Fondacioni ALSAR ka nisur tashmë në bashkëpunim me organizata partnere veprimtaritë humanitare në kuadër të muajit të Ramazanit.

Ditët e solidaritetit human janë një periudhë kohore gjatë së cilës u vihet në ndihmë nevojtarëve kudo që gjenden më së pari me artikujt ushqimorë më të nevojshëm.

Në fillim të kësaj jave pati aktivitete humanitare në Shkodër, në të cilat u shpërnda një sasi e konsiderueshme pakosh ushqimore.

Me mbështetjen e një organizimi të posaçëm ndihme për këtë muaj, nga ATİB dhe HİLAL, me qendër në Gjermani, u dhanë 60 pako me ushqime.

Përfitues ishin anëtarë të shoqatave të paraplegjikëve dhe tetraplegjikëve.

Ky ishte vetëm një prej aktiviteteve humanitare të së hënës në këtë qytet.

Një prej projekteve që ka nisur të realizohet prej në nisje të Ramazanit nga Fondacioni ALSAR në bashkëpunim me Agjencinë Turke për Bashkëpunim dhe Koordinim (TİKA) është ai i shtrimit dhe shpërndarjes së iftareve anekënd vendit.

Mbështetja e TİKA-s për realizimin e këtij projekti është thelbësore dhe, sigurisht, së tepërmi e lavdërueshme.

Synimi është ambicioz: iftare për 3000 persona në një muaj, me një mesatare të shtrimit apo shpërndarjes në paketime të posaçme të iftareve për rreth 100 persona për çdo mbrëmje të Ramazanit.

Dhënia e iftareve ka nisur në Tiranë, për pjesëtarë të komuniteti rom, në organizime gjatë këtyre tre ditëve të para të agjërimit.

Nga kryeqyteti shkohet në qytete të tjera, në shtrime iftaresh për komunitete dhe agjërues të tjerë, për të përcjellë ngado mesazhe solidariteti dhe dashurie njerëzore, aq kuptimplote në një muaj të tillë të bekuar.

Projekti i shtrimit të iftareve apo shpërndarjes së tyre është veç një prej veprimtarive humanitare në Ramazan, të dalluara për shumëllojshmërinë dhe intensitetin e lartë.

Me ndjenjën e shtuar të solidaritetit human në prag të Ramazanit, Fondacioni ALSAR dhe HASENE-ja, organizata e ndihmave me qendër në Gjermani, shpërndanë dhe sot ndihma në pako me ushqime.

Veprimtaria e sotme humanitare ishte e katërta në radhë përgjatë kësaj jave, prej së hënës në të enjten. Pogradeci u bë vendqëndrimi i shpërndarësve të ndihmave ushqimore pas Tiranës, Gramshit dhe Malësisë së Madhe.

Për familje në nevojë të Pogradecit u dhanë 300 pako ushqimore. Përfaqësuesit vullnetarë të HASENE-së i dërguan pakot me ndihma dhe në shtëpi nevojtarësh në kushte tepër të vështira, në pamundësi dhe për të lëvizur.

Aktivitete të ngjashme humanitare do të ketë në vazhdimësi gjatë muajit të Ramazanit. Ditët e solidaritetit human sapo kanë filluar!

HASENE është një prej organizatave partnere që i mbështet me kontribut të qenësishëm veprimtaritë humanitare të ALSAR-it në këtë muaj të veçantë.

Aktiviteti i përbashkët humanitar në prag të Ramazanit i Fondacionit ALSAR dhe HASENE-së, organizatës së ndihmave me qendër në Gjermani, vazhdoi në ditën e tretë të tij me shpërndarjen e ndihmave ushqimore në Malësinë e Madhe.

Ndihma për banorë të kësaj treve, për familje në nevojë, përbëhej nga 150 pako me ushqime, shpërndarë të mërkurën.

Përfaqësues vullnetarë të HASENE-së dhe punonjës të ALSAR-it e kryen së bashku aksionin shpërndarës, mes pritjes me dashuri dhe mirënjohje nga banorët, të rritur e fëmijë.

Ditët e solidaritetit human me njerëzit në nevojë para dhe gjatë Ramazanit janë një fushatë shpërndarjeje ndihmash e organizuar për çdo vit nga Fondacioni ALSAR në bashkëpunim me organizata dhe fondacione partnere. HASENE është prej kohësh kontribuese e rëndësishme me ndihma e fushatës.

Përkundër kontekstit të këtij aktiviteti humanitar, ndihma me pako ushqimore është më e vyer tani që rritja e pandërprerë e çmimeve po godet ekonominë dhe jetesën e çdo familjeje.

Pas Tiranës, pakot me ushqime të sjella nga HASENE, organizata e ndihmave me qendër në Gjermani, janë shpërndarë në Gramsh për familje në nevojë.

Shpërndarja është bërë në bashkëpunim me Fondacionin ALSAR dhe në bashkërendim me Bashkinë e Gramshit.

Familjeve në nevojë u janë dhënë të martën 250 pako me ndihma, brenda së cilave gjenden artikujt më të nevojshëm ushqimorë.

Kjo veprimtari bamirëse zhvillohet në prag të muajit të Ramazanit, në shprehje të solidaritetit human me shtresat më në nevojë.

Aktiviteti humanitar i Fondacionit ALSAR merr rëndësi të veçantë para dhe gjatë muajit të Ramazanit, si ndihmë materiale dhe shpirtërore për nevojtarët.

Ditët para dhe gjatë muajit të Ramazanit karakterizohen në Fondacionin ALSAR nga shprehja e papushimtë e solidaritetit human me shtresat më në nevojë të shoqërisë.

Veprimtaritë e përditshme të shpërndarjes së ndihmave ushqimore zhvillohen në bashkëpunim me institucione partnere.

Me një prej tyre, HASENE-në, me qendër në Gjermani, nisi të hënën shpërndarja e ndihmave me pako ushqimore për familje në nevojë.

Shpërndarja në Tiranë u bë në bashkërendim me Bashkinë e kryeqytetit, në 12 njësi administrative.

Për nevojtarët u dhanë 500 pako ushqimore, shpërndarë në praninë e gjashtë përfaqësuesve vullnetarë të HASENE-së.

Organizata e ndihmave me qendër në Gjermani do të shpërndajë në tërësi 1556 pako me ushqime në qytete të ndryshme.

Fondacioni ALSAR dhe HASENE bashkëveprojnë prej kohësh për realizimin e përbashkët të projekteve humanitare në vendin tonë.