Sot, më 22 shkurt, u realizua në Pogradec projekti i dhurimit të pemëve për më shumë hapësira të gjelbërta.

Me këtë rast u dhuruan 25 pemë dekorative, që do t’ia shtojnë gjelbërimin dhe bukurinë qytetit buzë liqenit.

Aktiviteti nisi me pritjen e drejtorit administrativ të Fondacionit ALSAR, z. Saimir Rusheku, nga kryetari i Bashkisë së Pogradecit, z. Ilir Xhakolli. Një bisedë e ngrohtë dhe falënderimi për ALSAR-in nga mikpritësi për këtë kontribut në gjelbërimin e qytetit e mbizotëruan takimin.

Më pas u vijua me mbjelljen në park të pemëve të dhuruara, ndjekur me kureshtje dhe mirënjohje dhe nga qytetarë në shëtitje.

ALSAR zhvillon prej vitesh projekte të tilla për përmirësimin e cilësisë së jetës. Fondacioni ka dhënë kontribut të vyer për shtimin e gjelbërimit si në kryeqytet dhe në qytete të tjera nëpërmjet realizimit të shumë projekteve për dhurimin dhe mbjelljen e pemëve.

Fondacioni ALSAR nisi sot ndihma materiale drejt Turqisë, destinuar për të prekurit nga tërmetet shkatërrimtare të këtij muaji.

Dy mjete të mëdha transporti mbartin artikuj ndihme dhuruar AFAD-it, Agjencisë së Menaxhimit të Fatkeqësive dhe Emergjencave në Turqi.

Kryetari i Fondacioni ALSAR, z. Mehdi Gurra, ambasadori i Republikës së Turqisë në Tiranë, z. Tayyar Kağan Atay, koordinatorja e TİKA-s në Tiranë, znj. Emine Gizem Başkan, punonjës të Ambasadës së Republikës së Turqisë dhe të Fondacionit ALSAR, ishin të pranishëm në nisjen e kamionëve.

Ndihma përmban gjeneratorë, ngrohësa elektrikë, lavatriçe, dyshekë, jorganë, jastëkë, veshmbathje dhe artikuj higjienikë. Sasia në copë e ndihmës është 9056, me peshë 7475 kilogramë, ndërsa ngarkesa përbëhet nga 1145 pako.

I spikatur për aktivitetin e gjerë humanitar, Fondacioni ALSAR është angazhuar që në ditët e para të fatkeqësisë për mbledhjen dhe dërgimin e ndihmave për vëllezërit në Turqi.

Një shumë monetare është dërguar më herët, e pas saj ka mbërritur në zonat e goditura nga tërmeti një kuzhinë lëvizëse, e cila do të qëndrojë atje për tre muaj dhe do të përgatisë e shpërndajë ushqim të ngrohtë për banorët.

Me solidaritet dhe ndihmesë, Fondacioni ALSAR i gjendet pranë popullit turk në këto ditë të vështira.

Në Kahramanmarash, në epiqendrën e tragjedisë prej tërmeteve shkatërruese të 6 shkurtit, ndodhet prej ditësh kuzhina lëvizëse e Fondacionit ALSAR.

Punonjës të fondacionit u vijnë në ndihmë përmes saj banorëve me ushqim të ngrohtë, shpërndarë gjatë gjithë ditës, mëngjes, drekë dhe mbrëmje.

Ende në javën e parë të qëndrimit në Turqi, kuzhina lëvizëse do të sigurojë ushqim të ngrohtë për të prekurit nga tërmetet për tre muaj. Në të përgatiten 15.000 racione në ditë, 5.000 për çdo vakt.

Ndihma e këtillë humanitare është e koordinuar me WEFA-n, organizatën partnere me qendër në Gjermani, dhe AFAD-in, agjencinë shtetërore turke të menaxhimit të fatkeqësive dhe emergjencave.

Fondacioni ALSAR ka nisur që në momentet e para të fatkeqësisë një fushatë për mbledhje kontributesh për t’u ardhur në ndihmë vëllezërve në Turqi. Krahas saj, punonjësit tanë të mbërritur në zonat e goditura nga tërmetet po shpërndajnë ndihma në artikuj të ndryshëm, duke ndihmuar në përballimin e pasojave katastrofike.

Goditur dhe shkatërruar prej tërmetesh të fuqishme të hënën e javës së kaluar, qytete dhe provinca të tëra në jug dhe juglindje të Turqisë janë në nevojë të ngutshme për ndihmë të gjithanshme.

Në kuadër të dhënies së kësaj ndihme ka vajtur në Kahramanmarash dhe një grup punonjësish të Fondacionit ALSAR. Ata prej ditësh po kontribuojnë në terren me shpërndarje ndihmash për banorët.

