Shqipëria është një vend që i ka të gjithë potencialet e duhura për t’u kthyer në një destinacion turistik tërheqës për turistët, siç janë bukuritë natyrore, trashëgimia kulturore edhe mikpritja.Turizmi është një sektor primar për Shqipërinë për shkak se lidhet drejtpërdrejt me mirëqenien dhe rritjen ekonomike vendase. Ai shihet si sektori që do të garantojë zhvillim të qëndrueshëm ekonomik, duke siguruar punësim, nxitje të ndërmarrjeve të vogla e të mëdha, më shumë të ardhura e më shumë mirëqenie për qytetarët shqiptarë.
Pikërisht për shkak të kësaj rëndësie që ka turizmi, dhe rolit që ai luan në ekonominë shqiptare, Fondacioni “ALSAR” ka ofruar mbështetjen e tij modeste ndaj një iniciative të shoqërisë civile, që promovon turizmin e qëndrueshëm dhe gjithëvjetor në Shqipëri, përmes së cilës do të realizohet ngritja e një platforme e cila do të jetë gjithëpërfshirëse në informacionin që siguron për nxitjen dhe rritjen e turizmit në Shqipëri, duke ofruar një hapësirë mediatike e cila të sigurojë: Informacion turistik për vendin tonë dhe të shërbejë si pikë orientimi jo vetëm për të gjithë trevat shqiptare, por edhe për të gjithë turistët e huaj joshqipfolës, që synojnë ta bëjnë Shqipërinë si pikë synimi të udhëtimit të tyre turistik.

Zhvillimi i një turizmi të qëndrueshëm dhe gjithëvjetor, i cili nuk nënkupton vetëm vizitimin e bregdetit gjatë verës, por zhvendosjen e vëmendjes edhe në zonat malore të Shqipërisë, pra në turizmin malor, në turizmin kulturor e historik dhe fetar, kërkon patjetër një promovim të vazhdueshëm të turizmit në Shqipëri dhe krijimin e një platforme që ta mundësojë një promovim të tillë.

Fondacioni “ALSAR” me rastin e festës së Fitër Bajramit, organizoi ceremoninë e pritjes në mjediset e selisë së tij, ku morën pjesë përfaqësues të pushtetit lokal, personalitete të ndryshme të fushës së kulturës, artit dhe shoqërisë civile.

Kryetari i Fondacionit “ALSAR” Z. Mehdi Gurra, gjatë ceremonisë së kësaj dite feste, që rrezaton vlera të solidaritetit human ndër të tjera iu shprehu mirënjohjen përfaqësuesve të pushtetit lokal për bashkëpunimin e tyre të ofruar në misionin e tyre të përbashkët, për t’iu ardhur në ndihmë të shtresave sociale në nevojë, duke deklaruar gjithashtu se, institucioni që ai drejton në përmbushje të programit të tij mirëbërës shoqëror, do të vijojë veprimtarinë e dhurimit të ndihmesës së tij modeste dhe shtrirjes së dorës së bamirësisë, kudo ku ndihet nevoja, për të lehtësuar sadopak problemet e tyre ekonomike e shoqërore.

Është kjo një ditë e veçantë, që shërben edhe si një moment reflektimi për të kontribuar më shumë për të ardhmen e ndritur të shoqërisë dhe kombit shqiptar.

Studentët e ekselencës të Fondacionit “ALSAR”, në kuadër të veprimtarive kulturore të projekteve të vullnetarizmit organizuan veprimtari të prezantimit të recencave të veprave studimore.

Në veprimtarinë ku u bë prezantimi i reçensës se veprës së titulluar “Historia Osmane dhe Institucionet” të autorit  Prof. Dr. Mehmet Maksudoglu”, referues në këtë ceremoni ishte studenti i Fakultetit të Historisë dhe Filologjisë  Indrit Qehajaj.

Gjatë prezantimit të tij ai nxorri në pah vlerat dhe faktet se ky libër i Prof. Dr. Maksudoglu bazohet në dokumente autentike të formuluara në kohën kur ato kishin fuqi veprimi. Referuesi argumenton se, ndryshe nga perandoritë e tjera në historinë e shoqërisë njerëzore, Perandoria Osmane ka funksionuar si Devlet i bazuar në parimet e Kur’anit Famëlartë, që kultivonin mendësitë dhe praktikat e respektimit të kulturave, të formave të organizimit ekonomik e shoqëror , të arsimimit e të arteve të popujve të ndryshëm.

