Me ardhjen e shtatorit dhe fillimin e vitit të ri shkollor, është praktikë e zakonshme e Fondacionit ALSAR dhurimi i çantave dhe mjeteve kancelarike për nxënës anembanë vendit.

Projektet për dhurimin e çantave të shkollës realizohen në bashkëpunim me organizata partnere, mbështetëse të tyre.

Një veprimtari e tillë në kuadër të aktivitetit humanitar dhe arsimor u krye këtë të premte në shkolla të Elbasanit. Qindra nxënës ua pajisën me çanta dhe mjete kancelarike, aq të nevojshme për ndjekjen normale të procesit mësimor.

Me mbështetjen e IHH-së me qendër në Holandë, u dhuruan 650 çanta shkollore. Ato dhe mjete të tjera kancelarike iu dhanë 260 nxënësve në shkollën 9-vjeçare “Musa Bica” në Griqan.

Shpërndarja u bë po ashtu për 320 nxënës të shkollës së mesme të bashkuar “11 Dëshmorët” në Labinot-Katund. Pjesa e mbetur u dhurua për nxënës të tjerë, në nevojë për ndihmë.

Të hapura si për çdo vit, në kuadër të një projekti afatgjatë për mirërritjen e brezit të ri, kurset verore të mësim-besimit janë vëzhguar nga afër nga punonjës të Fondacionit ALSAR.

Vëmendja është përqendruar në ecurinë e tyre, në efikasitetin e mësimeve të dhëna. Inspektimi është bërë në tetë kurset, të ndjekura nga fëmijë të moshës nga 8 në 15 vjeç.

Ndryshe nga shkolla verore, e hapur vetëm në kryeqytet dhe për një numër më të kufizuar ndjekësish, kurset verore u krijojnë mundësinë e edukimit etiko-moral shumë fëmijëve në qytete të ndryshme të vendit.

Mësuesit për çdo kurs u japin fëmijëve njohuri besimi, në një proces mësimdhënieje jo të ngurtë, që i bën ata të ndihen mirë e të përthithin mësimin.

Vëzhgimi i ecurisë ndihmon në shmangien e të metave të mundshme dhe në përsosjen e aktivitetit, që tradita e kurseve verore të vijojë dhe të përfshijë sa më tepër fëmijë.

Këtë veprimtari verore të përvitshme e mbështesin partnerë të huaj të Fondacionit ALSAR, me kontribut të qenësishëm në mbarëvajtjen e tij.

Në vijim të mbështetjes që Fondacioni ALSAR jep për arsimimin e brezit të ri, në kuadër të aktivitetit të tij arsimor, studentë të ekselencës kanë marrë këstin e dytë të bursave për vitin akademik 2021-2002.

Dhënia e këstit është bërë në ambientet e Fondacionit ALSAR, në praninë e një numri të konsiderueshëm studentësh.

Bursat e ekselencës u janë akorduar studentëve të shkëlqyer të degëve të ndryshme të Universitetit të Tiranës, shpërndarë fillimisht muaj më parë me një ceremoni.

Projekti i akordimit të bursave të ekselencës ka një vazhdimësi shumëvjeçare. Dhjetëra studentë përfitojnë prej tij në çdo vit akademik; rreth 1000 studentëve u është akorduar kjo bursë në tetë vitet e realizimit të projektit.

Një proces vlerësimi i paraprin gjithmonë akordimit të bursave të ekselencës, për përzgjedhjen e duhur të studentëve përfitues. Fondacioni ALSAR e çmon akordimin e bursave si një projekt mjaft të rëndësishëm në lëmin e arsimit.

Pas javësh të kaluara gëzueshëm në shoqërinë e njëri-tjetrit, në mësim dhe zbavitje, fëmijët të cilët ndoqën shkollën verore përgjatë korrikut u mblodhën në ambientet e Fondacionit ALSAR për të marrë certifikatat përkatëse dhe dhuratat e përgatitura për ta.

Pjesëmarrës në aktivitetin e zhvilluar ishin dhe miq nga Turqia, përfaqësues të HAYRAT-it, mbështetësit të projektit të shkollës verore.

Pas fjalëve të rastit u shpërndanë certifikatat për fëmijët, të përgëzuar për ndjekjen e shkollës verore. Çdonjërit prej tyre iu dhurua dhe një Kur’an me penë dixhitale.

