Botimet ALSAR do t’i jepnin lexuesit muaj më parë, “Çelësat e Fatihasë”, një përmbledhje të librit, “Islami në shtatë versete kur’anore”.

Nga i njëjti autor, Abduselam Mukbil El Mexhidi, pason në botim një tjetër titull, për një tjetër sure, en-Nisa.

Ky libër, “paraqitës i ndërmjetëm, ekspozues i njohurive kur’anore të sures en-Nisa”, vjen si një ofertë për të vështruar aspekte të mrekullueshme të retorikës novatore dhe të jashtëzakonshme kur’anore.

Zbërthyes dhe shpjegues, teksti është i lehtë për t’u përthithur edhe nga një lexues i pastërvitur me komentimet e ndërlikuara shpesh në këtë fushë analizuese.

Ai nuk përmban fjali tejet të gjata dhe të lodhshme, falë një konceptimi të gjetur të konstruktimit të përkufizimeve.

Autori jep një shtjellim të dobishëm me vështrimet e sures në trajtesë, përmes ndarjeve në boshte dhe nëndarjeve vijuese.

Shqipëria dhe Turqia kremtuan vitin e kaluar një përvjetor jubilar, atë të mbushjes së një shekulli nga vendosja e marrëdhënieve diplomatike. I njëjti vit, 2023-shi, shënonte njëkohësisht dhe 100-vjetorin e themelimit të Republikës së Turqisë.

Fondacioni ALSAR, si ent me përpjekje të pandalshme në forcimin e këmbëve të urave të vëllazërisë, miqësisë dhe bashkëpunimit të gjatë të popujve tanë dhe të shteteve tona, organizoi me atë rast në Tiranë një simpozium shkencor ndërkombëtar.

Pjesëmarrja e gjerë dhe tematika e larmishme e kumtesave treguan se sa me vend ishte kjo mënyrë e zgjedhur kremtimi.

Simpoziumi, “Marrëdhëniet shqiptaro-turke: e kaluara, e tashmja dhe e ardhmja”, ofroi një analizë të thellë të ndërveprimit mes dy vendeve, e të perspektivave në kuadër strategjik.

I tërë materiali studimor u përmblodh për t’u nxjerrë si një botim, i cili do t’u shërbejë të gjithë të interesuarve.

Siç thuhet në parathënien e tij, “botimi arkivon një tjetër akt domethënës të Fondacionit ALSAR në shërbim të mbajtjes sa më të gjallë dhe më të fortë të vëllazërisë së dy popujve”.

Botimet ALSAR i sjellin lexuesit një autor me shumë emër, të suksesshëm dhe mjaft të dashur posaçërisht për të vegjlit.

Sa e sa fëmijë i kanë lexuar përrallat e tij, i kanë dëgjuar dhe kanë zhvilluar përmes tyre imagjinatën. Lëvrues i spikatur i letërsisë për fëmijë, Gaqo Bushaka njihet për përrallat e shkruara me aq mjeshtëri dhe pritur aq mirë nga lexuesi së cilit i janë kushtuar.

Ai na paraqitet tani me “Përrallat e hënës”, një botim i ri i sapodalë nga shtypi.

Përmes rrëfimesh të pasura me figura letrare, temash e personazhesh, autori ngjall kërshërinë e fëmijës lexues, të paaftë më pas për ta hequr librin nga dora deri në mbarim të faqes së fundit.

“Përralla që do t’ju rrëfej ka bërë udhë të gjatë gjersa ka ardhur tek unë, se përrallat udhëtojnë shumë nëpër botë.” Kjo është vetëm fjalia e parë e një prej ndarjeve të tekstit, e një prej përrallave, asaj nga shkretëtira, por të ngjashme me të ka plot në botimin e ri të ALSAR-it.

Fondacioni ALSAR organizoi në Labinot-Katund, në Elbasan, një veprimtari të kushtuar ditëlindjes së Profetit Muhamed (a.s.).

Në xhaminë plot me besimtarë dhe besimtare u këndua Kur’an dhe u fol mbi të Dërguarin e Zotit, mbi sunnetin e tij, mbi trashëgiminë udhërrëfyese që ai i la njerëzimit.

Këndimin e vargjeve kur’anore e bëri hafizi Osman Özmaden.