Diskutimi u ndal dhe mbi tolerancën fetare që mbizotëronte në Devletin Osman dhe politikat që  ndiqeshin për ta ruajtur këtë  tolerancë  dhe për t’i siguruar çdo besimtari të  drejta të  barabarta dhe sigurinë e jetës, nderit dhe pasurisë.

Studentët nuk kishin menduar të  qëndronin vetëm në  trajtimin e historisë osmane, por të  diskutonin dhe për territoret shqiptare nën osmanët. U diskutua mbi sistemet  që  u përdorën nga osmanët në  këto troje, për Sadrazamët (kryeministrat) shqiptarë  në  shtetin osman, për pashallëqet dhe deri tek Ismail Qemali, ata vlerësuan në këtë mënyrë gjatë analizës dhe vlerësimeve të tyre  se ky libër, drejtpërdrejt dhe tërthorazi, hedh dritë  mbi çështje të ndryshme të zhvillimit të shoqërisë shqiptare, që nga fillimi i shekullit XV deri në vitin 1912.

Të pranishëm në sallën e konferencave të Fondacionit “ALSAR” ishin studentë të fakulteteve të ndryshme, të cilët përgëzuan referuesin për prezantimin e tij në këtë nismë të ndërmarrë, që synon të zgjerojë horizontin e tyre kulturor.

Fondacioni “ALSAR” në kuadër të zhvillimit të marrëdhënieve të bashkëpunimit në fushën e arsimit dhe të kulturës me Fakultetin e Historisë dhe Filologjisë të Universitetit të Tiranës, zhvilloi në auditorët e këtij fakulteti projektin “Libri dhurata më e çmuar”, që synon të kontribuojë në mënyrë modeste për të pasuruar bibliotekën e këtij institucioni arsimor e akademik.

Përmes realizimit të këtij projekti, u dhuruan 20 tituj të ndryshëm librash botime të Fondacionit “ALSAR”, që përbëjnë një burim të mirëfilltë dijesh dhe ofrojnë një gamë të gjerë njohurish e të dhënash nga punime e studime interesante rreth shumë çështjeve të historisë, të kulturës dhe kërkimit shkencor, ndër të cilat spikat edhe kolana e “Kalendarit Kombiar (1897- 1928)”, një nga veprat më madhore të Rilindjes Kombëtare Shqiptare.

Fondacioni ALSAR në mbështetje të nismave që synojnë të promovojnë vlerat e kulturës dhe trashëgimisë sonë kulturore, ka ofruar kontributin e tij inkurajues për Muzeun e Gruas që është ngritur për të prezantuar nëpërmjet artefakteve, dokumentave apo objekteve të tjera me rëndësi kulturore, historinë e gruas shqiptare në periudhat si Antikiteti, Mesjeta, Periudha Osmane, Rilindja dhe Pavarësia, Monarkia, Lufta e Dyte Botërore, Komunizmi dhe deri në dekadat e sotme.

Muzeu i Gruas është parë nga këndvështrimi i grave, dhe prezanton pozitën e tyre në familje, kontributin dhe influencat e tyre që ato kanë dhënë në shoqëri për arritjen e civilizimit, emancipimit dhe të të drejtave.

Nëpërmjet objekteve personale, veshjeve, dokumentave, fotove, filmimeve, orendive, librave, dhe çdo objekti që është në funksion historik, shpirtëror e psikologjik të jetës së grave, muzeu do të mundësojë informacione të pazbuluara më parë, duke ndihmuar kësisoj edukimin e të rinjve, që nëpërmjet kulturës të kultivojnë njohuritë e tyre dhe memorien historike.

Fondacioni “ALSAR” permes programeve të tij kulturore, angazhohet në ruajtjen e  vlerave të trashëgimisë sonë kulturore.

Fondacioni “Alsar”, në kuadër të veprimtarive kulturore organizoi një udhëtim turistik në Bosnje Hercegovinë, me synimin për të njohur trashëgiminë kulturore e historike të këtij vendi të rajonit tonë.

