Category Page: Kulturore

    Përurohet libri, “Betejat e humbura të Tiranës”, botim i Fondacionit ALSAR

    Salla “Balsha” në hotelin “Tirana International” mblodhi mbrëmjen e së enjtes së 17 marsit figura të politikës, kulturës, akademizmit, klerit, etj., në ceremoninë e përurimit të librit të ish-presidentit Bamir Topi.

    Botuar nga Fondacioni ALSAR, “Betejat e humbura të Tiranës” flet për kryeqytetin nga optika e një banori autokton. Në përkufizimin e vetë autorit, libri është e vërteta e tij për Tiranën, të cilën e ka parë dhe rrëfyer si qytet dhe kryeqytet.

    Në radhën e personaliteteve që e kanë marrë fjalën në ceremoninë e përurimit mes pjesëmarrësve të shumtë, ka folur së pari kryetari i entit botues, Fondacionit ALSAR, z. Mehdi Gurra.

    Pasi u ka uruar fillimisht mirëseardhjen të pranishmëve, ai është ndalur te botimi i librit të ish-presidentit Bamir Topi, ka dhënë arsyet pse ALSAR-i zgjodhi ta botojë veprën, dhe ka vënë në pah njëkohësisht dhe aktivitetin botues të fondacionit.

    “Bashkëpunimi ynë me z. Bamir Topi për botimin e këtij libri është mbështetur në faktin domethënës se ai është një qytetar i Tiranës, një banor i përhershëm i saj, një vendas që shkruan për Tiranën! Kapaciteti i tij intelektual dhe mundësia për të shprehur shqetësime reale dhe reflektime serioze për kryeqytetin në një botim na sollën te pëlqimi për t’ia botuar veprën,” u theksua në fjalën e z. Gurra.

    Nxitur nga libri, folësit në vijim i kushtuan minuta të tëra Tiranës, nga Beqir Meta, Neritan Ceka dhe Arben Tafaj, te Fatmir Sejdiu, ish-presidenti i Kosovës.

    Fjala e gjatë në fund e autorit, me tregime përjetimesh dhe konstatimesh që çuan në shkrimin e librit, do të mbyllej me falënderime, mes të cilave spikaste ajo për kryetarin e Fondacionit ALSAR.

    “Dëshiroj të falënderoj nga zemra z. Mehdi Gurra, i cili tregoi një gatishmëri të menjëhershme – këto gatishmëritë e menjëhershme janë shumë natyrale, shumë natyrale – për ta botuar librin dhe për ta sjellë në dritë,” tha z. Topi.

    Me falënderimet e autorit do të përfundonin dhe fjalët e mbajtura në ceremoninë e përurimit të botimit më të ri të Fondacionit ALSAR.

    [rev_slider slidertitle=”postim alsar betejat e humbura” alias=”postim-alsar-betejat-e-humbura”]

    Një ish-president si autor në botimet tona, Bamir Topi rrëfen betejat e humbura të Tiranës

    Botimet ALSAR i paraqiten publikut me një tjetër titull të ri në pak javë, “Betejat e humbura të Tiranës”, shkruar nga Bamir Topi.

    Autori, ish-president i Republikës, është i njohur për lidhjen e fortë emocionale me kryeqytetin, vendlindjen e tij, por dhe për angazhimin politik në dekadat e tranzicionit shqiptar.

    Ndjeshmëri, qasje, këndvështrime dhe analiza janë elemente të strukturës së këtij libri me një nëntitull intrigues, “Doktrina politike e racizmit social mbi tiranasit në kryeqytetin e Shqipërisë”.

    Prof. dr. Bamir Topi sugjeron kështu përmes titullit dhe nëntitullit trajtesa të guximshme dhe delikate në faqet e këtij botimi.

    Fondacioni ALSAR do të organizojë në ditët e ardhshme, saktësisht më 17 mars, dhe një ceremoni përuruese për librin, me një ftesë për pjesëmarrje për çdokënd.

    Botimet e reja përbëjnë bazën e aktivitetit kulturor të ALSAR-it, duke u krijuar hapësirë botuese shumë autorëve.

