Me përkushtimin e gjithhershëm për të qenë në krah të jetimëve, për t’i ndihmuar dhe për t’i bërë të mos ndihen të vetëm, ALSAR realizoi të shtunën, më 28 janar, shpërndarjen e një sasie pakosh me ushqime.

Ndihma u nda në ambientet e jashtme të fondacionit për jetimët e shoqëruar dhe me familjarë.

Pakot me artikujt bazë ushqimorë u dhanë për 50 jetimë.

I pranishëm dhe aktiv në shpërndarjen e ndihmës ushqimore ishte dhe drejtori i qendrës në Gjermani të EMİN-it, shoqatës humanitare që e mundësoi realizimin e projektit.

Shpërndarja e pakove ushqimore është një prej veprimtarive të vazhdueshme të Fondacionit ALSAR në aktivitetin e ngjeshur humanitar, e kryer shpesh dhe në bashkëpunim me ente partnere.

Në qarkun e Elbasanit u realizua në fundjavë projekti i shpërndarjes së fidanëve të arrave.

Në aktivitetin humanitar me shumë të pranishëm dhe të ndjekur me interes u shpërndanë 1000 fidanë arrash.

Fidanët u dhuruan për 20 familje jetimësh. Çdonjëra prej tyre mori 50 rrënjë.

Përfituesve të ndihmës me fidanë u është dhënë një mundësi e mirë për të siguruar pas një kohe të ardhura të qëndrueshme dhe për të përmirësuar jetesën.

Shpërndarja e fidanëve është veç një prej projekteve të vëna periodikisht në zbatim në ndihmë të jetimëve dhe të familjeve të tyre.

Projektin e mbështeti EMİN, shoqata humanitare me qendër në Gjermani.

Në kuadër të aktiviteteve të zhvilluara në qarkun e Kukësit është bërë dhe shpërndarja e një numri të konsiderueshëm të sobave për ngrohje.

Përfitues të projektit humanitar të ndihmave dimërore të realizuar më 27 janar kanë qenë nxënës të shkollave “Përbreg” dhe “Elmaz Ademi”.

Veprimtaria humanitare u zhvilluar në bashkëpunim me Prefekturën e Qarkut Kukës. Për nxënësit e këtyre shkollave u dhuruan 20 soba për ngrohje.

Projekti u realizua me mbështetjen e shoqatës humanitare EMİN, me qendër në Gjermani.

Një përfaqësues i saj dhe prefekti i qarkut ishin të pranishëm në dhurimin e kësaj ndihme dimërore.

Fondacioni ALSAR zhvilloi të premten e 27 janarit disa aktivitete në qarkun e Kukësit. Një prej tyre ishte dhurimi i kompjuterave për institucionin e Prefekturës.

ALSAR i erdhi në ndihmë këtij institucioni me pesë kompjutera, një printer dhe një pajisje për grirjen e letrave.

Prefekti i qarkut, z. Ali Hallaçi, i pranishëm në ceremoninë e dorëzimit, shprehu falënderimin dhe kënaqësinë për ndihmën me pajisje të tilla, si dhe çmoi bashkëpunimin e suksesshëm me Fondacionin ALSAR.

Ndihma e dhënë i shërben rritjes së cilësisë së shërbimit ndaj qytetarëve në këtë prefekturë në verilindje të vendit.

Projekti u realizua në kuadër të veprimtarive humanitare të Fondacionit ALSAR, të shumta gjatë gjithë vitit dhe me një gamë të gjerë përfituesish, institucione dhe shtresa sociale në nevojë.

Aktiviteti humanitar i Fondacionit ALSAR ka vijuar në këto ditë janari me zbatimin e projektit të ndihmave dimërore, për t’iu gjendur pranë shtresave në nevojë.

Në qarkun e Elbasanit janë shpërndarë ndihma në dru zjarri, në batanije dhe në veshmbathje për familje në nevojë dhe për familje jetimësh.

Çdo përfitues i kësaj ndihme ka marrë një metër kub dru, dy batanije, si dhe veshmbathje. Shpërndarjen nuk e ka penguar moti me reshje të dendura.

Veprimtarinë e mbështeti Organizata Ndërkombëtare Islame e Bamirësisë, me qendër në Kuvajt.

Shpërndarja e ndihmave dimërore është një veprimtari e përsëritur në vazhdimësi gjatë stinës së ftohtë, me të cilën u vihet në ndihmë njerëzve më në nevojë.

Projekti humanitar i dhurimit të fidanëve të arrave pati këtë të shtunë të 24 dhjetorit fazën e tij përmbyllëse.

Në Lushnjë, Fier, Gramsh dhe Kavajë u dhuruan fidanë arrash për 40 familje jetimësh.

I nisur fillimisht në Tiranë, projekti do të vijonte realizimin në Bulqizë dhe Kukës, me shpërndarjen e fidanëve për banorë të atyre zonave, si dhe të Klosit, Burrelit e Tropojës.

Ai u finalizua me sukses, duke u ardhur në ndihmë në total 93 familjeve të fëmijëve jetimë me shpërndarjen e 5000 fidanëve të arrave.

E gjithë veprimtaria, në përmbushje të misionit të Fondacionit ALSAR për t’u qëndruar pranë shtresave në nevojë, u përkiste projekteve humanitare dimërore.

Projektin e mbështeti WEFA, organizata e ndihmave me qendër në Gjermani, e falënderuar për kontributin.