Fëmijët që ndjekin kurset e gjuhës turke në Fondacionin ALSAR kanë patur mes tyre një mik të veçantë, atasheun e arsimit pranë Ambasadës së Republikës së Turqisë në Tiranë.

1. Metin Bulut ka parë zhvillimin e procesit mësimdhënës në vizitën e tij dhe është përfshirë në të, ka biseduar me fëmijët dhe është njohur me ecurinë e kurseve.

Atasheu ka patur mundësinë të vërejë nivelin mësimdhënës në këto kurse, të shohë përdorimin e mjeteve bashkëkohore gjatë shpjegimit të lëndës, e të kuptojë interesin e madh të fëmijëve për të mësuar gjuhën turke.

Kurset e gjuhës turke përbëjnë një element të përhershëm të aktivitetit arsimor të Fondacionit ALSAR. Rinisja e tyre e përvitshme shoqëron fillimin e çdo viti të ri shkollor.

Mësimi i turqishtes nuk i vlen thjesht zotërimit të një gjuhe të huaj, por është mjaft i dobishëm për ndjekësit e kurseve në të nesërmen e tyre, sepse u hap rrugën për të ndjekur studimet në Turqi dhe u krijon mundësi të mira punësimi në tregun e punës.

Për rëndësinë e kurseve të turqishtes në përgatitjen arsimore të fëmijëve, më në veçanti të atyre jetimë, flet dhe vizita e z. Metin Bulut, atasheut të arsimit pranë Ambasadës së Republikës së Turqisë në Tiranë.

Duke ndërthurur aktivitetin arsimor dhe humanitar, Fondacioni ALSAR vijon programin për t’u ardhur në ndihmë nxënësve të shkollave publike.

Në dy shkolla të Përrenjasit u dhuruan të mërkurën, më 6 tetor, çanta dhe mjete kancelarike për nxënësit, dhe botime të ALSAR-it për trupin pedagogjik.

Ndihmat  u dhanë në Shkollën 9-vjeçare “Rrajcë-Fushë” dhe në Shkollën e Mesme të Bashkuar “Sali Halili”.

Përfitues të ndihmave të ALSAR-it ishin 811 nxënësit e dy shkollave. Veç tyre, çdo pjesëtar i trupit pedagogjik të këtyre dy shkollave mori një pako me pesë tituj të botimeve të Fondacionit ALSAR.

Projekti u realizua në bashkëpunim me Drejtorinë e Zyrës Vendore të Arsimit Parauniversitar në Përrenjas dhe u mbështet nga IHH me qendër në Holandë.

ALSAR-i e ka bërë traditë dhënien e ndihmës për nxënësit e shkollave publike në nisje të çdo viti të ri shkollor. Nxënës në shkolla të tjera të vendit kanë marrë të njëjtën ndihmë, në çanta dhe mjete shkollore, në javët e kaluara.

Në ambientet e Fondacionit ALSAR rifilluan kurset e gjuhëve të huaja dhe të edukimit etiko-moral, si një aktivitet që bashkëshoqëron vitin shkollor.

Projekti jetëgjatë i kurseve është në përmbushje të misionit arsimor të fondacionit, për t’u ardhur në ndihmë fëmijëve që të shkollohen e edukohen sa më mirë. Ai është po ashtu pjesë e ndihmës së shumanshme për fëmijët jetimë.

Mësimin në kurset e gjuhëve të huaja, anglisht dhe turqisht, dhe në të edukimit etiko-moral e bën tërheqës niveli i lartë i mësimdhënësve. Për një përvetësim të mirë të diturive ndihmojnë metodat bashkëkohore të mësimdhënies dhe programet e ndryshme audiovizive.

Ndjekësit e kurseve janë të pajisur me mjetet e duhura didaktike. Salla e zhvillimit të kurseve ka po ashtu pajisjet e nevojshme.

Orari i kurseve është i tillë që nuk pengon ndjekjen e rregullt nga fëmijët të shkollës. Lënda e kurseve ndihmon në formimin më të plotë arsimor të fëmijëve dhe i bën më të përgatitur për të sotmen dhe të nesërmen e tyre.

Një tjetër projekt i vënë në zbatim gjatë këtyre ditëve nga Fondacioni ALSAR, me mbështetjen e IHH-së me qendër në Holandë, ishte dhënia e bursave për studentë të shkëlqyer të universiteteve publike.

Bursat u dhanë për njëzet e pesë studentë ekselentë në praninë e përfaqësuesve të IHH-së, të ardhur në Tiranë për realizimin e një serie projektesh në bashkëpunim me Fondacionin ALSAR.

IHH me qendër në Holandë akordon për të tretin vit me radhë, në partneritet me ALSAR-in, bursa ekselence për studentë të universiteteve tona publike. Numri i bursave të dhëna është në rritje; një tendencë që pritet të vijojë në të njëjtin drejtim.

Akordimi i bursave për nxënës dhe studentë ekselentë është një aktivitet i vazhdueshëm i Fondacionit ALSAR, i realizuar dhe në bashkëveprim me organizata partnere.

Të eturit për dije, nxënës e studentë, kanë te ALSAR-i një përkrahës dhe ndihmues në përmbushjen e aspiratës së tyre.

Nisja e vitit të ri shkollor është një mundësi e mirë për të kryer veprimtari humanitare dhe arsimore. Dhe nuk ka më mirë se t’u vish në ndihmë fëmijëve jetimë, që edhe ata ta nisin mbarë shkollën.

Nevoja për mjete shkollore është e para për çdo fëmijë, për çdo nxënës. E tillë është dhe për jetimët në ecje në rrugën e bukur dhe të vështirë të marrjes së dijes.

Dhe, kështu, për t’u ardhur në ndihmë jetimëve të ulur në bankat e shkollës në këto ditë të fundit të shtatorit, Fondacioni ALSAR shpërndau për ta çanta dhe mjete të tjera didaktike.

Dhuratat për vitin e ri shkollor i morën 200 fëmijë jetimë në Tiranë, përfitues të vazhdueshëm të ndihmës së Fondacionit ALSAR.

Projekti i dhurimit të çantave dhe mjeteve të tjera shkollore u realizua me mbështetjen e IHH-së me qendër në Holandë.

Ndihma për arsimimin e brezit të ri është investim për të ardhmen e shoqërisë dhe të vendit, dhe kontributi është akoma më i madh dhe më me vlerë kur ajo u jepet jetimëve.