nga tre batanije.

Projektin e mbështeti IHH me qendër në Holandë.

Ndërsa kujdeset për fëmijët jetimë, ALSAR nuk lë jashtë vëmendjes dhe familjet e tyre, shpesh në nevojë për gjërat më elementare.

ALSAR-i u gjendet ngaherë pranë shtresave në nevojë të shoqërisë; ndihmat dimërore janë pjesë e aktivitetit humanitar të fondacionit.