Në aktivitetin treditor mirëbërës të kësaj jave të WEFA-s në vendin tonë ishte dhe dhurimi i veshmbathjeve për fëmijë jetimë.

Përgjatë dy ditëve, më 14 dhe 15 prill, 250 fëmijë jetimë morën dhuratë veshmbathje në ambientet e Fondacionit ALSAR.

Shpërndarja u bë kështu nëpërmjet një organizimi të përbashkët të ALSAR-it dhe WEFA-s. Pakot e dhuruara jetimëve përmbanin pantallona dhe bluza.

Organizata e ndihmave me qendër në Gjermani kontribuon si shumë të tjera në ditët e solidaritetit human gjatë Ramazanit për realizimin e projekteve të shumta humanitare.

Një partnere e qëndrueshme e ALSAR-it, ajo u vjen në ndihmë shtresave në nevojë të shoqërisë sonë në këtë muaj të veçantë, të dalluar nga të tjerët.

U bënë tashmë rreth dy javë që Fondacioni ALSAR zhvillon veprimtari intensive humanitare në kuadër të muajit të Ramazanit.

Vijimin e këtyre veprimtarive po e mbështet këto ditë një prej partnerëve ndërkombëtarë, WEFA, me qendër në Gjermani.

Bashkëpunimi përfshin një sërë aktivitetesh, një prej të cilëve u zhvillua të mërkurën, më 13 prill.

E përfaqësuar me një delegacion, WEFA u erdhi në ndihmë 250 familjeve në nevojë me pako ushqimore.

Ndihmat në ushqime u shpërndanë në koordinim me ALSAR-in në njësinë administrative Zall-Bastar.

Solidariteti dhe fryma vëllazërore që bart muaji i Ramazanit u shpreh gjithashtu nëpërmjet vizitave në shtëpi të familjeve në kushte të vështira jetese.

Fondacioni ALSAR organizoi në njësinë administrative Kërrabë, në bashkëpunim me shoqatën turke të ndihmave humanitare, HAYRAT, shpërndarjen e pakove ushqimore për banorë të kësaj zone.

Udhëhequr nga slogani, “Bereqeti i Ramazanit u përhaptë nga zemra në zemër anekënd botës”, HAYRAT e mbështet me kontribut të çmuar aksionin humanitar të ALSAR-it në këtë muaj agjërimi.

Ndihma ushqimore u dhanë për familje në nevojë të Kërrabës, të mbledhur në një shesh të qendrës administrative, dhe u shpërndanë gjithashtu nëpër shtëpi në kushte të vështira ekonomike.

Kjo ndihmë përbëhej nga 200 pako me artikujt më bazë ushqimorë, mjaft të nevojshme për familjet në nevojë të zonës.

Ditët e solidaritetit human në Ramazan nënkuptojnë veprimtari të shumta humanitare të Fondacionit ALSAR, të zhvilluara në bashkëpunim me fondacione dhe shoqata të ndryshme ndihmash, përgjithësisht të huaja.

Qindra e mijëra njerëz në nevojë përfitojnë përgjatë këtij muaji nga realizimi i projekteve të përbashkëta të shpërndarjes së ndihmave.

Fondacioni ALSAR e përmbylli aktivitetin humanitar në Shkodër në ditën e parë të kësaj jave me shpërndarjen e 90 pakove me ushqime për familje në nevojë.

Shpërndarja e kësaj ndihme u mundësua dhe falë kontributit të dhuruesve të tjerë, individë të gatshëm për t’iu bashkuar ditëve të solidaritetit human në Ramazan.

Sasia prej 90 pakosh ishte veç një pjesë e 250 pakove ushqimore të shpërndara të hënën në Shkodër, në një veprimtari të gjerë humanitare në bashkëpunim me partnerë të huaj.

Familje në nevojë, të verbër, paraplegjikë dhe tetrapelgjikë përfituan nga e tërë ndihma e dhënë gjatë asaj dite.

Veprimtari të ngjashme humanitare do të zhvillohen në ditët e ardhshme në qytete dhe lokalitete të tjera. Ka një gamë të gjerë të tyre në Ramazan, në realizime projektesh të ndryshme, të gjitha koncentruar në dëshirën dhe vullnetin për ta bërë sa më të prekshëm shprehjen e solidaritetit njerëzor.

Mes kontribuesve në shpërndarjen e ndihmave ushqimore këtë të hënë në Shkodër ishte dhe shoqata “Türkevi”, me qendër në Holandë.

Ardhur me projektin e Ramazanit të këtij viti, “Türkevi Topluluğu” kontribuoi me 50 pako me ushqime.

Përfitues në aktivitetin humanitar të organizuar nga Fondacioni ALSAR ishin familje në nevojë dhe anëtarë të shoqatës së të verbërve.

I gjithë organizimi i fillimjavës u bë në kuadër të ditëve të solidaritetit human gjatë Ramazanit, gjatë së cilave ndihma të shumta shpërndahen për shtresat më në nevojë të shoqërisë, me synimin fisnik për të përçuar shpresë në çdo shtëpi, për të lehtësuar dhe gëzuar çdo familje në këtë muaj adhurimesh.

Me një përvojë të gjatë në fushën e veprimtarive humanitare, Fondacioni ALSAR ka krijuar tashmë një traditë mjaft të mirë me ditët e solidaritetit human para dhe gjatë Ramazanit. Vazhdimin dhe forcimin e kësaj tradite e ndihmojnë sigurisht kontributet e partnerëve dhe bashkëpunëtorëve ndërkombëtarë.

Ndër aktivitetet humanitare të fillimjavës në Shkodër ishte dhe shpërndarja e ndihmave ushqimore të sjella nga Avrupa Yardım Vakfı, një fondacion bashkëpunues me ALSAR-in.

Dhjetëra njerëz e pjesëtarë familjesh në nevojë morën pakot e ndihmave me artikujt më bazë ushqimorë.

Për nevojtarët u dhanë 50 pako me ushqime në veprimtarinë shpërndarëse të organizuar dhe administruar nga Fondacioni ALSAR.

Veprimtari të ngjashme humanitare do të zhvillohen përgjatë gjithë muajit të Ramazanit në të katër anët e vendit.

Ardhja në ndihmë nevojtarëve në këto ditë solidariteti human është një angazhim i kahershëm i Fondacionit ALSAR, i përkrahur me kontribute konkrete nga organizata dhe fondacione partnere.