Në kryeqytetin britanik është mbajtur më 6 dhe 7 dhjetor Forumi i 4-t Botëror i Udhëheqjes Muslimane, me temë qendrore të tij, “Roli i udhëheqjes muslimane në rindërtimin e imazhit global të Islamit”.
Politikanë, parlamentarë, qeveritarë, studiues, ekspertë, organizma të OKB-së, aktivistë dhe drejtues organizatash joqeveritare kanë qenë të ftuar në aktivitetin e zhvilluar në Londër nën kujdesin e disa institucioneve.
Forumi dyditor ka trajtuar çështje kyçe të lidhura me Islamin dhe me muslimanët. Fjalët e mbajtura kanë patur për referencë disa fusha kryesore, si krijimin e një narrative të re mbi Islamin, forcimin e udhëheqjes muslimane në të tëra nivelet, fuqizimin e femrave dhe rolin e tyre në ritrajtësimin e narrativës së re islame, dhe krijimin e platformave për udhëheqësit muslimanë për të dhënë zgjidhje për problemet aktuale të shoqërisë.
Drejtues apo ish-drejtues shtetërorë e kanë nderuar forumin me pjesëmarrjen e tyre. Veçohej pjesëmarrja e zëvendëskryeministres së Malajzisë, dr. Wan Azizah Wan Ismail, që foli për pozitën dhe rolin e femrave muslimane në shoqëri.
“Femrat muslimane duhet të dalin në pah, duhet t’i zhvillojnë e t’i vënë në punë aftësitë e tyre për të parë një përmirësim të vërtetë afatgjatë në shoqëritë muslimane”, tha mes të tjerash ajo në fjalën e mbajtur në Lambeth Palace.
I ftuar në këtë forum ka qenë dhe z. Mehdi Gurra, si kryetar i “ALSAR”-it, një prej fondacioneve më aktive në jetën shoqërore shqiptare.
Veç takimeve dhe shkëmbimit të ideve me të ftuarit në këtë forum, z. Gurra ka mbajtur dhe një fjalë, përqendruar te veprimtaria shumëdimensionale e fondacionit që ai drejton.
“Ndihem tepër i vlerësuar për ftesën e bërë për të marrë pjesë në këtë konferencë. Jam i gëzuar po ashtu që po më jepet mundësia të flas para një auditori të tillë, që të bëj një pasqyrë të zhvillimeve në vendin tim, dhe të tregoj për punën dymbëdhjetëvjeçare të organizmit që drejtoj, Fondacionit ‘ALSAR’, për misionin e tij, duke iu përmbajtur dhe tematikës së kësaj veprimtarie,” është shprehur fillimisht i ftuari nga Shqipëria.
“Bota islame është ndeshur në dekadat e fundit me sfida të jashtëzakonshme. Shumë herë ajo ka qenë e papërgatitur t’u përgjigjet atyre. Këto sfida janë ende aktuale, një pjesë e tyre akoma janë në pritje për t’u trajtuar siç duhet. Rrugëdaljet kërkojnë angazhim tërësor të shoqërisë. Nga organet qeverisëse te shoqëria civile dhe te vetë individi, të tërë kanë detyrimin për t’u prerë rrugën sëmundjeve të kohës. Këto sëmundje kanë ndikuar dhe në cenimin e imazhit të Islamit. Mëkëmbja e këtij imazhi është në vetvete sfida më e madhe e botës islame. Ajo kërkon vepra, jo fjalë!”, ka nënvizuar z. Gurra.
Të pranishmit janë njohur nëpërmjet tij me bashkëjetesën fetare në vendin tonë, por dhe me problematikat e shoqërisë shqiptare.
“Çfarë e veçon vendin tim është bashkëjetesa fetare, mbase një prej pasurive më të çmuara të Shqipërisë. Me një popullsi në shumicë muslimane, aty fetë bashkëjetojnë në paqe. Ashtu bashkëjetojnë dhe besimtarët e feve të ndryshme. Në Tiranë, në kryeqytet, brenda një hapësire jo fort të madhe i ndesh objektet qendrore të kultit të tre besimeve kryesore. Përplasjet me sfond fetar mungojnë; nëse ndodh të ketë problematika, ato janë të vogla, sporadike, dhe më së shumti janë fërkime midis kufijve të laikes dhe fetares. Proceset demokratike, ndërkaq, kanë ndjekur drejtimin e tyre, megjithëse qeverisja nuk mund të thuhet se i ka përmbushur pritshmëritë e publikut. Keqadministrimi, korrupsioni dhe papunësia janë plagë nga të cilat vuan kronikisht shoqëria shqiptare. Vendi mbetet ende në tranzicion, shoqëria ka nevojë akoma për përkujdesje.”
Fjala e mbajtur prej z. Gurra në forumin ndërkombëtar në Londër ka patur më tej në qendër “ALSAR”-in, në funksion të tematikës së aktivitetit:
“Fondacioni ‘ALSAR’ erdhi kështu në jetë në shtator të vitit 2006 jo aksidentalisht, por si nevojë për të prirë me modesti në rrugën e mëkëmbjes së shoqërisë shqiptare. Mjedisi kishte njohur dhe nisma të tjera të ngjashme, shumë prej të cilave nuk e kishin patur të gjatë. Të tjera organizata të shoqërisë civile kishin veprimtari të zbehtë, aq sa ishte e vështirë t’u mbahej mend emri. Si ‘Alternativë e së ardhmes’, misioni për të ndihmuar në mbarëvajtjen e jetës shoqërore e ka shoqëruar Fondacionin ‘ALSAR’ në këto dymbëdhjetë vite. Veprimtaria ka qenë e përqendruar në tre drejtime kryesore, në atë humanitar, arsimor dhe kulturor, duke synuar rritjen e mirëqenies në të gjitha kuptimet e fjalës.”
Përpara se të ndalet më gjerësisht te shifrat e veprimtarisë së fondacionit, ai ka theksuar se, “‘ALSAR’ është sot lehtësisht i identifikueshëm, është lehtësisht i njohshëm, falë aktivitetit intensiv. Progresi është i dukshëm mbas më shumë se një dekade. Veprimtaritë janë më të shumta, në më shumë fusha, përfituesit e drejtpërdrejtë apo të tërthortë nga aktiviteti i ‘ALSAR’-it janë në rritje progresive, bashkëpunimi me fondacione të ngjashme në botë është po ashtu në shtim të vazhdueshëm. Nga veprimtaria në kufij lokalë është kaluar në ato rajonalë, si një organizëm i kudogjendshëm. Për shembull të mirë kemi nevojë, atë po përpiqemi të japim! Për imazh të mirë kemi nevojë, atë po përpiqemi të krijojmë!”
Teksa ka përfunduar tregimin e hollësishëm të punës së “ALSAR”-it, kryetari i tij, mbajtësi i fjalës, u ka thënë të pranishmëve: “Ky është kontributi që ne japim për shoqërinë shqiptare, ky është shembulli se si duhen ndryshuar gjërat.”
Pjesëmarrja e z. Mehdi Gurra në këtë forum ka qenë një mundësi e mirë për ta bërë të ditur në nivel ndërkombëtar veprimtarinë e Fondacionit “ALSAR”. Ajo i ka shërbyer në të njëjtën kohë dhe njohjes me organizata me aktivitet të ngjashëm në pjesë të tjera të botës, krijimit të lidhjeve të reja për t’u çelur rrugën bashkëpunimeve të ardhshme.

