Një veprimtari humanitare e së premtes së 22 prillit ishte dhe shpërndarja e ndihmave ushqimore në Roskovec.

Pakot me artikuj ushqimorë ishin dhuratë e Bashkisë Bağcilar në Stamboll, shpërndarë nëpërmjet një organizimi të përbashkët me Fondacionin ALSAR.

Për familjet në nevojë të Roskovecit u shpërnda një sasi prej 100 pakosh me ushqime, si realizim i projektit të ushqimeve në Ramazan.

Ditët e solidariteti human gjatë Ramazanit janë të mbushura me veprimtari të ngjashme humanitare, përmes së cilave u vihet në ndihmë njerëzve më në nevojë.

Shumë prej këtyre veprimtarive janë  realizime projektesh në ndërveprim mes Fondacionit ALSAR dhe shoqatave, organizatave dhe fondacioneve partnere, apo institucioneve të ndryshme ndërkombëtare.

Fondacioni ALSAR dhe Agjencia Turke për Bashkëpunim dhe Koordinim (TİKA) vazhdojnë shpërndarjen e ndihmave ushqimore në qytete dhe lokalitete të ndryshme të vendit në muajin e madhëruar të Ramazanit.

Projekti i shpërndarjes së pakove me ushqime për jetimë dhe familjet e tyre, për nevojtarët, po realizohet ditë pas dite, ndërsa ndihma mbërrin aty ku nevojat janë të mëdha.

Të premten, më 22 prill, u shpërndanë 160 pako me ushqime në Fushë-Krujë, Mamuras dhe Lezhë. Ndihma u prit krahëhapur nga banorë në nevojë, falënderues për atë që morën.

Shpërndarja e këtij kontingjenti ndihmash ushqimore bëhet në kuadër të ditëve të solidaritetit human në Ramazan.

Ky është vetëm një prej projekteve të përbashkëta humanitare që Fondacioni ALSAR realizon në këtë muaj, duke u ardhur në ndhmë mijëra nevojtarëve.

Fondacioni ALSAR dhe Agjencia Turke për Bashkëpunim dhe Koordinim (TİKA) vazhdojnë realizimin e projekteve të përbashkëta në Ramazan, të ndarjes së ndihmave në pako ushqimore dhe të shtrimit të iftareve për bashkësi besimtarësh dhe komunitete në nevojë.

Për banorë të Fushë-Krujës, besimtarë dhe nevojtarë, u shtrua mbrëmjen e së enjtes një iftar në oborrin e Xhamisë Arrameras.

Në ambientin e rregulluar me kujdes dhe këndshëm për rreth njëqind veta, ngrënia e përbashkët e iftarit krijoi një atmosferë të ngrohtë dhe vëllazërore.

Të pranishëm në iftar ishin kryetari i Fondacionit ALSAR, z. Mehdi Gurra, dhe koordinatorja e TİKA-s në Tiranë, znj. Emine Gizem Başkan.

Shtrimi i iftareve apo dhurimi i hajes së iftarit në paketa të parapërgatitura është veprimtari e përditshme e ALSAR-it dhe TİKA-s, siç është dhe shpërndarja e ndihmave ushqimore.

Ndihma, shprehja e solidaritetit, krijimi i frymës festive, u kushtohet familjeve në nevojë, jetimëve, agjëruesve. Ramazani është mundësia më e mirë për të ndihmuar dhe për t’u vëllazëruar!

Durrësi, Kavaja, Peqini, Rrogozhina, Cërriku dhe Gramshi ishin ndalesat e radhës të automjeteve me ndihma ushqimore, destinuar për t’u shpërndarë në ditë të shprehjes së solidaritetit njerëzor në Ramazan.

Për banorë në nevojë, jetimë dhe familjarë të tyre, u shpërndanë të enjten, më 21 prill, 200 pako me ushqime.

Shpërndarja e këtyre ndihmave ushqimore është një sipërmarrje e përbashkët e Fondacionit ALSAR dhe Agjencisë Turke për Bashkëpunim dhe Koordinim (TİKA).

Ajo ka nisur në Tiranë, ka vijuar në qytete të tjera, si një veprimtari masive humanitare në zhvillim përgjatë një muaji.

ALSAR-i bashkëvepron me shumë partnerë në Ramazan për realizimin e një sërë projektesh humanitare, duke u ardhur në ndihmë mijëra njerëzve në të katër anët e vendit.

Ditët e solidaritetit human gjatë Ramazanit nënkuptojnë veprimtari të ngjeshura humanitare në ndihmë të komuniteteve dhe shtresave në nevojë.

Shpesh këto veprimtari janë të njëkohshme, brenda një dite, duke shpërndarë ndihma nga veriu në jug të vendit.

Ndihma ushqimore u shpërndanë dje, më 20 prill, dhe në Shkodër e Malësi të Madhe. Për fëmijë jetimë dhe familjet e tyre u dhanë 200 pako me artikujt më bazë ushqimorë.

Dhënia e kësaj ndihme u mundësua nga Agjencia Turke për Bashkëpunim dhe Koordinim (TİKA), në bashkëpunim me Fondacionin ALSAR.

Mijëra pako të tilla me ushqime do të shpërndahen në këtë muaj me mbështetjen e TİKA-s dhe kontributin logjistik të ALSAR-it.

Ndërveprimi mes Fondacionit ALSAR dhe Agjencisë Turke për Bashkëpunim dhe Koordinim (TİKA) vijon me projektin e përbashkët të shpërndarjes së pakove me ushqime në qytete dhe lokalitete të ndryshme të vendit.

Ky aktivitet humanitar në ditët e solidaritetit human gjatë Ramazanit është shtrirë tashmë tej kryeqytetit, në ndihmë të jetimëve.

Të mërkurën, më 20 prill, ndihma ushqimore u shpërndanë në Elbasan, Librazhd dhe Përrenjas.

Për fëmijë jetimë nën përkujdesin e ALSAR-it dhe për familjet e tyre u dhanë 200 pako me ushqime, ndihmë e drejtpërdrejtë e TİKA-s.

Kujdesi për shtresat në nevojë, dhe, në veçanti, ndihma për fëmijët jetimë, janë preokupim i vazhdueshëm i Fondacionit ALSAR. Vëmendja ndaj tyre shtohet në Ramazan, me gjallërimin e frymës së solidaritetit, e me mbështetjen e organizmave partnere.