Category Page: Humanitare

    Fondacioni “ALSAR” dhe TİKA shpërndajnë ndihma ushqimore për fëmijët jetimë

    Alsar

    Qindra fëmijë jetimë dhe pjesëtarë të familjeve të tyre kanë mbushur pallatin e sportit “Farie Hoti” në kryeqytet, të ftuar për të marrë pako ushqimore, si ndihmë në ditët e solidaritetit human gjatë muajit të madhëruar të Ramazanit.

    Organizuar nga Fondacioni “ALSAR” dhe TİKA, Agjencia Turke për Bashkëpunim dhe Koordinim, shpërndarja e ndihmave ushqimore, në pako me 20 kg, u bë për 1000 fëmijë jetimë të Tiranës.

    Ceremoninë e shpërndarjes së ndihmave e nderuan me pjesëmarrjen e tyre, ambasadori i Republikës së Turqisë në Tiranë, z. Murat Ahmet Yörük, koordinatorja e TİKA-s në Tiranë, znj. Emine Gizem Başkan, dhe kryetari i Fondacionit “ALSAR”, z. Mehdi Gurra.

    Z. Murat Ahmet Yörük u përcolli pjesëmarrësve në fjalën e tij përshëndetjet e presidentit turk, z. Recep Tayyip Erdoğan. Ambasadori tha se për çdo vit në Ramazan mblidhemi këtu me kontributin e TİKA-s dhe nëpërmjet bashkëpunimit me Fondacionin “ALSAR”.

    Ai foli për ndihmat e dhëna në qytete dhe lokalitete të ndryshme të Shqipërisë nga institucione të ndryshme turke, për ecjen krah më krah të dy popujve me miqësi dhe vëllazëri të vërtetë, për premtimin për t’iu gjendur pranë shqiptarëve në ditë të mira dhe të këqija.

    “Nuk ju lamë vetëm pas tërmetit, nuk jamë lamë vetëm gjatë pandemisë. Dhimbjet dhe vuajtjet tuaja janë dhimbjet dhe vuajtjet tona,” tha z. ambasador.

    Murat Ahmet Yörük

    Kryetari i Fondacionit “ALSAR” e nisi fjalën e tij përshëndetëse duke u uruar mirëseardhjen pjesëmarrësve në sallë.

    Z. Mehdi Gurra e vuri theksin te ndihma e TİKA-s për fëmijët jetimë që janë nën kujdesin e Fondacionit “ALSAR”, për shpërndarjen në numër të përgjithshëm të 3500 pakove ushqimore për këta fëmijë, duke nisur me 1000 pako për fëmijët jetimë të Tiranës e duke vazhduar në ditët e ardhshme për ata në qytete të ndryshme të vendit.

    Pasi e bëri dhe njëherë të njohur kujdesin e veçantë të treguar nga “ALSAR”-i për fëmijët jetimë, ai uroi një Ramazan të mbarë dhe agjërim të lehtë për çdokënd.

    Fondacioni “ALSAR” përpiqet gjatë gjithë vitit t’u vijë në ndihmë të pamundurve, familjeve në nevojë, fëmijëve jetimë.
    Kjo ndihmë merr vlerë të veçantë në muajin e bekuar të Ramazanit, si një lehtësim i vështirësive ekonomike dhe si shprehje e solidaritetit njerëzor. Mirënjohje meriton kontributi i TİKA-s për fëmijët jetimë të ndihmuar nga “ALSAR”-i!

    “ndihmesa për jetimin, ndihmë e shquar për shëndetin moral të shoqërisë”

    Fondacioni “Alternativa e së Ardhmes” (ALSAR) organizoi me datë 30 korrik 2019 në Sallën “Unesko” të Muzeut Historik Kombëtar  në Tiranë një veprimtari  kushtuar fëmijëve jetimë “Ndihmesa për jetimin, ndihmë e shquar për shëndetin moral të shoqërisë”, ku u realizua dhe shpërndarja e ndihmës monetare dhe dhuratave për fëmijët pjesëmarrës.

    Në këtë aktivitet, ku ishin të pranishëm fëmijë jetimë nga e gjithë Shqipëria, merrnin pjesë Kryetari i Unionit të Organizatave të Shoqërisë Civile të Botës Islame Z. Ali Kurt, Kryetari i Organizates Wefa Z. Musab AYDIN, përfaqësues të Organizatave të Shoqërisë Civile të Botës Islame.

    ALSAR, përmes zhvillimit të këtij projekti ndër vite ka synuar të ofrojë një ndihmesë dhe përkujdesje për fëmijët jetimë, në drejtim të lehtësimit të vështirësive ekonomike familjare, si dhe të edukimit dhe të arsimimit të tyre, duke e konsideruar këtë si një ndihmesë modeste, por pozitive dhe shumë të rëndësishme jo vetëm për fëmijët jetimë, por edhe për të ardhmen e mbarë shoqërisë shqiptare.

    Programi artistik i këtij aktiviteti ishte i larmishëm. Ai u alternua me:

    Interpretimin e këndimit të Kuranit Famëlartë; Himnet kombëtare, si dhe fjalët përshëndetëse të:

    Ø  Kryetarit të Fondacionit ALSAR, z. Mehdi Gurra, i cili paraqiti një pasqyrim të shkurtër të veprimtarisë së Fondacionit ALSAR ndër vite dhe shërbimeve që ajo ofron për fëmijët jetimë e më gjerë. Në përfundim të fjalës së tij, Z. Gurra falënderoi të gjithë donatorët, veçanërisht Fondacionin WEFA, i cili bëri të mundur ofrimin e donacionit në ndihma financiare dhe dhurata.

