Fondacioni ALSAR dhe MENAR, me qendër në Gjermani, po realizojnë një projekt të përbashkët për mbajtjen e një cikli ligjëratash për imamët.

Mbajtja e ligjëratave ka nisur prej ditësh në Pogradec dhe po vijon ende, ndjekur me interes të madh. Për pjesëmarrësit, 25 imamë, ligjërojnë një grup profesorësh nga Turqia.

Në ditën e parë të ligjëratave, një fjalë hapëse, përshëndetëse, ka mbajtur kryetari i Fondacionit ALSAR, z. Mehdi Gurra.

Projekti i shërben përgatitjes së duhur të imamëve, për t’u shërbyer sa më mirë komuniteteve ku ata ushtrojnë aktivitetin e tyre.

Ligjëratat u përcjellin dëgjuesve dije të nevojshme për specifika të detyrës së marrë përsipër, të karakterit teologjik dhe ndryshe, si udhëheqës fetarë të besimtarëve.

Imamët pjesëmarrës do të pajisen pas dy ditësh, në mbarim të ligjëratave, me certifikatat përkatëse.

Botimet ALSAR po zënë me kalimin e kohës gjithnjë e më tepër vend në veprimtarinë e fondacionit, rrjedhojë e përqendrimit të shtuar tek to dhe e kërkesës në rritje të publikut për të marrë në dorë botime kësodore.

Viti 2021 nuk bëri përjashtim nga ky fenomen i dekadës së fundit në veprimtarinë e ALSAR-it. Njëzet e pesë tituj të rinj, të tematikave të ndryshme, iu shtuan qindra botimeve të tjera pararendëse, si pasurues të bibliotekave dhe tregues të rëndësisë së librit në Fondacionin ALSAR. Histori, studime, letërsi, kulturë, gjuhësi, ribotime, botime anastatike, përkthime, teologji… libra për çdo lexues.

“Doracak gjeografik: Shqipëria”, “Bosnja dhe Hercegovina gjatë misionit të Xhevdet Efendiut”, “Kullat e sahatit në Shqipëri”, “Jeta muslimane shqiptare”, “Reformat në Perandorinë Osmane dhe shqiptarët (1792 – 1876)” spikatën fort mes tyre.

Në radhë i erdhën gjithashtu publikut, “Raporti i veprimtarive të Fondacionit ALSAR”, “Pushkini: Jeta dhe veprat”, “Xhelaludin Rumi: Jeta dhe vepra”, “Dasma tiranase”, “Shkolla e Mjekësisë”, “Drejtshkrimi i gegnishtes ose gegnishtja e standardizueme”, “Bashkëudhëtari im i Ramazanit”, “Grekët në çdo epokë (Les grecs a toutes les époques – De la plume d’un ancien diplomate” “Her devirde yunanlılar – Eski bir diplomatın kaleminden)”, “Mevludi Sherif”, “Gruaja dhe familja në dyzet hadithe”, “Horizonte etnokulturore, “Alkimia e shpirtit në epokën e tejmodernizmit”, “Udhëtimi i shenjtë – Jeta e Pejgamberit tonë, Hz. Muhammedit (s.a.v.)”, “Fjalori i homonimeve leksikore në gjuhën shqipe”, “Islami – Liria për të shërbyer”, “Romët (ciganët), këta njerëz të çuditshëm”, “Kërkim në botën e imanit”, “Shtegtim me vargje”, “Mevludi” (në boshnjakisht) dhe “Tregimet e Tironës”.

Autorë të ndryshëm patën fatin kështu ta shohin punën e tyre të botuar në mënyrë të mrekullueshme në qindra kopje; të tjerë të ikur prej kohësh nga kjo jetë u kujtuan dhe u nderuan sërish nëpërmjet Botimeve ALSAR.

Gjithçka tjetër kulturore në veprimtarinë tonë gjatë vitit të kaluar ishin përurimet e ekspozitave, pritjet e personaliteteve të ndryshme dhe vizitat në institucione brenda dhe jashtë vendit, dhurimet e literaturës, të botimeve tona, reagimet publike, qëndrimmbajtëse, pjesëmarrjet në veprimtari (dhe përkujtimore), pjesëmarrjet në panaire librash, etj.

