Qyteti bregdetar i Durrësit është bërë pritës i Kongresit Ndërkombëtar të Materialeve dhe Polimereve, një aktivitet shkencor i organizuar nga bashkëpunimi i disa institucioneve, organizma, universitete dhe shoqata të ndryshme.

Kongresi, i organizuar për të ndarë zhvillimet shkencore të lidhura me shkencën dhe teknologjinë e materialeve, mbahet çdo vit që nga 2017-ta. Temat e Kongresit të 6-të i përkasin kësaj fushe shkencore, për të cilat do të flasin një numër i konsiderueshëm kumtuesish nga vende të ndryshme.

Aktiviteti shkencor është përshëndetur nga shumë të ftuar, mes të cilëve kryetari i Fondacionit ALSAR, mbështetës i zhvillimit të Kongresit.

Mehdi Gurra do të thoshte në fjalën e tij përshëndetëse se, “Si kryetar i Fondacionit ALSAR, një mbështetës i vazhdueshëm i kësaj veprimtarie të suksesshme, kam bindjen se qëllimet për organizimin e këtij kongresi kanë për t’u përmbushur, ashtu si dhe në kongreset e mëhershme.”

Ndërsa theksoi se suksesin e këtij aktiviteti shkencor e dëshmon vijimësia e tij, ai shtoi: “Jetojmë në kohë ndryshimesh, sfidash dhe paqartësish të mëdha, lokale, rajonale, kontinentale dhe globale, mes tyre sociale dhe ekonomike, çka e bën më të kërkuar, më të nevojshëm dhe më të dëgjuar zërin e njerëzve të shkencës, prej të cilëve priten risi, novacione, dhënie zgjidhjesh shkencore.”

Përshëndetja e z. Gurra do të vijonte me fjalët, “Paraqitja e zhvillimeve shkencore në fushën për të cilën është mbledhur kongresi, shkëmbimi i gjerë i ideve, kumtesat e shumta, do të kenë me siguri produktin e tyre, prej nga përfitues do të jenë të gjithë, folës dhe dëgjues, pjesëmarrës në këtë sallë dhe lexues më tutje të materialeve të përgatitura enkas për këtu.

Kongresi do të hapë horizonte të reja, do të krijojë mundësi të reja, do të ushqejë njohje të reja dhe do të farkëtojë miqësi kolegësh. Për ne, mbështetësit e tij, është e rëndësishme që kongresi të zhvillohet në frymën e duhur, të jetë i dobishëm dhe t’u vlejë të gjithëve.”

“Fondacioni ALSAR e ka mbështetur me shumë dëshirë këtë kongres, një kontribut i vlerësuar me certifikatë mirënjohjeje nga organizatorët. E ka bërë këtë në kuadrin e vizionit dhe misionit të tij mbarëshoqëror, që, nga tre boshtet e tij, njërin e ka kulturor. Në pozitën e mbështetësit, ALSAR nuk e ka kursyer energjinë, kontributin e prekshëm, për mbarëvajtjen e kongresit”, nënvizoi përshëndetësi.

Mes të tjerash në fjalë, duke vënë në pah mungesën e botimeve të plota të kumtesave të mbajtura në këtë kongres shkencor në vite, z. Mehdi Gurra shprehu gatishmërinë që Fondacioni ALSAR t’i përmblidhte të tëra ato në një botim të vetëm.

Urimi për punime të mbara të kongresit mbylli fjalën e kryetarit të Fondacionit ALSAR.

Kongresi Ndërkombëtar i Materialeve dhe Polimereve i mban punimet deri më 17 shtator.

Kryetari i Fondacionit ALSAR, z. Mehdi Gurra, priti për një vizitë pjesëmarrësit aktivë në veprimtarinë humanitare të shpërndarjes së fidanëve të agrumeve për familje të fëmijëve jetimë.

Vizitorët i shoqëronte koordinatorja e TİKA-s në Tiranë, Emine Gizem Başkan. Studentët turq ishin gjithashtu në shoqërinë e drejtuesit të tyre dhe të agronomit të ardhur nga Turqia.

Të rinjtë aktivistë, të ardhur në kuadër të programit të shkëmbimit të përvojave, mësuan nga mikpritësi, z. Gurra, për aktivitetin e gjerë shumëvjeçar të Fondacionit ALSAR. Ai u foli atyre për vëmendjen e madhe që i kushton fondacioni brezit të ri, formimit dhe përgatitjes së duhur të tij.