Ndjekësit e veprimtarisë dëgjuan fjalën e kryetarit të Fondacionit ALSAR, z. Mehdi Gurra, një ligjëratë të shkurtër për ditëlindjen e Profetit Muhamed (a.s.), për rëndësinë e përkujtimit të kësaj ngjarjeje.

Për krijesën njerëzore më të dashur për myslimanët u foli të ardhurve në xhami dhe atasheu për Çështjet Fetare pranë Ambasadës së Republikës së Turqisë në Tiranë, dr. Adem Gerlegiz.

Teologu Ziber Lata, nga Maqedonia e Veriut, dhe prof. dr. Abdullah Hikmet Atan, nga Turqia, ligjëruan gjithashtu për të njëjtën temë, duke e përshkruar nga disa këndvështrime madhështinë e personalitetit të Profetit Muhamed (a.s.).

Veprimtaria e së dielës, më 29 shtator, pasoi simpoziumin e organizuar një ditë më parë në Korçë nga Fondacioni ALSAR, nën fjalët, “Ditëlindja jote: ditëlindja jonë”.

ALSAR organizon për çdo vit veprimtari të dedikuara ditëlindjes së Profetit Muhamed (a.s.).

Me rastin e ditëlindjes së Profetit Muhamed (a.s.), në qytetin e Korçës u mbajt këtë të shtunë, më 28 shtator, një simpozium kulturor.

Aktiviteti i organizuar nga Fondacioni ALSAR, i quajtur, “Ditëlindja jote: ditëlindja jonë”, mblodhi qytetarë të shumtë në sallën e “Grand Hotel Palace”.

Ditëlindja e Profetit, kjo ngjarje me rëndësi të veçantë dhe të jashtëzakonshme në historinë njerëzore, ishte qendra e fjalëve të të gjithë atyre që iu drejtuan të pranishmëve.

Simpoziumi u hap me këndim të vargjeve të Kur’anit Famëlartë nga hafizi Osman Özmaden.

Kryetari i Fondacionit ALSAR, z. Mehdi Gurra, mbajti fjalën e hapjes, të kushtuar tërësisht të Dërguarit të fundit të Zotit.

Ai u uroi fillimisht mirëseardhjen të pranishmëve dhe foli mandej për njeriun të cilit i zbriti fjala hyjnore, për qenien më të përsosur njerëzore, për shembullin më të mirë njerëzor, për udhërrëfyesin e njerëzimit në rrugën e duhur, në rrugën e besimit dhe të moralit.

Z. Gurra i mëshoi rëndësisë së aktiviteteve të tilla në përkujtim të ditëlindjes së Profetit Muhamed, foli mbi mevludin, e solli gjithashtu në vëmendjen e dëgjuesve angazhimin organizativ të Fondacionit ALSAR në këtë kontekst, me veprimtari dhe me botime.

Një fjalë përshëndetëse mbajti atasheu për Çështjet Fetare pranë Ambasadës së Republikës së Turqisë në Tiranë, dr. Adem Gerlegiz.

Fjala e radhës i takoi në simpozium teologut Ziber Lata, të ardhur nga Maqedonia e Veriut. Ligjërata e tij u pasua nga ajo e mysafirit nga Turqia, prof. dr. Abdullah Hikmet Atan.

Në mbarim të simpoziumit pati dhe një koktej për pjesëmarrësit.

Vetëm pak muaj pasi Botimet ALSAR nxorën nga shtypi një vepër dyvëllimëshe të autores Zenepe Dibra, “Shkodra – Histori që gjallon me reliket e saj”, në qytetin e Shkodrës u zhvillua një aktivitet promovues.

Promovimi i veprës u bë të enjten, më 26 shtator, në Kinema Republika, në praninë e të interesuarve të shumtë që kishin mbushur sallën.

Autorja e veprës çmoi në fjalën e mbajtur angazhimin botues të ALSAR-it dhe shprehu mirënjohjen e saj e të qytetarëve të Shkodrës për këtë kontribut. Falënderim të posaçëm i përcolli ajo botuesit.

Në promovim u shfaq dhe një dokumentar i RTSH-së, i nxitur nga botimi.

Të pranishmit në promovim i përshëndeti znj. Sidita Halluni në emër të Fondacionit ALSAR.