ALSAR-i e mbarti në janar në Tuz dhe Ulqin të Malit të Zi ekspozitën fotografike për njëqindvjetorin e Tiranës si kryeqytet; një aktivitet i mirëpritur për banorët e atjeshëm dhe për drejtuesit vendorë.

Kurset e artit për fëmijë të Galerisë “Hoti” në Plavë u mbështetën me dhurimin në prill nga Fondacioni ALSAR të bazës materiale për to.

Botimet ALSAR u paraqitën në panairet e librit në Shkup dhe Tiranë, duke qëndruar me sukses krah më krah shtëpive më të njohura botuese dhe me aktivitet mjaft të kahershëm. Në realizim të projektit afatgjatë, “Libri, dhurata më e çmuar”, institucione në Elbasan dhe Cërrik morën dhuratë në nëntor dhjetëra tituj nga botimet tona.

Programi fetaro-kulturor i organizuar nga ALSAR-i në muajin e Profetit Muhamed u prit ngrohtë në Cërrik, Ulqin dhe Tuz.

Fondacioni ALSAR mori pjesë në shtator, në Stamboll, në takimin themelues të Unionit Ndërkombëtar të Botuesve të Literaturës Islame; në të njëjtin muaj u nderua me certifikatë mirënjohjeje në Kongresin e 5-të Ndërkombëtar të Materialeve dhe Polimereve në Burdur, Turqi.

Në ekuilibër dhe harmoni me aktivitetin humanitar dhe arsimor, veprimtaria kulturore i dha larmishmëri jetës së Fondacionit ALSAR.

“Jusufi e Zelihaja në letërsinë shqipe”, nga autori Adnan Ismaili, profesor i filologjisë orientale në Universitetin e Tetovës, është një studim i thelluar dhe shterues i kësaj teme në letërsinë shqipe, që përfshin poemat e Muhamed Kyçykut, Hafiz Ali Korçës, dhe një poezi të Çajupit.

Vepra merr në shqyrtim poemat e këtyre autorëve, të krijuara mbi historinë kur’anore të kaptinës “Jusuf”, e cilësuar si “më e bukura e ngjarjeve”.

Studimet si ky synojnë kategorizimin e saktë të vendit të kësaj pasurie letrare në kuadër të letërsisë së përgjithshme shqipe, për çka dhe kjo vepër merr vlerë të veçantë.

Libri është punim i magjistraturës, që autori e ka mbrojtur në Universitetin e Prishtinës.

“Jusufi e Zelihaja në letërsinë shqipe” sapo ka dalë nga shtypi së bashku me disa botime të tjera të Fondacionit ALSAR.

Fondacioni ALSAR i pasuron titujt e botimeve të tij me një vepër madhore, shkruar nga Max Weber.

“Sociologji e fesë” nuk mund të lexohet lehtë, as është për çdokënd. Max Weber përpilon një arkeologji të besimeve fetare si vlerë e padiskutueshme qytetërimformuese.

Në optikën e Weber-it, dukuria fetare ka një rëndësi të posaçme në formimin e shoqërive dhe qytetërimeve, pasi dija e shpallur e sjellë nga profetët ka fuqinë dhe mundësinë për ta rithemeluar shoqërinë nga pikëpamja konceptuale.

Max Weber sheh rolin domethënës të luajtur nga feja në ndryshimin shoqëror përgjatë gjithë historisë. Libri, sipas një kritiku, është kontributi më esencial i shekullit për kuptimin krahasimor dhe evolucionar të marrëdhënies midis shoqërisë dhe fesë, e madje midis shoqërisë dhe kulturës në përgjithësi.

Një vepër klasike në shkencat shoqërore, “Sociologji e fesë” është një libër akademik.

Në vijim të botimeve për çështje të albanologjisë dhe veçanërisht të gjuhës shqipe, ALSAR sjell për lexuesit librin e ri “Karakteri shqiptar dhe etimologjia e emrit gegë”, shkruar nga Mehmet Elezi.

Në të parin studim të derisotëm që rrok këtë temë, autori ballafaqon qëndrime dhe argumente historike, shoqërore-psikologjike, etnografike e gjuhësore, duke iu referuar dhjetëra dijetarëve të mëhershëm e bashkëkohorë.

Libri merr shkas nga etimologjia e emrit gegë dhe cek disa çështje të rëndësishme që lidhen me ruajtjen e gjuhës shqipe dhe me qëndrimet institucionale ndaj saj.