Në mjediset e Universitetit “Aleksandër Moisiu” në Durrës nisi këtë të mërkurë Konferenca Ndërkombëtare mbi Shkencën dhe Teknologjinë e Qëndrueshme (ICONST 2024).

Atë e organizon Universiteti “Aleksandër Moisiu”, në partneritet me disa universitete dhe institucione të tjera, vendase dhe të huaja, nga Turqia, Bosnjë-Hercegovina, Mali i Zi, Kosova.

Konferenca nisi me ceremoninë hapëse dhe me një fjalë përshëndetëse të rektorit të universitetit mikpritës.

I pranishëm në punimet hapëse të saj ishte dhe drejtori administrativ i Fondacionit ALSAR, z. Saimir Rusheku.

Në konferencë u çmua kontributi i spikatur i Fondacionit ALSAR në mbështetje të iniciativave kërkimore-shkencore në kuadër të veprimtarisë së tij arsimore dhe kulturore, dhe u dha një pllakatë mirënjohjeje me këtë rast. Pllakata iu dorëzua përfaqësuesit të fondacionit, z. Saimir Rusheku.

Fondacioni ALSAR prej një kohe të gjatë ka fituar reputacionin e një enti që e mbështet pa rezerva aktivitetin akademik.

Konferenca i zhvillon punimet në tre ditë, deri më 6 shtator, me një gamë të gjerë tematike.

Përgjatë një jave, në ditët në mbarim të gushtit, ndjekësit e kurseve të gjuhës turke të organizuara nga Fondacioni ALSAR iu bashkuan kampit veror në Turqi, një aktiviteti të gjerë dhe dinamik me të rinj e të reja nga vende të ndryshme, nga Ballkani e më tej.

Në qëndrimin e tyre në dy qytete, në Edirne dhe Çanakala, 90 kursistët e kurseve të turqishtes në Tiranë, Kukës dhe Konispol, patën mundësinë të njihen me kulturën turke, me ngjarje madhore në historinë e Turqisë, të shohin nga afër objekte të traditës e të ndalojnë në vende ku përkujtohet epopeja çlirimtare e popullit turk.

Drejtues institucionesh hapën dyert për pjesëmarrësit në kampin veror, i mirëpritën dhe iu përgjigjën me tërë gatishmërinë interesit rinor për të ditur sa më tepër për funksionimin institucional.

Qendra rinore e Edirnesë u shndërrua në një vendpritje të dashur, në një hapësirë tërë jetë ku koha rrodhi shpejt. Vizitat në mjediset arsimore qenë me interes për ata që e mendojnë veten e tyre në to në të ardhmen në rrugën e dijes.

Ditët ishin të mbushura me veprimtari të shumëllojshme, me takime, lojëra, etj., në ndërveprim dhe shoqëri me bashkëmoshatarë.

Kampi veror në Turqi do të mbetet gjatë në kujtesën e pjesëmarrësve, posaçërisht të atyre nga vendi ynë, si një eksperiencë me gjithçka të bukur brenda saj.

Këtë të dielë të fundit të gushtit u përcollën për në Turqi ndjekësit e kurseve të gjuhës turke të organizuara nga Fondacioni ALSAR.

Nxënës, studentë, jetimë, të interesuar për mësimin e turqishtes, të tërë ndjekës të kurseve në tre qytete, në Tiranë, Kukës dhe Konispol, do të bëhen pjesë e një kampi veror në Turqi me një pjesëmarrje të gjerë. Ata do t’u bashkohen bashkëmoshatarëve, nxënësve, të ftuarve të tjerë nga Ballkani, kontinenti ynë, e me gjerë.

Të nisurit nga Tirana, 90 djem e vajza, do të jenë pjesë e aktiviteteve të shumta kulturore të parashikuara për pjesëmarrësit në kampin veror, do të vizitojnë institucione në qytete të ndryshme dhe do të priten nga funksionarë të tyre.

Ata do të ndjekin programe dhe aktivitete në Edirne, Çanakala, Stamboll, etj., do të njihen me kulturën e pasur turke, e do të kenë mundësi ta shohin nga afër funksionimin e sistemit arsimor turk.

Nga qëndrimi me bashkëmoshatarë nga vende të ndryshme do të krijojnë lidhje e shoqëri të reja.

Ky udhëtim u mundëson atyre një përjetim të veçantë, një përvojë të paharrueshme, një javë të pasur me aktivitet, që do t’ua bëjë më të dashur edhe gjuhën turke.

Programi zhvillohet me mbështetjen e Agjencisë Turke për Bashkëpunim dhe Koordinim, TİKA, të Ministrisë të Kulturës dhe Turizmit në Turqi, dhe nën përkujdesin e Ambasadës së Republikës së Turqisë në Tiranë.

Në serinë e botimeve tona, sjellim për lexuesit dhjetë libra me tregime për të dërguarit e Zotit.