Aktiviteti i ngjeshur humanitar po zhvillohet në bashkëpunim dhe në bashkërendim me AFAD-in, Agjencinë e Menaxhimit të Fatkeqësive dhe Emergjencave në Turqi, WEFA-n, organizatën e ndihmave me qendër në Gjermani, dhe një organizëm joqeveritar turk, Gönüllerde Birlik Vakfı.

Në Elbistan, një qytet në provincën e Kahramanmarashit, të prekurve nga tërmeti u jepen ushqime, batanije dhe artikuj të ndryshëm të nevojshëm.

Mes të ftohtit dhe rrënojave, ndihma përcillet duar më duar te nevojtarët, njerëz që kanë humbur të afërmit dhe shtëpitë.

Pasojat tragjike të tërmeteve të rëna në Turqi më 6 shkurt kanë zgjuar ndjenjën e solidaritetit ngado, në njerëz të thjeshtë, në organizata joqeveritare, në institucione shtetërore dhe qeveri.

Ndjenja e tilla e solidaritetit e ka përfshirë dhe Fondacionin ALSAR që në momentet e para të tragjedisë së përmasave apokaliptike, vënë në lëvizje për të kontribuar me ç’është e mundur në ndihmë të popullit mik e vëlla turk.

Organizime takimesh, mbledhje fondesh, ndihmash, dhe bashkërendime veprimtarish humanitare me ente partnere, me një objektiv të vetëm, “Në ndihmë të vëllezërve tanë në Turqi”, janë sot përditshmëria e Fondacionit ALSAR.

Në kuadër të mbledhjes së kontributeve monetare, një shumë prej 5.000 eurosh i është dërguar tashmë AFAD-it, Agjencisë së Menaxhimit të Fatkeqësive dhe Emergjencave në Turqi.

Një kuzhinë lëvizëse dhe një grup punonjësish të fondacionit janë nisur dhe pritet të mbërrijnë në Kahramanmarash për të dhënë si ndihmë në terren ushqim të ngrohtë për të dëmtuarit nga tërmetet. Kuzhina lëvizëse do të qëndrojë atje për tre muaj, duke shpërndarë 15.000 racione ushqim në ditë, nga 5.000 racione për çdo vakt, në mëngjes, drekë dhe mbrëmje. Me një shumë bashkëshoqëruese prej 9.000 eurosh me këtë ndihmë do të blihen dhe artikuj të nevojshëm për banorët në zonë, në kushtet e emergjencës së plotë. Aktiviteti në terren i ALSAR-it koordinohet me WEFA-n, organizatën e ndihmave me qendër në Këln të Gjermanisë, dhe të dy entet e bashkërendojnë punën me AFAD-in.

Në të njëjtin kohë, po punohet për mbledhje dhe përgatitje artikujsh bazë për popullatën, batanije, dyshekë dhe veshmbathje, mes të tjerash, për t’u dërguar shumë shpejt me dy kamionë në zonat e goditura, ku çdo ndihmë është e mirëpritur.

Ky solidaritet dhe kjo veprimtari e ethshme për mbledhjen dhe dërgimin e ndihmave nuk merr fund në pak ditë. Angazhimi solidarizues dhe humanitar i Fondacionit ALSAR në ndihmë të vëllezërve në Turqi do të vijojë, me mundësitë dhe kapacitetet në dispozicion, për aq sa të jetë e nevojshme.

Në shprehje të solidarësisë me vuajtjet e popullit turk pas tërmeteve shkatërrimtare të 6 shkurtit, Fondacioni ALSAR dhe Lidhja e Hoxhallarëve të Shqipërisë po bashkëpunojnë prej ditësh për mbledhje dhe dërgim të ndihmave.

Në kuadër të këtij bashkëpunimi, në ambientet e Fondacionit ALSAR është bërë dorëzimi i një shume të konsiderueshme ndihme monetare të mbledhur nga LHSH-ja.

Kreu i këtij institucioni, z. Sokol Kondakçiu, e dorëzoi shumën monetare prej 10.000 eurosh të mbledhur si ndihmë, në zyrën e kryetarit të ALSAR-it, z. Mehdi Gurra.

Shuma në euro do të kalojë përmes ALSAR-it në destinacionin e duhur, në ndihmë të vëllezërve në Turqi.

Një përfaqësi e LHSH-së do të shkojë gjithashtu aty ku ka ndodhur fatkeqësia, për ta treguar nga afër solidaritetin dhe për të dhënë së bashku me ALSAR-in ndihmën në kapërcimin e fatkeqësisë që e ka goditur Turqinë mike.