U mbajt në qytetin e Durrësit Konferenca e 2-të Ndërkombëtare me titull ‘’Materialet dhe Polimerët’’ në datat 9-12 Nëntor 2018. Konferenca u organizua nga Universiteti i Çanakkalesë,Shoqëria e Kimistëve (Turqi), Universiteti i Ohajos(SHBA), Agjensia e Koordinimit dhe e Bashkëpunimit të Kryeministrisë(Turqi), Shoqëria Kimistëve tuniziane(Tunizi), Universiteti Politeknik i Tiranës (Shqipëri), Universiteti i Tuzlës (Bosnjë-Hercegovinë), Shoqëria e Kimistëve në Maqedoni, Universiteti “Nënë Tereza”(Maqedoni) etj. Profesore e akademikë më në zë të institucioneve pjesëmarrëse në kete konference prezantuan punimet e tyre me te reja kerkimore shkencore te cilat u ndoqen me interest e veçante nga te pranishmit.

Fondacioni “Alternativa e së Ardhmes” ALSAR në kuadër të mbështetjes së aktiviteteve kulturore e akademike ishte një ndër organizatorët dhe sponsorizuesit e këtij aktiviteti, ku në perfundim te kesaj konference u vlerësua edhe me një çertifikatë mirënjohje.

“Diturija” dhe Lumo Skëndo janë bërë shkas në më pak se një muaj për dy konferenca shkencore, njëra e zhvilluar në Tiranë muajin e shkuar, dhe tjetra e sapombajtur në Prishtinë.
Botimi anastatik i revistës “Diturija”, një sipërmarrje e suksesshme e Fondacionit “ALSAR” dhe e Bibliotekës Kombëtare të Shqipërisë, ka marrë kështu tërë vëmendjen intelektuale dhe mediatike gjatë kësaj periudhe kohore.
Në rolin e organizatorit në kryeqytetin kosovar të konferencës me temë, “Lumo Skëndo dhe themelimi i revistës Diturija”, ishte Biblioteka Kombëtare e Kosovës “Pjetër Bogdani”, në bashkëpunim me Bibliotekën Kombëtare të Shqipërisë dhe Fondacionin “ALSAR”.
Konferenca e zhvilluar më 6 nëntor qe po ashtu në kuadër të kremtimit të 110-vjetorit të Kongresit të Manastirit.
Fjalën e hapjes në këtë konferencë e mbajti mikpritësi, z. Fazli Gajraku, drejtori i Bibliotekës Kombëtare të Kosovës, ndërsa foli dhe znj. Leonora Morina-Bunjaku, zëvendësministre e Kulturës në qeverinë e Kosovës.
Znj. Persida Asllani, drejtoresha e Bibliotekës Kombëtare të Shqipërisë, dhe z. Mehdi Gurra, kryetari i Fondacionit “ALSAR”, mbajtën fjalë përshëndetëse.
Dy miqtë nga Tirana e vunë theksin te figura e Mid’hat Frashërit dhe te kontributi i tij intelektual, revista “Diturija”, themeluar dhe drejtuar nga ai. Z. Mehdi Gurra i kushtoi pak rreshta në fjalën e tij dhe veprimtarisë së Fondacionit “ALSAR”, për t’ua bërë atë të njohur më mirë të pranishmëve në konferencë.
Botimi anastatik i revistës “Diturija” u çmua prej tyre dhe prej kumtuesve në vijim, vështruar në kënde të ndryshme.

Fondacioni “ALSAR” në kuadër të zhvillimit të programit të tij kulturor “Takim me personalitete”, organizoi në qytetin e Durrësit në bashkëpunim edhe me qendrën “Dyrrah for Charity” një veprimtari në të cilën ishin të ftuar dy personalitete të shquara akademiku Ahmed Ferid Mustafa dhe profesori Hamdi Arslan nga Turqia .

Gjatë këtij takimi arkitekti, studiuesi dhe akademiku i mirënjohur Ahmed Ferid Mustafa mbajti ligjëratën e tij me temë : “Planifikimi urban i qytetit te Medines së Ndritshme” ku ndër të tjera u shpreh se “Miliona muslimanë vizitojnë xhaminë e Profetit në Medine çdo vit, por shumë pak e dinë se Medina Munawwarah, Qyteti i Dritës, nuk është vetëm zgjidhja e parë në Islam, por edhe një shembull i shkëlqyer i planifikimit urban.