Në një atmosferë festive është përkujtuar 28 Nëntori, Dita e Pavarësisë sonë Kombëtare. Veprimtaria kulturore u zhvillua në sallën e konferencave të fondacionit ALSAR, e organizuar nga grupi i fëmijëve që frekuentojnë qendrën e kurseve të gjuhëve të huaja.

Fëmijët gjatë performancës së tyre artistike në këtë veprimtari, prezantuan një program me materiale artistike e letrare të përzgjedhura, gjatë së cilës nxorrën në pah rëndësinë dhe vlerat e kësaj feste, kësaj dite të shënuar për të gjithë ne e cila ka qenë dhe mbetet simbol i bashkimit, unitetit, lidhjes, krenarisë, qëndresës dhe vendosmërisë së popullit shqiptar.

Lutjet dhe urimet e të pranishmeve buronin nga thellësitë e zemrave: “Zoti e bekoftë Shqipërinë dhe e ndriçoftë atë në rrugën drejt progresit e prosperitetit kombëtar”.

U zhvillua në Stamboll nga data 17 – 18 nëntor 2018 Panairi i III-të Ndërkombëtar i Organizatave të Shoqërisë Civile. Fondacioni “ALSAR” mori pjesë në këtë panair, krahas 170 organizatave nga 40 vende të ndryshme të botës.

