Pasurimi i bibliotekave të institucioneve të ndryshme në të katër anët e vendit është një objektiv dhe aktivitet i kahershëm i Fondacionit ALSAR.

Duke e parë librin si dhuratën më të çmuar, dhe duke parë nevojën për literaturë të institucioneve, ALSAR e ka përsëritur kohë pas kohe projektin e dhurimit të literaturës.

Rritja cilësore dhe sasiore e botimeve të ALSAR-it e ka zgjeruar përpjestimisht dhe projektin në fjalë, të vënë në zbatim në kuadër të aktivitetit kulturor të fondacionit.

Vendqëndrim i projektit “Libri, dhurata më e çmuar” ishte një ditë më parë, më 5 nëntor, Elbasani, ku iu dhurua literaturë Myftinisë së qytetit. Për këtë institucion u dhuruan 37 tituj të botimeve të ALSAR-it, me nga 3 deri në 100 kopje për çdo titull.

Në të njëjtën ditë u dhurua literaturë dhe për Bibliotekën e Cërrikut. Këtij institucioni iu dhurua nga një kopje e 280 titujve, botime të Fondacionit ALSAR dhe të Shtëpisë Botuese Logos-A, me qendër në Shkup të Maqedonisë së Veriut. Bashkë me librat, biblioteka e qytetit të Cërrikut mori dhuratë dhe nga një deri në pesë kopje të 53 numrave të revistës mbarëkombëtare “Shenja”.

Shprehja e mirënjohjes dhe falënderimit për Fondacionin ALSAR i bashkëshoqëroi dy veprimtaritë dhuruese në Elbasan dhe Cërrik.

Në një ambient më të mbledhur, më të ngushtë, u mbajt dhe në Tuz programi fetaro-kulturor kushtuar të Dërguarit të Zotit me rastin e muajit të tij.

Me të njëjtin titull, “Mirë se erdhe mëshira e mbarë botës”, në program kishte lexim Kur’ani, ligjërata dhe këndim mevludi.

U ligjërua për Profetin Muhamed, a.s., për dritën që ai i solli njerëzimit, për besimin islam.

Të pranishmëve iu drejtua me një fjalë kryetari i Fondacionit ALSAR, z. Mehdi Gurra. Dr. Hakan Kutlu, prof. dr. Hamdi Arslan dhe z. Sadush Tahiri patën peshën kryesore të programit, me lexim Kur’ani dhe ligjërata.

Programi fetaro-kulturor i mbajtur për tre ditë radhazi në Cërrik, Ulqin dhe Tuz ishte një organizim i Fondacionit ALSAR në bashkëpunim me entet lokale.

Programi fetaro-kulturor “Mirë se erdhe mëshira e mbarë botës” u mbajt mbrëmjen e së hënës në Ulqin, si një bashkëpunim midis Bashkësisë Islame në Malin e Zi, Mexhlisit të Bashkësisë Islame Ulqin dhe Fondacionit ALSAR.

Muaji i Profetit Muhamed, a.s., dhe ribotimi i veprës “Meuludi Sherif” të Hafiz Ali Ulqinakut nga Fondacioni ALSAR e nxitën organizimin e këtij programi fetaro-kulturor.

Programin e nderoi me praninë e tij atasheu për fenë pranë Ambasadës së Republikës së Turqisë në Mal të Zi, z. Kadir Kaynar.

Dr. Hakan Kutlu, nga Universiteti “Fatih Sulltan Mehmed” i Stambollit, këndoi Kur’an në hapje të programit, për t’u lënë vendin më pas fjalëve përshëndetëse.

I pari përshëndeti kryeimami i Ulqinit, Ali ef. Bardhi, ndjekur nga kryeimami i Tivarit, Muhidin ef. Milaimi.

Fjalë përshëndetëse mbajti po ashtu z. Mehdi Gurra, kryetari i Fondacionit ALSAR.

Ligjëratat u mbajtën nga z. Sadush Tahiri, imam dhe ligjërues prej Shkupit, dhe prof. dr. Hamdi Arslan, nga Universiteti “Fatih Sulltan Mehmed” i Stambollit. Ky i fundit bëri dhe duatë në mbarim të programit.

Mevlud në shqip këndoi z. Besim ef. Cura, imam i Xhamisë së Detarëve. Dr. Hakan Kutlu këndoi mevlud në gjuhën turke.

Programi pati pjesëmarrje të kënaqshme, ndjekur me kërshëri nga të pranishmit në sallë.