Magjia e një udhëtimi qëndron në faktin se ia vlen të kundrosh qetësisht një vend, të cilin e sheh për herë të parë, të shuash kureshtjen dhe emocionet që të kanë pushtuar ditë më parë dhe ku realisht para vetes ke gjëra të bukura e mbresëlënëse për të vështruar, objekte dhe peizazhe interesante.

Ky udhëtim i rrallë nuk na emocionoi vetëm për bukuritë e natyrës, kulturën, objektet historike me vlera arkitektonike, rregullin, sjelljen njerëzore, por edhe për zhvillimin e këtij vendi, siç është Bosnje-Hercegovina,

Tashmë të gjithë e dimë historinë e gjakderdhjes së gjenocidit më të egër etnik, nga i cili kanë kaluar më shumë se 20 vjet më parë dhe që do të mbahet mend si një nga ngjarjet më tragjike në Ballkan. Dikur para viteve ’90, një nga gjashtë republikat e ish-Jugosllavisë për disa dekada, një shtet multientnik, ku pjesën më të madhe e zënë boshnjakët, të tjerë serb e kroat.

Populli i thjeshtë dhe kulturëdashës i Bosnje–Hercegovinës,që përjetoi tmerrin e gjenocidit absurd nga fqinji i tij, ka ruajtur me fanatizëm dëshmi të kulturës së lashtë e të re. Gjurmët e atij konflikti të pashembullt shihen edhe sot në godina të ndryshme: shtëpi, hotele, fabrika të goditura nga plumbat e predhat, si muze natyror i asaj faqeje të historisë të shkruar me gjak në vitet 1992-1995. Mostari është një nga qytetet që e pësoi më rëndë këtë gjenocid.

Gjatë udhëtimit tone u ndalëm në këtë qytet ai shtrihej në mes të një grykë të madhe shkëmbore. Ajo që të tërheq mbi gjithçka në Mostar është ura, simboli i qytetit e që njihet në histori si “Ura e Mostarit”.

Lumin Neredva e kalojnë dhjetëra ura, por interesante është ura me gurë, një ndërtim i mrekullueshëm arkitekturor. Ura e vjetër pesëqind vjeçare u shkatërrua me artileri më 9 nëntor të vitit 1993 nga ushtria e kroatëve të Bosnjës. Ura e vjetër nuk kishte rëndësi strategjike, por shkatërrimi i saj për qëllim shuarjen e një simboli të kulturës osmane. Ajo u rindërtua 11 vjet pas shkatërrimit, pas plot 7 vjet rresht pune intensive, dhe sot qëndron përsëri më këmbë mrekullisht e njëjtë në strukturë, si ajo e para, e ndërtuar gjatë viteve 1557 – 1566, nën urdhrat e Sulltan Sulejmanit të Madh.

Mëngjesi i ditës tjetër erdhi mbi Sarajevë, fillimisht në Vrelo Bosne, një park që të përkujton Drilonin në Pogradec. Sarajeva të befason më shumë me arkitekturën karakteristike. Mjafton ky realitet për të kuptuar nga njëra anë natyrën, dhe nga ana tjetër kulturën e zhvillim e saj.

Është e vështirë ta shëtisësh të gjithë Sarajevën, por ne edhe me aq sa e vëzhguam mbetëm mjaft të kënaqur dhe të befasuar njëkohësisht. Sidomos kur u ndodhëm përballë xhamive të shumta, që të stepin në vështrimin e parë me madhështinë e bukurinë e tyre.

Nuk di ku të ndalesh sytë më parë e megjithatë bëjmë dhjetëra foto përpara Xhamisë mbi 500 vjeçare Gazi Husref-bej, e veçantë për vlerat arkitektonike. Një vepër arti e ndërtuar me mjeshtëri në teknikë e kombinacione.

Ditët nuk ishin të mjaftueshme për të shijuar gjithë këto bukuri magjepsëse të Bosnje-Hercegovinës, si gjërat e çmueshme, veçse, duke ju treguar këto fotografi me pamje të këtyre bukurive gjatë ditëve të këtij udhëtimi, mendojmë se do të transmetojmë te ju një pjesë sado të vogël të atyre emocioneve që përjetuam në atë qëndrim të shkurtër, por të paharruar.