Çeljen e panairit e inauguruan përfaqësues të institucioneve turke, të cilët gjatë fjalëve të tyre përshëndetëse, vlerësuan rolin dhe rëndësinë e organizimit të tij, duke e konsideruar atë një ngjarje të rëndësishme, që prezanton aleancën e vlerave të organizatave e shoqerise civile kudo në botë, e cila synon krijimin e urave të bashkëpunimit, komunikimit e partneritetit ndërmjet sektorit publik dhe privat, jo vetëm brenda kufijve të një shteti por dhe ndërmjet popujve dhe shteteve.

Ky panair bashkoi përfaqësues të organizatave të shoqërisë civile të vendeve të ndryshme, me synimin për të krijuar e zhvilluar kontakte midis tyre, për të shkëmbyer përvojat e tyre më të suksesshme institucionale, si dhe për të pasqyruar veprimtarite e këtyre organizatave dhe efektet e tyre në komunitetet dhe shtetet e tyre përkatëse.

Në këtë kontekst, Fondacioni “ALSAR” prezantoi në stendën e tij përmes materialeve promovuese të natyrave audio-vizuale dhe të shkruar, programin dhe veprimtarinë e tij mirëbërëse me karakter arsimor, kulturor dhe humanitar në shërbim të shoqërisë shqiptare, si në drejtim të ruajtjes e promovimit të vlerave të traditës sonë kulturore e kombëtare, ashtu edhe në drejtim të përkujdesjes sociale ndaj shtresave në nevojë.

U zhvillua në qytetin e Canakkales në Turqi, nga data 15 – 16 nëntor 2018, Konferenca Shkencore Ndërkombetare me temë “Emigrimi dhe Shoqëria” organizuar nga Universiteti “18 mars”.

Fondacioni “Alsar” mori pjesë në zhvillimin e punimeve të kësaj konference në kuadër të marrëveshjes së përbashkët të bashkëpunimit, dhe mbajti në të referatin me temë: “Emigrimi, fenomeni që kanos të ardhmen e Ballkanit”

Gjatë kësaj trajtese u hodh dritë mbi fenomenin e emigrimit në rajonin e Ballkanit, një dukuri kjo që po bëhet gjithnjë e më shqetësuese, pasi të rinjtë e kanë më të lehtë të largohen dhe të rehatohen në një jetë më të mirë, në vend që të qëndrojnë në atdheun e tyre dhe të përpiqen e të luftojnë për ta ndryshuar atë.

Ky është një kërcënim i drejtpërdrejtë për zhvillimin tonë ekonomik dhe kohezionin social. Nëse nuk trajtohet në shkaqet dhe rrënjët e tij, ai mund të prodhojë një cikël të rrezikshëm vicioz që vështirë se mund të shpërthehet e të këputet.Janë këto disa nga mesazhet që u përçuan për të pranıshmıt me anë të këtıj referati. Punimet e kesaj konference u ndoqen me interes nga të pranishmit.

Kryeqyteti i Kosovës i ka patur për zemër kohët e fundit në veçanti botimet e Fondacionit “ALSAR”, me dy promovime të njëpasnjëshme brenda pak ditëve. Është folur në Prishtinë për dy botime krejt të veçanta, janë analizuar ato hollësisht, e u është dhënë zë në mjedisin e lexuesve të zgjedhur.
Ditë më parë promovohej në Prishtinë botimi anastatik i revistës “Diturija”, këtë të enjte iu la vend promovimit të librit të diplomatit Shaban Murati, “Kalvari diplomatik i shtetit të Kosovës.”

Si një përmbledhje artikujsh, analizash dhe këndvështrimesh diplomatike nga një njohës mjaft i mirë i diplomacisë, me një tematikë tepër aktuale për rrugën që po përshkon tani shteti i Kosovës, libri dhe promovimi i tij mblodhën në ambientet e Bibliotekës Kombëtare të Kosovës personalitete të jetës shoqërore dhe akademike. E çmuar ishte prania e autorit të librit, z. Shaban Murati, dhe e botuesit të tij, z. Mehdi Gurra.
Drejtorit të Akademisë Diplomatike të Republikës së Kosovës, z. Beqir Ismaili, i takoi fjala e hapjes. Ai e cilësoi këtë botim si me vlerë të madhe shkencore, diplomatike dhe ndërkombëtare.
Mjetet kosovare të informimit që e pasqyruan veprimtarinë i kushtuan një hapësirë të gjerë fjalës së mbajtur nga z. Mehdi Gurra, kryetari i Fondacionit “ALSAR”.
Ato zgjodhën t’i përcjellin publikut vendas ca rreshta prej ligjërimit të tij gjatë promovimit, duke nënvizuar mes të tjerash se ai pati “fjalë të mëdha për autorin”:
“Një shikim i hollë analitik, publicistik, ‘Kalvari diplomatik i shtetit të Kosovës’ është vëzhgim, kritikë e këshillë njëkohësisht prej një publicisti tepër aktiv, të mirënjohur dhe në Kosovë…