    Ø  Kryetarit të  Organizates WEFA me qendër në  Gjermani,   Z. Musab AYDIN si dhe

    Ø   Kryetarit të Unionit të Organizatave të Shoqërisë Civile të Botës Islame Z. Ali Kurt.

    Prezantimi i repertorit të pasur të ansamblit artistik të fëmijëve, krijoi një atmosferë elektrizuese me këngë e valle nga treva të ndryshme të Shqipërisë të veshur me kostume popullore duke shpalosur në sallë një larmi ngjyrash e tingujsh që përfshinë dhe entuziazmuan fëmijët dhe të ftuarit.  Spektakli vijoi me performancën e mrekullueshme të artistit të mirënjohur Met Selimi.

    Në përmbyllje të këtij aktiviteti, fëmijëve iu shpërndanë dhurata në artikuj veshmbathje si dhe ndihma financiare në vlerën e 28 eurove në muaj për periudhën e 3 mujorit të dytë të vitit 2019 mundësuar falë ndihmës dhe kontributit te Organizatës WEFA me qendër në Gjermani.

    “DITËT E SOLIDARITETIT NE NDIHME TE NJEREZEVE NE NEVOJE”

    Bamirësia nuk njeh kufij, në vijimesi të programit “Ditët e solidaritetit” ndalesa e radhës ishte në Konispol, ku u zhvilluan 2 projekte në ndihmë të komunitetit të banorëve të kësaj zone. Projekti i parë konsistoi në dhurimin e pajisjeve elektronike (10 laptop dhe 10 televizore si dhe mjete kancelarike) në ndihmë të shkollave publike dhe nxënësve të kësaj njësie administrative. Ndërsa përmes realizimit të projektit të dytë u mundësua dhurimi i pakove ushqimore për 50 familjet në nevojë të kësaj zone. Kurorëzimi i suksesshëm i këtyre projekteve u mundësua falë ndihmës dhe mbështetjes së ofruar nga kryetari i Bashkisë së qytetit të Afyonit në Turqi, Z. Burhanetin Çoban, i cili gjate kësaj periudhe 3 vjecare ka dhene një kontribut të çmuar në ndihmë të komunitetit te banoreve te Konispolit, si një nga shembujt e dashamirësisë, dhe vëllazërisë që ekziston ndërmjet dy popujve tanë.

    “Dora e ngrohtë” në acarin dimëror

    Me synimin për të vijuar sigurimin e ndihmës për familjet e fëmijëve jetimë, edhe në këto ditë të acarta të stinës së dimrit, Fondacioni “ALSAR” në kuadër të zhvillimit të veprimtarive të tij humanitare, përzgjodhi një ndër zonat veriore me përqendrimin më të madh të tyre, atë të qytetit të Kukësit, për të realizuar projektin “Solidariteti human në ndihmë të fëmijëve jetimë gjatë stinës së dimrit” nëpërmjet të cilit u realizua dhurimi i një kontingjenti ndihmash në lëndë drusore për ngrohje, për të kontribuar sadopak në lehtësimin e vështirësive të tyre ekonomike. Falë mbështetjes së ofruar nga Organizata e Ndihmave Humanitare “ me qendër në Belgjikë, nga ky projekt përfituan, 50 familje të fëmijëve jetimë.

    “SOLIDARITETI HUMAN NË NDIHMË TË FËMIJËVE JETIMË ”

    Me synimin për të vijuar sigurimin e ndihmës ushqimore për familjet e fëmijëve jetimë, Fondacioni “ALSAR” në kuadër të zhvillimit të veprimtarive të tij humanitare, përzgjodhi një ndër zonat me përqendrimin më të madh të tyre, atë të qytetit të Tiranës, për të realizuar më datë 20 tetor 2018 projektin “Solidariteti human në ndihmë të fëmijëve jetimë” përmes të cilit u mundësua dhurimi i një kontingjenti ndihmash në artikuj ushqimorë, për të kontribuar sadopak në lehtësimin e vështirësive të tyre ekonomike.

    ALSAR I DHURON ÇANTA SHKOLLORE NXËNËSVE SANXHAK, PRESHEVË,NOVISAD

    Fondacioni ALSAR në vijimësi të zhvillimit të veprimtarisë se tij mirëbërëse shoqërore në bashkëpunim me institucionet e Bashkësive Islame të Preshevës Medvegjës dhe Bujanovcit dhe të Novi Sadit realizoi më datat 01- 02 tetor 2018 në qytetet: Sanxhak, Novisad dhe Preshevë, projektin e dhurimit të çantave shkollore dhe mjeteve kancelarike nxënësve të shkollave publike që i përkasin shtresave sociale në nevojë.

    Ceremonite zyrtare te realizimit të këtij projekti u zhvilluan në shkollat publike. Në to morën pjesë përfaqësuesit e Bashkësive Islame, përfaqësues të Fondacionit “ALSAR” dhe të organizatës partnere IHH me qendër në Holandë që kontribuoi për sponsorizimin e këtij projekti.

    Realizimi i këtij projekti ishte një kurorëzim i suksesshëm i zhvillimit të marrëdhënieve të bashkëpunimit te ndërsjellë ndërmjet institucioneve tona. Ai konsistoi në dhurimin e 1400 çantave shkollore dhe mjeteve kancelarike për nxënësit e shkollave publike që i përkasin shtresave sociale në nevojë të kësaj zone.

    Drejtuesit e institucioneve arsimore dhe të Bashkësisë Islame të këtyre qyteteve vlerësuan ndihmesën e vyer të Fondacionit “ALSAR” duke e konsideruar atë një akt fisnik të shprehjes se solidaritetit human ndaj vëllezërve të tyre shqiptarë.