Salla e Pallatit të Kulturës të Cërrikut do të mbushej pasditen e së dielës, ditës së fundit të tetorit, me ndjekës të programit fetaro-kulturor kushtuar Profetit Muhamed.

Programi “Mirë se erdhe Mëshira e mbarë Botës” u përgatit në një bashkëpunim mes Fondacionit ALSAR dhe Bashkisë së Cërrikut.

Programi qe konceptuar si një ndërthurje e ligjëratave, leximit të Kur’anit, fjalës përshëndetëse dhe fjalës së rastit.

Në çdo fjalë të mbajtur u vu në pah personaliteti i jashtëzakonshëm i të Dërguarit të Zotit, rëndësia e jetës dhe veprës së tij.

Fjalën përshëndetëse e mbajti kryetari i Bashkisë Cërrik, Andis Salla, dhe atë të rastit, imami i Xhamisë Cërrik, Eduard Sula. Prof. Hamdi Arslan dhe Sadush Tahiri mbajtën ligjëratat. Leximin e Kur’anit e bëri dr. Hakan Kutlu.

Programi e pasuroi jetën fetaro-kulturore të Cërrrikut me përkujtimin e figurës së Profetit Muhamed.

Bashkësia Islame në Malin e Zi dhe Mexhlisi i Bashkësisë Islame të Ulqinit do të organizojnë më 1 nëntor në Ulqin programin fetaro-kulturor me rastin e muajit të Muhamedit, a.s., dhe të ribotimit të Mevludit të Hafiz Ali Riza Ulqinakut.

“Mirë se erdhe mëshira e mbarë botës”, programi fetaro-kulturor kushtuar Profetit Muhamed, a.s., do të ketë lexim Kur’ani, ligjërata dhe këndim mevludi.

I pranishëm, dhe pjesëmarrës në program, do të jetë dhe kryetari i Fondacionit ALSAR, z. Mehdi Gurra.

“Mevludi Sherif” i Hafiz Ali Ulqinakut u ribotua para pak muajsh nga Fondacioni ALSAR, nxitur nga një kërkesë e Mexhlisit të Bashkësisë Islame të Ulqinit. ALSAR e pati bërë botimin e parë në vitin 2015.

Në program është paraparë që të gjithë të pranishmëve t’u dhurohet nga një kopje e ribotimit të “Mevludi Sherif”-it.

Ç’janë romët? Ç’është e kaluara e tyre, nga vijnë, ku gjenden? Ç’i dallon, ç’traditë kanë, ç’gjuhë? Ç’bëhet me ta sot dhe si parashihet e ardhmja e tyre?

Monografia e botuar nga Fondacioni ALSAR i trajton të tëra këto pyetje, me një vështrim të gjithmbarshëm, gjeografik, historik, etnografik, gjuhësor, letrar. Ajo flet për përndjekjen, për vuajtjen, për ekzistencën e tyre në vendin tonë dhe në pjesë të tjera të Europës.

“Romët (ciganët), këta njerëz të çuditshëm!” e shuan kureshtjen për shumë gjëra të paditura për ta, si krijesa njerëzore rëndom të paragjykuara e të shpërfillura.

“Romi,” thekson autori, Viktor Bakillari, “nuk do qiejgërvishtës, do tendë; nuk do beton, do hapësirë të blertë; nuk do asfalt, do rrugë me kalldrëm; nuk do bori makinash, do cicërima zogjsh; nuk do rrapëllimë metalike a sirenë treni, do trokun e patkonjve dhe hingëllimën e kalit.”

Mendësia cigane merr një kapitull për t’u trajtuar; me t’u lexuar, asgjë e theksuar më sipër nga autori nuk përbën më çudi.

Pak fjalë, shumë mendim (Xaca dùme, but godi), siç thonë romët, përcjellin 187 proverbat rome të sjella në shqip nëpërmjet frëngjishtes. Përpos tyre, janë dhe krijimet letrare për romët; ato poetike, nga autorë të huaj, përgjithësisht francezë (Bodler, Rembo, Apoliner, etj.), dhe nga poeti shqiptar Pano Taçi.

Përzgjedhje e kujdesshme u është bërë këngëve, poezive (në poezinë e romëve, në poezinë frënge dhe shqipe). Autori e ka plotësuar gjithçka të thënë për romët me një tregim të tijin, që në qendër ka romin shqiptar. Bibliografia mbyll trajtesën monografike.

Ndër të rrallat monografi në shqip për romët, ajo e shton më tej larminë e titujve të botuar nga Fondacioni ALSAR.