“Bagazhi i pasur diplomatik e ka lejuar z. Shaban Murati të shkruajë në vite për hallet dhe rropatjet e diplomacisë kosovare, të pikasë atë që nuk është bërë mirë, të japë mendim të kualifikuar, e të kujtojë se ç’përparësi duhen ndjekur…
“Diplomati me shumë emër i thotë Prishtinës se rendi i prioriteteve diplomatike dhe strategjike të Kosovës është i thjeshtë, se prioriteti i prioriteteve është njohja e shtetit të Kosovës nga Serbia…”
Fjalë të ngjashme thanë dhe folësit më tej në vijim të aktivitetit promovues.
“Me kapacitetin e një eksperti të marrëdhënieve ndërkombëtare, të një diplomati me një përvojë thuajse 50-vjeçare në politikën e jashtme, z. Murati ka prekur temat më kruciale, temat që kanë të bëjnë me sfidën e forcimit dhe afirmimit ndërkombëtar të shtetësisë së Kosovës,” u shpreh profesor Ibrahim Gashi.
Një tjetër folës, z. Memli Krasniqi, e vuri theksin te largpamësia e autorit të veprës, pikasur, sipas tij, në analizën e bërë deklaratave të shtetarëve amerikanë në prag të Rambujesë.
Vetë autori i botimit të “ALSAR”-it, librit “Kalvari diplomatik i shtetit të Kosovës”, do të thoshte teksa u drejtohej të pranishmëve, siç raporton media kosovare:
“Për mua është një emocion i veçantë të jem në mjedisin tuaj, sepse Kosova ka qenë për mua një dashuri profesionale. Nuk ka njeri në Tiranë që ka shkruar për Kosovën më shumë se unë… Ky libër nuk është thjesht një përmbledhje e artikujve, por unë kam dhënë portretin diplomatik të problematikës së Kosovës….”
Kjo veprimtari promovuese në Prishtinë ishte një vlerësim si për entin botues, Fondacionin “ALSAR”, posaçërisht për z. Mehdi Gurra, ashtu dhe për autorin e librit, z. Shaban Murati. Të dy këta morën përgëzimet e organizatorëve dhe pjesëmarrësve për këtë ndihmesë intelektuale për ardhmëninë e shtetit të Kosovës.

Në prag të hapjes së Panairit të Librit në kryeqytet, Fondacioni “ALSAR” ka shpërndarë qindra libra në qytetin e Shkodrës.
“Libri, dhurata më e çmuar” është një prej shumë projekteve të fondacionit të vënë në jetë me sukses. Ndalesa e radhës ishte këtë herë në Bibliotekën e Shkodrës “Marin Barleti”, përzgjedhur nga Fondacioni “ALSAR”.
Bibliotekës “Marin Barleti” i janë dhuruar 650 libra. Këto libra do t’u shërbejnë kryesisht studentëve, dhe janë më së shumti të karakterit historik, ku nuk mungojnë dhe botimet më të fundit. Biblioteka e qytetit dhe Universiteti i Shkodrës “Luigj Gurakuqi” kanë menduar që studentët të marrin nga dhjetë tituj librash prej botimeve të Fondacionit “ALSAR”.
Në aktivitetin e zhvilluar me këtë rast, një fjalë para të rinjve mbajti drejtori i bibliotekës, Gjovalin Çuni, i cili u kërkoi atyre të afrohen sa më tepër me bibliotekën e t’i jepen leximit. Për pjesëmarrësit foli dhe kryetari i Fondacionit “ALSAR”, z. Mehdi Gurra.
Drejtori i bibliotekës “Marin Barleti” shprehur nevojën e institucionit që drejton për një skaner profesional, duke marrë premtimin e z. Gurra, në emër të “ALSAR”-it, për të bërë ç’është e mundur për ta siguruar atë.
Një ndihmesë të posaçme në zhvillimin e tërë aktivitetit dha znj. Sidita Halluni.
Vizita pati dhe te Biblioteka Françeskane dhe Jezuitët e Shkodrës, ku u dhuruan po ashtu libra.
Një ndalesë tjetër qe në “Radio Jehona”, nga drejtuesit e së cilës u kërkua ndihmë për rinovimin e aparaturës së këtij kanali radiofonik. Drejtuesi i Fondacionit “ALSAR” shprehu gatishmërinë për të ndihmuar në këtë aspekt.