Ai gjatë prezantimit të tij, hodhi dritë mbi masterplanin e këtij qyteti, që përfshin infrastrukturën, transportin, objektet e komunitetit dhe planifikimin e përdorimit të tokës. Këto studime të kryera janë bazuar në projektet e planifikuara të zhvillimit, dendësinë e popullsisë dhe rritjen e parashikuar të popullsisë së përhershme dhe vizitorëve në qytet. Gjenerimi i këtyre të dhënave ndihmoi në udhëheqjen dhe formësimin e planit gjithëpërfshirës. Ne duhet ta kuptojmë bukurinë dhe rëndësinë e Islamit dhe gjithashtu t’i bëjmë të ditur opinionit publik çfarë trashëgimie të pasur që kemi të bazuar në Kur’an dhe Traditen Profetike që përfshin nivele të ndryshme nga individi deri tek Bashkesia” tha Dr. Mustafa.

Ndersa profesori Hamdi Arslan ne ligjeraten e tij trajtoi temen rolit dhe rendesise se vellazerise ne Islam . gjate se ciles theksoi se : Një nga urdhrat bazë të Islamit është që myslimanët ta shohin njëri-tjetrin si vëllezër dhe të bëjnë atë që kërkon vëllazëria. “Në të vërtetë, besimtarët janë vëllezër!..” Pra, besimtarët nuk janë gjë tjetër përveçse vëllezër dhe për rrjedhojë, duhet të sillen si vëllezër me njëri-tjetrin. Ndërsa Profeti (a.s.), ka thënë: “Nuk do të keni besuar (plotësisht), pa dëshiruar për vëllain tuaj atë që dëshironi për veten!” Rëndësia e saj është shumë e madhe, si nga ana shoqërore e po ashtu edhe nga ajo individuale. Nga ana shoqërore rëndësinë e saj e shohim tek emigrimi i të Dërguarit s.a.v.s e i cili e kishte parë si hapin e parë të ndërtimit të shtetit në Medine pikërisht vëllazërimin në mes të Muhaxhirinëve të Mekës dhe Ensarëve të Medinës e që e dimë fare mirë se Ensarët ishin ata që çdo gjë e ndanin në dy më vëllezërit e tyre Muhaxhir duke filluar nga familja, shtëpia e deri tek pasuria në përgjithësi.

Prandaj, më qe ky ishte hapi i parë drejt ndërtimit të shtetit, pas besimit në Allahun xh.sh dhe në të dërguarin e Tij, pa dyshim se kjo ishte edhe gjëja më e rëndësishme për një shtet të ngritur mbi baza të forta dhe për një shoqëri të shëndosh e që rezultatet e kësaj shoqërie janë dëshmuar historikisht kur për një kohë mjaft të shkurtër arritën që të perhapin besimin, kulturën dhe civilizimin e tyre në të gjithe botën.

Janë këto disa nga mesazhet që u përçuan gjatë këtyre ligjëratave, të cilat u ndoqën me vëmendje e interes të veçantë nga pjesëmarrësit.

Me rastin e festës kombëtare të Turqisë, u zhvillua sot në sallën e konferencave të fondacionit ALSAR, një veprimtari kulturore e organizuar nga grupi i fëmijëve që frekuentojnë qendrën e kurseve të gjuhëve të huaja.

Në këtë veprimtari, na nderoi me pjesëmarrjen e tij ambasadori i Republikës së Turqisë në vendin tonë shkëlqesia e tij Z. Murat Ahmet Yörük i cili në fjalën e tij përshëndetëse për fëmijët pjesëmarrës që kishin përgatitur programin artistik tha se shqiptarët ndodhen gjithmonë në zemrën e turqve.

Duke ju drejtuar fëmijëve të pranishëm ambasador turk tha: “Ju jeni shumë të vlefshëm për ne, mos e harroni asnjëherë se edhe ju jeni bijtë tanë. Në të vërtetë ju jeni përfaqësuesit konkretë të marrëdhënieve të vërteta miqësore dhe vëllazërore të cilat janë të pranishme prej qindra vitesh mes turqve dhe shqiptarëve. Për këtë arsye festat tuaja janë festat tona dhe festat tona janë festat tuaja, prandaj uroj që edhe në periudhat në vijim të vazhdojmë të festojmë festat tona kombëtare me të njëjtin entuziazëm dhe të njëjtën lumturi”.