Janë histori kur’anore të thjeshtuara, të shoqëruara me ilustrime, për një lexues ende të parritur mirë. Botimi u kushtohet fëmijëve, me tekste tërheqëse dhe të lexueshme lehtësisht prej tyre.

Dhjetë librat janë përkthime nga boshnjakishtja. Rrëfenjat ngjallin kureshtjen e të vegjëlve dhe u japin mësime të çmueshme, ndërsa ilustrimet i bëjnë më të përthithshme historitë.

Tregimet fillojnë me Ademin, njeriun e parë mbi tokë, dhe përfundojnë me Muhammedin, a.s., vulën e profetëve. Mes tyre do të lexohet për Nuhun, Hudin, Salihun, Lutin, Shuajbin, Ibrahimin, Ismailin, Is’hakun, Musain, Davudin, Sulejmanin, Junusin, Zekerijain, Jahjën dhe Isain, duke përmendur veç një pjesë të të përmendurve e të të treguarve në Kur’an.

Libri i katërt është i tëri për Jusufin, a.s., si një prej historive më të bukura njerëzore, përçuese e përfundimeve dhe mësimeve të jashtëzakonshme morale, nga nevoja për durim në çdo gjë te domosdoshmëria e mbështetjes së plotë tek Zoti dhe vullneti i Tij.

Jeta e Profetit Muhammed, a.s., më shembullorja e një njeriu ndonjëherë në këtë botë, zë hapësirën e tre librave të fundit. Mjedisi, rritja dhe pjekja e tij, nisja e misionit profetik dhe përmbushja e detyrës së caktuar nga lartësitë hyjnore, përshkruhen me aq hollësi sa për një botim të tillë me specifikat përkatëse.

Botimet ALSAR, kujdesur për çdo nivel lexuesi, u japin rregullisht gjëra të reja të vegjëlve. Dhjetë librat, si rrëfenja kur’anore, i sugjerohen çdo prindi të angazhuar seriozisht për rritjen e fëmijëve të tij me frymën e besimit.

Vetëm pak javë pasi Fondacioni ALSAR mbajti në Konispol simpoziumin shkencor për 80-vjetorin e gjenocidit ndaj shqiptarëve të Çamërisë, është kthyer sërish atje për realizimin e një projekti kulturor.

Këtë të mërkurë u zhvillua një aktivitet dhurues, ndihmues për gjallërimin e jetës kulturore të Konispolit. Një ceremoni iu kushtua dhurimit të 300 titujve të librave, dhënë në dy kopje, dhe materialeve të ekspozitës “Çamëria”. Po ashtu u dhuruan dhe 20 mbajtëse të materialeve të ekspozitës, së përuruar fillimisht një muaj më parë në sheshin me të njëjtin emër.

Fondacionin ALSAR e përfaqësoi në këtë aktivitet drejtuesi i tij, z. Mehdi Gurra. Ai u prit nga kryetari i Bashkisë së Konispolit, z. Ergest Dule. Të pranishëm në ceremoni ishin dhe punonjës të bashkisë.

Librat dhe materialet e ekspozitës pasurojnë nga pikëpamja kulturore institucionin bashkiak, lokalitetin, dhe u shërbejnë qytetarëve të Konispolit.

Ato janë një tjetër kontribut i Fondacionit ALSAR për Konispolin, në radhën e aktiviteteve të vazhdueshme kulturore, arsimore dhe humanitare për të.

Në vlerësim të këtij kontributi të gjatë, një certifikatë mirënjohjeje u dha me këtë rast për Fondacionin ALSAR.

Në përvjetorin e tetë të përpjekjes së dështuar për grusht shteti, Turqia përkujton martirët e saj, bijtë dhe bijat që sakrifikuan jetën për vatanin, për të sotmen dhe të ardhmen e vendit të tyre.

Në Ditën e Demokracisë dhe të Unitetit Kombëtar, një valë aktivitetesh e përkujtojnë ngjarjen me shenjë të pashlyeshme në historinë e Turqisë moderne.

Siç për çdo vit, një ceremoni përkujtimore u zhvillua dhe në kryeqytetin tonë, në parkun e Liqenit Artificial, aty ku gjendet memoriali me emrat e dëshmorëve të 15 korrikut.

Ceremonia e organizuar nën kujdesin e Ambasadës së Republikës së Turqisë në Tiranë u ndoq nga funksionarë të institucioneve turke në vendin tonë, nga përfaqësues të shoqërisë civile, të mjeteve të informimit, dhe qytetarë.

Himnet kombëtare të Shqipërisë dhe Turqisë hapën ceremoninë. Ambasadori i Repuıblikës së Turqisë në Tiranë, z. Tayyar Kağan Atay, iu drejtua të pranishmëve, duke e përmbledhur me fjalë të zgjedhura aktin heroik të popullit turk, një epope me qindra dëshmorë dhe mijëra të tjerë të lënduar.

