Aksionin humanitar të shpërndarjes së ndihmave ushqimore, të nisur që para Ramazanit, IHH me qendër në Holandë e vazhdoi gjatë kësaj jave.

Një sasi prej 350 pakosh u shpërnda për familje në nevojë në Elbasan, Fushë-Krujë dhe Tiranë.

Për nevojtarë të Elbasanit u dhanë 150 pako me ushqime, në Fushë-Krujë ndihma e dhënë përbëhej nga 100 pako, dhe po kaq pako, 100, u shpërndanë në Mënik të Tiranës.

IHH me qendër në Holandë do të shpërndante dhe në prag të Ramazanit 150 pako me ndihma ushqimore në Klos. Kështu, në tërësi, kontingjenti i ndihmës ushqimore të shpërndarë nga ky organizëm ndihme gjatë këtij Ramazani ishte 500 pako.

Organizimi dhe shpërndarja e ndihmave u bë në bashkërendim dhe bashkëveprim me Fondacionin ALSAR, që kujdesin për shtresat në nevojë e ka parësor në punën e tij. Ndihma për nevojtarët u dha në kuadër të ditëve të solidaritetit human.

Traditë e kahershme e Fondacionit ALSAR, e forcuar dhe pasuruar me kalimin e viteve, shtrimi i iftareve po mbështetet dhe këtë Ramazan nga shoqata dhe organizata të ndryshme ndihme.

Për katër ditë me radhë, me kontributin e IHH-së me qendër në Holandë janë shtruar iftare në Elbasan, Cërrik dhe Tiranë.

Në këto iftare të javës së fundit të muajit të madhëruar, ushqim është dhënë për 500 persona, banorë të zonave, besimtarë dhe nevojtarë.

Shtrimin e iftareve e ka ndjekur një përfaqësues i IHH-së, i ardhur së bashku me ndihmat. Të pranishëm në iftare kanë qenë dhe drejtues e punonjës të Fondacionit ALSAR, të angazhuar me organizimin e tyre.

I gjithë ky aktivitet u zhvillua në kuadër të ditëve të solidaritetit human përgjatë Ramazanit, të karakterizuara nga realizime projektesh të shumta në ndihmë të shtresave në nevojë.

Karvanit të kontribuesve me ndihma përgjatë muajit të Ramazanit iu bashkuan dhe sindikata turke, që në bashkëpunim me Fondacionin ALSAR shpërndanë pako me ushqime për njerëz në nevojë.

Ndihmat në ushqime nga konfederata sindikale turke HAK-İŞ dhe nga sindikata Hizmet-İş u shpërndanë në Lushnjë.

Sasia e dhuruar për nevojtarë, njerëz dhe familje në nevojë, ishte 150 pako ushqimore; një kontribut domethënës në këto ditë të veçanta.

Ndihma e dhënë prej këtyre sindikatave është veç një pjesëz e kontributit humanitar të institucioneve dhe organizmave turke për shtresat në nevojë të shoqërisë shqiptare gjatë Ramazanit.

Ditët e solidaritetit human janë të mbushura me veprimtari të shumta humanitare, të organizuar nga Fondacioni ALSAR dhe të mbështetura nga partnerë dhe bashkëpunëtorë ndërkombëtarë.

Ndërsa ditëve të muajit të madhëruar të Ramazanit po u afrohet fundi dhe atmosfera bëhet akoma më festive, aktivitetet humanitare nuk kanë të ndalur.

Të mërkurën, më 27 prill, u bë shpërndarja e pakove ushqimore në Berat dhe Poliçan, një kontribut humanitar kuvajtian.

Nën kujdesin e Drejtorisë së Përgjithshme të Vakëfeve dhe Ambasadës së Shtetit të Kuvajtit në Republikën e Shqipërisë, dhe në bashkëpunim me Fondacionin ALSAR, për njerëz dhe familje në nevojë u dhanë 150 pako, me artikujt më bazë ushqimorë.

Nevojtarëve në Berat iu shpërndanë 100 pako; 50 të tjerat ishin ndihmë për banorë të Poliçanit.

I gjithë aktiviteti humanitar i këtij muaji, në bashkëpunime të Fondacionit ALSAR me institucione dhe organizma partnere, është në kuadër të ditëve të solidaritetit human në Ramazan, teksa mijëra njerëzve u vihet në ndihmë, për shumë e shumë qytetarë shtrohen iftare, dhe mijëra jetimë i gëzohen përkrahjes së shtuar.

Fëmijët jetimë nën përkujdesin e Fondacionit ALSAR janë në qendër të vëmendjes në aktivitetet humanitare të zhvilluara përgjatë këtij muaji.

Shumë prej tyre janë ndihmuar në disa forma, me ushqime, me veshmbathje, dhe financiarisht, siguruar nëpërmjet bashkëpunimeve të ndryshme.

Me një projekt humanitar po i ndihmon ata dhe IHH me qendër në Holandë, e mirënjohur për kontribute të ngjashme dhe në periudha të tjera të vitit.

Ndihma e dhënë në fillim të kësaj jave ishte për 100 fëmijë jetimë, të gëzuar me veshje të reja, të cilat patën mundësi t’i përzgjedhin dhe vetë në qendrat tregtare.

Muajin e Ramazanit e karakterizon në Fondacionin ALSAR një veprimtari e gjerë humanitare në kuadër të ditëve të solidaritetit human.

Në traditën e shtrimit të iftareve në Ramazan, një i tillë mblodhi mbrëmjen e së shtunës dhjetëra banorë në fshatin Vilëz, të njësisë administrative Zall-Bastar.

Ashtu si në ditët dhe javët e kaluara, iftari u shtrua si një organizim i përbashkët i Fondacionit ALSAR dhe Agjencisë Turke për Bashkëpunim dhe Koordinim (TİKA).

Pjesëmarrësit në iftar, banorë, besimtarë dhe nevojtarë, shijuan ushqimin dhe ndanë përvojat e tyre në këto ditë agjërimi, sakrifice dhe adhurimi.

TİKA po mbështet gjatë Ramazanit një seri veprimtarish humanitare, përgjithësisht të shpërndarjes së ndihmave humanitare dhe të shtrimit të iftareve.

Fondacioni ALSAR ka krijuar një traditë, të nisur që në fillimet e tij, të shtrimit të iftareve. Kjo traditë pasurohet dhe forcohet me kalimin e viteve, dhe një kontribut të çmuar për këtë jep dhe TİKA me mbështetjen e saj.