Në ditën e dytë të realizimit të projektit të ndihmave ushqimore për Ramazan, janë shpërndarë pako për shtresa në nevojë të Tiranës dhe rrethinave të tij.

Pranë ambienteve të Fondacionit ALSAR u krye shpërndarja e ndihmave në ushqime për 150 familje jetimësh.

Po të shtunën, e njëjta veprimtari u zhvillua në fshatin Mënik, me përfitues të ndihmave 100 familje në nevojë.

Në dhënien e pakove me ndihma ushqimore morën pjesë aktivisht punonjës të organizatës që e mbështet projektin, HASENE, me qendër në Gjermani.

Aksioni humanitar vijon më pas në Lushnjë, e nesër në Elbasan. Gjatë tre ditëve do të jepen si ndihmë 800 pako me ushqime.

Afrimi i Ramazanit shoqërohet dhe këtë vit me realizim të projekteve humanitare në ndihmë të shtresave në nevojë.

Me mbështetjen nga HASENE, organizata e ndihmave me qendër në Gjermani, dhe pjesëmarrjen e gjashtë punonjësve të saj, nga e premtja në të dielën do të shpërndahen 800 pako me ushqime në katër qytete të vendit.

Sot ishte radha e shpërndarjes së ndihmave ushqimore në Pogradec, realizuar në bashkëpunim me Bashkinë e qytetit.

Ndihma e dhënë në Progradec përbëhej nga 200 pako me artikujt më bazë ushqimorë, shpërndarë për familje në nevojë. Pakot u dërguan dhe në shtëpi për njerëz të pamundur.

Projekti vijon realizimin të shtunën me shpërndarjen e pakove me ushqime në Tiranë dhe Lushnjë, e të dielën në Elbasan.

Është në traditën e Fondacionit ALSAR t’i shpeshtojë veprimtaritë humanitare në të hyrë të Ramazanit dhe gjatë tij, për të mbërritur te sa më shumë nevojtarë dhe për të dhënë sa më tepër ndihmë.

Në kuadër të kujdesit të vazhdueshëm për fëmijët jetimë, një ndihmë financiare është shpërndarë për ta.

Në ambientet e Fondacionit ALSAR u dha kësti i tretë për 78 jetimë, përfitues nga projekti i realizuar me mbështetjen e Mercy to Humanity, me qendër në Britani.

Bashkërendimin në projekt e ndjek nga afër dega në vendin tonë e këtij enti humanitar.

I pari projekt i përbashkët mes ALSAR-it dhe Mercy to Humanity vijon prej një kohe të kontribuojë për mirëqenien e jetimëve.

Në fokus të aktivitetit tonë humanitar, fëmijë jetimë përkrahen e ndihmohen financiarisht, mes të tjerash, gjatë tërë vitit.

Sot, më 22 shkurt, u realizua në Pogradec projekti i dhurimit të pemëve për më shumë hapësira të gjelbërta.

Me këtë rast u dhuruan 25 pemë dekorative, që do t’ia shtojnë gjelbërimin dhe bukurinë qytetit buzë liqenit.

Aktiviteti nisi me pritjen e drejtorit administrativ të Fondacionit ALSAR, z. Saimir Rusheku, nga kryetari i Bashkisë së Pogradecit, z. Ilir Xhakolli. Një bisedë e ngrohtë dhe falënderimi për ALSAR-in nga mikpritësi për këtë kontribut në gjelbërimin e qytetit e mbizotëruan takimin.

Më pas u vijua me mbjelljen në park të pemëve të dhuruara, ndjekur me kureshtje dhe mirënjohje dhe nga qytetarë në shëtitje.

ALSAR zhvillon prej vitesh projekte të tilla për përmirësimin e cilësisë së jetës. Fondacioni ka dhënë kontribut të vyer për shtimin e gjelbërimit si në kryeqytet dhe në qytete të tjera nëpërmjet realizimit të shumë projekteve për dhurimin dhe mbjelljen e pemëve.

Fondacioni ALSAR nisi sot ndihma materiale drejt Turqisë, destinuar për të prekurit nga tërmetet shkatërrimtare të këtij muaji.

Dy mjete të mëdha transporti mbartin artikuj ndihme dhuruar AFAD-it, Agjencisë së Menaxhimit të Fatkeqësive dhe Emergjencave në Turqi.

Kryetari i Fondacioni ALSAR, z. Mehdi Gurra, ambasadori i Republikës së Turqisë në Tiranë, z. Tayyar Kağan Atay, koordinatorja e TİKA-s në Tiranë, znj. Emine Gizem Başkan, punonjës të Ambasadës së Republikës së Turqisë dhe të Fondacionit ALSAR, ishin të pranishëm në nisjen e kamionëve.

Ndihma përmban gjeneratorë, ngrohësa elektrikë, lavatriçe, dyshekë, jorganë, jastëkë, veshmbathje dhe artikuj higjienikë. Sasia në copë e ndihmës është 9056, me peshë 7475 kilogramë, ndërsa ngarkesa përbëhet nga 1145 pako.

I spikatur për aktivitetin e gjerë humanitar, Fondacioni ALSAR është angazhuar që në ditët e para të fatkeqësisë për mbledhjen dhe dërgimin e ndihmave për vëllezërit në Turqi.

Një shumë monetare është dërguar më herët, e pas saj ka mbërritur në zonat e goditura nga tërmeti një kuzhinë lëvizëse, e cila do të qëndrojë atje për tre muaj dhe do të përgatisë e shpërndajë ushqim të ngrohtë për banorët.

Me solidaritet dhe ndihmesë, Fondacioni ALSAR i gjendet pranë popullit turk në këto ditë të vështira.

Në Kahramanmarash, në epiqendrën e tragjedisë prej tërmeteve shkatërruese të 6 shkurtit, ndodhet prej ditësh kuzhina lëvizëse e Fondacionit ALSAR.

Punonjës të fondacionit u vijnë në ndihmë përmes saj banorëve me ushqim të ngrohtë, shpërndarë gjatë gjithë ditës, mëngjes, drekë dhe mbrëmje.

Ende në javën e parë të qëndrimit në Turqi, kuzhina lëvizëse do të sigurojë ushqim të ngrohtë për të prekurit nga tërmetet për tre muaj. Në të përgatiten 15.000 racione në ditë, 5.000 për çdo vakt.

Ndihma e këtillë humanitare është e koordinuar me WEFA-n, organizatën partnere me qendër në Gjermani, dhe AFAD-in, agjencinë shtetërore turke të menaxhimit të fatkeqësive dhe emergjencave.

Fondacioni ALSAR ka nisur që në momentet e para të fatkeqësisë një fushatë për mbledhje kontributesh për t’u ardhur në ndihmë vëllezërve në Turqi. Krahas saj, punonjësit tanë të mbërritur në zonat e goditura nga tërmetet po shpërndajnë ndihma në artikuj të ndryshëm, duke ndihmuar në përballimin e pasojave katastrofike.