Category Page: Humanitare

    Djem e vajza të Kukësit në iftar

    Shtrimi i iftareve, projekt në realizim, është zhvendosur të shtunën në Kukës.

    Me prani të gjatë në këtë qytet nëpërmjet aktiviteteve dhe kurseve të gjuhës turke, Fondacioni ALSAR organizoi dhe shtrimin e këtij iftari, me mbështetjen e paçmueshme të Agjencisë Turke për Bashkëpunim dhe Koordinim.

    Në tryezat e shtruara për muajin e Ramazanit mysafirët kanë qenë pak të veçantë, djem e vajza të Kukësit, të shoqëruar një pjesë dhe nga nënat e tyre.

    Të vegjël, të rinj e të rritur shijuan ushqimin e iftarit dhe përjetuan momente gëzimi.

    ALSAR ka patur një program të ngjeshur humanitar gjatë muajit të agjërimit, dhe shtrimi i iftareve është ndër aktivitetet kryesore dhe me ndikim social.

    Realizohet projekti i shpërndarjes së ndihmave ushqimore në Momël të Kavajës

    Ende në Ramazan, në ditë të solidaritetit human, me veprimtari të shumta humanitare në ndihmë të komuniteteve dhe shtresave në nevojë, vijon shpërndarja e pakove me ushqime.

    Në fshatin Momël, në Kavajë, është zhvilluar aktiviteti i dhënies së ndihmave ushqimore për banorë të zonës.

    Shpërndarja u krye në sheshin para xhamisë së fshatit, ndërsa u dhanë 100 pako me artikujt bazë ushqimorë për familje në nevojë.

    Projekti u mbështet nga Yeryüzü Doktorları, një organizatë joqeveritare me qendër në Turqi, që për mision të saj ka mbërritjen te njerëzit në nevojë pa mundësi për të siguruar shërbim shëndetësor, e me shumë aktivitet humanitar.

    Ky ishte i pari projekt i realizuar nga Fondacioni ALSAR me këtë partner të ri, me të cilin është nënshkruar dhe një protokoll bashkëpunimi.

    Vazhdimësia e një projekti humanitar, iftar dhe në Fushë-Krujë

    Ramazani ka hyrë në ditët e fundit të tij, ndërsa aktivitetet tona humanitare nuk kanë të ndalur.

    Në solidaritet human me shtresa në nevojë, vijojnë veprimtaritë që u lehtësojnë përditshmërinë njerëzve dhe kontribuojnë për vëllazërimin besimor dhe forcimin e lidhjeve sociale.

    Fushë-Kruja ka qenë stacioni i radhës në mesjavë në projektin e shtrimit dhe dhënies së iftareve për agjërues dhe shtresa në nevojë.

    Me mbështetjen e TİKA-s, është mundësuar dhënia e iftarit për 100 persona. Të mbledhur në një xhami, agjërues në Ramazan kanë ngrënë vaktet e parapërgatitura të iftarit.

    Fondacioni ALSAR dhe TİKA janë angazhuar që në nisje të këtij muaji agjërimi në realizimin e projektit humanitar të dhënies e shtrimit të iftareve në qytete të ndryshme të vendit.

    Agjërues në Peshkopi mblidhen në iftarin e shtruar me mbështjetjen nga TİKA

    Projekti i shtrimit të iftareve, një traditë e kahershme e Fondacionit ALSAR, vijon rrugëtimin e tij në këtë Ramazan duke mbledhur në tryeza agjërues e shtresa sociale në nevojë.

    Me mbështetjen e Agjencisë Turke për Bashkëpunim dhe Koordinim, banorë anembanë vendit u janë gëzuar iftareve të përbashkëta apo vakteve të paketuara të dhëna për t’u ngrënë në sofrën familjare.

    TİKA mundësoi dhe shtrimin të enjten të një iftari për 100 persona në qytetin e Peshkopisë.

    Agjërues dhe agjëruese ndanë ushqimin në një ambient të ngrohtë dhe vëllazëror, shkëmbyen përvoja të ditëve e netëve të këtij muaji, e përjetuan momente të lumtura.

    Në ditë së solidaritetit human, ALSAR u gjendet pranë njerëzve dhe në bashkëpunim me ente si TİKA kontribuon për mirëqenien sociale.

    Shtrohet iftar në qytetin e Lushnjës

    Në kuadër të projektit të iftareve në Ramazan, një i tillë është shtruar të mërkurën në qytetin e Lushnjës.

    Iftarin e ka mundësuar TİKA, Agjencia Turke për Bashëpunim dhe Koordinim.

    Tryezat e iftarit janë shtruar për 100 persona, me vakte të parapërgatitura dhe të paketuara.

    Lushnja është një prej qyteteve të përfshira në projektin që po realizohet në një bashkëpunim midis Fondacionit ALSAR dhe TİKA-s.

    Ky projekt humanitar në zhvillim përgjatë gjithë muajit u vjen në ndihmë shtresave në nevojë, mbledh bashkë agjërues dhe forcon lidhjet sociale.

    Në Përrenjas, me pakot e ndihmës dhe iftarin nga TİKA

    Prej në nisje të muajit të Ramazanit, Agjencia Turke për Bashkëpunim dhe Koordinim ka mbështetur një projekt të gjerë ndihme për shtresa në nevojë ngado në vendin tonë.

    Jetimë dhe familje jetimësh janë ndihmuar me ushqime, nga veriu në jug, nga Tirana e në qytete të tjera.

    Punonjësit e Fondacionit ALSAR e kanë patur ndalesën e radhës për shpërndarjen e kësaj ndihme në Përrenjas.

    Banorëve u janë dhënë pako me artikujt bazë ushqimorë, pritur prej tyre me mirënjohje.

    Po ashtu, agjëruesit kanë mundur të shijojnë iftarin e shtruar nga TİKA.

    Në një bashkëpunim të ngushtë, ALSAR dhe TİKA po kontribuojnë në lehtësimin e përditshmërisë së familjeve shqiptare dhe në përçimimin e frymës së solidaritetit human në ditë agjërimi.