Shkolla verore është një prej projekteve të përvitshme të Fondacionit ALSAR, prej nga fëmijët marrin dije të nevojshme të karakterit edukativ dhe besimor.

Shkollën e kësaj vere e ndoqën 40 fëmijë jetimë në kryeqytet, për të cilët fondacioni kujdeset në mënyrë të vazhdueshme.

Dhjetëra fëmijë kanë nisur prej ditësh shkollën verore, një projekt i përvitshëm i Fondacionit ALSAR. Me kohëzgjatje njëmujore, ajo ju jep mundësi fëmijëve të marrin dije shtesë, të vlefshme për formimin e duhur të karakterit të tyre.

Mësimet e përqendruara në tematikën edukativo-besimore, të dhëna në shkollën verore, e bëjnë atë tërheqëse për fëmijët që duan ta kalojnë verën sa më mirë e më bukur.

E hapur në kryeqytet, ajo po ndiqet nga 40 fëmijë jetimë, të vëmendshëm në çdo mësim të dhënë. Projektin e ka mbështetur HAYRAT-i, me qendër në Turqi. Nga i njëjti vend ka mbërritur dhe një mësimdhënës.

Fëmijëve ua bëjnë më të dashur shkollën verore veprimtaritë zbavitëse dhe ushqimi i përditshëm. Ndërthurja e mësimdhënies me argëtimin i jep gjallëri ditës së tyre.

Për ta ishte përgatitur këtë të enjte vajtja në një qendër zbavitjeje, ku do të kalonin orë të gëzueshme duke luajtur në shoqërinë e njëri-tjetrit. Hapësirat e gjera dhe lojërat e shumta i përfshinë në lumturinë fëmijërore. Një ditë e kaluar bukur, një përvojë mbresëlënëse, e paharrueshme!

Aktivitete të ngjashme për fëmijët e shkollës verore do të ketë dhe më tutje, në ditët e ardhshme, si, për shembull, një piknik në Dajt.

Mirëqenia e fëmijëve, në veçanti e atyre jetimë, mirërritja e tyre, janë preokupim i gjithhershëm i Fondacionit ALSAR. Përtej elementit humanitar, edukimi dhe formimi i tyre përcakton të nesërmen e shoqërisë. Projekte të tilla si shkolla verore i mbajnë fëmijët larg veseve, i argëtojnë dhe u japin edukimin e nevojshëm.

Në sallën “Akernia” të hotel “Tirana International” u zhvillua sot, më 1 qershor, dhënia e certifikatave me rastin e përfundimit të programit të kursit të gjuhës turke për vitin shkollor 2021-2022.

Të pranishmit e ardhur në ceremoni me ftesë të Fondacionit ALSAR, në bashkëpunim me Zyrën e Atasheut për Çështjet Arsimore të Ambasadës së Republikës së Turqisë në vendin tonë, ndoqën fjalët e rastit dhe programin artistik.

Ceremoninë e hapi, me fjalën e tij, kryetari i Fondacionit ALSAR, z. Mehdi Gurra, i cili u uroi mirëseardhjen pjesëmarrësve, më së pari ambasadorit të Republikës së Turqisë në Tiranë, z. Murat Ahmet Yörük, e mandej foli për ecurinë e zhvillimit të kurseve të gjuhës turke në vite dhe për rëndësinë e dhënë atyre.

Programi i ansamblit artistik “Hazis Ndreu” dhe numrat e artistit të cirkut, klounit të mirënjohur Met Selimi, krijuan atmosferë gazmore dhe e shndërruan në festë ceremoninë.

Fjala e ambasadorit të Republikës së Turqisë në vendin tonë, z. Murat Ahmet Yörük, u dëgjua me vëmendje dhe interes, teksa ai vuri në dukje miqësinë tradicionale që e karakterizon marrëdhënien mes dy popujve, turk dhe shqiptar, të ushqyer e forcuar dhe me projekte të tilla si ai i kurseve të gjuhës turke.

Certifikata dhe dhurata monetare u shpërndanë më pas për ndjekësit e kurseve të gjuhës turke në Tiranë dhe Kukës, të zhvilluara nën kujdesin e Fondacionit ALSAR.

Bërja e fotografive të përbashkëta shënoi dhe fundin e ceremonisë.

Kurset pa pagesë të gjuhës turke ndiqen në Tiranë nga jetimë dhe studentë, e në Kukës janë të hapura për nxënësit e shkollave nëntëvjeçare dhe të mesme.