Programi humanitar në vendin tonë i shoqatës së ndihmave me qendër në Gjermani, EMIN, përmbante dhe projektin e mbështetjes së jetimëve, duke ndihmuar dhjetëra prej tyre.

Në aktivitetin e organizuar të hënën në mjediset e Fondacionit ALSAR, personeli i përbashkët shpërndau veshmbathje dhe ndihmë financiare për fëmijë jetimë.

Për 75 jetimë u dhanë veshmbathje; një ndihmë e konsiderueshme dhe e nevojshme për fëmijët. U shpërnda gjithashtu dhe ndihmë financiare për 50 jetimë.

Shpërndarja e ndihmave u bë në kuadër të ditëve të solidaritetit human në Ramazan, mbushur me veprimtari të shumta humanitare, të zhvilluara shpesh si bashkëpunime të ALSAR-it me partnerë ndërkombëtarë.

EMIN do të shpërndante gjithashtu ndihma ushqimore për shtresa në nevojë dhe do të shtronte iftare në fundjavën e kaluar.

Njerëz të shumtë, besimtarë, banorë, pjesëtarë komunitetesh dhe shtresash në nevojë, i çelën së bashku iftaret e shtruara me mbështetjen e shoqatës së ndihmave me qendër në Gjermani, EMIN.

Atmosferë festive u krijua në organizime të ndryshme në tre qytete, në iftaret e shtruara në tre ditë për 500 persona, në tërësi.

Në kryeqytet, në dy iftare u thirrën komunitete në nevojë dhe besimtarë të Laprakës, me haje për 100 persona në secilin prej tyre.

Iftar për 150 të pranishëm u organizua në Labinot të Elbasanit. Për një numër të njëjtë të ftuarish, 150, u shtrua iftar dhe në Kavajë.

Traditë e hershme e Fondacionit ALSAR, shtrimi i iftareve mbart solidaritetin human dhe përjetimin e përbashkët të ditëve të gëzuara të Ramazanit.

Shoqata e ndihmave humanitare me qendër në Gjermani, EMIN, ka shpërndarë në bashkëpunim me Fondacionin ALSAR pako ushqimore për njerëz në nevojë.

Ndihma në ushqime u dha në kuadër të ditëve të solidariteti human gjatë Ramazanit. Për shpërndarjen e një pjese të saj u shkua shtëpi më shtëpi.

Nga 70 pakot me ushqime, 60 prej tyre u shpërndanë për paraplegjikë dhe tetraplegjikë të shoqatës “Shpresë për jetën”. Shpërndarja e 10 të tjerave u bë për individë në gjendje jo të mirë ekonomike dhe shëndetësore, për të sëmurë rëndë nën përkujdesin e shoqatës “Ryder Albania”.

EMIN u është bashkuar në këtë mënyrë shoqatave dhe organizatave ndërkombëtare që po bashkëpunojnë me Fondacionin ALSAR gjatë këtij muaji për realizimin e projekteve të përbashkëta humanitare.

Shtresa dhe komunitete në nevojë përfitojnë në Ramazan ndihma të konsiderueshme, si kontribute humanitare për t’ua lehtësuar sadopak jetën dhe për t’u shprehur solidaritetin njerëzor.

Bashkëpunimi i Fondacionit ALSAR me institucionet turke, përkatësisht me Agjencinë Turke për Bashkëpunim dhe Koordinim (TİKA), merr tjetër përmasë gjatë muajit të Ramazanit.

Përmes projekteve të përbashkëta humanitare bëhet e prekshme për mijëra njerëz anembanë vendit tonë ndihma e buruar nga miqësia e dy popujve.

Në këtë kuadër, të premten e 15 prillit u organizua shpërndarja e pakove me ushqime pranë ambienteve të Fondacionit ALSAR.

Aktiviteti u zhvillua me praninë e ambasadorit të Republikës së Turqisë në Tiranë, z. Murat Ahmet Yörük, të koordinatores së TİKA-s në kryeqytetin tonë, znj. Emine Gizem Başkan, dhe të kryetarit të Fondacionit ALSAR, z. Mehdi Gurra.