    [rev_slider slidertitle=”postim alsar bamir topi” alias=”postim-alsar-postim-2225″]

    ALSAR nxjerr nga shtypi librin, “Ri-Rrugë e Mëndafshit”

    Botimet ALSAR vazhdojnë të sjellin te lexuesi në mënyrë ritmike tituj të rinj, duke i qëndruar besnik traditës së shumëllojshmërisë tematike.

    Ndërsa një ditë më parë u bëmë të ditur botimin, “Propozime për drejtshkrimin”, u njohim sot me një tjetër libër të ri.

    Punimet në këtë botim e ftojnë lexuesin t’i kushtojë vëmendje dhe ta rimendojë konceptualisht Rrugën e Mëndafshit.

    “Ernest Pariset, një dijetar francez i mëndafshit i shekullit të nëntëmbëdhjetë, e ndau historinë e gjatë të mëndafshit në katër epoka të mëdha: epoka e kinezëve, epoka e muslimanëve, epoka e italianëve dhe epoka e francezëve,” na tregon libri në tekstin e kapakut të pasmë.

    “Cila do të mund të ishte forca shtytëse pas këtij marshimi madhor të mëndafshit nëpër kohë dhe hapësirë? … Shkëmbimi i mëndafshit nuk është asgjë tjetër, veçse pjesë e një dinamike historike të bashkëveprimit njerëzor.”

    “Në vitet në vijim ne do të shohim se projektet e reja të realizuara nga vendet në Rrugën e Mëndafshit do të luajnë rol kyç për procesin e ri integrues midis lindjes dhe perëndimit…”

    Sigurisht  që “Ri-Rrugë e Mëndafshit” ka në brendësi shumë më tepër se kaq, një material të bollshëm shpjegues dhe ndriçues.

    [rev_slider slidertitle=”postim alsar propozime per drejtshkrimin 1″ alias=”postim-alsar-propozime-per-drejtshkrimin-1″]

    Botim dyvëllimësh në fushën e gjuhësisë, “Propozime për drejtshkrimin”

    Fondacioni ALSAR sapo nxori nga shtypi veprën gjuhësore në dy vëllime, “Propozime për drejtshkrimin”.

    Një botim me interes për gjuhëtarët, për vetë specifikat e përmbajtjes.

    Për të thënë diçka mbi botimin ngjan e udhës t’i referohemi parathënies së tij, ku lexohet mes të tjerash se, “Botimi i këtyre dy vëllimeve me propozime për drejtshkrimin në vitin e 50-vjetorit të Kongresit të Drejtshkrimit, synon të tërheqë vëmendjen e opinionit publik mbi atë kuvend historik kombëtar dhe të theksojë rëndësinë që ka njohja dhe zbatimi i normës letrare në përgjithësi e i drejtshkrimit në veçanti, si elementi themelor e më i dukshëm në çdo tekst të shkruar. Njëkohësisht, duke vlerësuar mendimin shkencor të autorëve të shkrimeve, shprehim bindjen se këto vëllime përmbajnë propozime me vlerë për të plotësuar mungesat e kodit drejtshkrimor ose për të përmirësuar anët e dobëta të tij. Të mbledhura kështu bashkë, shkrimet me propozime për drejtshkrimin e shqipes, të bëra pas botimit të ‘Drejtshkrimit të gjuhës shqipe’ (1973) dhe të ‘Fjalorit drejtshkrimor’ (1976), e pasurojnë bibliotekën e gjuhësisë shqiptare me një material studimi shumë të dobishëm për hulumtime në fushën e gjuhësisë sonë normative.”

    Sa për përmbajtjen e dy vëllimeve, atë e gjejmë gjithashtu të shpjeguar në parathënie: “Vëllimi i parë përmban njëmbëdhjetë materiale nga grupi i drejtshkrimit i Këshillit Ndërakademik dhe tridhjetë artikuj të tjerë, ku trajtohen probleme të përgjithshme të drejtshkrimit dhe krahas tyre edhe një numër çështjesh më të veçanta. Vëllimi i dytë përmban gjashtëdhjetë e shtatë artikuj për çështje drejtshkrimore dhe gramatikore që lidhen me drejtshkrimin. Autorë të tyre janë studiues të njohur të gjuhës shqipe dhe pedagogë të universiteteve shqiptare.”