Duke folur për marrëdhëniet mes dy vendeve, ambasadori Yörük u shpreh se mes Turqisë dhe Shqipërisë nuk ka kufij gjeografikë, por “duhet të dini se zemra e Turqisë rreh në Shqipëri, po ashtu edhe zemra e Shqipërisë rreh në Turqi.”

Fëmijët gjatë performancës se tyre artistike në këtë veprimtari, prezantuan në gjuhen turke një program me materiale artistike e letrare të përzgjedhura, dedikuar kësaj feste.

Të pranishmit ndër të tjera, u njohën edhe me mbarëvajtjen e kurseve të gjuhës turke, të cilat ofrohen falas dhe zhvillohen nën drejtimin e profesorit të dërguar nga Ministria e Arsimit e Republikës së Turqisë.

Kryetari i fondacionit Alsar Z. Mehdi Gurra gjatë fjalës së tij përshëndetëse i shprehu ambasadorit të Republikës së Turqisë në vendin tonë shkëlqesisë së tij Z. Murat Ahmet Yörük urimet më të përzemërta ku ndër të tjera tha : “Me rastin e festës kombëtare të Republikës së Turqisë, iu shpreh Ju shkëlqesi ambasador, dhe nëpërmjet jush popullit vëlla turk përshëndetjet dhe konsideratat më të larta, duke iu uruar suksese të mëtejshme në rrugën drejt progresit e prosperitetit tuaj kombëtar”.

Fondacioni “ALSAR” mblodhi në sallën “Akernia” të Hotel Tiranës dhjetëra personalitete të politikës, të diplomacisë, intelektualë të njohur, në promovimin e librit të diplomatit Shaban Murati, “Kalvari diplomatik i shtetit të Kosovës”.
Mes një pjesëmarrjeje të gjerë, aktivitetin e nderuan me praninë e tyre presidenti i Republikës, z. Ilir Meta, dhe zëvendëskryeministri i qeverisë së Kosovës, z. Enver Hoxhaj.
Një përmbledhje artikujsh dhe punimesh të njëzet viteve, që në kohën kur për Kosovën nisi të përvijohej pavarësia e saj, “Kalvari diplomatik i shtetit të Kosovës” është botuar nga Fondacioni “ALSAR”, organizues dhe i veprimtarisë promovuese.
I takoi kësisoj drejtuesit të këtij organizmi, z. Mehdi Gurra, t’u uronte mirëseardhjen të ftuarve dhe të mbante fjalën e hapjes. Në të ai nënvizoi faktin se ky ishte libri i tretë i diplomatit Shaban Murati i botuar nga Fondacioni “ALSAR”, duke shpjeguar në të njëjtën kohë se në qendër të këtij bashkëpunimi të ndërsjelltë gjendej çështja kombëtare, një shqetësim i përhershëm si i autorit, po ashtu dhe i fondacionit.
Z. Gurra u ndal pak, modestisht, te përmbajtja e librit, për të thënë më tutje dhe ca fjalë lavdëruese për personalitetin e diplomacisë, shkruesin e këtij libri. Në fund, ai premtoi se fondacioni do të vijojë të nxjerrë botime të tjera po kaq dinjitoze.
Interesante ishte fjala e zëvendëskryeministrit të Kosovës, z. Enver Hoxhaj, e përqendruar te libri duke e shfletuar atë teksa fliste dhe duke cituar pjesë prej saj. Qeveritari nga Kosova shprehu konsiderata të larta për autorin, teksa bëri të ditur se ishte një ndjekës i kahershëm dhe i vëmendshëm i shkrimeve të tij. Për të, analiza diplomatike e z. Shaban Murati ka qenë dhe është kurdoherë ndihmuese për ata që merren me marrëdhëniet ndërkombëtare.
Pas tij do të fliste z. Maxhun Peka, një tjetër ambasador i njohur, i shfaqur së fundi dhe në ekrane me kujtimet e tij. Prof. dr, Ylber Sela, drejtor i Institutit për Studime Politike dhe Ndërkombëtare, nënvizoi në fjalën e tij se autori i librit shfaqet si njeri me diapazon të gjerë intelektual, si njohës shumë i mirë i rrethanave diplomatike europiane dhe botërore, që nxjerr gjykime të qarta lidhur me proceset me të cilat përballen shqiptarët, si dhe ndërton pikëpamje tepër të avancuara mbi të drejtën historike kombëtare në krijimin e shtetit të Kosovës.
Në podium do të ngjitej për të folur dhe z. Aleksandër Çipa, si kryetar i Unionit të Gazetarëve të Shqipërisë. Z. Shaban Murati pati mundësi po ashtu të shprehej mbi punën e tij si i fundit midis folësve.
Media e shkruar dhe vizive ishte dukshëm e pranishme në këtë aktivitet, e interesuar për t’ia përcjellë atë publikut.
Ky promovim pasoi një varg veprimtarish të ngjashme të Fondacionit “ALSAR”, si veç një e tillë mes atyre që priten të zhvillohen në të ardhmen e afërt.

