Category Page: Humanitare

    Te njerëz në nevojë me ndihma në ushqime

    Fondacioni ALSAR, me përkushtimin e shtuar në këto ditë të solidaritetit human, vazhdon të zhvillojë pa u lodhur aktivitete humanitare.

    Mes tyre ishte dhe shpërndarja e një sasie ndihmash ushqimore për individë e familje nën kujdesin e shoqatës Ryder Albania.

    Tek këta qytetarë në kushte të vështira ekonomike dhe shëndetësore u shkua shtëpi më shtëpi, duke dërguar veç ndihmës dhe paksa ngrohtësi njerëzore.

    Ndihma përbëhej nga 20 pako me artikuj ushqimorë, mundësuar nga “INITALY Risto & Gusto”.

    Falë bashkëpunimit të gjerë, ALSAR zgjeron caqet e dërgimit të ndihmës, posaçërisht në këtë muaj të Ramazanit.

    Iftar për banorë të Kavajës në ditë të solidaritetit human

    Javën e fundit të Ramazanit po e shoqëron intensifikimi i veprimtarive humanitare në ndihmë të komuniteteve dhe shtresave në nevojë.

    Partnerët ndërkombëtarë të Fondacionit ALSAR pasojnë njëri-tjetrin në mbështetje projektesh humanitare në ditë të solidaritetit human.

    HAYRAT, me qendër në Turqi, ka mbështetur dhënie iftari për 100 persona në Kavajë; një aktivitet që ka mbledhur bashkë njerëz për të ndarë momente të gëzuara në mbarim të një dite agjërimi.

    Projektet e shtrimit të iftareve apo të dhënies së vakteve të gatshme të iftarit në zona e komunitete të ndryshme të vendit kanë qenë të vazhdueshme në këtë muaj.

    Përtej karakterit humanitar, ato i shërbejnë krijimit të një atmosfere festive dhe forcimit të lidhjeve shoqërore.

    Vijon realizimi i projekteve humanitare të shpërndarjes së ndihmave ushqimore

    Në vazhdën e një aktiviteti të gjerë humanitar në ditët e muajit të Ramazanit, një sasi e konsiderueshme ndihme në ushqime është dhënë për banorë të fshatit Bulçesh të Tiranës.

    Për njerëz në nevojë janë dhënë 40 pako me artikujt bazë ushqimorë, ndërsa zhvillimin e projektit e ka mundësuar mbështetja nga HAYRAT, organizata e bamirësisë me qendër në Turqi.

    Në terren për shpërndarjen kanë qenë punonjës të Fondacionit ALSAR, të angazhuar çdo ditë në veprimtari të ngjashme.

    HAYRAT është një prej organizmave partnere me të cilin ALSAR po bashkëpunon gjatë këtij muaji për realizimin e projekteve në ndihmë të shtresave në nevojë.

    Solidariteti human është karakteristikë e këtij muaji agjërimi, përçuar te njerëzit përmes ndihmës në shumë forma.

    Për jetimë jepet dhe ndihma financiare e zekatit

    Mjediset e Fondacionit ALSAR janë mbushur me fëmijë jetimë që kanë marrë ndihmën financiare të zekatit.

    Të pritur ngrohtë, ata kanë marrë zarfat me ndihmën e zekatit dhe janë qerasur nga punonjësit.

    Ndihma financiare e zekatit u përfitua nga 50 fëmijë jetimë.

    Realizimin e projektit e mbështeti organizata e ndihmave me qendër në Gjermani, WEFA.

    Fondacioni ALSAR dhe WEFA zhvilluan së bashku disa aktivitete humanitare në këto ditë Ramazani në ndihmë të shtresave në nevojë.

    Fëmijëve jetimë u dhurohen veshmbathje në prag të Bajramit

    Fushata e realizimit të projekteve humanitare në ditët e solidaritetit humanitar gjatë muajit të Ramazanit ka vijuar këtë të mërkurë me dhurimin e veshmbathjeve për fëmijë jetimë.

    Shpërndarja është bërë në ambientet e Fondacionit ALSAR, në një atmosferë të vërtetë feste.

    Artikuj veshmbathjeje janë dhënë për 262 jetimë, në prag të Bajramit.

    Aktivitetin e mbështeti WEFA, organizata e ndihmave ndërkombëtare me qendër në Gjermani.

    Ajo ka mbështetur disa aktivitete humanitare gjatë këtyre ditëve në vendin tonë në ndihmë të shtresave në nevojë.

    Pandërprerë në aktivitet humanitar, shtrohen dhe jepen iftare të paketuara

    Projektet e shtrimit të iftareve dhe të dhënies së vakteve të paketuara të iftareve ndjekin njëri-tjetrin ndërsa muaji i Ramazanit hyn në javën e fundit të tij.

    Ato i mbështeti gjatë këtyre ditëve dhe WEFA, organizata e ndihmave ndërkombëtare me qendër në Gjermani.

    Për anëtarë të Shoqatës së Paraplegjikëve dhe Tetraplegjikëve të Shkodrës u shtrua iftar në një ambient të gjerë.

    Në Tiranë, për shtresa në nevojë dhe pjesëtarë të komunitetit rom u shpërndanë vakte të paketuara iftari, për t’u ngrënë në mjedise familjare.

    Me mbështetjen e WEFA-s, u dhanë në tërësi iftare për 500 persona.

    Ky ent humanitar mbështeti dhe disa veprimtari të tjera, nën organizimin e Fondacionit ALSAR, dhe të gjitha në ditë të solidaritetit human në Ramazan.