    Ky botim është një tjetër kontribut i Fondacionit ALSAR për kulturën shqiptare në përgjithësi, e për gjuhësinë në veçanti.

    [rev_slider slidertitle=”postim alsar propozime per drejtshkrimin” alias=”postim-alsar-postim-11000″]

    Përurohen tre librat e autorit Burhan Al Din Sejdi Fili me një ceremoni plot emocione

    Salla “Consortium”, në hotelin “Tirana International”, priti dhjetëra njerëz këtë të shtunë, të 19 shkurtit, në ceremoninë e përurimit të tre botimeve të Fondacionit ALSAR, përmbledhjeve poetike të autorit Burhan Al Din Sejdi Fili, “Burrnia foli”, “Kërkim në botën e imanit” dhe “Shtegtim me vargje”.

    Me pjesëmarrjen e tyre e nderuan ceremoninë kryetari i Bashkësisë Islame të Kosovës, Myftiu Naim Efendi Tërnava, drejtori i Institutit Albanologjik të Prishtinës, prof. dr. Hysen Matoshi, dhe prof. dr. Seit Mansaku.

    Fjalën e hapjes e mbajti kryetari i Fondacionit ALSAR, entit botues, e njëkohësisht organizues i ceremonisë së përurimit, z. Mehdi Gurra, i cili pasi i përshëndeti pjesëmarrësit, në veçanti mysafirët e ardhur nga larg, e përgëzoi autorin për punën krijuese letrare. Ai i bëri një përshkrim të tillë autorit dhe poezisë së tij:

    “Burhan Fili është prej një soji njerëzish të ndeshur rrallë e më rrallë, që mirësinë e zemrës ua shpreh shkëlqimi i syve dhe fytyrës. Model i thjeshtësisë, i besimtarit, i veprimtarit të palodhur, ai është prej atyre shembujve njerëzorë për të cilët shoqëria ka nevojë sot më tepër se kurrë.

    “I urtë, i menduar, i përkorë në fjalë, Burhan Fili zgjodhi të mos i mbajë ndjenjat mbyllur brenda vetes, por t’i shprehë ato në vargje, për t’u përcjellë lexuesve emocionin, frymëzimin, idealizmin, këshillimin, tregimin e rrugës së drejtë, rrugës së besimit.

    Poezia e tij, me vargun e thjeshtë, i flet çdokujt, troket në çdo zemër. Vargjet e tij janë si feksja e dritës në agim, të lehta si ajo dritë e lehtë, por tejet grishëse!

    “Burhan Fili i vuri një pritë të përkohshme lumit të tij poetik, mblodhi e zgjodhi prej andej një tufë të madhe poezish dhe vendosi t’ia japë për botim Fondacionit ALSAR.”

    Myftiu Naim Efendi Tërnava, prof. dr. Hysen Matoshi dhe prof. dr. Seit Mansaku e analizuan më në brendësi poezinë e Burhan Al Din Sejdi Filit, cituan vargje dhe shprehën konsiderata për tre librat, ndalur më së shumti te “Burrnia foli” për vetë specifikën e saj tematike.

    [rev_slider slidertitle=”postim alsar Burhan Al Din Sejdi Fili” alias=”postim-alsar-postim100″]

    Ligjëratë për Islamin dhe Perëndimin, botimi ynë më i ri

    Fondacioni ALSAR i sjell lexuesit një botim dygjuhësh, një ligjëratë të mbajtur dekada më parë, por me mjaft interes dhe sot për temën e trajtuar.

    “Islami dhe Perëndimi” vjen në gjuhën e përkthyer dhe në atë origjinale, në shqip dhe anglisht.

    Princi i Uellsit e mbajti këtë ligjëratë më 27 tetor 1993 në Teatrin Sheldonian. Lexuesi do të ketë mundësi të njihet me pikëpamjet e këtij personaliteti të lartë britanik mbi një çështje tepër delikate dhe vazhdimisht në diskutim.

    Ligjëratën u kujdes ta botojë më herët Qendra për Studime Islame e Oksfordit.

    Ky botim u shtohet titujve të botuar nga ALSAR-i, gjithnjë e më të shumtë, gjithnjë e më të shumëllojshëm.

    [rev_slider slidertitle=”postim alsar ligjerate islamin” alias=”postim-alsar-ligjerate-islamin”]