Fondacioni “ALSAR” vendosi një tjetër gur kilometrik në udhën e tij të nisur më shumë se një dekadë më parë. Falë angazhimit të këtij institucioni, Mid’hat Frashëri, i njohur si Lumo Skëndo, dhe revista e tij, “Diturija”, u vunë këtë të mërkurë në qendër të vëmendjes, në një konferencë kushtuar posaçërisht atyre.
Konferenca shkencore e mbajtur në “Hotel Tirana” ishte një organizim i përbashkët i Fondacionit “ALSAR”, i Bibliotekës Kombëtare të Shqipërisë dhe i Bibliotekës Kombëtare të Kosovës “Pjetër Bogdani”.
Aktiviteti i shërbeu promovimit të botimit anastatik të revistës “Diturija”, me një numër të madh të interesuarish që mbushën sallën “Balsha”, aq sa shumë prej tyre do të detyroheshin të qëndronin në këmbë.
Intelektualë e akademikë e nderuan me pjesëmarrjen e tyre organizimin në fjalë, ashtu si dhe përfaqësues të pushtetit lokal e qendror, apo dhe përfaqësues të trupit diplomatik.
Botimi anastatik i revistës “Diturija” ka mbërritur në dorën e lexuesit si iniciativë dhe konkretizim nga Fondacioni “ALSAR” dhe Biblioteka Kombëtare, për çka me të drejtë i takoi z. Mehdi Gurra, drejtues i fondacionit, ta mbajë fjalën e hapjes të konferencës shkencore.

Duke u uruar mirëseardhjen të ftuarve, z. Gurra iu përmbajt në fjalën e tij tërësisht temës së konferencës, “Lumo Skëndo dhe themelimi i revistës ‘Diturija’”, me një theksim të pranëvënies së tyre në histori.
“Lumo Skëndo dhe ‘Diturija’ u bënë të pandarë, teksa u plotësuan ndërsjelltas; Lumo Skëndo shpalosi brendinë e tij, vizionin e tij, te revista, ndërkohë ‘Diturija’ i bëri nder të zotit, i dha peshë, zë dhe shkëlqim”, u shpreh ai, mes të tjerash.
Z. Gurra nënvizoi për të pranishmit se “Diturija” dhe botuesi i saj i rezistuan kohës, me meritat e veçanta që mbartin për kulturën shqiptare, për ta riparë dritën e botimit në 110-vjetorin e Kongresit të Manastirit.
Fjalën e tij do ta pasonte ajo e drejtoreshës së Bibliotekës Kombëtare, zonjës Persida Asllani, sipas së cilës, revista “Diturija” është shprehja më e plotë e profilit intelektual të Lumos Skëndos.
Do të fliste shkurt në konferencën shkencore dhe drejtori i Bibliotekës Kombëtare të Kosovës, z. Fazli Gajraku. I ftuari nga Kosova, veç përshëndetjeve, e shfrytëzoi fjalën e tij për të bërë të ditur organizimin e një konferencë shkencore në linja të ngjashme në fillim të nëntorit në Prishtinë.
Kumtesat nga prof. dr. Xhevat Lloshi, prof. dr. Luan Malltezi, prof. dr. Persida Asllani, prof.asc. dr. Mark Marku dhe z. Uran Butka do ta trajtonin nga këndvështrime të ndryshme revistën “Diturija”, e gjithashtu, sigurisht, botuesin e saj, Lumo Skëndo.
Në fund, z. Mehdi Gurra, pa e fshehur entuziazmin për suksesin e konferencës, premtoi se në muajt në vazhdim do të ketë botime të tjera me vlerë të Fondacionit “ALSAR”.
Veprimtaria u pasqyrua gjerësisht në mjetet e informimit. Vlen të thuhet se prej shumë ditësh ka patur interes për botimin anastatik të revistës “Diturija”, me një sërë artikujsh për të dhe për figurën e Mid’hat Frashërit në shtypin e shkruar.