Në bisedën e lirshme me vizitorët u fol për veprimtaritë humanitare, për angazhimin në ndihmë të shoqërisë dhe të shtresave në nevojë. Me entuziazmin karakteristik të moshës, studentët e dëgjuan me kujdes fjalën e kryetarit të ALSAR-it dhe përfituan prej saj.

Vizita u mbyll me dhënien e dhuratave dhe bërjen e fotografive të përbashkëta.

Si pjesë e pandashme e aktivitetit kulturor të Fondacionit ALSAR, projekti i dhurimit të librave vijon të zhvillohet e të pasurojë bibliotekat e institucioneve të ndryshme.

Një veprimtari e këtillë dhuruese u krye këtë të enjte në Elbasan dhe Korçë, ku u dhanë qindra libra për bibliotekat universitare dhe të qyteteve.

Për bibliotekën e qytetit të Elbasanit u dhuruan 116 tituj. Ndërkaq, Universiteti “Aleksandër Xhuvani” mori dhuratë 115 tituj.

Bibliotekës së qytetit të Korçës iu dhanë 122 tituj, dhe për Universitetin “Fan S. Noli” ishin ndarë 176 tituj.

Në kopje të shumta, titujt e shumëllojshëm të librave të dhuruar u sugjerojnë lexuesve të këtyre qyteteve dhe universiteteve tematika me interes për çdokënd.

I mirëpritur dhe në këto qytete si kudo, projekti jetëgjatë, “Libri, dhurata më e çmuar”, dha një tjetër kontribut kulturor, ashtu siç bën prej vitesh.

Në ambientet e Fondacionit ALSAR u prit për një vizitë dr. Adem Gerlegiz, atasheu për çështjet fetare pranë Ambasadës së Republikës së Turqisë në Tiranë.

Zyrtarit turk ia uroi mirëseardhjen kryetari i Fondacionit ALSAR, z. Mehdi Gurra. Në një bisedë të ngrohtë mes tyre, z. Gurra e njohu mysafirin me aktivitetin e ALSAR-it, me objektivat dhe arritjet në vite.

Takimin njohës e karakterizoi shkëmbimi i urimeve dhe i ideve për thellimin e bashkëpunimit në nivel institucional.

Theksi u vu në miqësinë tradicionale mes dy vendeve dhe në rëndësinë e forcimit të saj nëpërmjet zgjerimit të marrëdhënieve.

Vizita u mbyll me falënderimin e atasheut turk për pritjen mjaft miqësore.

Pasi i ka botuar disa vëllime poetike, të mirëpritura nga publiku, Fondacioni ALSAR e risjell si autor Burhan Filin me një vepër në prozë.

Një histori dashurie dhe fati, e treguar bukur, “Shpresa është gjallë” shërben për të përcjellë mesazhe të vyera, ashtu siç bën çdo vepër e autorit.

Burhan Al Din Sejdi Fili, i palodhur në shpërthimet pasionante në të shkruar, shumë i ri ende shpirtërisht, e ka derdhur në letër frymëzimin e tij dhe ka dhënë si krijim letrar një rrëfim prekës.

“Shpresa është gjallë” sillet e rifreskuar nga Botimet ALSAR në këto ditë të nxehta gushti.

Botimi sapo ka dalë nga shtypi dhe shpejt do të jetë në dorë të lexuesit.

Fondacioni ALSAR dhuroi në ditët e para të gushtit një numër të konsiderueshëm botimesh për bibliotekat në Gjirokastër, Fier, Vlorë dhe Durrës.

Tituj të tematikave të ndryshme, botime të reja dhe më të hershme, iu shtuan bibliotekave të këtyre qyteteve.

Veprimtaritë dhuruese u zhvilluan në kuadër të projektit “Libri, dhurata më e çmuar”.

Drejtues dhe punonjës të këtyre institucioneve shprehën mirënjohjen për këtë dhuratë me vlerë, duke e falënderuar Fondacionin ALSAR për kontributin në pasurimin e biliotekave dhe të jetës kulturore në mjedisin e tyre social.

Në një rrugëtim të gjatë në vite, projekti “Libri, dhurata më e çmuar” vijon të vihet në zbatim në mënyrë periodike, dhe mbetet një prej aktiviteteve të rëndësishme kulturore të fondacionit. Institucione të shumta shtetërore dhe private kanë përfituar prej tij, duke marrë dhuratë botime të pritura mjaft mirë nga lexuesit.