Ambasadori turk, pasi e përshkroi Ramazanin si një muaj solidariteti, vuri në dukje veprimtarinë e TİKA-s dhe rolin e saj ndërkombëtar, posaçërisht dhe në Shqipëri.

“TİKA është marka ndërkombëtare e Turqisë, e shquar në aktivitetet e saj për zhvillim dhe ndihmë sociale në Shqipëri, në të gjithë Ballkanin, e madje në mbarë botën. Ajo ka zbatuar deri më sot rreth 600 projekte në Shqipëri,” tha z. Murat Ahmet Yörük.

Kryetari i Fondacionit ALSAR nënvizoi bashkëpunimin me institucionet turke dhe dha shifra të ndihmës së parashikuar për t’u shpërndarë.

Mehdi Gurra theksoi mes të tjerash: “Bashkëpunojmë prej 16 vitesh me të gjitha institucionet turke. Vetëm për këtë vit, me ndihmën e TİKA-s do të ndihmohen në tërësi 10 mijë familje.”

Ai e bëri të ditur për të pranishmit dhe mjetet e informimit se TİKA ka për t’u ardhur në ndihmë në këtë muaj Ramazani fëmijëve jetimë nën përkujdesin e ALSAR-it.

Ambasadori turk, kryetari i Fondacionit ALSAR dhe koordinatorja e TİKA-s e nisën më pas shpërndarjen e pakove me ndihma ushqimore për jetimët dhe familjet e tyre.

Një sasi prej 1000 pakosh me ushqime, me artikujt më bazë ushqimorë, u shpërnda gjatë aktivitetit humanitar. Ndërkaq, sasia e tërë e ndihmës ushqimore që do të ndahet gjatë Ramazanit për jetimët dhe familjet e tyre, në bashkëpunim me ALSAR-it dhe TİKA-s, është 3000 pako.

Në tre ditët e aktiviteteve humanitare të mbështetura nga organizata e ndihmave me qendër në Gjermani, WEFA, përveç shpërndarjes së pakove me ushqime, dhënies së veshmbathjeve dhe ndihmës financiare të zekatit për fëmijë jetimë, u realizuan dhe shtrime iftaresh.

Në dy mbrëmje Ramazani, iftare u shtruan për banorë të Zall-Bastarit dhe për komunitete në nevojë. Iftaret mblodhën në tryeza 300 persona, në frymën e përjetimit në bashkësi të muajit të agjërimit.

Atmosfera festive e krijuar përçoi te të pranishmit në iftare ndjenjën e mirësisë dhe begatisë hyjnore, si dhe të solidarësisë njerëzore.

Ata ndanë së bashku ushqimin dhe shtuan vëllazërinë mes tyre, falënderues nga zemra për shtruesit e iftarit.

Tradita e shtrimit të iftareve, e pasuruar vit pas viti, Ramazan pas Ramazani, ndjek rrugën e saj në Fondacionin ALSAR me mbështetjen e organizatave dhe fondacioneve partnere.

Në kuadër të aktiviteteve të përbashkëta në ditët e solidaritetit human gjatë Ramazanit, Fondacioni ALSAR dhe WEFA shpërndanë për fëmijë jetimë ndihmën financiare të zekatit.

Dhënia e zarfave u bë të enjten, më 14 prill, në ambientet e Fondacionit ALSAR, shoqëruar me momente festive, gëzimi, për fëmijët.

Ndihmën financiare të zekatit e përfituan 50 fëmijë jetimë. Realizimi i projektit u bë i mundur falë mbështetjes së organizatës së ndihmave me qendër në Gjermani, WEFA.

Jetimët zënë një vend të veçantë në misionin e Fondacionit ALSAR për t’u qëndruar pranë shtresave në nevojë. Ndihmat për ta janë periodike dhe të ndryshme.

Ndërkaq, WEFA ka mbështetur gjatë këtyre ditëve një varg veprimtarish humanitare, nga shpërndarja e pakove ushqimore te shtrimi i iftareve.