Ai u ndal te lufta ndaj FETO-s, organizatës terroriste, përgjegjëse për gjakderdhjen e tetë viteve më parë, me nënvizimin se fatkeqësisht struktura e saj vazhdon të ekzistojë në mënyrë të rrezikshme në Shqipëri. Ambasadori turk tha, megjithatë, se FETO po humb pushtet dhe jashtë vendit pasi iu thye shtylla kurrizore në Turqi, e se do të pushojë së ekzistuari, ndërsa e përhershme është Republika e Turqisë.

Të pranishmëve u foli në emër të organizatave të shoqërisë civile kryetari i Fondacionit ALSAR. Z. Mehdi Gurra tha për të pranishmit në nisje të fjalës së tij:

“Mbledhja pranë këtij memoriali është kthyer në ritual për ne. Ardhja jonë flet për respekt të palëkundur për 251 martirët e një momenti të kobshëm, e njëkohësisht të lavdishëm, në historinë e shtetit modern turk.

Ngjarjet e 15 korrikut të vitit 2016 nisën si një grusht shteti i radhës, pjesë e një cikli puçesh që e kishin mbajtur Turqinë prej dhjetëvjeçarësh nën tutelë. Por shpirti heroik turk, i mbrujtur me besimin në Zot dhe me dashurinë e pashoqe për atdheun, u dha mësimin më të mirë veglave të së keqes, mendjeve të pushtuara nga tentakulat e oktapodit me filozofi dhe veprim pervers antishtetëror.

Pushtuesit e urave, aeroporteve, televizioneve, institucioneve shtetërore, agresorët me tanke, avionë e helikopterë, nuk e kishin imagjinuar atë reagim të fuqishëm popullor. Kushtrimi i presidentit Erdoğan nëpërmjet një mjeti telefonik çoi në këmbë vullnetin e popullit, asnjëherë më parë të treguar aq energjikisht. Përpjekja për grusht shteti, më e përgjakshmja në Turqi, nuk mundi ta realizojë qëllimin e prishjes së rendit kushtetues dhe të zëvendësimit të organeve të ligjshme shtetërore me një juntë ushtarake.”

Në lidhje me luftën ndaj FETO-s, dhe në kuadër të aktualitetit, z. Gurra u shpreh: “Një luftë tjetër, më e gjatë, ka vazhduar prej asaj dite: ajo e shkuljes me rrënjë të fijeve të organizatorëve të asaj gjakderdhjeje puçiste dhe e shkallmimit të frymës që e mundësoi atë. Shtrirja dhe jashtë kufijve të Turqisë e kësaj lufte ka ndeshur në pengesa dhe nuk ka qenë aq e lehtë. Shteti turk ka dashur t’ua bëjë të qartë të gjitha vendeve mike dhe partnere rrezikshmërinë e FETO-s, që mund të kërkojë ta destabilizojë situatën aty ku lihet e lirë të veprojë.

Në vendin tonë kemi akoma shumë rrugë përpara, për ndërgjegjësimin e njerëzve mbi rrezikun gylenist, mbi funksionimin kapilar dhe të fshehtë të kësaj organizate, dhe për përballjen vendosmërisht me këtë qenie monstruoze.

Për t’i çjerrë maskën si duhet FETO-s kërkohet informacion i drejtpërdrejtë, i pashtrembëruar dhe i pamanipuluar. Njerëzit duhet ta kuptojnë mirë se pas buzëqeshjes së këtyre njerëzve fshihet një shpirt i lig, aspak i interesuar për të mirën e përgjithshme. Kjo e vërtetë duhet thënë hapur dhe fort, për të hequr çdo iluzion naiv. Dhe ai ideal besimor, nëse ekziston sado pak, te gulenistët, është thellësisht i prishur nga ideologjia malinje e strukturës okulte. Ne duhet ta mundim dhe këtu FETO-n! Nuk duhet të kenë të ardhme gylenistët tek ne! As në organet shtetërore, as në institucionet joqeveritare, dhe as në mesin e njerëzve të thjeshtë!

Emrat e dëshmorëve në këtë memorial na kujtojnë se sa e shtrenjtë është liria. Lusim Zotin të mos jemi të detyruar të paguajmë një çmim të ngjashëm!

Në këto momente solemne, duhet të kujtojmë dhe mijëra të vrarët në Gaza, e të lutemi që për të mbijetuarit të mbarojnë vuajtjet e të vijë paqja.

E mbyll fjalën time në këtë ditë të unitetit kombëtar në Turqinë mike me përkujtimin tërë nderim të sakrificës sublime të të rënëve në epopenë e shkruar në mesin e korrikut të 2016-s.

Zoti i ruajttë Turqinë dhe Shqipërinë dhe i begatoftë!”

Lutja për të rënët, këndimi i Kur’anit dhe vënia e luleve në memorialin me emrat e dëshmorëve të popullit turk, plotësuan ceremoninë përkujtimore.

Pjesëmarrësit në ceremoni patën mundësi të shihnin dhe fotografi të ekspozuara me këtë rast, me tematikë ngjarjet e mesit të korrikut të 2016-s në Turqi.