Fondacioni ALSAR zhvilloi të premten e 27 janarit disa aktivitete në qarkun e Kukësit. Një prej tyre ishte dhurimi i kompjuterave për institucionin e Prefekturës.

ALSAR i erdhi në ndihmë këtij institucioni me pesë kompjutera, një printer dhe një pajisje për grirjen e letrave.

Prefekti i qarkut, z. Ali Hallaçi, i pranishëm në ceremoninë e dorëzimit, shprehu falënderimin dhe kënaqësinë për ndihmën me pajisje të tilla, si dhe çmoi bashkëpunimin e suksesshëm me Fondacionin ALSAR.

Ndihma e dhënë i shërben rritjes së cilësisë së shërbimit ndaj qytetarëve në këtë prefekturë në verilindje të vendit.

Projekti u realizua në kuadër të veprimtarive humanitare të Fondacionit ALSAR, të shumta gjatë gjithë vitit dhe me një gamë të gjerë përfituesish, institucione dhe shtresa sociale në nevojë.

Aktiviteti humanitar i Fondacionit ALSAR ka vijuar në këto ditë janari me zbatimin e projektit të ndihmave dimërore, për t’iu gjendur pranë shtresave në nevojë.

Në qarkun e Elbasanit janë shpërndarë ndihma në dru zjarri, në batanije dhe në veshmbathje për familje në nevojë dhe për familje jetimësh.

Çdo përfitues i kësaj ndihme ka marrë një metër kub dru, dy batanije, si dhe veshmbathje. Shpërndarjen nuk e ka penguar moti me reshje të dendura.

Veprimtarinë e mbështeti Organizata Ndërkombëtare Islame e Bamirësisë, me qendër në Kuvajt.

Shpërndarja e ndihmave dimërore është një veprimtari e përsëritur në vazhdimësi gjatë stinës së ftohtë, me të cilën u vihet në ndihmë njerëzve më në nevojë.

Projekti humanitar i dhurimit të fidanëve të arrave pati këtë të shtunë të 24 dhjetorit fazën e tij përmbyllëse.

Në Lushnjë, Fier, Gramsh dhe Kavajë u dhuruan fidanë arrash për 40 familje jetimësh.

I nisur fillimisht në Tiranë, projekti do të vijonte realizimin në Bulqizë dhe Kukës, me shpërndarjen e fidanëve për banorë të atyre zonave, si dhe të Klosit, Burrelit e Tropojës.

Ai u finalizua me sukses, duke u ardhur në ndihmë në total 93 familjeve të fëmijëve jetimë me shpërndarjen e 5000 fidanëve të arrave.

E gjithë veprimtaria, në përmbushje të misionit të Fondacionit ALSAR për t’u qëndruar pranë shtresave në nevojë, u përkiste projekteve humanitare dimërore.

Projektin e mbështeti WEFA, organizata e ndihmave me qendër në Gjermani, e falënderuar për kontributin.

Në shprehje të solidaritetit human me shtresat në nevojë, e posaçërisht me jetimët, një dhurues nga Turqia ka dhënë për ta një sasi ndihme në ushqime dhe në mjete për ngrohje.

Për fëmijë jetimë në Tiranë dhe Shkodër janë dhuruar 50 pako ushqimore; një ndihmë e konsiderueshme dhe domethënëse.

Kontributi tjetër përbëhej nga tre soba me dru për ngrohje dhe gatim, destinuar për familje jetimësh.

Dhjetori ka qenë i mbushur me veprimtari të tilla humanitare në ndihmë të jetimëve dhe familjeve të tyre.

Një numër i madh jetimësh janë ndihmuar në ditë të solidaritetit human, në kuadër të realizimit të projekteve humanitare dimërore.

Një tjetër projekt i realizuar të martën në ndihmë të jetimëve ishte dhe dhurimi i veshmbathjeve për një numër prej tyre.

Të mbledhur në sallën e konferencave të Fondacionit ALSAR, 30 jetimë morën dhuratë veshmbathje të zgjedhura me kujdes për ta për stinën e dimrit.

EMİN, me qendër në Gjermani, e mbështeti dhe këtë aktivitet, në kuadër të ndihmës dimërore.

Ditët e solidaritetit human në dhjetor i karakterizojnë veprimtari të ngjeshura në ndihmë të shtresave në nevojë, më në veçanti në ndihmë të jetimëve.

Nga mbështetja financiare te ndihma me dru zjarri dhe ushqime, kontributi për jetimët dhe familjet e tyre është i gjerë dhe i gjithanshëm.

Në kuadër të ditëve të solidaritetit human me shtresat në nevojë dhe të realizimit të projekteve humanitare dimërore është bërë këtë të martë dhe dhurimi i batanijeve.

Ndihmën e përfituan 32 familje jetimësh dhe në nevojë. Për çdo familje u dhanë dy batanije.

Aktiviteti i zhvilluar pasoi një sërë veprimtarish dhuruese, në të cilat janë shpërndanë ndihma të tjera për familjet e jetimëve, si dru zjarri, soba dhe ushqime.

Një gamë e gjerë aktivitetesh humanitare të dedikuara jetimëve dhe familjeve të tyre synon t’ua lehtësojë sadopak vështirësitë e jetesës në stinën e dimrit.

Realizimi i projekteve mundësohet nga bashkëpunimi i Fondacionit ALSAR me organizata, shoqata dhe fondacione partnere.